Skip to content

ᑎᓯᑎᒋᔪᑦ ᐅᔭᕋᒃᑎᑐᑦ

ᑲᖏᖅᖠᓂᕐᒥ ᐅᔭᕋᑦ A ᖄᖏᖅᓯᓚᐅᖅᐳᑦ ᐆᒻᒪᕆᒃᑐᓂ ᐊᕐᕕᐊᑦ ᐊᒪᕈᕐᓂ ᐱᙳᐊᖅᑎᓄᑦ 10-6-ᒥ ᐱᓂᕐᒧᑦ 2018-ᒥ ᐅᑭᐅᖅᑕᖅᑐᒥ ᐋᑕᒻᔅ ᑕᐃᒎᓯᐊᖓᓐᓂ ᑲᖏᖅᖠᓂᕐᒥ ᕕᕈᐊᕆ 4-ᖑᑎᓪᓗᒍ.

ᓴᓪᓕᕐᒥᐅᑕᖅ ᓅᓚᓐ ᓇᑯᓛᖅ ᐱᕗᖅ ᓴᐳᔾᔨᓯᒪᔨᑦᑎᐊᕙᐅᓛᖑᓂᕐᒧᑦ ᓵᓚᖃᐅᓯᐊᕐᒥ ᓵᓚᖃᕋᓱᐊᕐᓂᐅᔪᒥ ᐋᖅᑭᒃᓱᐃᔨᐅᔪᒥᑦ ᑕᐃᕕᑦ ᑲᓛᒃᒥ ᐅᑭᐅᖅᑕᖅᑐᒥ ᐋᑕᒻᔅ ᒥᑭᓛᓄᑦ ᕼᐋᑭᖅᑎᐅᔪᓄᑦ ᓵᓚᖃᕋᓱᐊᕐᓂᐅᔪᒥ ᑲᖏᖅᖠᓂᕐᒥ ᕕᕈᐊᕆ 4-ᖑᑎᓪᓗᒍ.
Coral Harbour's Nolan Nakoolak accepts the Best Defenceman award from tourney organizer David Clark at the Arctic Atoms minor hockey championship in Rankin Inlet on Feb. 4, 2018. photo courtesy of Noel Kaludjak

ᓵᓚᖃᕋᓱᐊᕐᓂᖅ ᑕᑯᒃᓴᐅᑎᑦᑎᓚᐅᕆᕗᖅ ᓯᕗᓪᓕᖅᐹᒥ ᐊᕐᓇᐃᕐᓇᓂᑦ ᐱᙳᐊᖅᑎᐅᔪᓂᑦ ᓵᓚᖃᕋᓱᐊᕐᓂᕐᒧᑦ (ᐅᔭᕋᑦ ᐊᕐᓇᐃᑦ), ᐊᒻᒪᓗ ᐅᔭᕋᑦ ᓇᕖᔅ ᐅᔭᕋᑦ B ᐱᙳᐊᖅᑎᐅᔪᓂᑦ, ᐊᒻᒪᓗᑦᑕᐅᖅ ᓇᐅᔮᑦ, ᓴᓪᓖᑦ ᐊᒻᒪ ᖃᒪᓂᑦᑐᐊᖅ.

ᐋᖅᑭᒃᓱᐃᔨᐅᔪᖅ ᑕᐃᕕᑦ ᑲᓛᒃ ᐅᖃᓚᐅᖅᐳᖅ ᓵᓚᖃᕋᓱᐊᕐᓂᐅᔪᖅ ᐱᓕᕆᐊᖑᑦᑎᐊᖅᑐᒻᒪᕆᐅᓚᐅᖅᐳᖅ.

ᐅᖃᓚᐅᖅᐳᖅ ᐱᒻᒪᕆᐅᓂᖓᓂ ᑎᓴᒪᓂ ᑲᖏᖅᖠᓂᕐᒥ ᐱᙳᐊᖅᑎᐅᔪᓂᑦ ᐃᓚᐅᖃᑕᐅᓂᖏᓐᓂ.

"ᐱᒻᒪᕆᐅᕐᔪᐊᓚᐅᖅᐳᖅ ᑖᒃᑯᓄᖓ ᓄᑕᖅᑲᓄᑦ ᒥᑭᓛᖑᔪᑦ ᕼᐋᑭᖅᑏᑦ ᐅᓄᖅᑐᐊᓘᖕᒪᑕ ᑲᖏᖅᖠᓂᕐᒥ," ᐅᖃᓚᐅᖅᐳᖅ ᑲᓛᒃ.

"ᐊᓕᐊᓇᐃᑦᑎᐊᓚᐅᖅᐳᖅ ᑕᑯᓂᕐᒧᑦ ᑕᒪᒃᑭᐅᒪᔪᓂ ᐊᕐᓇᓄᑦ ᐋᑕᒻᔅᓄᑦ ᐱᙳᐊᖅᑎᐅᔪᓂᑦ ᓵᓚᖃᕋᓱᐊᕐᓂᐅᔪᒥᑦ, ᐊᒻᒪᓗ ᐊᓕᐊᓇᐃᒋᔭᐅᑦᑎᐊᓚᐅᖅᑐᖅ.

"ᖁᒃᓴᓪᓚᒃᐳᖓ ᐊᕐᓇᓂᑦ ᐅᓄᕐᓂᐅᔪᓂᑦ ᕼᐋᑭᖃᑦᑕᓕᖅᑐᓂᑦ ᒫᓐᓇᐅᔪᒥ, ᐊᒻᒪᓗ ᐱᐅᑦᑎᐊᖅᐳᖅ ᐱᓕᕆᐊᕆᔭᑦᑎᓐᓄᑦ ᓵᓚᖃᕋᓱᐊᕐᓂᖏᓐᓄᑦ ᓇᖕᒥᓂᖅ ᐱᙳᐊᖅᑎᖁᑎᖏᓐᓂᑦ.

"ᐅᖃᖃᑎᖃᖅᖢᖓ ᐃᓚᖏᓐᓂ ᓄᑕᖅᑲᓂᑦ ᐱᙳᐊᖅᑎᐅᔪᓂ, ᐊᓕᐊᓇᐃᓐᓂᖅᓴᐅᓚᐅᕐᓂᕋᐃᕗᑦ ᐊᖑᑎᑕᖃᕐᓇᓂ."

ᑲᓛᒃ ᑭᒡᓕᐅᔪᒥ ᕼᐋᑭᒥᑦ ᐱᙳᐊᖅᑕᐅᖃᑦᑕᕐᓂᖓᓂ ᐅᑭᐅᖅᑕᖅᑐᒥ ᐋᑕᒻᔅᓂ ᐱᐅᓯᕙᓪᓕᐊᕗᖅ, ᑭᓯᐊᓂ ᐃᓯᖅᑎᑦᑕᐃᓕᒪᓂᐅᔪᖅ ᓴᙱᓗᐊᓚᐅᙱᓚᖅ ᑕᒪᑐᒪᓂ ᐊᕐᕌᒍᒥ.

ᐅᖃᓚᐅᖅᐳᖅ ᓄᑕᖅᑲᐃᑦ ᓱᖏᐅᑎᕙᓪᓕᐊᕗᑦ ᐋᖅᑭᒃᓯᒪᓂᖓᓂ ᓵᓚᖃᕋᓱᐊᕐᓂᐅᔪᓂᑦ ᐊᒻᒪᓗ ᒪᓕᒐᖏᓐᓂᑦ ᐊᑐᕆᐊᖃᖅᑕᒥᓂᑦ.

"ᐃᓯᖅᑎᑦᑎᓂᖃᐅᕐᔪᐊᓚᐅᖅᐳᖅ ᑭᖑᓪᓕᖅᐹᖑᔪᒥ ᐱᙳᐊᕐᓂᐅᔪᒥ, ᐊᒻᒪᓗ ᐊᔪᙱᓐᓂᖃᕐᔪᐊᖅᑐᓂ ᐱᙳᐊᖅᑎᖃᓚᐅᖅᐳᑦ ᑕᐃᑲᓂ ᐸᕐᓇᒃᓯᒪᓕᖅᑐᓂ ᒪᓕᒃᑐᒥ ᐲᕖᓄᑦ ᖁᑦᑎᖕᓂᖅᓴᐅᔪᓄᑦ

"ᖃᔅᓯᒐᓚᖕᓂ ᓄᑕᖅᑲᓂ ᖃᐅᔨᒪᔪᖃᐅᖅᐳᖅ ᐸᒃᒥ ᐃᓯᖅᑎᑦᑎᔪᓐᓇᕐᓂᖏᓐᓂ, ᑕᐃᒫᒃ ᓯᕗᓂᒃᒪᕗᑦ ᖃᐅᒻᒪᒃᐸᓪᓕᐊᑐᐃᓐᓇᖅᐳᖅ ᐱᓕᕆᐊᑦᑎᓐᓄᑦ."

ᐃᓄᒋᐊᕌᓗᖕᓂ ᑕᐃᒪᐃᒐᔪᓚᐅᖅᐳᖅ ᐅᓪᓗᓂ-ᐱᖓᓱᓂ ᖃᓄᐃᓐᓂᐅᔪᒥ, 9-ᒥ ᐅᓪᓛᒃᑯᑦ ᐱᙳᐊᖃᑎᖃᖅᐸᓪᓕᐅᓂᐅᔪᓂᑦ ᓴᓪᓕᓂ ᐊᒻᒪᓗ ᐅᔭᕋᑦ A-ᑯᓐᓂ ᐊᓐᓂᑭᑕᕐᕕᖕᒥ ᐱᓯᒪᓪᓗᑎᒃ ᓇᑉᐸᓪᓗᐊᖓᓂ ᑕᑖᖅᑎᑦᑎᓪᓗᓂ ᕕᕈᐊᕆ 3-ᖑᑎᓪᓗᒍ.

ᑲᓛᒃ ᐅᖃᓚᐅᖅᐳᖅ ᔫᓂᐊᖑᔪᑦ ᑲᓇᔅ ᐱᙳᐊᖅᑏᑦ ᐊᐅᓪᓛᕐᓂᐊᖅᑐᑦ ᒫᓂᑑᐸᒧᑦ ᓂᕈᐊᖅᑕᐅᓚᐅᕆᕗᑦ ᓵᓚᖃᕋᓱᐊᕐᓂᐅᔪᒥ.

ᐅᖃᓚᐅᖅᐳᖅ ᑕᐃᒃᑯᐊ ᐱᕙᓪᓕᐊᑎᑦᑎᔪᑦ ᔫᓂᐊᒥ ᑲᓇᒃᔅᓂ ᐱᓕᕆᐊᖑᔪᒥ ᐃᓕᑦᑎᕙᓪᓕᐊᕗᑦ ᐱᕙᓪᓕᐊᑎᓪᓗᒋᑦ, ᐊᒻᒪᓗ ᐃᒃᐱᖕᓇᕐᓂᓕᒃ ᐊᓕᐊᓇᐃᒍᓱᖕᓂᐅᔪᒥ ᐃᓗᐊᓂᓕᒫᖅ.

"ᓄᑕᖅᑲᐃᑦ ᓂᕈᐊᖅᑕᐅᔪᑦ ᐊᓕᐊᓇᐃᒍᓱᑦᑎᐊᕆᕗᑦ, ᑭᓯᐊᓂ ᐅᖃᐅᑎᓚᐅᖅᑕᒃᑲ ᐊᒻᒪᓗ ᐊᖓᔪᖅᑳᖏᑦ ᐱᓕᕆᓪᓚᕆᖕᓂᐅᔪᖅ ᒫᓐᓇᒥ ᐱᒋᐊᓕᑕᐃᓐᓇᖅᐳᖅ.

"ᖁᕕᐊᑉᐳᖓ ᐱᓕᕆᖃᑎᖃᕐᓂᕐᒥ ᐅᑯᓇᓂ ᓄᑕᖅᑲᓂᑦ ᐊᒻᒪᓗ ᐊᖓᔪᖅᑳᖏᓐᓂ ᓯᕗᒻᒧᑦ ᐃᖏᕐᕋᓂᕐᒧᑦ."

ᑲᓛᒃ ᐅᖃᓚᐅᖅᐳᖅ ᖃᔅᓯᒐᓚᐅᔪᑦ ᓵᓚᖃᕋᓱᐊᕐᓂᕐᓂ ᑲᖏᖅᖠᓂᕐᒥ ᐱᓕᕆᐊᖑᔪᓂ ᑕᖅᑭᓄᑦ-ᒪᕐᕉᖕᓄᑦ ᑕᒪᑐᒪᓂ ᐊᕐᕌᒎᔪᒥ ᐃᑲᔪᕈᓯᑦᑎᐊᕙᐅᕗᖅ ᓇᖕᒥᓂᖃᖅᑎᓄᑦ ᓄᓇᓕᖕᓂ.

ᐅᖃᓚᐅᖅᐳᖅ ᑕᑯᔪᒪᓇᔭᑦᑎᐊᖅᐳᖅ ᓇᐃᓴᐅᑎᓪᓚᕆᖏᓐᓂ ᑮᓇᐅᔾᔭᒃᓴᓂᕐᒧᑦ ᐊᖏᒡᓕᒋᐊᕐᓂᐅᔪᒥ ᑐᓂᔭᐅᔪᒧᑦ ᓄᓇᓕᖕᓄᑦ.

"ᓇᖕᒥᖃᖅᑐᖁᑎᕗᑦ ᐅᖃᐅᔾᔨᔪᓐᓇᖅᐳᑦ ᐃᔨᖏᑦ ᖃᐅᒻᒪᒃᐸᓪᓕᕐᓂᐊᕐᓂᖏᓐᓂ ᑕᑯᒑᖓᒥᒃ ᓵᓚᖃᕋᓱᐊᕐᓂᖃᕐᓂᐊᖅᑎᓪᓗᒍ ᓄᓇᓕᖕᓄᑦ ᖃᐅᔨᒪᖕᒪᑕ ᐱᓇᓱᐊᕈᓯᐅᑉ ᓄᙳᐊᓂ ᐱᔭᒃᓴᖃᐅᕐᓂᐊᕐᓂᖏᓐᓂ.

"ᓄᓇᓯᐅᑎᓂᑦ ᐊᑐᖅᑐᐊᖅᑕᐅᔪᖃᕐᓗᓂ, ᑐᔪᕐᒥᕕᓂᑦ ᐃᒡᓗᕈᓯᖅᑖᕋᓱᐊᖅᑐᓂᑦ, ᐃᓄᐃᑦ ᑮᓇᐅᔭᓂ ᐊᑐᖅᑐᓂ ᓂᐅᕕᕐᕕᓂᑦ ᐊᒻᒪ ᓂᕆᕕᖕᓂᑦ, ᐊᒻᒪᓗ ᖃᖓᑕᓲᑦ ᑮᓇᐅᔭᓕᐅᑦᑎᐊᕐᓗᑎᒃ ᖃᖓᑕᔪᓄᑦ ᐱᙳᐊᖅᑎᓄᑦ ᑲᖏᖅᖠᓂᕐᒧᑦ.

"ᑕᐃᒪᑐᖅ ᐱᓕᕆᕕᖃᕐᓚᖓ ᐊᒻᒪ ᐃᑲᔪᕈᑎᒃᓴᓂᑦ ᑕᒪᒃᑭᐅᒪᑦᑎᐊᖅᑐᒥ ᖃᐅᔨᓴᐃᓂᐅᔪᒥ ᖃᓄᑎᒋ ᑮᓇᐅᔭᓂᑦ ᑕᒪᒃᑯᐊ ᓵᓚᖃᕋᓱᐊᕐᓂᐅᔪᑦ ᑐᓂᓯᕙᖕᓂᖏᓐᓂ ᓄᓇᓕᑦᑎᓐᓄᑦ ᐱᓇᓱᐊᕈᓯᐅᔪᒥ ᑐᙵᕕᓕᖕᒥᑦ.

"ᓴᙱᔪᒥ ᑎᒥᐅᔪᓄᑦ ᐃᑲᔪᖅᓯᕐᓂᖃᑦᑎᐊᖅᐳᒍᑦ ᐊᒻᒪᓗ, ᖃᐅᔨᒪᑦᑎᐊᖅᑐᒥ ᐊᕐᓇᒥ ᐅᖃᐅᔾᔭᐅᓚᐅᖅᓯᒪᕗᖓ, ᐃᓄᐃᑦ ᐊᑦᑕᑕᖃᕈᒪᓂᖃᓲᖑᕗᑦ ᐱᓕᕆᑦᑎᐊᕈᓐᓇᕐᓂᐅᔪᓄᑦ, ᑕᐃᒫᒃ ᐱᓕᕆᑦᑎᐊᖅᑐᒥ ᖃᓄᐃᓕᐅᕐᓂᖃᖅᑎᓪᓗᒍ ᐃᓄᐃᑦ ᐃᓕᓯᔪᒪᕗᑦ ᐊᑎᖏᓐᓂ ᐃᓚᒋᔭᐅᖃᑕᐅᔪᒪᓪᓗᑎᒃ."

ᐃᐊᓪᕗᕋᑦ ᕗᐊᐃᓯ ᐊᔪᕆᖅᓱᐃᓚᐅᖅᐳᖅ ᐅᔭᕋᑦ A ᐱᙳᐊᖅᑎᐅᔪᓄᑦ ᑎᐊᕆᓐ ᐃᑲᒃᕼᐃᒃ ᐱᓕᕆᖃᑎᒋᓪᓗᓂᐅᒃ, ᐊᒻᒪᓗ ᐅᖃᓚᐅᖅᐳᖅ ᑕᒪᐃᑎᒍᑦ ᓵᓚᖃᕋᓱᐊᕐᓂᐅᔪᖅ ᑕᑯᒃᓴᐅᑎᑦᑎᓚᐅᖅᐳᖅ ᐊᒥᓱᓂ ᖃᓂᒌᒃᑐᑕᐅᓂᖏᓐᓂ ᓵᓚᖃᕋᓱᐊᕐᓂᕐᓄᑦ. ᐅᖃᓚᐅᖅᐳᖅ ᐃᒃᐱᒍᓱᓚᐅᕐᓂᖓᓂ ᓵᓚᖃᕋᓱᐊᕐᓂᐅᔪᓂ ᐱᙳᐊᖅᑎᖏᑦ ᐹᖅᓯᓇᔭᕐᓂᖏᓐᓂ ᐊᕐᕕᐊᓂᑦ ᑭᖑᓪᓕᖅᐹᖑᔪᒥ.

"ᐱᙳᐊᖅᑎᑦᑎᐊᕙᖃᐅᓚᐅᖅᐳᑦ ᐊᒻᒪᓗ ᐊᖑᑎᖏᑦ ᐊᖏᔫᑎᒻᒪᕆᐅᓚᐅᖅᐳᑦ ᑕᐅᑐᒃᖢᒋᑦ ᐱᙳᐊᖅᑎᕗᑦ” ᐅᖃᓚᐅᖅᐳᖅ ᕗᐊᐃᓯ.

"ᐊᖏᔫᑎᐊᓗᖕᓂ ᐱᙳᐊᖅᑎᖃᓚᐅᖅᐳᑦ ᑕᒪᑐᒪᓂ ᐊᕐᕌᒍᒥ.

"ᑭᓯᐊᓂ ᐱᒋᐊᕐᓂᖓᓂ ᐊᕐᕌᒍᒥ ᐃᓕᓐᓂᐊᖅᑎᓐᓇᓱᓚᐅᕋᒃᑭᑦ ᐱᙳᐊᖅᑎᕗᑦ ᐱᓯᐊᕐᓂᖏᓐᓂ ᑲᑎᙵᓂᐅᓗᑎᒃ, ᐊᒻᒪᓗ ᖃᓄᐃᑦᑕᕆᐊᖃᕐᓂᖏᓐᓂ ᐱᓇᓱᐊᕐᓂᕐᒧᑦ ᓵᓚᖃᕋᓱᐊᕐᓂᕐᒧᑦ 'W'-ᒥ.

"ᐅᖃᕋᔭᖅᐳᖓ ᑲᑎᙵᓪᓗᑕ ᐱᓕᕆᓂᕗᑦ ᐊᒻᒪᓗ ᐱᙳᐊᖅᑎᕗᑦ ᐱᓕᕆᖃᑎᒌᒃᖢᑎᒃ ᐊᒃᓱᕈᖅᖢᑎᒃ ᓵᓚᖃᕈᓐᓇᖅᓯᑎᑦᑎᓚᐅᖅᐳᖅ."

ᕗᐊᐃᓯ ᐅᖃᓚᐅᖅᐳᖅ ᓄᑕᖅᑲᐃᑦ ᐊᓕᐊᓇᐃᒋᔭᖃᑦᑎᐊᓚᐅᖅᐳᑦ ᐃᓄᒋᐊᖑᔪᓂᑦ ᐊᒻᒪᓗ ᐅᐸᒃᖢᓂᔾᔪᒃ ᐱᙳᐊᕐᓂᐅᔪᑦ ᐱᓕᕆᔨᒻᒪᕆᑯᓘᓪᓗᑎᒃ. ᐅᖃᓚᐅᖅᐳᖅ ᓂᙵᒃᐸᖕᓇᑎᒃ ᐊᒻᒪᓗ ᐅᐃᒻᒪᓗᐊᕌᓗᒃᐸᖕᓇᑎᒃ ᓂᐱᖅᑯᖅᑐᔪᐊᓗᖕᒥ ᑭᒡᓕᐅᔪᒥ ᐃᒡᓗᕐᔪᐊᒥᑦ.

" ᐅᑭᐅᖅᑕᖅᑐᒥ ᐋᑕᒻᔅ ᐱᒻᒪᕆᐅᕐᔪᐊᖅᐳᖅ ᐅᑯᓄᖓ ᓄᑕᖅᑲᓄᑦ, ᐱᓗᐊᖅᑐᒥ ᑕᐃᒃᑯᓄᖓ ᓅᑉᐸᓪᓕᐊᔪᓄᑦ ᐲᕖᓄᑦ ᖃᐅᔨᒪᕙᓪᓕᐊᔭᕆᐊᖃᕐᒪᑕ ᕼᐋᑭᖅᑎᐅᓂᕐᒧᑦ ᐊᒻᒪ ᐱᙳᐊᖅᑎᓄᑦ ᑲᑎᙵᓂᐅᔪᓂ ᒫᓐᓇ ᓅᑉᐸᓪᓕᐊᑎᓪᓗᒋᑦ ᖁᒻᒧᒃᐸᓪᓕᐊᓂᐅᔪᒧᑦ ᑭᒡᓕᐅᔪᓄᑦ.

"ᐊᓕᐊᓇᐃᒍᓱᑦᑎᐊᓚᐅᖅᐳᑦ ᓵᓚᖃᕋᓱᐊᕐᓂᐅᔪᒥ ᑕᖅᑭᐅᓚᐅᖅᑐᒥᓕᒫᖅ ᐊᒻᒪᓗ ᐊᒃᓱᕈᖅᐸᓪᓕᐊᑐᐃᓐᓇᖅᖢᑎᒃ ᐱᓕᒻᒪᒃᓴᓂᓕᒫᓂᑦ.

"ᐊᔪᕐᓇᕆᒐᓚᓚᐅᖅᐸᕋ ᓂᕈᐊᖅᓯᔭᕆᐊᒃᓴᖅ ᐱᙳᐊᖅᑎᓂᑦ A-ᒥ ᑕᒪᕐᒥᒐᓚᐃᑦ ᓄᑕᖅᑲᐃᑦ ᐊᒃᓱᕈᕐᔪᐊᖅᑎᓪᓗᒋᑦ ᐃᓚᐅᖃᑕᐅᔪᒪᓪᓗᑎᒃ, ᑭᓯᐊᓂ ᖁᕕᐊᓱᑦᑎᐊᓚᐅᖅᐳᑦ ᐱᙳᐊᖃᑕᐅᔪᓐᓇᕐᓂᖏᓐᓂ ᓵᓚᖃᕋᓱᐊᕐᓂᕐᒥᑦ ᑕᐃᒫᒃ ᐊᔪᕐᓇᙱᑎᑦᑎᒃᑲᓐᓂᓚᐅᖅᐳᖅ.

"ᓯᕗᓪᓕᖅᐹᖑᓪᓗᓂ ᐊᔪᕆᖅᓱᐃᖃᑕᐅᓯᒪᕗᖓ ᐊᒻᒪᓗ ᐊᔪᕐᓇᕆᓚᐅᖅᐸᕋ ᐱᒋᐊᓕᓵᖅᑎᓪᓗᖓ, ᑭᓯᐊᓂ ᐊᓕᐊᓇᐃᒡᓕᕙᓪᓕᐊᓚᐅᖅᐳᖅ ᓱᖏᐅᑎᕙᓪᓕᐊᓪᓗᒍ ᐊᒻᒪᓗ ᑕᐃᒪᐃᖏᓐᓇᕈᒪᕗᖓ."