ᐃᓄᐃᑦ ᐅᐱᒋᔭᖃᕆᐊᖅᑐᓚᐅᖅᐳᑦ ᐃᖅᑲᐅᒪᔭᖃᖅᖢᑎᒃ ᐅᓇᑕᕐᔪᐊᓚᐅᖅᓯᒪᔪᓂᒃ ᐃᓱᒪᖅᓱᖅᑎᑦᓯᓕᕐᒪᑕ ᑲᓇᑕᒥ ᐅᐸᑕᐅᖃᓚᐅᖅᐳᑦ ᑕᒪᒃᑯᐊ ᑭᕙᓪᓕᕐᒥᐅᑦ ᐱᓇᓱᐊᕈᓯᐅᓚᐅᖅᑐᒥ.
ᐊᒥᓲᓂᖃᖅᖢᑎᒃ ᐅᖓᑖᓄᑦ 400 ᐃᓕᓐᓂᐊᖅᑎᑦ, ᐃᓕᓐᓂᐊᖅᑎᑎᔨᑦ ᓄᓇᓕᖕᓂᒥᐅᓪᓗ ᐃᖃᐃᓕᓴᕐᕕᖓᓄᐊᓚᐅᖅᐳᑦ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᓇᐅᔮᓂ ᐅᓇᑕᕐᔪᐊᓚᐅᖅᓯᒪᔪᓂᒃ ᐃᖅᑲᐅᒪᔭᖃᖅᖢᑎᒃ ᓄᕕᐱᕆ 10−ᒥ.
ᓇᐅᔮᒥᐅᑦ ᐅᓇᑕᕐᔪᐊᓚᐅᖅᓯᒪᔪᓂᒃ ᐃᖅᑲᐅᒪᖃᑦᑕᕋᓗᐊᖅᐳᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᑦ ᐃᓚᐅᑎᑕᐅᓪᓗᑎᒃ ᖃᓄᐃᓕᐅᖅᑎᑕᐅᓪᓗᑎᒡᓗ.
ᐅᓇᑕᖅᑐᒃᓴᖑᐊᓛᑦ 3055 RCACC ᑲᒪᔨᖓᑦ ᑳᑉᑎᓐ ᓗᐃᑦ ᕗᕋᐃᓐᓯᔅ ᐅᖃᓚᐅᖅᐳᖅ ᐊᒥᓱᒻᒪᕆᐊᓘᓚᐅᕐᒪᑕ ᐃᓄᐃᑦ ᓇᐅᔮᓂ ᐃᖅᑲᐅᒪᔭᖃᖅᑎᓪᓗᒋᑦ.
“ᓂᐱᖃᖏᑦᓯᐊᓚᐅᖅᐳᖅ ᑕᐃᑲᓂ ᑐᒃᓯᐊᖅᑎᓪᓗᒋᑦ ᐃᖅᑲᐅᒪᔭᖃᖅᖢᑎᒃ ᐅᓇᑕᕐᔪᐊᓚᐅᖅᓯᒪᔪᓂᒃ,” ᐅᖃᓚᐅᖅᐳᖅ ᕗᕋᐃᓐᓯᔅ.
“ᐅᓪᓗᖃᑦᓯᐊᕐᓂᐊᖅᐳᑦ ᐅᓇᑕᖅᑐᒃᓴᖑᐊᓛᑦ ᐊᒻᒪ, ᐊᕐᕌᒍᒥᓗ, 33−ᓂᒃ ᐅᓇᑕᖅᑐᒃᓴᖑᐊᓛᖅᑕᖃᓕᖅᐳᖅ ᐅᓇᑕᖅᑐᒃᓴᐅᔭᖃᑕᐅᓂᐊᖅᑐᓂᒃ.
“ᖁᓪᓕᖅ ᐃᑭᑕᐅᓚᐅᖅᐳᖅ ᐊᕐᕌᒍᒥ ᖃᓄᐃᓕᐅᕈᑎᖃᕐᓂᐊᖅᑎᓪᓗᑕ, ᐃᓐᓇᑐᖃᖅ ᐊᓚᓯ ᓇᓄᕋᒃ, ᖁᓪᓕᓕᕆᓂᐊᖅᖢᓂ.”
ᕗᕋᐃᓐᓯᔅ ᐅᖃᓚᐅᖅᐳᖅ ᓇᐅᔮᓂ ᐅᓇᑕᖅᑐᒃᓴᖑᐊᓛᑦ ᐅᓇᑕᖅᑐᒃᓴᐅᔭᖅᑐᑦ ᐃᓕᐅᖃᐃᓚᐅᖅᐳᑦ ᐊᐅᐸᓗᒃᑐᓂᒃ ᐱᕈᖅᓯᒪᔪᓂᒃ ᐊᓪᓕᕋᐅᔭᒧᑦ ᖁᓪᓕᖅᑕᖃᖅᑐᒧᑦ ᐅᕙᓘᓐᓃᑦ ᐊᖏᔪᒥᒃ ᐊᖕᒪᓗᖅᑐᒥᒃ ᐱᕈᖅᓯᒪᔪᓂᒃ ᐃᓕᓯᑉᓗᑎᒃ ᐊᓂᕙᓪᓕᐊᑉᓗᑎᒃ.
ᐅᖃᓚᐅᖅᐳᖅ ᑕᐃᒪᓐᓇ ᐊᔾᔨᒋᑲᓴᓚᐅᖅᐸᖓ ᖃᓄᐃᓕᐅᕈᑕᐅᓚᐅᖅᑐᑦ ᑲᓇᑕᒥ ᐃᖅᑲᐅᒪᓐᓇᐅᔪᖃᕐᕕᖕᒥ ᐊᕐᕌᒍᑕᒫᑦ ᐊᑐᖅᑕᐅᖃᑦᑕᖅᑐᑉ.
“ᐃᒻᒪᖄ 50 ᐅᕙᓘᓐᓃᑦ 60 ᓄᓇᓕᖕᓂᒥᐅᑦ ᐃᓚᐅᖃᑕᐅᓚᐅᖅᐳᑦ ᖃᓄᐃᓕᐅᖃᑕᐅᓪᓗᑎᒃ ᐊᕐᕌᒍᒥ, ᑕᒪᓐᓇ ᖁᕕᐊᓇᓚᐅᖅᐳᖅ ᑕᑯᓪᓗᒍ,” ᐅᖃᓚᐅᖅᐳᖅ.
“ᐱᕈᖅᓯᐊᖑᐊᓂᒃ ᐃᓕᓯᔪᖃᓚᐅᖅᐳᑦ ᐳᑭᖅᑕᓕᓂᑦ ᐊᒻᒪ ᑲᓇᑕᒥ ᐅᓇᑕᖅᑐᒃᓴᓂᒃ ᒥᐊᓂᖅᓯᔨᓂᒃ ᓇᐅᔮᓂ.
“ᑕᐃᒪ ᕇᔾᔪᒃᑯᑦ ᐃᓚᐅᑎᑕᐅᖁᓚᐅᖅᐸᕗᑦ ᐅᓇᑕᖅᑐᒃᓴᐅᔭᖃᑕᐅᓗᑎᒃ ᐅᓇᑕᖅᑐᒃᓴᖑᐊᓛᓪᓗ 2018-ᖑᓕᖅᐸᑦ.”
ᑎᐅᕆᓐ ᓂᑯ ᐃᓚᒋᔭᐅᖃᑕᐅᓯᒪᓕᖅᐳᖅ ᐊᐅᓚᑦᓯᔨᖏᓐᓄᑦ ᓖᔾᔭᓕᕆᔨᒃᑯᑦ ᑲᖏᖅᖠᓂᕐᒥ ᐅᑭᐅᓄᑦ ᐊᕙᑎᐅᓕᖅᑐᓄᑦ.
ᓂᑯ ᐅᖃᓚᐅᖅᐳᖅ ᐅᓇᑕᕐᔪᐊᓚᐅᖅᑐᓂᒃ ᐃᖅᑲᐅᒪᔭᖃᕐᓗᓂ ᑐᒃᓯᐊᕐᓂᖅ ᐱᒻᒪᕆᐅᖃᑦᑕᕐᒪᑦ ᓄᓇᓕᖕᒥ. ᐅᖃᓚᐅᖅᖢᓂᓗ ᖃᐅᔨᒪᔭᖃᖅᖢᑎᒡᓗ ᑭᕙᓪᓕᐅᑉ ᐃᓗᐊᓂ ᐅᓇᑕᖅᑐᒃᓴᓂᒃ.
“ᐱᒻᒪᕆᐅᖕᒪᑦ ᐃᖅᑲᒪᔭᐅᒋᐊᖃᕐᒪᑕ ᐅᓇᑕᕐᔪᐊᖃᑕᐅᓚᐅᖅᓯᒪᔪᑦ ᓱᓕ ᐅᑉᓗᒥ ᐱᔨᑦᓯᕋᖅᑐᑦ, ᑕᒪᒃᑯᐊᓗ ᕇᔾᔪᒃᑯᑦ,” ᐅᖃᓚᐅᖅᐳᖅ ᓂᑯ.
“ᐃᓚᐅᑎᑕᐅᒋᐊᖃᕐᒪᑕ ᓄᓇᓕᖕᓂ ᐅᓇᑕᖅᑐᒃᓴᖑᐊᓛᑦ ᑲᖏᖅᖠᓂᕐᒥ.
“ᑲᒪᔨᖓᑦ ᑐᐊᑎ ᑐᑐ ᐊᒻᒪ ᑲᖏᖅᖠᓂᕐᒥ ᐅᓇᑕᖅᑐᒃᓴᖑᐊᓛᑦ ᐅᐱᓐᓇᑦᓯᐊᖅᐳᑦ, ᐅᓇᑕᖅᑐᒃᓴᓂᒡᓗ ᐃᓇᖏᖅᓯᓯᒪᑉᓗᑎᒃ ᐅᓇᑕᕐᔪᐊᓚᐅᖅᑐᓂᒃ ᐃᖅᑲᐅᒪᓐᓇᐅᑎᓪᓗᒍ − ᐱᓕᕆᑦᓯᐊᖃᑦᑕᖅᐳᑦ.”
ᐅᐸᖃᑕᐅᔪᑦ ᐊᔾᔨᒌᖃᑦᑕᖏᑉᐳᑦ ᐊᕐᕌᒍᑕᒫᑦ ᑲᖏᖅᖠᓂᕐᒥ, ᐅᑭᐅᓂ ᒪᕐᕉᖕᓂ ᐊᒥᓲᓛᖑᓯᒪᓪᓗᑎᒃ.
ᓂᑯ ᐅᖃᓚᐅᖅᐳᖅ ᐊᔾᔨᒌᖏᑦᑐᓂᒃ ᐱᔾᔪᑎᖃᖅᖢᑎᒃ ᐅᐸᒃᑐᑦ ᐊᒥᓲᓂᖏᑦ ᐊᔾᔨᒌᖃᑦᑕᖏᑉᐳᑦ ᑭᓯᐊᓂ, ᑕᐃᑉᓱᒪᓂᑐᖃᖅ, ᑲᖏᖅᖠᓂᕐᒥᐅᑦ ᐅᐸᒃᑐᑦ ᑐᒃᓯᐊᕆᐊᖃᑕᐅᔪᑦ ᐊᒥᓲᖃᑦᑕᖅᓯᒪᕗᑦ ᒫᓂ ᐅᓗᔪᒃ ᐃᓕᓐᓂᐊᕐᕕᖓᓂ.
“ᐊᒥᓱᒻᒪᕆᐅᓂᐊᖅᑐᒃᓴᐅᕗᑦ ᐃᓚᐅᔪᑦ 150 ᐅᑭᐅᖃᓕᖅᑎᓪᓗᒍ ᑲᓇᑕ, ᐱᒻᒪᕆᓂᐊᖅᖢᓂᓗ ᓄᓇᑉᑎᓐᓂ,” ᐅᖃᓚᐅᖅᐳᖅ.
“ᑭᓯᐊᓂ ᐊᒥᓱᑦ ᑲᖏᖅᖠᓂᕐᒥᐅᑦ ᐃᖅᑲᐅᒪᔭᖅᑐᖃᑕᐅᒐᔪᒃᐳᑦ ᐅᓇᑕᕐᔪᐊᓚᐅᖅᓯᒪᔪᓂᒃ ᑕᒪᒃᑯᓂᖓᓗ ᒫᓐᓇ ᐅᓇᑕᖅᑐᒃᓴᑉᑎᓐᓂᒃ ᐅᓇᑕᕐᔪᐊᓚᐅᖅᑐᑦ ᐃᖅᑲᐅᒪᓐᓇᐅᑎᓪᓗᒍ.”