ᑭᕙᓪᓕᕐᒥᐅᑕᓪᓚᕆᒃ ᓯᓚᕐᔪᐊᒥ ᓂᐱᓕᐅᖅᓯᒪᔪᖅ ᐃᓐᖏᖅᑎ, ᓲᓴᓐ ᐊᒡᓘᒃᑲᒃ, ᑲᖏᖅᖠᓂᕐᒦᓚᐅᖅᐳᖅ ᑎᑎᕋᐅᔭᕐᓂᕐᒥᒃ ᐃᓕᓐᓂᐊᖅᑎᑦᓯᔭᖅᑐᖅᖢᓂ ᐃᓕᓐᓂᐊᖅᑎᓄᑦ ᒫᓂ ᐅᓗᔪᒃ ᐃᓕᓐᓂᐊᕐᕕᖓᓂ ᔭᓐᓄᐊᕆ 11−ᐅᑎᓪᓗᒍ.
ᐃᓕᖁᓯᑐᖃᓕᕆᓂᖅ (CCR) ᐃᓕᓐᓂᐊᕈᑎᒃᓴᑦ ᓴᓇᔭᐅᕗᑦ ᐱᖃᑎᒌᒃᖢᑎᒃ ᐱᓕᕆᖃᑎᒌᒃᖢᑎᒃ ᒫᓂ ᐅᓗᔪᒃ ᐃᓕᓐᓂᐊᕐᕕᖓᑦ ᐊᒻᒪ ᐊᒡᓘᒃᑲᐅᑉ Arctic Rose Foundation.
ᐊᒡᓘᒃᑲᒃ ᐅᖃᓚᐅᖅᐳᖅ ᑖᓐᓇ ᐱᓕᕆᐊᕆᔭᐅᔪᖅ ᐃᓕᓐᓂᐊᖅᑎᑎᒍᑕᐅᔪᖅ "ᑎᑎᕋᐅᔭᕐᓂᕐᒧᑦ−ᐱᕙᓪᓕᐊᒍᑕᐅᖕᒪᑦ, ᐃᓕᖁᓯᑐᖃᕐᓄᓪᓗ−ᐊᑕᐃᓐᓇᕐᓂᕐᒧᑦ" ᐱᓕᕆᐊᖑᑉᓗᓂ ᒪᒃᑯᒃᑐᓂᒃ ᖃᓄᐃᓕᐅᕈᓘᔭᕐᓂᕐᒧᑦ ᐱᓕᕆᐊᖑᑉᓗᓂ ᐃᑲᔪᖅᑕᐅᔪᓐᓇᖅᖢᑎᒡᓗ ᓄᓇᓕᕐᔪᐊᖏᓐᓂ ᐃᓕᖁᓯᑐᖃᓕᕆᓂᕐᒧᑦ ᑕᐃᑉᓱᒪᓂᑐᖃᓕᕆᒍᑎᓂᒡᓗ ᓄᓇᓕᖕᓂ, ᐃᓚᒌᒃᑐᓕᕆᓂᖅ ᐊᒻᒪ ᐅᓂᒃᑳᓕᐅᕐᓂᖅ ᖃᐅᔨᓴᕈᑕᐅᑉᓗᓂ.
"ᐱᓕᕆᐊᓪᓚᕆᒋᔭᐅᔪᑦ ᖃᐅᔨᓴᕐᓂᖅ ᖃᓄᐃᓕᐅᕈᑕᐅᓕᕈᓐᓇᖅᖢᓂ, ᐃᑲᔪᕈᑕᐅᑉᓗᓂᓗ ᒪᒥᓴᕐᓂᕐᒥᒃ ᐃᓕᓐᓂᐊᖅᑎᑎᒍᑕᐅᑉᓗᓂᓗ, ᖃᐅᔨᓴᕈᑕᐅᔪᖅ ᐊᑐᖅᑕᐅᓂᐊᖅᖢᓂ ᐊᒻᒪ ᐃᓚᒌᓂᒃ ᑲᑎᑦᓯᒍᑕᐅᓂᐊᖅᖢᓂ ᑕᒡᕙᖓ ᖃᓄᐃᓕᐅᕐᓂᕐᒧᑦ ᐱᓕᕆᐊᕆᔭᐅᒍᑕᐅᓂᐊᖅᖢᓂ," ᐊᒡᓘᒃᑲᒃ ᐅᖃᓚᐅᖅᐳᖅ.
"ᑕᐃᒪᓐᓇᓗ ᐃᓕᓐᓂᐊᖅᑎᑕᐅᓚᐅᕐᓗᑎᒃ ᖃᓄᐃᓕᐅᕐᓂᐊᕐᓂᕐᒧᑦ ᐃᓱᒪᓕᐅᕈᓐᓇᕐᒪᑕ ᐱᒋᐊᕈᑎᖃᓚᐅᖏᓐᓂᕐᒥᖕᓂ ᖃᓄᐃᓕᐅᕈᑎᒋᒍᒪᔭᒥᓂᒃ. ᖃᐅᔨᒪᓕᐊᓂᖕᒪᑕ ᑎᑎᕋᐅᔭᕐᓂᕐᒥᒃ ᓇᓂᑐᐃᓐᓇᖅ ᑕᑯᒃᓴᐅᕙᒃᑐᓂᒃ, ᑕᐃᒪ ᐃᓄᖕᒥᒃ ᓇᓂᑐᐃᓐᓇᖅ ᑎᑎᕋᐅᔭᖅᑎᒥᒃ ᑎᑭᑎᑦᓯᓂᐊᖅᐳᒍᑦ ᒫᑦᓯᖑᓂᐊᖅᑐᓂ, ᑕᐃᒪᓐᓇ ᐱᓕᕆᐊᖃᖅᓯᒪᓕᐊᓂᖕᒪᑕ ᑕᒪᒃᑯᓂᖓ ᐊᓯᖏᓐᓂᒃ ᑐᓴᕐᓂᖅᑐᓂᒃ ᑎᑎᕋᐅᔭᕐᓂᕐᒥᒃ, ᐃᓄᖕᒥᒃ ᑎᑭᑎᑦᓯᓂᐊᖅᑐᒍᑦ ᐅᖃᐅᓯᒃᑯᑦ ᑕᐃᒪᓐᓇ ᑐᓴᕐᓂᖅᑐᓂᒃ ᖃᓄᐃᓕᐅᖅᑎᒥᒃ ᑎᑎᕋᖅᑎᒥᒃ.
"ᑎᑎᕋᓪᓚᕆᒡᓗᑎᒡᓗ ᑎᑎᕋᐅᔭᖅᑎᒥᒃ ᑎᑭᑎᑦᓯᓂᐊᖅᐳᒍᑦ, ᐊᓯᖏᓐᓂᒡᓗ, ᑎᑎᕋᕐᕕᖕᒥᖕᓄᑦ ᑎᑎᕋᖃᑦᑕᕐᓂᐊᕐᒪᑕ ᖃᐅᔨᓴᕐᓗᑎᒡᓗ ᖃᓄᖅ ᑎᑎᕋᐅᔭᕈᓐᓇᕆᐊᒃᓴᖅ ᐅᓂᒃᑳᓕᐅᕐᓗᑎᒡᓗ."
ᐊᒡᓘᒃᑲᖅ ᐅᖃᓚᐅᖅᐳᖅ ᑕᒪᒃᑯᐊ ᖃᐅᔨᓴᕈᑎᑦ ᑕᖅᑭᑕᒫᑦ ᓴᖅᑭᑕᐅᖃᑦᑕᕐᓂᐊᖅᖢᑎᒃ ᓴᓇᔭᐅᔪᑦ, ᑕᒪᒃᑯᐊ ᑎᑎᕋᖅᑕᐅᔪᑦ, ᐅᓂᒃᑳᖅᑕᐅᔪᑦ, ᑎᑎᕋᐅᔭᖅᓯᒪᔪᑦ ᑎᑎᕋᖅᑕᐅᔪᑦ, ᑐᓴᕐᓂᖅᑐᑦ ᐅᖃᐅᓯᑦ, ᐃᓐᖏᕈᑎᑦ ᐊᓯᖏᓪᓗ ᑎᑎᕋᐅᔭᖅᑕᐅᔪᑦ ᖃᓄᐃᓕᐅᕈᑕᐅᒧᑦ ᐃᓚᐅᔪᓄᑦ ᒪᒃᑯᒃᑐᓄᑦ ᖃᓄᐃᓕᐅᕈᑎᒋᒍᒪᔭᖏᑦ.
ᐃᒻᒪᖄ 14 ᐃᓚᐅᓚᐅᖅᐳᑦ ᒫᓂ ᐅᓗᔪᒃ ᐃᓕᓐᓂᐊᕐᕕᖓᓂ ᑲᖏᖅᖠᓂᕐᒥ − ᓯᕗᓪᓕᖅᐸᐅᑉᓗᓂ ᑕᒪᓐᓇ ᐱᓕᕆᐊᖑᓚᐅᖅᖢᓂ ᖃᕆᑕᐅᔭᒃᑯᑦ ᐊᒻᒪ ᐃᓕᓐᓂᐊᕆᐊᓪᓚᕆᖃᑦᑕᖅᖢᑎᒃ.
ᐊᒡᓗᒃᑲ ᐅᖃᓚᐅᖅᐳᖅ ᑕᒪᓐᓇ ᐃᓕᓐᓂᐊᖅᑎᑦᓯᒍᑦ ᐋᑭᒃᓱᖅᑕᐅᓯᒪᑉᓗᓂ ᓄᓇᓕᖕᓂ ᐊᑐᖅᑕᐅᒋᐊᖃᖅᑐᑦ ᒪᓕᒃᖢᒋᑦ.
ᑖᓐᓇ Arctic Rose Foundation−ᑯᑦ ᐱᓕᕆᐊᖃᕋᓱᐊᖅᐳᑦ ᐅᑭᐅᖅᑕᖅᑐᒥᐅᑦ ᓄᑕᖃᑦ ᒪᒃᑯᒃᑐᓪᓗ ᐃᑲᔪᖅᑕᐅᖁᑉᓗᒋᑦ ᐊᕙᑎᖃᑦᓯᐊᖅᑎᑕᐅᓗᑎᒃ ᐅᓗᕆᐊᓇᖏᑦᑐᒥᒃ: ᐃᓕᖁᓯᑐᖃᓕᕆᓗᑎᒃ, ᐃᓱᒪᒃᑯᒃ ᐋᖅᑭᒃᓱᖅᐸᓪᓕᐊᒍᑎᒃᓴᓂᒃ, ᐅᒃᐱᕐᓂᒃᑯᓪᓗ ᐊᒻᒪ ᐃᖃᐃᓕᓴᕈᑎᒃᑯᑦ ᑎᒥᒃᑯᑦ.
ᑕᒪᓐᓇ ᑎᒥᐅᔪᖅ ᐱᓕᕆᖃᑎᖃᖅᐸᒃᖢᓂ ᓄᓇᓕᖕᓂ ᓄᓇᓕᖕᓂ ᐱᒋᐊᖅᑎᑕᐅᔪᓂᒃ ᐃᓕᓐᓂᐊᕈᑎᓂᒃ ᐱᓕᕆᐊᓂᒃ ᑕᒪᒃᑯᓂᖓ ᓲᕐᓗ ᓂᕿᑖᕐᕕᖕᓂᒃ ᐊᑭᖃᖏᑦᑐᓂᒃ ᐅᕙᓘᓐᓃᑦ ᐃᓕᓐᓂᐊᕌᓂᖕᓂᕐᒧᑦ ᑲᑎᒪᔨᐊᓛᓂᒃ, ᓄᑕᖃᓄᑦ ᒪᒃᑯᒃᑐᓄᓪᓗ ᑐᕌᖅᑐᓂᒃ.
ᖃᓄᐃᓕᐅᕆᐊᖃᕐᓂᖏᓐᓄᑦ ᖃᐅᔨᔪᖃᕌᖓᑦ ᐃᓕᓐᓂᐊᕈᓪᓗ ᐱᑕᖃᖏᑉᐸᑦ, ᑎᒥᐅᔪᖅ ᐋᖅᑭᒃᓱᐃᓇᓱᐊᖃᑦᑕᖅᐳᑦ ᐃᑲᔪᕈᑎᖃᖅᖢᑎᒡᓗ ᐃᓚᐅᔪᓂᒃ ᓄᓇᓕᖕᓂ ᐊᒻᒪ ᓄᓇᓕᖕᓂ ᐅᑭᐅᖅᑕᖅᑐᒥ ᓄᑕᖃᓂᒃ ᒪᒃᑯᒃᑐᓂᒡᓗ.