Skip to content

ᐳᐊᕆᑎᓕᒃ ᐃᒥᖅᑕᕐᕕᕕᓂᕐᒦᑦᑐᖅ

Hᐊᒻᓚᒃᑯᑦ ᐳᐊᕆᑎᓕᖓ ᐊᒧᔭᐅᑦᑎᐊᓚᐅᖅᑐᖅ ᐃᒪᕐᒦᖅᑳᖅᑎᓪᓗᒍ ᓯᑯᒃᑯᑦ ᑲᑕᓚᐅᕐᒪᑦ ᐃᒥᖅᑕᕐᕕᕕᓂᕐᒥ ᓄᕕᐱᕆ 15-ᒥ.

The hamlet's CAT bulldozer sits in the water after crashing through the ice on Williamson Lake in Rankin Inlet on Nov. 15, 2018. Darrell Greer/NNSL photo
The hamlet's CAT bulldozer sits in the water after crashing through the ice on Williamson Lake in Rankin Inlet on Nov. 15, 2018. Darrell Greer/NNSL photo

ᐳᐊᕆᑎᓕᐅᑉ ᐊᑖᖓ ᐃᒪᕐᒦᓚᐅᕐᒪᑦ ᑕᓯᕐᒥ ᑕᓪᓕᒪᑦ ᐃᑲᕐᕋᑦ ᓇᑉᐸᖓᓂᓗ ᐊᒧᔭᐅᖅᑳᕐᓇᓂ.
Hᐊᒻᓚᒃᑯᑦ ᑎᑎᕋᕐᕕᖕᒥ ᐊᖓᔪᖅᑳᖓ ᔭᔅᑕᓐ ᒥᐅᕆᑦ ᑲᑎᒪᔪᓃᓚᐅᖅᑐᕉᖅ Hᐊᒻᓚᒃᑯᑦ ᓴᓇᔨᖓ ᐊᑐᐊᑦᔪᐊᖅ ᐊᒃᓴᕐᓂᖅ ᐃᖕᒥᓂᒃ ᑐᓴᖅᑎᑦᑎᖕᒪᑦ ᐱᕐᕈᓗᐊᕿᔪᖃᕐᓂᖓᓄᑦ 9:30-ᒥ ᐅᑉᓛᒃᑯᑦ.
ᐅᖃᖅᖢᓂ ᒥᑦᑕᕐᕕᖕᒥᐅᑕᒡᒎᖅ ᐊᑐᖅᑐᐊᓚᐅᕐᒪᑕ ᐳᐊᕐᕆᑎᓕᖕᒥᒃ Hᐊᒻᓚᒃᑯᓐᓂᒃ ᐱᕐᕈᓗᐊᕿᓂᖃᖅᑐᖃᖅᑎᓪᓗᒍ. “ᓱᓇᒥᑭᐊᖅ ᐱᔾᔪᑎᖃᖅᖢᓂ ᐊᖁᑦᑐᖅ, ᒧᓯᓯ ᒥᓯᕌᓛᖅ ᐃᒥᖅᑕᕐᕕᕕᓂᒃᑰᓕᕐᓂᕐᒥᖕᒪᑦ,” ᑕᐃᒪᓐᓇ ᐅᖃᖅᖢᓂ ᒥᐅᕆᑦ.
ᐋᓐᓂᖅᑐᖃᓚᐅᙱᑦᑐᖅ ᐊᒻᒪᓗ ᐊᒧᔭᐅᔪᓐᓇᖅᓯᓚᐅᖅᑐᖅ ᐊᓯᖏᑦ ᑲᒻᐸᓂᐅᔪᑦ ᑲᖏᖅᖠᓂᕐᒥ ᐃᑲᔪᖅᑎᒋᑉᓗᒋᑦ ᓲᕐᓗ ᐃᓄᒃᓱᒃ ᐃᒡᓗᕐᔪᐊᓕᐅᖅᑎᒃᑯᑦ ᐊᒻᒪᓗ M&T-ᑯᑦ.
“ᐅᔾᔨᖅᑐᑦᑎᐊᕆᐊᖃᕐᓇᖅᑐᖅ ᑕᐃᒪᐃᑦᑐᒥᒃ ᐊᒧᓯᓇᓱᒃᖢᓂ,” ᑕᐃᒪᓐᓇ ᐅᖃᖅᖢᓂ.
ᒥᐅᕆᑦ ᐅᖃᖅᖢᓂ ᖃᐅᔨᒪᓚᐅᖅᑐᕉᖅ ᑕᐃᑉᑯᐊ ᐊᒧᓯᓇᓱᒃᑐᑦ ᐊᒧᓯᑦᑎᐊᕐᓂᐊᕐᓂᖏᓐᓂᒃ.
“ᐊᖁᑎᐅᔫᑉ ᑐᓴᖅᑎᑦᑎᔾᔪᑎᖓ ᖃᐃᑕᐅᑲᐅᑎᒋᓚᐅᖅᑐᖅ ᐊᒻᒪᓗ ᐳᑭᖅᑕᓕᓕᐊᓕᓚᐅᖅᖢᑕ ᓇᓪᓕᐅᒃᑯᒫᓕᕆᔨᒃᑯᓐᓄᓪᓗ ᐊᔾᔨᓂᒃ ᓇᒃᓴᖅᖢᑕ,” ᑕᐃᒪᓐᓇ ᐅᖃᖅᖢᓂ. “ᑕᐃᒪᓕ ᐅᑕᖅᑭᓕᖅᑐᒍᑦ ᖃᐅᔨᓴᕈᑕᐅᔪᓂᒃ ᐊᒻᒪᓗ ᓇᓗᓇᕈᓐᓃᕐᓂᐊᖅᑐᖅ ᖃᓄᐃᓕᔭᐅᓂᐊᕐᒪᖔᑕ.”
ᒥᐅᕆᑦ ᐅᖃᖅᖢᓂ ᐊᖁᖃᑦᑕᖅᑐᒡᒎᖅ ᓄᓇᒃᑰᕈᑎᕐᔪᐊᓂᒃ ᐃᒥᖅᑕᕐᕕᕕᓂᕐᒧᕈᔾᔨᔪᓐᓇᙱᑦᑐᑦ ᑭᓯᐊᓂ ᔭᓄᐊᕆᐅᓕᕌᖓᑦ ᐅᕝᕙᓘᓐᓃᑦ ᕕᕗᐊᕆᒥ ᓯᑯᖓ ᐃᑉᔪᓂᖅᐹᖑᓕᖅᑎᓪᓗᒍ.
“ᐅᖃᖃᑎᒋᓚᐅᖅᑕᕋ ᐊᖁᓚᐅᖅᑐᖅ ᐊᒻᒪᓗ ᓈᒻᒪᒃᖢᓂ. ᐊᒃᓱᓪᓘᓐᓃᑦ ᐃᒪᕐᒨᕐᒪᑦ ᐳᐊᕐᕆᑎᓕᒃ ᐃᒡᓗᑕᕐᒥ ᐃᒃᓯᕙᓚᐅᕐᒪᑦ ᐃᒪᕐᒨᑎᓐᓂᖅᓴᐅᔪᒥ,” ᑕᐃᒪᓐᓇ ᐅᖃᖅᖢᓂ. “ᑕᒻᒪᓚᐅᕐᒪᑦ. ᑕᐃᒪᓐᓇ ᑐᑭᓯᓇᑐᐃᓐᓇᖅᑐᖅ.”
ᐊᓐᑐᕈ ᑯᐃᑭᓐᐳᔅ, Hᐊᒻᓚᒃᑯᑦ ᐃᑯᒪᓕᕆᔨᖓ, ᖃᐅᔨᒋᐊᕐᕕᐅᔪᓐᓇᓚᐅᙱᑦᑐᖅ ᓄᓕᐊᖓ ᐃᕐᓂᓵᓚᐅᕐᒪᑦ ᑕᐃᒪᐃᒻᒪᑦ ᒥᐅᕆᑦ ᐳᐊᕆᑎᓕᖕᒥ ᓄᓇᒃᑰᕈᑕᐅᓯᕝᕕᖕᒨᖅᑕᐅᑎᑦᑎᓕᓚᐅᖅᑐᖅ ᐅᖁᖅᓴᖅᓯᒪᔪᒧᑦ ᐊᐅᒃᓯᕈᓐᓇᖁᑉᓗᒍ.
“ᑯᐃᑭᓐᐳᔅ ᑕᑯᒋᐊᕈᓐᓇᕈᒫᖅᑕᖓ ᐅᑎᖅᓯᒪᓕᖅᐸᑦ, ᑭᓯᐊᓂ ᐃᓱᒪᔪᖅ ᐊᑐᒃᑲᓐᓂᕈᓐᓇᖅᓯᓂᐊᕐᓂᖓᓄᑦ ᐊᒻᒪᓗ ᐃᑯᒪᖓᒎᖅ ᖃᓄᐃᙱᑦᑐᓐᓇᖅᑐᖅ ᐃᒪᑦᑎᐊᕙᐅᖕᒪᑦ ᐃᒥᖅᑕᕐᕕᕕᓂᐅᑉ ᐃᒪᖓ, ᑕᕆᐅᖑᙱᒻᒪᑦ.
“ᐳᐊᕆᑎᓕᖓ ᐅᕕᖓᕐᓚᒃᑐᖅ, ᑭᓯᐊᓂ ᐅᑕᖅᑭᔭᕆᐊᖃᖅᑐᒍᑦ ᐊᓐᑐᕈᒥᒃ ᖃᐅᔨᓴᕈᒫᕐᒪᒍ ᐅᑎᖅᐸᑦ ᖃᓄᐃᓪᓚᑦᑖᕐᒪᖔᑦ, ᑭᓯᐊᓂ ᐊᒃᓱᓪᓘᓐᓃᑦ ᐊᒧᔭᐅᓯᒪᓕᕐᒪᑦ ᐊᒻᒪᓗ ᐋᓐᓂᖅᑐᖃᙱᖦᖢᓂ.”