ᐅᓪᓗᓂᒃ 8-ᓂᒃ ᐃᓄᑑᓪᓗᓂ ᓄᓇᒦᓚᐅᖅᑎᓪᓗᒍ, ᐊᓯᐅᓯᒪᓪᓗᓂ ᐃᒡᓗᓕᖕᒥᐅᖅ ᐊᖑᓇᓱᒃᑎ ᐸᕐᓴᖅᑕᐅᒋᐊᖃᓕᓚᐅᒪᑦ ᑲᓇᑕᒥ ᐅᓇᑕᖅᑐᒃᓴᐃᑦ ᖃᖓᑕᓲᖅᑎᖏᓐᓄᑦ.
ᐅᓪᓗᓂᒃ 8-ᓂᒃ ᐊᓯᐅᓯᒪᓪᓗᓂ ᓄᓇᒥ ᑕᒪᑐᒪᓂ ᑕᖅᑭᐅᕋᑖᖅᑐᒥ ᓯᑎᐱᕆᒥ ᑐᒃᑐᓯᐅᕆᐊᖅᓯᒪᓪᓗᓂ ᐸᕐᑦ ᕼᐊᓇ-ᑲᑉᐱᐊᓇᖅ ᖃᐅᔨᒪᓕᖅᑐᖅ ᓄᓇᓕᖕᒥᐅᖑᖃᑎᒥᓄᑦ ᐱᒃᑯᒥᒋᔭᐅᓂᕐᒥᓂᒃ.
ᐅᓇᑕᖅᑐᒃᓴᒃᑯᑦ ᕿᓂᖅᑎᖏᓐᓄᑦ ᐸᕐᓴᐃᔨᖏᓐᓄᓪᓗ ᐱᐅᓕᔭᐅᓚᐅᖅᖢᓂ ᑖᓐᓇ ᐃᒡᓗᓕᖕᒥᐅᖅ ᓯᕗᓪᓕᕐᒥ ᓴᓂᕋᔭᖕᒧᖓᐅᔭᐅᔪᕕᓂᑦ ᓯᑎᐱᕆ 22-ᒥ.
“ᐊᒃᓱᐊᓗᒃ ᐃᓅᖃᑎᒃᑲ ᖁᕕᐊᓚᐅᖅᑐᑦ ᐅᕙᓐᓂᒃ ᑕᑯᒐᒥᒃ,” ᐸᕐᑦ ᕼᐊᓇ-ᑲᑉᐱᐊᓇᖅ ᐅᓂᒃᑳᓚᐅᖅᑐᖅ ᑐᓐᖓᓵᖅᑕᐅᓚᐅᕐᓂᕐᒥᓂᒃ ᐅᑎᕋᒥ ᐅᓂᒃᑳᖅᖢᓂ. “ᐅᕙᓐᓂᒃ ᐃᖅᑲᓇᕋᓱᒋᓗᐊᖅᐸᖏᓐᓇᒪᓕ. ᓄᓇᓕᑦᑎᓐᓂ ᓴᓇᖑᐊᖅᑎᑐᐃᓐᓇᐅᒐᒪ, ᐊᔾᔨᐅᖏᓗᐊᖏᓱᖓ, ᓱᓇᐅᕝᕙ ᑕᒻᒪᖅᓯᒪᔪᕕᓂᐅᔪᖓ. ᐅᑎᕋᒪ ᓴᓂᕋᔭᖕᒧᑦ ᑎᒎᑎᔭᐅᑲᑕᓕᓚᐅᖅᑐᖓ ᐃᕿᑕᐅᕙᒃᖢᖓᓗ ᓄᓇᓕᖕᒥᐅᓄᑦ. ᐊᒃᓱᐊᓗᒃ ᖁᕕᐊᓱᒧᑦ ᖁᕝᕕᐅᖅᐸᒃᖢᑎᒃ ᐃᓚᖏᑦ ᐅᕙᖓᓘᓐᓃᑦ ᕿᐊᓱᖑᓕᓚᐅᖅᑐᖓ. ᐊᒃᓱᐊᓗᒃ ᐃᒃᐱᖕᓇᓚᐅᖅᑐᖅ ᑎᑭᓐᓇᒪ ᓂᐅᕕᐅᕆᐊᖅᑕᐅᓪᓗᖓ ᑐᓐᖓᓵᕆᔪᓄᑦ.”
ᑖᓱᒪ ᐆᒃᑐᕋᖅᑕᐅᔪᑎᒋᔭᖓ ᓄᓇᒥ ᐱᒋᐊᖅᑐᕕᓂᖅ ᓯᑎᐱᕆ 13-ᒥ ᐸᕐᑦ ᕼᐊᓇ-ᑲᑉᐱᐊᓇᖅ, 69-ᓂᒃ ᐊᕐᕌᒍᓕᒃ, ᐊᐅᓚᐅᑎᓂ 150-ᓂᒃ ᓴᓐᖏᓂᓕᒃ ᐃᑭᒻᒪᒍ ᐅᒥᐊᖅᑐᓯᒋᐊᖅᖢᓂ, ᐅᓯᓪᓗᓂ ᓄᓇᒃᑰᔪᕋᓚᒥᓂᒃ ᓄᓇᑐᐃᓐᓇᒨᓲᒥᒃ (ATV)-ᒥᓂᒃ, ᐅᒥᐊᖅᑐᓯᒋᐊᖅᑐᕕᓂᖅ ᐊᖑᓇᓱᒋᐊᖅᖢᓂ ᑖᕗᖓ ᓄᓇᒧᑦ ᐃᖏᕐᕋᓂᐊᖅᖢᓂ 8-ᓂᒃ ᐃᑲᕐᕋᓂᒃ ᐃᒡᓗᓕᖕᒥᐅᑦ ᑐᒃᑐᓯᐅᕐᕕᖓᓄᑦ ᓄᓇᒥ.
ᐊᓱᐃᓛᒃ ᑎᑭᓐᓇᒥ, ᓄᓇᒃᑰᔪᓂ ATV ᓂᐅᓪᓗᓂᐅᒃ ᑕᖕᒫᖅᓴᓕᖅᑐᕕᓂᖅ. ᖃᐅᑎᓪᓗᒍ ᐅᓪᓛᒃᑯᑦ ᐸᕐᓇᓚᐅᖅᖢᓂ ᐊᐅᓪᓚᓕᖅᑐᕕᓂᖅ ᑭᓯᐊᓂᓕ ᐳᐃᒍᕐᓂᖅᖢᓂᐅᒃ GPS-ᖁᑎᓂ.
ᖁᑭᐅᑎᓂ ᓇᖕᒪᒃᖢᓂᐅᒃ, ᓂᒡᓕᓱᐃᑦᑐᓂ ᓇᒃᓴᖅᖢᓂᐅᒃ ᑕᒧᓗᒋᖅᖢᓂᓗ, ᐊᐅᓪᓚᖅᑐᕕᓂᖅ ᓄᓇᒃᑰᔫᖅᖢᓂ, ᐊᑯᓂᑲᓪᓚᒃ ᓄᓇᑐᐃᓐᓇᒧᑦ ᐃᖏᕐᕋᓪᓗᓂ ᐱᔭᕆᑐᔪᒃᑰᖅᖢᓂ ᓄᓇᒃᑯᑦ ᐱᖑᖃᐅᖅᑐᒻᒪᕆᐊᓗᒃᑯᑦ, ᑐᒃᑐᓯᐊᖅᑐᕕᓂᖅ.
“ᐱᖓᓱᓂᒃ ᑐᒃᑐᐊᓪᓚᓚᐅᖅᖢᖓ, ᐱᓚᒃᑐᐊᓪᓚᓚᐅᖅᖢᒋᓪᓗ, ᐱᐊᓂᒃᓯᒪᓕᖅᖢᒋᑦ, ᐱᔭᕆᑐᔪᕈᓘᓚᐅᕐᒪᑕ ᐊᑯᓂ ᐃᓄᑑᓪᓗᖓᓗ… ᓱᓇᐅᕙ ᑖᓕᖅᑎᓪᓗᒍ,” ᐸᕐᑦ ᕼᐊᓇ-ᑲᑉᐱᐊᓇᖅ ᐃᖅᑲᐅᒪᔪᖅ. ᑕᒪᓐᓇ ᓄᓇᕐᓗᒃᑐᕈᓘᓚᐅᕐᒪᑦ ᐊᒻᒪᓗ ᐊᑦᑕᕐᓇᕈᔪᒃᖢᓂ ᐅᓐᓄᒃᑯᑦ ᐃᖏᕐᕋᕝᕕᒋᒋᐊᒃᓴᖅ. ᖃᓄᑎᒋ ᐃᒃᑮᖑᑎᒋᖕᒪᖔᑦ ᖃᐅᔨᒪᓚᐅᖏᑦᑑᖓ ᑭᓯᐊᓂᓕ ᐅᓐᓄᒃᑯᑦ ᖁᐊᖃᑦᑕᓕᖅᑎᓪᓗᒋᑦ ᐃᒪᖅᓱᐃᑦ ᓄᓇᓗ ᑕᒃᓯᒧᑦ ᖃᑯᖅᑑᓕᖅᖢᓂ, ᐅᓂᒃᑳᕆᓪᓗᓂ.
“ᐊᓱᐃᓛᒃ ᓯᓂᓕᖅᑐᕕᓂᖅ ᐅᔭᕋᓱᒃᔫᑉ ᑐᓄᐊᓂ. ᑐᒃᑐᕋᔭᒥᒃ ᕿᐱᒃᖢᖓ ᓯᓚᒥ ᓯᓂᓚᐅᖅᑐᖓ ᐃᒃᑮᕈᓘᓕᖅᑎᓪᓗᒍ,” ᐅᓂᒃᑳᕆᓪᓗᓂ ᐸᕐᑦ ᕼᐊᓇ-ᑲᑉᐱᐊᓇᖅ, ᒪᕐᕉᖕᓂ ᔭᐃᑲᒃᓯᒪᓐᓂᖅᖢᓂ, ᔩᓐᓯᓂᒃᓗ ᖃᕐᓕᒃᓯᒪᓪᓗᓂ ᓯᓚᐹᖃᖅᖢᓂ ᐊᒻᒪᓗ ᑲᒥᐊᓗᒃᓯᒪᓪᓗᓂ ᕿᑎᖓᓄᑦ ᑎᑭᓯᒪᔪᓂᒃ. ᖃᐅᑎᓪᓗᒍ ᓄᓇᒃᑰᔪᒥᓄᑦ ᐃᑭᒃᑲᓐᓂᖅᖢᓂ ᐱᖑᖕᒥᑦ ᑕᐅᓄᖓ ᓇᖅᓴᒧᑦ ᐃᖏᕐᕋᓕᖅᑐᕕᓂᖅ. ᑰᒐᓛᒥᒃ ᑕᑯᒐᒥ ᒪᓕᓕᖅᑕᕕᓂᐊ, ᑭᓯᐊᓂᓕ ᓄᓇᒃᑰᔫᖓ ATV ᒪᕐᕋᒧᑦ ᐊᔪᓕᕐᒪᑦ ᐲᕋᓱᐊᓚᐅᕋᓗᐊᖅᖢᓂᐅᒃ, ᐱᔭᕆᑐᓗᐊᕐᒪᑦ ᓄᖅᑲᓕᖅᑐᕕᓂᖅ.
ᐅᓐᓄᓗᐊᓕᕐᒪᑦ ᑕᒫᓂ ᓯᓚᒥ ᓯᓂᒃᑕᒃᑲᓐᓂᓕᖅᑐᕕᓂᕐᒃ, ᐊᓱᐃᓛᒃ ᓇᖕᒥᓂᖅ ᐱᐅᖅᓱᐊᕆᓇᓱᐊᓕᖅᑐᕕᓂᖅ ᐊᑖᑕᒥᓂᑦ ᐃᓕᓯᒪᔭᒥᓂᒃ ᐊᑐᐊᖅᓯᓪᓗᓂ ᐊᒻᒪᓗ ᑲᓇᑕᒥ ᐅᓇᓕᒃᓴᔭᓂᑦ. ᐃᒐᓕᖅᑐᕕᓂᖅ, ᕿᔪᒃᓴᔭᓂᒃ ᐊᕝᕗᓚᐅᖅᖢᓂ, ᐅᔭᕋᓂᒃᓗ ᓯᓂᒡᕕᒋᓂᐊᖅᑕᒥᓂᒃ ᒪᓂᖅᓴᒃᓴᐃᔪᕕᓂᖅ ᑐᒃᑐᐃᑦ ᒪᒥᕋᖏᓐᓂᒃ ᐊᓪᓕᕋᖃᖅᖢᓂ ᐊᒥᐊᒃᑯᖏᓐᓂᒃ ᕿᐱᒃᓯᒪᓪᓗᓂ.
ᖃᐅᒃᑲᓐᓂᖅᑎᓪᓗᒍ, ᐅᓪᓗᓂᒃ ᐱᖓᓱᓂᒃ ᑖᕙᓃᓕᖅᖢᓂ, ᐸᕐᑦ ᕼᐊᓇ-ᑲᑉᐱᐊᓇᖅ ᐊᒃᓱᕈᖅᖢᓂ ᓄᓇᒃᑰᔫᓂ ATV ᒪᕐᕋᒥᑦ ᐲᕋᓱᐊᓕᖅᑕᕕᓂᐊ ᐊᒻᒪᓗ ᐊᓱᐃᓛᒃ ᐊᒥᓱᓂᒃ ᐃᖃᕐᕋᓂᒃ ᐊᒃᓱᕈᑎᒋᒐᒥᐅᑦ ᐱᓕᕆᐊᕆᓚᐅᖅᖢᓂᐅᒃ, ᐊᐅᓪᓚᕈᓐᓇᖅᓯᔪᕕᓂᖅ, ᐅᒥᐊᕐᒥᓄᑦ ᑐᓚᒃᓯᒪᔪᒧᑦ, ᑭᓯᐊᓂᓕ ᓇᓂᔪᓐᓇᐃᓪᓕᒋᓪᓗᓂᐅᒃ ᖃᐅᔨᓕᖅᖢᓂ ᐊᓯᐅᓐᓂᕐᒥᓂᒃ.
“ᑕᒻᒪᐅᖃᓕᓚᐅᖅᑐᖓ ᑕᑕᒥᓇᖅᑐᖅ ᑕᐃᒪᐃᓱᓂ,” ᐅᖃᕆᓕᓗᓂ.
ᐊᓯᐅᓯᒪᓪᓗᓂ ᑖᖅᓯᒃᑲᓐᓂᕐᒥᖕᒪᑦ, ᐸᕐᑦ ᕼᐊᓇ-ᑲᑉᐱᐊᓇᖅ, ᐊᓱᐃᓚᒃ ᐃᒻᒥᓄᑦ ᐊᖏᓕᖅᑐᕕᓂᖅ, ᑕᖕᒫᕐᕕᓕᐅᒃᑲᓐᓂᕆᓪᓗᓂ. ᓂᕈᐊᖅᓯᓪᓗᓂ ᐅᔭᕋᓱᒡᔪᖃᖅᑐᒥᒃ ᐱᖑᖕᒥᒃ, ᑕᐃᑲᓂ ᐳᖅᑐᓂᖃᕐᒪᑦ ᐃᓗᐊᓅᕈᓐᓇᕋᒥ. ᐃᓯᕈᓐᓇᓚᐅᕋᒪ ᑖᓱᒪ ᐃᓗᐊᓄᑦ, ᐃᒡᓕᓕᐅᒃᑲᓐᓂᖅᖢᖓ ᐅᔭᕋᓂᒃ, ᐃᕕᒃᓂᒃᓗ ᒪᒥᕋᕐᓂᒃᓗ. ᐅᔭᕋᓱᔪᐃᑦ ᓈᒻᒪᑦᑎᐊᓚᐅᖅᑐᑦ ᐊᓄᕆᒧᑦ ᓴᐳᑎᒋᓪᓗᒋᑦ ᓯᓂᓚᐅᖅᑐᖓ ᓯᓚᒥ, ᐅᓂᒃᑳᕆᓪᓗᓂ. ᓂᕐᕋᓚᓪᓗᖓ ᐅᓪᓗᕆᐊᓂᒃ ᑕᐅᑐᒃᖢᖓ ᓯᓚᒥ, ᖃᓄᐃᓐᓂᐊᕆᐊᒃᓴᓐᓂᒃ ᐃᓱᒪᒃᓴᖅᓯᐅᓕᓚᐅᖅᑐᖓ, ᐃᖅᑲᐅᒪᓕᖅᖢᒋᑦ ᐃᓚᒃᑲ ᑕᒪᒃᑯᓂᖓ ᐱᒃᑯᒥᒋᓂᖅᐹᓐᓂᒃ ᐃᓅᓯᓐᓂ ᐱᒻᒪᕆᐅᑎᑕᓐᓂᒃ. “ᐃᖅᑲᐅᒪᓕᖅᖢᒋᑦ ᐃᕐᖑᑕᑯᓗᒃᑲ, ᐊᐃᑉᐸᕋᓗ, ᐸᓂᒃᑲᓗ,” ᐅᓂᒃᑳᕆᓪᓗᓂ. “ᑐᒃᓯᐅᑎᓕᓚᐅᖅᑕᒃᑲ ᑖᒃᑯᐊ ᑕᐃᓱᒧᖓ ᐊᖑᑎᒧᑦ ᕿᓚᖕᒦᑦᑐᒧᑦ.”
ᓱᓇᐅᕙᓖᒍᖅ ᐃᓚᖏᑦ ᐸᕐᑦ ᕼᐊᓇ-ᑲᑉᐱᐊᓇᐅᑉ, ᐃᒡᓗᓕᖕᒥ ᓴᓂᕋᔭᖕᒥᓗ ᕿᓂᓕᖅᑐᕕᓃᑦ ᐸᕐᒃᓴᐃᓂᐊᖅᑐᓂᒃ ᐸᕐᓇᓕᖅᑐᕕᓃᑦ ᑖᒃᑯᐊ ᐅᓇᓕᒃᓴᔭᐃᑦ ᐃᓚᖏᑦ ᕿᓂᓕᓴᐅᑎᒋᔪᕕᓃᑦ. ᒪᕐᕉᒃ ᐅᔪᕈᖏᒃ ᖃᐅᔨᒪᓐᓂᕐᒪᑕ ᓇᒧᑦ ᐅᒥᐊᓂ ᑐᓚᖕᓂᐊᓚᐅᕐᒪᒍ, ᑭᓯᐊᓂᓕ ᓇᒧᓪᓚᕆᒃ ᓯᒡᔭᒧᑦ ᑎᑭᓚᐅᕐᒪᖔᑦ ᖃᐅᔨᒪᔭᐅᖏᓱᓂ ᓱᓕ.
ᔪᐊᔨ ᖃᑦᑕᓕᒃ, ᐃᓚᐅᔪᖅ ᐃᒡᓗᓕᖕᒥ ᐅᓇᓕᒃᓴᔭᓂ ᐃᓚᐅᖃᑕᐅᓕᖅᑐᕕᓂᖅ ᕿᓂᖅᑐᓂ, ᐅᓂᒃᑳᕆᓪᓗᓂ ᐊᓱᐃᓛᒃ ᓇᓂᓯᔪᕕᓃᑦ ᓯᕗᓪᓕᖅᐹᒥᒃ ᑕᖕᒫᕐᕕᕕᓂᐊᓂᒃ ᐅᓐᓅᓕᖅᑎᓪᓗᒍ ᐃᒃᑮᕈᓘᓪᓗᓂᓗ.
“ᑭᓂᖅᖢᑕ ᑕᐅᑐᖑᐊᓕᓚᐅᖅᑕᕗᑦ ᓯᓚᒥ ᑖᕙᓃᓕᖅᖢᑕ. ᐅᕙᐳᖅ ᐊᓱᐃᓛᒃᓕ ᐃᒡᓗᕋᓛᒥ ᓯᓂᒃᑕᖅᑐᒍᑦ ᐃᒃᐱᐊᕐᔪᖕᓂᒃ ᕿᐱᖃᑦᑎᐊᖅᖢᑕ, ᐅᕙᑦᑎᓐᓄᑦ ᖃᓄᐃᓗᐊᖏᓱᓂ. ᐃᓱᒪᒋᓚᐅᖅᑕᕗᑦ ᐹᑦ ᖃᓄᐃᓕᕆᐊᖓ”, ᐅᖃᕆᓪᓗᓂ, ᐃᓚᓪᓗᓂᐅᒃ ᐊᓱᐃᓛᒃ ᕿᓂᖅᑎᓄᒎᖅ ᐅᐊᑦᑎᐊᕈᖑᖅᑎᓪᓗᒍ ᕿᓂᖅᑕᐅᓕᖅᑐᕕᓂᖅ ᓄᓇᒃᑰᔫᖓᑕ ᑐᒥᖏᑦ ᒪᓕᒃᑕᐅᓪᓗᑎᒃ ᐅᖓᓯᒃᑐᒧᑦ ᑭᓯᐊᓂᓕ ᓱᓕ ᓇᓂᓐᓂᖏᓱᓂᔪᒃ.
ᐊᖏᕐᕋᖓᓂᓗ, ᐸᕐᑦ ᕼᐊᓇ-ᑲᑉᐱᐊᓇᐅᑉ ᖃᑕᖑᑎᖏᑦ ᐱᖏᒍᓱᓕᖅᑐᕕᓃᑦ ᐊᒻᒪᓗ ᕿᓚᓇᕋᓱᐊᑐᐃᓐᓇᓕᖅᑐᕕᓃᑦ ᖃᓄᐃᖏᑦᑎᐊᖁᓪᓗᒍ.
“ᐃᓱᒪᒋᓚᐅᖅᑕᕋ ᓄᓇᒥ ᐃᓄᑑᓪᓗᓂ ᑳᓕᖅᑐᖅᓴᐅᔪᖅ, ᐃᒻᒪᖄᓗ ᕿᐅᔪᒃᓴᐅᓕᖅᑐᖅ, ᐃᒻᒪᖄᓗ ᐃᓅᔪᓐᓃᖅᑐᖃᐃᑦ,” ᐅᓂᒃᑳᓚᐅᕐᒥᔪᑦ ᓯᐅᕋᓐ ᕼᐊᓇ-ᑲᑉᐱᐊᓇᖅ, ᐸᓂᖓ. “ᑭᓯᐊᓂᓕ ᐅᕙᖓ ᖁᕕᐊᓇᕐᓂᖅᓴᒥᒃ ᐃᓱᒪᓇᓱᐊᖏᓐᓇᓚᐅᖅᑐᖓ: ᐋᒃᑲ, ᓱᓕ ᐃᓅᔪᖅ ᐅᓇᓕᒃᓴᔭᓂ ᐃᓚᐅᖃᑕᐅᖕᒪᑦ ᐊᔪᖏᑦᑐᖅ ᐃᓐᓇ. ᓂᕆᐅᒋᓪᓗᒍ ᐊᒻᒪᓗ ᖃᓄᐃᖏᑦᑎᐊᖁᓪᓗᒍ.”
ᐊᓱᐃᓛᒃ ᐅᓪᓗᖅ ᓯᑕᒪᒋᓕᖅᑕᖓᓂ, ᐸᕐᑦ ᕼᐊᓇ-ᑲᑉᐱᐊᓇᖅ ᓄᓇᒦᖢᓂ ᓄᖅᑲᖓᓇᓱᐊᓕᓚᐅᖅᑐᕕᓂᖅ, ᑕᐃᒪᓐᓇ ᐅᖃᐅᔾᔭᐅᖃᑦᑕᖅᓯᒪᒐᒥ ᐊᓯᐅᓯᒪᔪᑦ ᐱᒋᐊᖃᕐᓂᖏᓐᓂᒃ. ᐊᒻᒪᓗ ᐅᕐᓱᑭᓴᓕᖅᖢᓂ ᓄᖑᑦᑐᒪᖏᓱᓂᐅᒃ ATV-ᖓᑕ ᐅᖅᓱᐊ, ᐃᒐᒥᓄᑦ ᐃᒃᑭᓴᐅᑎᑐᐊᕆᓐᓂᕐᒪᒍ.
ᑕᐃᒪᖓᓂᑦ ᓂᕿᖃᑦᑎᐊᖏᓐᓇᖅᖢᓂ ᑐᒃᑐᓚᐅᖅᑕᒥᓂᒃ ᓂᕆᕙᒃᖢᓂ ᐆᔪᓕᐅᖅᐸᒃᖢᓂᓗ ᐃᓯᕆᓪᓗᓂᐅᒃ ᐃᒐᒥ ᖄᖑᓂ. ᖃᐅᔨᒪᓪᓗᓂ ᓂᕿᒃᓴᖃᑦᑎᐊᕐᓂᕐᒥᓂᒃ ᑕᖅᑭᓕᒫᒧᑦ ᓈᒻᒪᒃᑐᒥᒃ, ᑕᐃᒫᑎᒋ ᑕᒫᓃᓐᓂᐊᕈᓂ. ᖁᑭᖅᓯᓴᕋᐃᓐᓂᕐᒥᓄᑦ ᐊᕿᒡᒋᖃᖅᑕᓚᐅᕐᒥᔪᕉᖅ. ᑰᕋᓛᑉ ᓴᓂᑦᑎᐊᖓᓃᓐᓇᒥ ᑕᐃᒪᓐᓇ ᐃᒪᑭᒃᓴᖏᓱᓂᓗ ᓂᒡᓕᓱᐃᑦᑐᓂ ᐃᒻᒥᖃᑦᑕᖅᖢᓂᐅᒃ ᑰᖕᒥᑦ.
ᐅᓪᓗᖅ 8-ᒋᓕᖅᑕᖓᓂ ᓂᐱᖅᑯᖅᑐᔪᐊᓗᖕᒥᒃ ᑐᓵᓕᖅᑐᕕᓂᖅ ᓯᓚᒥ.
“ᑕᑯᓚᐅᖅᑐᖓ ᐊᖏᔪᐊᓗᖕᒥᒃ ᕼᐅᑭᓖᔅᒥᒃ (ᖃᖓᑕᓱᒥᒃ),” ᐅᖃᕆᓪᓗᓂ. “ᑕᒪᑐᒪᓂᓴᐅᑎᒋ ᐃᒐ ᐃᑭᒃᑲᓐᓂᓚᐅᖅᑕᕋ ᐊᒻᒪᓗ ᐊᒡᒐᒃᑲ ᐃᓴᖓᓕᖅᖢᒋᑦ ᓯᓚᒧᑦ. ᐊᓱᐃᓛᒃ ᐅᑎᒃᑲᓐᓂᕋᒥᒃ ᑕᑯᔭᐅᓚᐅᖅᑐᖓ ᕿᓂᖅᑕᐅᓂᓐᓂᒃ ᖃᐅᔨᒪᓕᖅᖢᖓ.”
ᒪᕐᕉᖕᓂᒃ ᐅᓇᑕᖅᑐᒃᓴᐃᑦ ᕿᓂᖅᑎᖏᓐᓂᒃ ᐸᖅᓴᐃᔨᖏᓐᓂᒃᓗ ᑲᑕᐅᑎᒃᑯᑦ ᑲᑕᒃᑐᖃᓚᐅᖅᑐᖅ ᖃᖓᑕᓲᒥᑦ ᑕᖕᒫᖅᓯᒪᕕᒋᔭᖓᑕ ᖃᓂᒋᔭᖓᓄᑦ.
“ᑖᕗᖓ ᐅᓪᓚᒃᓯᓚᐅᖅᑐᖓ, ᐊᒃᓱᐊᓗᒃ ᐱᐅᓕᔨᒃᑲ ᖁᔭᓕᓚᐅᖅᑕᒃᑲ ᖁᕕᐊᒋᓪᓗᒋᓪᓗ,” ᐸᕐᑦ ᕼᐊᓇ-ᑲᑉᐱᐊᓇᖅ ᐅᓂᒃᑳᓚᐅᖅᑐᖅ.
ᐊᓱᐃᓚᒃ ᑐᐱᖏᓐᓂ ᐅᓇᑕᖅᑐᒃᓴᐃᑦ ᓯᓂᒃᑕᒃᑲᓐᓂᓚᐅᖅᖢᓂ, ᖃᐅᑎᓪᓗᒍ ᖁᓕᒥᒎᓕᖕᒧᑦ ᐊᐃᔭᐅᓚᐅᖅᑐᒍᑦ ᐊᒻᒪᓗ ᓴᓂᕋᔭᖕᒧᖓᐅᔾᔭᐅᓪᓗᑕ.
ᑕᐃᑯᖓ ᑎᑭᓐᓇᑦᑕ ᐅᑕᖅᑭᔭᐅᔪᕕᓂᐅᔪᖓ ᖃᑕᖑᑎᓐᓄᑦ ᐱᖏᒍᓱᒍᓐᓃᖅᑐᓄᑦ ᐅᑎᖅᓯᒪᓕᖅᑎᓪᓗᖓ ᐃᒡᓗᓕᖕᒧᑦ, ᐸᓂᒐ ᓯᐅᕋᓐ ᑕᒪᐅᖓ ᑎᑭᓚᐅᖅᑐᖅ ᐋᑐᕚᒥᐅᑕᐅᒐᓗᐊᕐᒪᑦ ᖃᓂᒋᔭᓐᓃᒋᐊᖅᑐᖅᖢᓂ.
“ᐊᒃᓱᐊᓗᒃ ᖁᕕᐊᓱᓚᐅᖅᑐᖅ ᑕᑯᒐᒥ ᐅᕙᓐᓂᒃ. ᐃᕿᑦᑎᓪᓗᓂ ᐊᒻᒪᓗ ᕿᐊᓚᐅᑳᕐᔪᒻᒪᕆᒃᖢᓂ, ᖁᕕᐊᓱᓗᐊᒧᑦ ᖁᕝᕕᐅᓕᕆᓪᓗᖓ,” ᐅᖃᕆᓪᓗᓂ.
ᖃᖓᑐᐃᓐᓇᖅ ᐊᖑᓇᓱᒋᐊᕐᓂᐊᓕᕌᖓᒪ, ᐸᕐᑦ ᕼᐊᓇ-ᑲᑉᐱᐊᓇᖅ ᐅᖃᓚᐅᖅᑐᖅ ᐅᔾᔨᖅᓱᑦᑎᐊᕐᓂᖅᓴᐅᓂᐊᓕᖅᑐᖓ. ᓇᒃᓴᐃᓐᓇᖃᑦᑕᕐᓂᐊᓕᖅᑕᕋ GPS ᐊᒻᒪᓗ SPOT ᑖᒃᑯᐊ ᓇᓃᒋᐊᖏᓐᓄᑦ ᓇᓂᓯᔪᑕᐅᔪᓐᓇᖅᑐᑦ, ᐅᖃᕆᓪᓗᓂ.
“ᑕᒪᒃᑯᐊ ᓇᓂᓯᔪᑏᑦ ᐊᑭᑐᔪᕈᓘᖕᒪᑕ, ᑭᓯᐊᓂᓕ ᐃᓅᓯᕐᒧᑦ ᐊᑐᕐᓂᖃᖅᑐᒻᒪᕆᐅᓪᓗᑎᒃ.”
ᐃᒡᓗᓕᖕᒥᐅᑦ ᕼᐊᒪᓚᖓᓂ ᐊᕙᑎᓂᒃ SPOT-ᓂᒃ ᓂᐅᕕᖅᓯᒪᓕᖅᑐᑦ ᓄᓇᓕᖕᒥᐅᓄᑦ ᐊᑭᖃᖏᑎᓪᓗᒋᑦ ᐊᑐᖅᑐᐊᑕᐅᔪᓐᓇᖅᑐᓂᒃ. ᒫᓐᓇ 18 ᐊᑐᖅᑐᐊᖅᑕᐅᔪᑦ ᐊᕙᑎᐅᖕᒪᑕ ᐱᔭᒃᓴᐃᑦ.