ᓵᓐᑐᕋ ᐃᓅᑎᐅᑉ ᒪᑐᐃᖓᓪᓗᓂ ᑎᑎᖅᑲᖓ ᖃᓪᓗᓈᓄᑦ – ᓯᕗᓪᓕᕐᒥ ᑎᑎᕋᖅᑕᐅᓚᐅᖅᑐᒥ ᓇᖕᒥᓂᖓᓐᓂ ᕙᐃᔅᐳᒃᑯᑦ ᐊᒻᒪ ᑎᑎᕋᖅᑕᐅᒃᑲᓐᓂᕐᓂᖓᓂ ᐊᐱᕆᓚᐅᖅᖢᑎᒃ ᐃᓕᔭᐅᔪᓐᓇᕐᓂᖓᓂ ᐅᕙᓂ ᐱᓇᓱᐊᕈᓯᐅᔪᒥ ᑐᓴᒐᒃᓴᓕᐊᖑᔪᒥ ᓄᓇᕗᒻᒥ ᑐᓴᒐᒃᓴᓕᐊᖑᔪᒧᑦ – ᐊᒃᓱᕈᕐᓇᖅᖢᓂ ᐅᖃᓕᒫᕐᓂᐅᕗᖅ.
ᐅᖃᓪᓚᐅᔾᔨᓂᐅᕚ? ᐅᓇᑕᕈᒪᓂᐅᕚ? ᐃᓄᓕᒫᓄᑦ ᐅᖃᓪᓚᖕᓂᐅᕙ ᐊᑐᐊᒐᓄᑦ ᐊᒻᒪ ᑐᕌᒐᒃᓴᓄᑦ? ᓱᑲᖓᓂᐅᕚ?
ᐅᖃᓕᒫᒃᑲᓐᓂᑲᑕᖕᓂᕐᒥ, ᑎᑎᖅᑲᐅᔪᖅ ᐃᒻᒥᓂᒃ ᓴᖅᑭᑎᑦᑎᕗᖅ ᐃᓕᓐᓂᐊᕐᓂᕐᔪᐊᖑᓂᖓᓂ ᐃᓅᖃᑎᒥᓂᒃ ᐊᔾᔨᒌᙱᓐᓂᐅᔪᓂ ᐱᓕᕆᓂᐅᔪᒥ.
ᐅᖃᓪᓚᖕᓂᐅᔪᑦ ᖃᓪᓗᓈᓄᑦ ᐱᔪᓐᓇᕐᓂᖃᕐᓂᐅᔪᓄᑦ ᐊᒻᒪ ᖃᓪᓗᓈᓄᑦ ᓱᕋᒃᓴᕋᐃᓐᓂᖏᓐᓂ ᐱᑕᖃᒐᔪᒃᐳᑦ ᒫᓐᓇᐅᔪᒥ, ᐊᒻᒪ ᐃᓅᑎᐅᑉ ᐅᖃᐅᓯᒃᓴᖓ ᓱᖏᐅᓐᓇᖅᐳᖅ ᑕᐃᒃᑯᓄᖓ ᑕᑯᓯᒪᔪᓂᑦ ᓂᐊᑦᕕᓕᒃᔅ ᖃᓪᓗᓈᓄᑦ ᐅᕝᕙᓘᓐᓃᑦ ᐅᖃᓕᒫᖅᑐᓄᑦ ᑎᑎᕋᖅᑎᐅᔫᑉ ᐹᐱᓐ ᑎᐋᓐᔨᓘᑉ ᖃᓪᓗᓈᑦ ᓱᕋᒃᓴᕋᐃᓐᓂᖏᓐᓂ.
ᐃᓱᒪᖔᕈᒪᓇᔭᖅᑎᓪᓗᑕ ᐃᓅᑎᐅᑉ ᑎᑎᖅᑲᖓ ᑐᓂᓯᓂᐊᕐᓂᖓᓂ ᐊᔪᕐᓇᙱᑦᑐᒥ ᐋᖅᑭᒍᑎᒃᓴᐅᔪᒥ ᐊᑲᐅᙱᓕᐅᕈᑕᐅᔪᓄᑦ ᓄᓇᕗᑦ ᓵᙵᓂᖓᓂ ᐱᔾᔪᑎᖃᖅᑐᒥ ᐱᔪᓐᓇᕐᓂᖃᓪᓚᕆᙱᑦᑐᒧᑦ, ᖃᐅᔨᒪᕗᒍᑦ ᐊᒥᓱᓂ ᓄᓇᕗᒻᒥ – ᐊᒻᒪ ᑲᓇᑕᓕᒫᒥ – ᐸᕐᓇᒃᓯᒪᙱᓚᑦ ᐅᖃᐅᓯᕐᓄᑦ ᖃᐃᖁᔨᓄᑦ ᐊᐱᕆᓂᕐᓄᑦ ᐱᔪᓐᓇᕐᓂᖃᕐᓂᕆᔭᒥᓂᑦ ᐊᒻᒪ (ᐅᔾᔨᕈᓱᒡᓗᓂ ᐅᔾᔨᕈᓱᙱᓪᓗᓂᓘᓐᓃᑦ) ᐃᓅᖃᑎᒥᒃ ᐊᑭᕋᖅᑐᕐᓂᕐᒥ ᐊᔾᔨᒌᙱᓐᓂᕐᒧᑦ.
ᑕᐅᑐᒃᖢᓂ ᐃᖏᕐᕋᐃᓐᓇᖅᑐᒥ ᖃᓄᐃᓕᐅᕐᓂᐅᔪᒥ ᑐᖁᑕᐅᔪᓄᑦ ᐊᒻᒪ ᐊᓯᐅᖅᑲᔪᓄᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᐊᒻᒪ ᓂᕕᐊᖅᓵᓄᑦ, ᐱᑕᖃᙱᓗᐊᕐᓂᖓᓂ ᐃᖅᑲᖅᑐᖅᑕᐅᓂᖏᓐᓂ ᑐᖁᑕᐅᔪᓄᑦ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᒧᑦ ᑰᓪᑎᓐ ᐴᓯᒧᑦ ᐊᒻᒪ ᑏᓇ ᕚᓐᑕᐃᓐᒧᑦ, ᐊᒻᒪ ᐱᑕᖃᙱᓗᐊᕐᓂᖓᓂ ᐃᖏᕐᕋᓂᐅᔪᒥ ᐱᐅᓯᒋᐊᖅᑎᑦᑎᓂᕐᒧᑦ ᐃᓅᖃᑎᒌᖕᓂᐅᔪᒥ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓇᓗᓇᐃᒃᑯᑕᐅᔪᓂ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ.
ᖄᖏᖅᓯᒪᓕᖅᑐᓂ ᑕᖅᑭᓂᑦ 6-ᓂ, ᐅᖃᓪᓚᖃᑎᖃᖅᓯᒪᕗᒍᑦ ᒪᑐᐃᖓᑦᑎᐊᖅᑐᓂ ᐃᓅᖃᑎᒥᒃ ᐊᑭᕋᖅᑐᖅᑎᓂ ᐊᔾᔨᒌᙱᓐᓂᕐᒧᑦ ᐅᑎᖅᑕᕋᐅᔭᖅᑎᓄᑦ ᐃᖅᑲᓇᐃᔭᖅᑐᓄᑦ ᓄᓇᕗᒻᒥ, ᐊᒻᒪ ᐅᖃᓕᒫᖅᖢᑕ ᐅᓂᒃᑳᓕᐊᖑᔪᓂ ᓄᓇᕗᒻᒥᐅᓂ ᐹᖅᓯᔪᓂ ᐃᓅᖃᑎᒥᒃ ᐊᑭᕋᖅᑐᕐᓂᕐᒥ ᐊᔾᔨᒌᙱᓐᓂᕐᒧᑦ ᐅᖃᓪᓗᕆᒃᓴᕐᓂᐅᔪᓂᑦ, ᓲᕐᓗ ᐃᓇᖏᖅᓯᓚᐅᑲᒃᑐᓂ ᓘᒃᑖᓂᑦ ᐃᒡᓚᐅᑎᖃᖅᑐᓂ ᐃᓕᓯᓂᕐᒥ ᐃᓅᓕᓴᐅᑎᓂᑦ ᐃᒥᖅᑕᐅᕙᒃᑐᒥ ᐃᒪᖓᓐᓂ, ᓇᓚᐅᑦᑖᕆᓂᖏᓐᓄᑦ, ᑕᒪᕐᒥᒃ ᐃᓄᐃᑦ ᑯᔭᖕᓂᒃᑯᑦ ᐆᒪᔾᔨᓯᓂᖃᕐᒪᑕ.
ᖃᓪᓗᓈᓂ ᖁᑦᑎᖕᓂᖅᓴᐅᓇᓱᒋᓂᖏᓐᓂ ᐆᒪᑦᑎᐊᖅᐳᖅ ᐊᒻᒪ ᖃᓄᐃᓐᓇᑎᒃ.
ᐃᓅᑎᐅᑉ ᑎᑎᖅᑲᖓ ᖃᐃᖁᔨᓂᐅᕗᖅ ᖃᓄᐃᓕᐅᕐᓂᐅᔪᒧᑦ ᐅᕙᑦᑎᓐᓄᑦ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓂ. ᐊᖏᖅᓯᒪᓂᖃᖅᐳᒍᑦ ᑲᔪᓯᑎᑦᑎᓂᕐᒧᑦ ᐃᓂᐅᔪᒥ ᑕᑯᒃᓴᐅᑎᑦᑎᔪᒥ ᓄᓇᕗᒻᒥ ᐃᓄᐃᑦ ᐃᓄᒋᐊᖕᓂᖏᓐᓂ, ᐊᒻᒪ ᑭᓯᐊᓂ ᑕᒪᕐᒥᒐᓚᐃᑦ ᐃᖅᑲᓇᐃᔭᖅᑎᑦᑎᓐᓂ ᖃᓪᓗᓈᖏᓐᓇᒐᓚᐅᕗᑦ. ᑕᐃᒪᓐᓇᑎᑐᑦ ᐊᒥᓱᓄᑦ ᖃᓪᓗᓈᖑᔪᓄᑦ, ᐅᕙᑦᑎᓐᓂ ᑕᑯᓲᖑᕗᒍᑦ ᐃᑲᔪᖅᑎᐅᓂᑦᑎᓐᓂ, ᑭᓯᐊᓂ ᖃᐅᔨᒪᓪᓚᕆᙱᓚᒍᑦ ᓱᓕᓪᓚᕆᖕᒪᖔᑦ. ᐃᓚᐅᙱᓐᓂᖅᑕᖃᖅᐳᖅ ᖃᓄᐃᓕᖓᓂᑦᑎᓐᓂ, ᖃᐅᔨᒪᓪᓗᓂ ᐃᓄᐃᑦ ᐅᓂᒃᑳᓪᓗᐊᕐᓂᖏᓐᓂ ᐅᓂᒃᑳᖅᑐᐊᓂ ᓄᓇᖓᓐᓂ.
ᐃᓅᑎᐅᑉ ᐅᖃᐅᓯᖏᑦ ᖃᐅᒻᒪᒃᑎᑦᑎᓂᖃᖅᐳᖅ ᓇᖕᒥᓂᖅ ᑲᑐᔾᔨᖃᑎᒌᑦᑎᓐᓄᑦ, ᐊᒻᒪ ᐅᖃᐅᔾᔨᓂᐊᖅᐳᑦ ᐅᖃᓪᓚᖕᓂᐅᔪᓂ ᑐᕌᒐᕆᓂᐊᖅᑕᑦᑎᓐᓂ ᓯᕗᒻᒧᒃᐸᓪᓕᐊᓂᕐᒧᑦ.
ᑕᐃᒪᑐᖅ ᑎᑎᖅᑲᖅ ᖃᐅᒻᒪᒃᑎᑦᑎᓂᖃᕐᓂᐊᖅᐳᖅ ᓄᓇᕐᔪᐊᕐᓄᑦᑕᐅᖅ, ᐃᖅᑲᓇᐃᔭᕐᕕᖕᒥ ᐃᓕᓐᓂᐊᕐᕕᖕᒥᓪᓘᓐᓃᑦ, ᓇᒥᑐᐃᓐᓇᖅ ᓂᐅᕕᕆᐊᖅᐸᖕᓂᕐᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᕐᓂᕐᒧᓪᓘᓐᓃᑦ, ᖃᐅᔨᒪᒋᑦ ᐃᓅᖃᑎᒥᒃ ᐊᔾᔨᒌᙱᓐᓂᕐᒧᑦ ᐊᑐᕐᓂᖃᐅᑎᖃᖅᐳᖅ ᑭᓱᓕᒫᑦᑎᐊᓂ ᖃᓄᐃᓕᐅᕐᓂᑦᑎᓐᓂ ᓄᓇᕗᒻᒥ.
ᑕᑯᕙᕗᑦ ᐆᒥᖓ ᑎᑎᖅᑲᐅᔪᒥ ᐊᒡᒐᒥᒃ ᐃᓴᒃᑐᒥ ᐃᑲᔪᕐᓂᕐᒧᑦ ᖃᓪᓗᓈᖑᔪᓂ ᑐᑭᓯᓂᖏᓐᓂ ᐅᖃᐅᓯᐅᓂᐅᔪᓂ ᐱᑕᖃᕐᓂᖏᓐᓂ ᐃᓄᐃᑦ ᓄᓇᖓᓐᓂ. ᐊᓯᖏᑦ ᑕᑯᕗᑦ ᓱᑲᖓᓂᐅᔪᒥ ᑐᕌᖓᔪᒥ ᐃᒻᒥᖕᓄᑦ ᓂᙵᐅᒪᓂᕐᒧᑦ.
ᐅᖃᓕᒫᕈᕕᐅᒃ ᑎᑎᖅᑲᖅ ᐊᒻᒪ ᐊᑲᖅᓴᙱᓪᓗᑎᑦ, ᐃᓚᒋᔭᐅᔪᒃᓴᐅᕗᑎᑦ ᐊᑲᐅᙱᓕᐅᕈᑕᐅᔪᒥ. ᐃᑲᔪᖅᑎᐅᔪᑦ ᑐᕌᖓᓂᖃᖅᐳᑦ ᐃᑲᔪᕐᓂᕐᒧᑦ, ᐊᒻᒪ ᐃᒻᒪᖄ ᐱᐅᓂᖅᐹᖑᔪᖅ ᐃᑲᔪᕐᓂᕐᒧᑦ ᐱᕈᖅᓴᐃᓂᕐᒥ ᐃᓐᓄᒍᓐᓇᕐᓂᐅᔪᒥ ᐊᒻᒪ ᐊᒡᕖᕐᓗᓂ ᐃᓄᐃᑦ ᐊᐅᓚᑦᑎᔪᓐᓇᕐᓂᐊᕐᒪᑕ ᓄᓇᖓᓐᓂ ᐊᔾᔨᐅᙱᑦᑑᓪᓗᓂ ᐃᓂᐅᓪᓗᓂ ᑲᓇᑕᐅᑉ ᐃᓗᐊᓂ.
ᐱᓗᐊᖅᑐᒥ ᓄᓇᕗᑦ ᑐᕌᖅᐸᓪᓕᐊᑎᓪᓗᒍ 20-ᖓᓂ ᓇᓪᓕᐅᕐᓂᖅᓯᐅᕐᓂᖓᓂ ᓄᓇᒋᔭᐅᓪᓗᓂ, ᒫᓐᓇ ᐱᓕᕆᓂᑦᑎᐊᕙᐅᕗᖅ ᐃᓅᑎᐅᑉ ᐅᖃᐅᓯᖏᓐᓂ ᐃᓱᒪᒋᑦᑎᐊᕐᓂᕐᒧᑦ, ᐊᒻᒪ ᐃᓱᒪᒋᓗᒍ ᑐᑭᓕᐊᕐᓂᖃᑦᑎᐊᕐᓂᖏᓐᓂ ᓯᕗᓪᓕᖅᐸᐅᔪᒥ ᐱᓕᕆᐊᕆᔭᐅᔪᒪᓚᐅᖅᑐᓄᑦ ᓯᕗᓕᐅᖅᑎᐅᔪᓄᑦ ᐱᒋᐊᓚᐅᖅᑐᓂ ᐊᒃᓱᕈᕈᑕᐅᔪᒥ ᐊᕐᕌᒍᑦ 50-ᓂ ᖄᖏᖅᓯᒪᓕᖅᑐᓂ ᐋᖅᑭᒃᓱᐃᓂᕐᒧᑦ ᐊᔾᔨᐅᙱᑦᑐᓂ ᓄᓇᐅᔪᒥ ᐃᓄᖕᓄᑦ ᑲᓇᑕᒥ.