ᐸᐅᒃᑑᑎᑦ ᐃᓄᐃᑦ ᐊᕐᓇᓂ ᑲᓇᑕᒥ ᐊᔭᐅᕆᓯᒪᕗᑦ ᓄᓇᕗᒻᒥᐅᓂ ᐱᓂᖏᓐᓂ ᓄᕙᒡᔪᐊᕐᓇᖅ-19–ᒧᑦ ᐋᓐᓂᐊᓕᕇᒃᑯᑎᒥ, ᐊᒻᒪᓗ ᐅᖃᐅᓯᒃᓴᒥ ᑐᓴᖅᑎᑕᐅᑎᓪᓗᒍ ᒪᒃᑯᒃᑐᓄᑦ, ᑲᑐᔾᔨᖃᑎᒌᖑᔪᑦ ᐱᓕᕆᑎᑦᑎᓯᒪᕗᑦ ᐃᓅᖃᑎᒌᖕᒥ ᓯᐊᒻᒪᖅᑎᑦᑎᓂᕐᒧᑦ ᐊᔭᐅᕆᔨᐅᔪᒥ.
ᐋᓂ ᐳᓴᒥ ᐃᖃᓗᖕᓂᕐᒥᐅᑕᖅ, ᐸᐅᒃᑑᑎᒃᑯᑦ ᐊᑦᑎᓚᐅᖅᑕᖓᓂ ᒪᒃᑯᒃᑐᒥ ᐃᓄᖕᒥ ᐊᕐᓇᐅᔪᒥ ᐊᕐᕌᒍᒥ ᓵᓚᖃᐅᓯᐊᒃᓴᒥ ᓵᓚᖃᖅᑎᐅᓂᖓᓂ ᕕᕈᐊᕆᒥ, ᓴᖅᑭᔮᖅᐳᖅ ᓄᑖᒥᒃ–ᓴᖅᑭᑕᐅᓵᖅᑐᒥ ᑕᕐᕆᔭᓕᐊᖑᔪᒥ ᐅᖃᖅᑐᒥ ᐋᓐᓂᐊᓕᕇᒃᑯᑎᒥ ᐱᓂᐊᕐᓂᖓᓂ ᐃᒻᒥᓄᑦ ᐊᑐᐃᓐᓇᐅᓕᑐᐊᖅᐸᑦ.
"ᐅᒃᐱᕈᓱᒃᐳᖓ (ᐋᓐᓂᐊᓕᕇᒃᑯᑎ) ᐃᑲᔪᕐᔪᐊᕐᓂᐊᕐᓂᖓᓂ ᓴᐳᔾᔨᓯᒪᓂᕐᒧᑦ ᓄᓇᓕᑦᑎᓐᓂ, ᐃᓄᑐᖃᖅᐳᑦ ᐊᒻᒪᓗ ᐅᕙᑦᑎᓐᓂ," ᐳᓴᒥ ᐅᖃᖅᐳᖅ 41-ᓴᑲᓐᒥ ᑕᕐᕆᔭᓕᐊᖑᔪᒥ. "ᑲᑉᐱᐊᓇᕋᓗᐊᖅᑎᓪᓗᒍ ᒫᓐᓇᐅᔪᒥ, ᐅᒃᐱᕈᓱᒃᐳᖓ ᑲᑎᙵᖃᑎᒌᒃᑯᑦᑕ, ᖃᓄᐃᔾᔮᙱᑦᑐᒍᑦ."
ᐸᐅᒃᑑᑎᑦ ᑐᓴᒐᒃᓴᓕᐅᓚᐅᖅᐳᑦ ᖃᔅᓯᒐᓚᖕᓂ ᒐᕙᒪᑐᖃᒃᑯᓐᓂ ᒥᓂᔅᑕᐅᔪᓂ ᐊᒻᒪ ᑲᓇᑕᒥ ᓯᐊᒻᒪᖅᑎᑦᑎᔨᐅᔪᓂ ᒫᔾᔨ 17–ᒥ ᖁᕝᕙᖅᓴᐃᓂᕐᒧᑦ ᐃᖏᕐᕋᐃᓐᓇᖅᑐᒥ "ᓄᓇᓕᓐᓄᑦ" ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᑦᑕᓇᔾᔭᐃᖅᓯᓯᒪᓂᕐᒥ ᐊᒻᒪᓗ ᑲᐱᔭᐅᓂᐅᔪᒥ ᐱᓕᕆᓂᐅᔪᒥ, ᐃᓚᖃᓚᐅᖅᑐᒥ ᑐᓐᓂᖅᓴᐃᓂᐅᔪᒥ 5,000–ᓂ ᒪᑐᐊᕐᓂ ᖄᖏᖅᓯᒪᓕᖅᑐᓄᑦ ᖃᔅᓯᐊᕐᔪᖕᓄᑦ ᑕᖅᑭᓄᑦ.
ᕇᐱᑲ ᑲᓪᓗ, ᑲᑐᔾᔨᖃᑎᒌᖑᔪᑦ ᐊᖓᔪᖅᑳᖓ, ᐅᖃᓚᐅᖅᐳᖅ ᐱᓯᒪᓂᖓᓂ ᑕᒪᒃᑭᓂ ᑲᐱᔭᐅᓂᐅᔪᓂ ᒪᑑᕐᓇ ᐋᓐᓂᐊᓕᕇᒃᑯᑎᒥ, ᑕᐃᒪᓐᓇᑎᑐᑦ ᐊᒥᓱᓂ ᓄᓇᖃᖅᑎᐅᔪᓂ ᓄᓇᓕᖓᓂ ᖃᒪᓂᑦᑐᐊᕐᒥ. ᑕᐃᒃᑯᐊ ᐅᑭᐅᓖᑦ 18–ᓂ ᐊᒻᒪ ᐅᖓᑖᓄᑦ ᐱᔪᓐᓇᕋᔭᖅᐳᑦ ᑲᐱᔭᐅᓂᖏᓐᓂ, ᑭᓯᐊᓂ ᓯᕗᓪᓕᐅᔾᔭᐅᖁᔭᐅᔪᓂ ᑲᑎᙵᓂᐅᔪᓂ, ᐃᓚᖃᖅᑐᒥ ᐃᓄᑐᖃᕐᓂ, ᓯᕗᓪᓕᐅᓚᐅᖅᐳᑦ ᑲᐱᔭᐅᓂᕐᒧᑦ.
"ᐊᒥᓱᑦ ᒪᒃᑯᒃᑐᑦ ᐃᓱᒪᕗᑦ ᐊᒃᑐᖅᑕᐅᔪᓐᓇᙱᓐᓂᖏᓐᓂ, ᑭᓯᐊᓂ ᖃᓂᒻᒪᓗᐊᕋᔭᙱᓐᓂᕋᖅᖢᑎᒃ ᓄᕙᒡᔪᐊᕐᓇᖅ-19–ᑖᕋᓗᐊᕈᑎᒃ," ᑲᓪᓗ ᐅᖃᓚᐅᖅᐳᖅ. "ᑕᐃᒪᙵᓂ ᐃᓄᐃᑦ ᒪᒃᑯᒃᑐᑦ ᐱᔪᓐᓇᓛᕐᒪᑕ ᓄᕙᒡᔪᐊᕐᓇᖅ-19 ᐋᓐᓂᐊᓕᕇᒃᑯᑎᒥ, ᐸᐅᒃᑑᑎᑦ ᐃᒃᐱᒍᓱᓚᐅᖅᐳᑦ ᐱᒻᒪᕆᐅᓂᖓᓂ ᐃᓚᐅᑎᑦᑎᓂᕐᒥ ᒪᒃᑯᒃᑐᓂ ᐊᕐᓇᓂ ᐊᔾᔪᒥᒋᔭᕐᒥ, ᓲᕐᓗ ᐋᓂ ᐳᓴᒥᒥ, ᐅᖃᓪᓚᖃᑎᖃᕈᓐᓇᖅᑐᒥ ᒪᒃᑯᒃᑑᖃᑎᖏᓐᓄᑦ ᐊᒻᒪ ᐃᒻᒪᖄ ᒪᒃᑯᒃᑐᓄᑦ ᑲᓇᑕᓕᒫᒥᑦᑕᐅᖅ, ᑭᓇᑐᐃᓐᓇᑦᑎᐊᖅ ᐊᑦᑕᓇᖅᑐᒦᒃᑲᑦᑕ ᑭᓯᐊᓂ ᑕᒪᑦᑕ ᐊᑦᑕᓇᖅᑐᒥᑦᑐᓐᓃᕈᑦᑕ."
ᑕᑯᒃᓴᐅᑎᑦᑎᓂᖃᖅᑎᓪᓗᒍ, ᑲᓪᓗ ᓇᑉᐸᖅᑕᒥ ᐃᑭᑦᑎᓚᐅᖅᐳᖅ ᐊᒻᒪᓗ ᓂᐱᖃᙱᑎᑦᑎᓚᐅᑲᒃᖢᓂ ᐃᖅᑲᐅᒪᓂᕐᒧᑦ ᓴᓂᑭᓗᐊᕐᒥᐅᑕᒧᑦ ᓯᓚᑎᒃ ᖃᕝᕕᖕᒧᑦ, 35-ᓂ-ᐅᑭᐅᓕᒃ ᐊᓈᓇᐅᔪᖅ ᑕᓪᓕᒪᓂ, ᐃᓅᔪᓐᓃᓚᐅᖅᑐᒥ ᐅᐃᓂᐱᐊᒡᒥ ᔭᓄᐊᕆ 3–ᒥ ᐱᓚᐅᖅᑎᓪᓗᒍ ᓄᕙᒡᔪᐊᕐᓇᖅ-19–ᒥ.
"ᓇᓗᓇᐃᖅᓯᕙᕗᑦ ᐊᒻᒪᓗ ᐊᑐᐃᓐᓇᖃᖅᑎᑦᑎᕗᒍᑦ ᓴᙱᓂᐅᔪᒥ ᐃᓚᖏᓐᓄᑦ," ᐅᖃᓚᐅᖅᐳᖅ.
ᓘᒃᑖᖅ ᐊᕙᓐ,ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᖓᑕ ᑐᒡᓕᐊ ᐊᓪᓚᓄᑦ ᐊᒻᒪᓗ ᐃᓄᖕᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐊᖓᔪᖅᑳᖃᕐᕕᖓᓂ ᐋᑐᕚᒥ, ᐅᖃᓚᐅᖅᐳᖅ ᐅᒃᐱᕈᓱᙱᓐᓂᖃᕐᓂᖓᓂ ᐊᒻᒪᓗ ᐱᔪᒪᓗᐊᙱᓐᓂᐅᔪᒥ ᑲᐱᔭᐅᓂᕐᒧᑦ ᐃᓚᖏᓐᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐱᔾᔪᑎᖃᖅᑐᒥ ᐃᓛᓐᓂᒃᑯᑦ "ᐱᐅᓂᖅᐹᒥ ᐱᓕᕆᓂᖃᙱᓐᓂᖏᓐᓂ ᖃᐅᔨᓴᐃᓂᐅᔪᒥ ᐅᕝᕙᓘᓐᓃᑦ ᐃᓅᓕᓴᖅᑕᐅᓂᐅᔪᒥ ᐱᓕᕆᔾᔪᓯᐅᔪᒥ, ᐊᒃᓱᕈᕈᑎᖃᖅᓯᒪᓪᓗᑎᒃ, ᐋᓐᓂᕐᓇᖅᑐᒥ ᐊᑐᕐᓂᖃᖅᖢᑎᒃ ᖃᖓᒃᑲᓐᓂᐅᔪᒥ."
ᑭᓯᐊᓂ, ᑎᒃᑯᐊᕆᓚᐅᖅᐳᖅ ᐃᑲᔪᖅᓱᐃᓂᐅᔪᒥ ᐃᓅᓕᓴᖅᑕᐅᓂᕐᒧᑦ ᐃᖅᑲᓇᐃᔭᖅᑎᐅᔪᓂ ᑐᕌᖅᑎᑦᑎᓯᒪᒋᕗᖅ ᐊᒥᓱᓄᑦ ᐱᐅᔪᓂ ᖃᓄᐃᓕᖓᓂᐅᔪᓄᑦ ᐊᒥᓱᓄᑦ ᐃᓅᓯᕆᔭᐅᔪᓄᑦ.
ᓴᓂᐊᒍᑦ ᐊᒃᑐᐃᓂᐅᔪᓂ ᐱᔾᔪᑎᖃᖅᑐᒥ ᐋᓐᓂᐊᓕᕇᒃᑯᑎᒥ ᖃᔅᓯᐊᕐᔪᑐᐃᓐᓇᐅᓯᒪᕗᑦ ᐊᒻᒪᓗ ᒥᑭᐸᓗᒃᖢᑎᒃ, ᐅᖃᓚᐅᖅᐳᖅ ᐋᑕᒻᔅ, ᐃᓚᒋᐊᖅᓯᓚᐅᖅᑐᒥ ᐃᓅᓕᓴᐃᓂᐅᔪᒥ ᓄᓇᓕᐅᔪᖅ ᑭᐅᔪᒪᑦᑎᐊᖅᐳᑦ ᐃᓄᓕᒫᓄᑦ ᐊᐱᖅᑯᑎᒋᔭᖏᓐᓂ ᐋᓐᓂᐊᓕᕇᒃᑯᑎᒥ.
"ᓇᓗᓇᐃᖅᓯᔪᒪᕗᖓ ᑭᒃᑯᓕᒫᓄᑦ ᐊᑦᑕᓇᔾᔭᐃᖅᓯᓯᒪᓂᕐᒧᑦ ᓇᐅᑦᑎᖅᓱᖅᑕᐅᓂᖓᓂ ᐆᒪᙵᑦ ᐱᓗᐊᖅᑐᒥ ᐋᓐᓂᐊᓕᕇᒃᑯᑎᒥ ᓄᓇᕐᔪᐊᓕᒫᒥ ᐊᑐᖅᑕᐅᓚᐅᖅᓯᒪᙱᑦᑐᒥ ᓄᓇᕐᔪᐊᓕᒫᒥ," ᐅᖃᓚᐅᖅᐳᖅ. "ᐃᓱᒪᕗᖓ ᐱᓪᓚᕆᐅᔪᒥ ᖃᐅᔨᓴᖅᑕᐅᓂᖓᓂ ᐅᕙᑦᑎᓐᓄᑦ … ᐱᐅᔪᒻᒪᕆᐊᓘᕗᖅ."
ᐳᓴᒥ 12,000 ᖃᓂᒋᔭᖓᓂ ᒪᓕᒃᑎᖃᖅᑐᒥ TikTok–ᑯᑦ, ᐅᖃᓚᐅᖅᐳᖅ ᐅᐱᒍᓱᒃᐳᖅ ᐃᓚᒋᔭᐅᓂᖓᓂ ᐋᓐᓂᐊᓕᕇᒃᑯᑎᒥ ᖁᕝᕙᖅᓴᐃᓂᕐᒧᑦ ᐱᓕᕆᓂᐅᔪᒥ.
"ᐊᔭᐅᕆᔪᒪᓗᐊᖅᐳᖓ ᐃᓄᖕᓂ ᒪᒃᑯᒃᑐᓂ ᐱᓂᖏᓐᓂ ᐋᓐᓂᐊᓕᕇᒃᑯᑎᒥ ᐊᒻᒪᓗ ᐅᐱᒍᓱᒡᓗᑎᒃ ᐱᓕᕆᖃᑕᐅᓂᑦᑎᓐᓂ ᑭᒃᑯᓕᒫᓂ ᐃᑲᔪᕐᓂᕐᒧᑦ ᐊᓂᒎᑎᓂᕐᒥᒃ ᐊᒥᓱᓄᑦ ᖃᓂᒻᒪᓐᓇᐅᔪᒥ," ᐅᖃᓚᐅᖅᐳᖅ.