Skip to content

ᐹᑦ ᕼᐋᓇᐅᑉ ᓄᓕᐊᔪᖕᒥ ᓴᖅᑭᑎᑦᑎᓚᐅᖅᐳᖅ ᑲᓇᑕᐅᑉ ᒪᓕᒐᓕᐅᕐᕕᖓᓐᓂ

ᐃᒡᓗᓕᖕᒥ ᓴᓇᙳᐊᖅᑎ ᐹᑦ ᕼᐋᓇ ᑲᑉᐱᐊᓇᖅ, ᓴᓇᒡᐅᔪᖅ ᓄᑖᖑᔪᒥᒃ ᓄᓕᐊᔪᖕᒥ ᓴᓇᙳᐊᒐᕐᔪᐊᒥᒃ 20-ᖓᓄᑦ ᓇᓪᓕᐅᓪᓂᖅᓯᐅᕐᕕᖓᓄᑦ ᓄᓇᕗᖃᕐᓂᕐᒥ, ᐱᓚᐅᖅᐳᖅ ᒪᓕᒃᑕᐅᔭᕆᐊᖃᕐᓂᐅᔪᓂ ᐋᑐᕚ ᐊᑐᐃᓐᓇᖃᖅᑎᑕᖓᓂ ᐊᐃᑉᕆᓕ 8-ᒥ.

ᐃᒡᓗᓕᖕᒥ ᓴᓇᙳᐊᖅᑎ ᐹᑦ ᕼᐋᓇ ᑲᑉᐱᐊᓇᖅ, ᓴᐅᒥᖕᒥ, ᐊᒻᒪ ᐅᖃᖅᑎ ᔨᐊᕝ ᕋᐃᒐᓐ ᓴᖅᑭᑎᑦᑎᕗᑦ ᕼᐋᓇᐅᑉ ᓄᓕᐊᔪᖕᒥ ᐱᓇᖕᓇᕐᒥ ᐃᓚᖓᓐᓂ ᑲᓇᑕᐅᑉ ᒪᓕᒐᓕᐅᕐᕕᖓᓐᓂ ᐋᑐᕚᒥ ᐊᐃᑉᕆᓕ 8-ᒥ.

ᓴᖅᑭᑎᑦᑎᓂᐅᔪᖅ ᑎᓕᔭᐅᓯᒪᓪᓗᓂ ᓴᓇᙳᐊᒐᕐᔪᐊᒥᒃ ᐱᒋᐊᓚᐅᖅᐳᖅ ᐃᓄᑐᖃᖅ ᔩᓂ ᐅᑲᓕᖅ ᑐᒃᓯᐊᕐᓂᖃᖅᖢᓂ ᐊᒻᒪ ᖁᓪᓕᕐᒥ ᐃᑭᑦᑎᓪᓗᓂ, ᑭᖑᓂᐊᒍᑦ ᐅᖃᖅᑎ ᔨᐊᕝ ᕋᐃᒐᓐ ᐅᖃᓪᓚᓚᐅᖅᐳᖅ.

"ᐃᒡᓗᕐᔪᐊᓂ ᑎᑎᕋᐅᔭᖅᑎ ᔮᓐ ᐱᐅᓯᓐ ᓴᓇᓚᐅᖅᑎᓪᓗᒍ ᑲᓇᑕᐅᑉ ᒪᓕᒐᓕᐅᖅᑎᖓᑕ ᐃᒡᓗᕐᔪᐊᖓᓂ, ᐱᓕᕆᓚᐅᖅᐳᖅ ᑕᒪᒃᑭᓂ ᑕᐃᔅᓱᒪᓂᐅᓚᐅᖅᑐᒥ ᐊᒻᒪ ᓯᕗᓂᒃᓴᒥ ᐃᓱᒪᒋᔭᖃᖅᖢᓂ. ᐅᓇ ᓄᑖᖅ ᓴᓇᓯᒪᔪᖅ ᐃᖅᑲᐃᑎᑦᑎᓂᐊᖅᐳᖅ ᐊᒻᒪ ᐅᐱᒍᓱᖕᓂᖃᕐᓗᓂ ᑲᓇᑕᐅᑉ ᐊᑐᖅᐸᓚᐅᖅᑕᖏᓐᓂ, ᑭᓯᐊᓂᑦᑕᐅᖅ ᐱᔨᑦᑎᕋᕐᓗᓂ ᓴᓇᓂᐅᔪᒥ ᓯᕗᓂᒃᓴᒥ ᐃᓄᖕᓄᑦ ᑎᑭᑉᐸᓪᓕᐊᔪᓄᑦ ᑲᓇᑕᒥᐅᑕᓂ ᕿᒪᐃᔪᓐᓇᕋᔭᕐᓂᖏᓐᓂ ᐅᖃᐅᓯᒃᓴᒥᓂᑦ ᑕᐃᔅᓱᒪᓂᐅᓚᐅᖅᑐᒥ ᐊᒻᒪ ᒫᓐᓇᐅᓕᖅᑐᒥ ᑲᓇᑕᒧᑦ ᖃᐅᒃᐸᐅᓂᐊᖅᑐᒧᑦ," ᐅᖃᓚᐅᖅᐳᖅ ᕋᐃᒋᓐ.

"ᐊᒻᒪ ᑕᐃᒫᒃ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᒡᓗᕐᔪᐊᖓ ᐅᓂᒃᑳᖅᑐᐊᕆᕙᕗᑦ ᐅᔭᕋᙳᖅᑎᑕᐅᓂᖓᓂ, ᐊᒻᒪ ᒥᔅᑕ ᕼᐋᓇ ᓄᑖᖑᓛᖑᔪᖅ ᐅᓂᒃᑳᖅᑐᐊᕆᔨᕗᑦ, ᒥᔅᑕ ᕼᐋᓇ, ᐅᖃᓚᐅᖅᓯᒪᕗᑎᑦ: 'ᑎᑎᕋᖅᑎᐅᙱᑦᑐᖓ, ᐅᔭᕋᖕᒧᐊᖅᑎᕆᔭᕆᐊᖃᖅᐳᖓ.ᕼᐊᓐᓇᓚᓕ ᐊᕐᕌᒍᓂ ᖄᖏᖅᓯᒪᓕᖅᑐᓂ, ᒥᔅᑕ ᐱᐅᓯᓐ ᑎᑎᕋᓚᐅᖅᐳᖅ: 'ᑎᑎᕋᖔᕈᒪᕙᕋ ᐅᔭᖅᑲᒧᑦ ᐸᐃᑉᐹᒨᙱᖔᖅᑐᒥ.'  ᐃᓱᒪᒋᔭᓯ ᐊᔾᔨᒌᐸᓘᖅᑰᓚᐅᖅᐳᑦ."

ᒪᓕᒃᑐᒥ ᑲᑕᔾᔭᕐᓂᕐᒥ ᒫᑕᓖ ᐅᑲᓕᕐᒧᑦ ᐊᒻᒪ ᑐᕋᐃᓯ ᓯᐊᕋᓯᓐᒧᑦ, ᕋᐃᒋᓐ ᐊᒻᒪ ᕼᐋᓇ ᐲᖅᓯᓚᐅᖅᐳᑦ ᐅᓕᖓᓂ ᓴᖅᑭᑎᑦᑎᓂᕐᒧᑦ ᓄᓕᐊᔪᖕᒥ.

"ᓄᓕᐊᔪᑦ ᐊᑕᐅᓯᐅᓪᓗᓂ ᓴᓇᙳᐊᖅᖢᒍ ᐊᓕᐊᓇᐃᒋᓛᕆᔭᓐᓂ. ᐃᓛᓐᓂᒃᑯᑦ ᑕᐃᔭᐅᓲᖅ ᓄᓕᐊᔪᖕᒥ, ᓴᒡᓱᒪ ᐊᕐᓇ ᐅᕝᕙᓘᓐᓃᑦ ᑕᑲᓇᑲᑉᓵᓗᒃ. ᐃᒪᕐᒥᐅᑕᐅᕗᖅ ᑕᑯᔭᐅᓯᒪᔪᒥ ᐅᑭᐅᖅᑕᖅᑐᒥ ᐃᒪᓕᒫᖓᓐᓂ, ᐊᑖᑕᑦᑎᐊᕋ ᐅᖃᓚᐅᖅᓯᒪᕗᖅ ᐊᕐᕌᒍᒐᓵᓗᖕᓂᑦ," ᐅᖃᓚᐅᖅᐳᖅ ᕼᐋᓇ ᑐᓴᒐᒃᓴᓕᐊᖑᔪᒥ.

"ᐅᓂᒃᑳᕆᔭᐅᕗᖅ ᓂᐊᖁᖃᕐᓂᖓᓂ ᐊᒻᒪ ᑎᒥᖓᓂ ᐊᔾᔨᐸᓗᐊᓂ ᐃᓄᖕᒧᑦ, ᐊᑦᑎᖕᓂᖅᓴᖓᓂ ᕿᓚᓗᒐᖅᑎᑐᑦ, ᐸᐱᕈᖃᖅᖢᓂ ᐊᒻᒪ ᐊᒪᐅᔭᕐᒥ. ᑕᒪᕐᒥᒐᓚᑦ ᐅᓂᒃᑳᖅᑐᐊᑦ ᓄᓕᐊᔪᖕᒥ ᐅᖃᖅᑑᔮᖅᐳᑦ ᑐᙵᓇᕐᓂᖓᓂ ᐊᒻᒪ ᐱᑦᑎᐊᕋᓱᐊᕐᓂᖓᓂ; ᑭᓯᐊᓂ, ᐃᓛᓐᓂᓚᐅᓱᖓᕐᒥ ᑐᓴᖅᓯᒪᕗᖓ ᐅᖃᐅᓯᕐᓂᑦ ᑕᐃᒪᐃᖏᓐᓇᐅᔭᙱᓐᓂᖓᓂ."

ᕼᐋᓇ, ᓴᓇᙳᐊᖅᓯᒪᔪᖅ ᑕᐃᒪᙵᓂ 1960 ᐱᒋᐊᕐᓂᐸᓗᐊᓂ, ᓂᕈᐊᖅᑕᐅᓚᐅᖅᐳᖅ ᓂᕈᐊᖅᑎᑦᑎᔨᐅᔪᓂ ᐃᓚᖃᖅᑐᒥ Dominion Sculptor-ᒥ, ᖃᐃᖁᔨᓚᐅᖅᑐᓂ ᖃᐅᔨᒪᔨᕐᔪᐊᖑᔪᓂ ᓴᓇᐅᒐᓕᕆᔨᐅᔪᓂᑦ ᓄᓇᓕᖕᓂ, ᐊᒻᒪ ᐅᓂᒃᑳᕆᔨᐅᔪᒧᑦ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕕᒡᔪᐊᖓᓂ.

ᐹᑦ ᕼᐋᓇ ᑲᑉᐱᐊᓇᐅᑉ ᓄᓕᐊᔪᖕᒥ, ᓴᖅᑭᑎᑦᑎᓚᐅᖅᐳᖅ ᐱᓇᖕᓇᕐᒥ ᐃᓚᖓᓐᓂ ᑲᓇᑕᐅᑉ ᒪᓕᒐᓕᐅᕐᕕᖓᓐᓂ ᐋᑐᕚᒥ ᐊᐃᑉᕆᓕ 8-ᒥ.

"ᓴᓇᐅᒐᖏᓐᓄᑦ, ᒥᔅᑕ ᕼᐋᓇ ᑭᐅᒐᔪᒃᐳᖅ ᐃᓅᖃᑎᒌᖕᓂᕐᒧᑦ ᐊᑲᐅᙱᓕᐅᕈᑕᐅᔪᓂ ᐊᒻᒪ ᐱᐅᙱᑦᑐᓂ ᐊᒃᑐᐃᓂᐅᔪᓄᑦ ᓇᖕᒥᓂᖅ ᐊᐅᓚᓂᖃᙱᓪᓚᕆᙱᓂᐅᔪᒥ ᐃᓄᖕᓄᑦ ᓄᓇᓕᐅᔪᓄᑦ. ᐃᓚᓕᐅᔾᔨᓪᓗᓂ ᑭᓱᑐᐃᓐᓇᓂᑦ ᐱᔭᐅᔪᓂ ᐊᖓᒃᑲᓂᑦ ᐅᕝᕙᓘᓐᓃᑦ ᓯᓐᓇᒃᑑᒪᒥᓂᑦ, ᓴᓇᐅᒐᖏᑦ ᖁᕝᕙᖅᓴᐃᓲᖑᕗᖅ ᒪᒥᓴᕐᓂᕐᒥ, ᑭᐅᓪᓗᓂ ᓇᖕᒥᓂᖅ ᐊᑐᖅᓯᒪᔭᖏᓐᓂ ᐊᒻᒪ ᐊᓯᖏᓐᓂ ᑲᔪᖏᖅᓴᐃᓲᖑᕗᑦ ᐅᖃᐅᓯᖃᕐᓂᕐᒧᑦ ᐊᒻᒪ ᑐᑭᓯᐊᒪᒋᓪᓗᑎᒃ ᐅᑯᓂᖓ ᐊᑲᐅᙱᓕᐅᕈᑕᐅᔪᓂᑦᑕᐅᖅ," ᐅᖃᓚᐅᖅᐳᖅ ᕋᐃᒋᓐ.

"ᐹᑦ ᕼᐋᓇᐅᑉ ᓴᓇᐅᒐᓕᕆᓂᖓ ᐊᒻᒪ ᓇᒡᓕᖕᓂᕆᔭᖓᓂ ᓄᓇᖓᓄᑦ ᐆᒻᒪᖅᑎᑦᑎᓯᒪᕗᖅ ᐅᔭᖅᑲᒧᑦ; ᑲᓇᑕᐅᑉ ᓄᑖᖑᓛᖓᓄᑦ ᐊᕕᒃᑐᖅᓯᒪᓂᐅᔪᖅ ᐃᓚᓯᓕᖅᐳᖅ ᓇᖕᒥᓂᖅ ᐱᒋᐊᕐᓂᕆᔭᖓᓂ ᑲᓇᑕᐅᑉ ᐅᓂᒃᑳᖅᑐᐊᖓᓂ, ᐊᒻᒪᓗ ᑲᓇᑕᐅᑉ ᒪᓕᒐᓕᐅᖅᑎᖏᑕ ᐃᒡᓗᕐᔪᐊᖓ ᓅᑉᐳᖅ ᖃᓂᓐᓂᖅᓴᐅᔪᒧᑦ ᐱᐅᓛᖑᔪᒧᑦ."

ᑕᒪᓐᓇ ᓄᓕᐊᔪᒃ ᓇᓗᓇᐃᖅᓯᕗᖅ ᓇᓪᓕᐅᓪᓂᖅᓯᐅᕐᓂᖓᓂ ᓴᖅᑭᑎᑕᐅᓂᖓᓂ ᓄᓇᕗᒻᒥ ᐊᕕᒃᑐᖅᓯᒪᖃᑕᐅᓂᖓᓂ ᐊᐃᑉᕆᓕ 1, 1999-ᒥ ᐊᒻᒪ ᑭᖑᓪᓕᖅᐹᖑᓪᓗᓂ ᐃᓚᒋᐅᕗᖅ ᓴᓇᐅᒐᓕᕆᓂᕐᒥ ᓴᓇᙳᐊᖅᑕᐅᔪᒥ ᐃᓚᒋᔭᐅᓪᓗᓂ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕕᒡᔪᐊᖓᓂ' ᑐᓐᓂᖅᑯᓯᐊᖑᔪᒥ ᐱᓕᕆᐊᒃᓴᐅᔪᓄᑦ ᓇᓗᓇᐃᖅᓯᓂᕐᒧᑦ 150-ᖓᓂ ᓇᓪᓕᐅᓐᓂᖅᓯᐅᕐᓂᖓᓂ ᑲᓇᑕᐅᑉ ᒐᕙᒪᖃᐅᓯᐊᖓᓐᓂ, ᐅᖃᐅᓯᐅᓪᓗᓂ ᑐᓴᒐᒃᓴᓕᐊᖑᔪᒧᑦ.

ᓴᓇᙳᐊᒐᖅ, ᐊᖏᓂᓕᖕᒥ 65 cm-ᒥ 84 cm-ᒧᑦ, ᓴᓇᙳᐊᒐᐅᓪᓗᓂ ᕿᑎᐊᓃᑦᑐᒥ ᐃᒡᓗᕐᔪᐊᒥ – the ᓴᓇᙳᐊᒐᖅ ᐃᓗᓪᓕᖅᓯᔪᒥ ᐊᖕᒪᓗᑲᓴᐅᔭᖅᑐᒥ ᐅᕝᕙᓘᓐᓃᑦ ᖁᐊᕐᔪᐊᖅᑐᒥ ᑕᖅᓯᖅᓱᖅᓯᒪᔪᒥ ᓴᓂᕋᖓᑕ ᖄᖓᓂ ᐃᓯᕐᕕᐅᔪᒧᑦ, ᐹᒧᑦ ᐃᒐᓛᒧᓪᓘᓐᓃᑦ, ᐊᑦᑐᖏᖅᓯᒪᓪᓗᓂ ᓴᓂᒻᒨᖓᔪᒥ ᐅᔭᖅᑲᒧᑦ ᐊᒻᒪ ᐃᓯᕐᕕᐊᓄᑦ.

ᐅᓇ ᓄᑖᖑᔪᖅ ᓴᓇᙳᐊᒑᓗᒃ ᐃᓚᐅᖃᑕᐅᓂᐊᓕᖅᐳᖅ ᖃᔅᓯᒐᓚᐅᔪᓂ ᐱᓕᕆᓂᐅᔪᓂ ᐃᒡᓗᖃᖅᑎᑕᐅᕌᓂᒃᑐᓂ ᐃᓯᕐᕕᖓᓂ, ᑕᐃᒪᙵᓂ 1978-ᒥ. ᓴᓇᙳᐊᒑᓗᒃ ᑕᑯᒃᓴᐅᑎᑕᐅᓂᐊᖅᐳᖅ ᐱᓇᖕᓇᕐᒥ ᐃᓚᖓᓐᓂ ᑭᓯᐊᓂ ᐃᓂᖃᐃᓐᓇᖅᑎᑕᐅᓕᕈᓂ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕕᒡᔪᐊᖓᓂ ᐃᓯᕐᕕᖓᓂ ᒪᓕᒃᑐᒥ ᐋᖅᑭᒃᓱᖅᑕᐅᑦᑎᐊᒃᑲᓐᓂᐊᓂᒃᑯᓂ ᕿᑎᖅᐸᓯᐊᓂ ᐃᓂᖓᓂ.