ᐱᖓᓱᑦ ᐊᖑᑎᑦ ᓚᑭᐅᕗᑦ ᐃᓅᖕᒪᑕ ᑎᖕᒥᓲᒃᑯᑦ ᑲᑕᖃᑕᐅᓚᐅᖅᖢᑎᒃ ᖃᖓᑦᑕᕋᓱᐊᖅᖢᑎᒃ ᐅᖓᓯᒃᑐᒥᑦ ᐃᖃᓗᒃᓯᐅᕐᕕᖕᒥᑦ 100 ᒪᐃᔭ ᐅᐊᖕᓇᖓᓂ ᑲᖏᖅᖠᓂᐅᑉ ᑕᖅᑭᐅᓚᐅᖅᑐᒥ. ᑖᓐᓇ ᑎᖕᒥᓲᖅ Cessna 180 ᑎᖕᒥᓲᖅᑎᖃᖅᖢᓂ ᐊᑯᓂ ᑲᖏᖅᖠᓂᕐᒥᐅᑕᐅᓚᐅᖅᑐᒥᒃ ᓵᓐ ᒦᓕ, ᔭᓗᓇᐃᒥᐅᑕᐅᓕᖅᖢᓂ, ᐊᒻᒪ ᑖᒥ ᓵᑉ, ᐹᓂ ᑐᑐ ᑲᖏᖅᖠᓂᕐᒥᐅᑕᐃᑦ ᐃᑭᒪᑉᓗᑎᒃ.
ᓵᑉ ᓇᖕᒥᓂᖃᖃᑕᐅᑉᓗᓂ ᑕᐃᑲᓂ ᑲᒥᓗᑯᐊᕐᒥᒃ ᓇᔭᖓᓗ, ᐱᓚᔾᔨ.
ᒦᓕ, ᐅᑭᐅᓕᒃ 54-ᓂᒃ, ᑎᖕᒥᓲᖅᑎᐅᖃᑦᑕᖅᓯᒪᓕᖅᖢᓂ ᐅᑭᐅᓄᑦ ᐊᕙᑎᑲᓴᖕᓄᑦ, ᐅᖃᓚᐅᖅᐳᖅ ᐊᒡᔭᖅᓯᓚᐅᕋᒥ ᑐᑐᒥᒃ ᓵᑉᒥᒡᓗ ᐊᐅᒐᓯ 25-ᒥ ᑕᐃᑲᓂ ᓴᓂᐊᓂ ᐃᖃᓗᒃᓯᐅᕐᕕᐅᑉ, ᐊᐃᓕᓚᐅᖅᖢᓂᒋᒃ ᐊᖃᒍᑎᓪᓗᒍ.
ᐅᖃᓚᐅᖅᖢᓂᓗ ᖃᓄᐃᓚᐅᖏᒻᒪᑦ ᓯᓚ ᖃᖓᑦᑕᕆᐊᓕᖅᖢᑎᒃ ᑕᐃᑲᖓᑦ ᑕᓯᕐᒥᑦ.
“ᑕᐃᑲᖓᑦ ᖃᖓᑦᑕᖃᑦᑕᖅᓯᒪᓕᖅᐳᖓ ᐅᑭᐅᓄᑦ ᐊᒥᓱᓄᑦ ᐊᒻᒪ, ᐊᐅᒐᓯ 26-ᓂ, ᓯᓚᑦᓯᐊᖑᑉᓗᓂ, ᐅᐊᓕᕐᓂᖅᐸᓯᖕᒥᑦ ᐊᓄᕆᑉᓗᓂ, ᓄᕗᔭᖏᑦᖢᓂᓗ,” ᐅᖃᓚᐅᖅᐳᖅ ᒦᓕ.
“ᐃᖏᕐᕋᓯᒋᐊᕈᑎᖓ ᓄᖅᑲᕈᑎᖓᓗ ᐱᔭᕐᓂᖐᓐᓇᓚᐅᖅᖢᓂ ᐱᓇᓱᐊᕈᓯᓄᑦ ᑲᑕᓚᐅᖏᓐᓂᑉᑎᓐᓂ, ᖃᐅᔨᒪᖏᑦᑐᖓ ᑕᒪᓐᓇ ᐱᔾᔪᑎᒋᔭᐅᓯᒪᖕᒪᖔᑦ.
“ᑕᐃᒪᓐᓇ ᖃᓄᐃᖏᑦᓯᐊᖅᖢᑕ ᐱᓚᐅᕋᑉᑕ, ᖃᖓᑦᑕᕆᐊᓕᖅᖢᑕᓗ.”
ᒦᓕ ᐅᖃᓚᐅᖅᐳᖅ ᐃᓂᒃᓴᖃᓗᐊᕐᓇᖏᒻᒪᑦ ᖃᖓᑦᑕᕆᐊᖅᖢᓂ ᑲᒥᓗᑯᐊᒥᑦ ᑕᓯᕐᒥᑦ ᑎᖕᒥᓲᒃᑯᑦ ᑕᐃᒪᓐᓇ 'ᐃᖏᕐᕋᕆᐊᓕᕈᓐᓇᕐᓇᕐᒪᑦ 'ᐃᖏᕐᕋᒋᐊᖏᓪᓗᓂᓘᓐᓃᑦ ᖃᖓᑦᑕᕋᓱᐊᕐᓗᓂ.
“ᑕᐃᒪ, ᑕᐃᒪᓐᓇ ᓇᐅᒃᑰᕐᕕᒋᓂᐊᖅᑕᕐᓄᑦ ᑕᐅᑐᒡᓗᓂ ᑕᓯᕐᒥ ᖃᖓᑦᑕᕋᓱᐊᕐᓂᐊᕐᓗᓂ ᐊᒻᒪ, ᑕᒡᕙᓃᖏᒃᑯᕕᑦ ᑎᖕᒥᓲᕐᓗ ᖃᖓᑦᑕᕈᒪᑉᓗᓂ, ᑕᐃᒪᓐᓇ ᖃᒥᓪᓗᒍ ᑭᓯᐊᓂ.
“ᑭᓯᐊᓂ ᐃᒪᓐᓇᐃᒻᒪᑦ ᐃᒪᖅᑕᖃᓗᐊᖏᒻᒪᑦ ᑕᓯᕐᒥ, ᑕᐃᒪᓐᓇ ᑕᒡᕗᖓ ᑐᕌᕐᕕᐅᓂᐊᖅᑐᒧᑦ ᑐᕌᕐᓗᓂ ᑕᒡᕙᑐᐊᖑᖕᒪᑦ ᖃᖓᑦᑕᕐᓗᓂ ᑭᓯᐊᓂ.
“ᑕᒡᕗᖓ ᑎᑭᓐᓇᑉᑕ ᖃᓄᐃᖏᑦᖢᑎᒡᓗ ᓱᓇᑐᐃᓐᓇᐃᑦ, ᑕᐃᒪᓐᓇ ᖃᖓᑦᑕᕆᐊᖅᖢᖓᓗ ᐃᒫᓂᑦ ᖃᖓᑦᑕᖅᖢᑕ ᖁᒻᒧᐊᓕᖅᖢᑕᓗ. ᑕᐃᒪᓐᓇ ᖃᖓᑦᑕᕆᐊᕈᑎᑦ ᐊᒻᒧᒋᐊᕐᓗᒋᑦ, ᑎᖕᒥᓲᑉ ᓯᕗᓂᐊ ᐊᒃᓱᕈᖅᑎᖏᓐᓇᕐᓗᒍ ᓱᒃᑲᓕᓴᖅᑎᓐᓇᓱᐊᕐᓗᒍ, ᑕᐃᒪᓐᓇ ᖁᒻᒧᐊᒋᐊᕐᓇᕐᒪᑦ.
“ᐱᐊᓚᔪᒻᒪᕆᐊᓗᒃᑯᑦ ᐊᓯᔾᔨᑳᓪᓚᓚᐅᖅᐳᖅ, ᑭᓯᐊᓂ, ᐃᖅᑲᐅᒪᓂᕋ ᒪᓕᒃᖢᒍ, ᑕᒪᕐᒥᒃ ᐃᓱᖏᒃ ᐋᖅᑭᑐᐊᕐᒪᑎᒃ ᖁᒻᒧᐊᒋᐊᓕᖅᖢᖓᓗ, ᐃᑯᒪᖏᑦ ᓱᒃᑲᐃᓪᓕᑉᓗᑎᒃ ᐊᒻᒪ ᓄᓇᒥᒃ ᑕᑯᒃᔭᐅᔪᖃᓕᖅᖢᓂ ᓯᕗᓂᑉᑎᓐᓂ.”
ᒦᓕ ᐅᔾᔨᕈᓱᑲᐅᑎᒋᑉᓗᓂ ᑲᑕᒃᐸᓪᓕᐊᓂᖏᓐᓄᑦ, ᐅᖃᐅᑎᑉᓗᒋᓪᓗ ᐃᑭᒪᔪᒃ ᐊᒻᒪ ᖃᓄᐃᓕᐅᕆᐊᖅᖢᓂ ᑲᑉᐱᐊᓇᕆᔭᐅᑉᓗᓂ ᑕᒪᓐᓇ ᑕᒪᐃᓐᓄᑦ ᑎᖕᒥᓲᖅᑎᓄᑦ: ᑕᐃᒪᓐᓇ ᑲᑕᓕᖅᑐᑦ ᓇᓗᓇᖏᑦᖢᓂᓗ ᖃᓄᐃᓕᒋᐊᕈᓐᓇᖏᑦᖢᓂᓗ.
ᑕᐃᒪᓐᓇ ᓇᓚᐅᑦᓵᖅᖢᓂ ᓴᑲᓐᓯᑐᐃᓐᓇᐃᑦ ᐊᓂᒍᖅᐸᑕ ᑕᐃᒪᐅᓂᐊᕐᓂᖓᓄᑦ, ᒦᓕ ᐊᐅᓚᑦᔭᐃᑉᓗᓂ ᐃᓴᕈᖏᓐᓂᒃ ᑕᐃᒪᓐᓇ ᕿᖓᖓ ᑎᖕᒥᓲᑉ ᐊᐅᓚᖁᖏᑦᖢᒍ.
ᐃᓱᒪᓕᐅᕆᐊᖃᖅᖢᓂ ᕿᓚᒥᐊᓗᒃ, ᒦᓕ ᐊᒧᓯᑉᓗᓂ ᐃᓴᕈᖏᓐᓂᒃ ᐊᒻᒪ ᕿᖓᖓ ᑎᖕᒥᓲᑉ ᐊᒻᒧᐊᓕᖅᖢᓂ.
“ᓯᒡᔭ ᖄᖏᖅᖢᒍ, ᐊᒃᑐᖅᓯᒪᑉᓗᑕ ᓄᓇᒥᒃ ᐊᑕᐅᓯᐊᖅᖢᑕ ᓯᒡᔭᒨᑦᑐᖅ ᐅᔭᕋᒃ ᐊᒃᑐᖅᖢᒍ,” ᐅᖃᓚᐅᖅᐳᖅ. “ᑖᓐᓇ ᐃᒪᒃᑯᑦ ᒥᒍᑎᖓ ᓯᐊᕐᕆᔭᐅᑦ ᑕᓕᖅᐱᐊᓂ ᐊᔪᖅᓯᑦᖢᓂ ᓄᓇᒧᑦ ᑲᑉᐳᑎᑉᓗᓂ, ᐱᐊᓚᐃᓴᑦᓯᐊᖅᑐᒥᒃ ᑲᐃᕙᑦᖢᑕ ᓄᖅᑲᖅᖢᑕᓗ ᑕᑉᓯᓯᒪᑉᓗᑕ ᑯᔾᔭᖓᑉᓗᑕ.”
“ᑕᐃᒪᓐᓇ ᖃᖓᑕᓚᐅᖅᖢᑕ ᑯᔾᔭᖓᓕᖅᖢᑕᓗ ᓴᑲᓐᓯᑐᐃᓐᓇᐅᓚᐅᖅᐳᑦ ᐱᕕᒃᓴᖃᖅᑎᑕᐅᓂᖅᐳᑦ, ᑕᐃᒪ ᑖᒥ (ᓵᑉ) ᐊᒻᒪ ᐹᓂ (ᑐᑐ) ᖃᐅᔨᓚᐅᖅᑐᒃᓴᐅᖏᑉᐳᓪᓘᓐᓃᑦ ᖃᓄᐃᓕᖕᒪᖔᑉᑕ.”
ᒦᓕ ᐅᖃᓚᐅᖅᐳᖅ ᓵᑉ ᐊᓂᖅᑳᖅᖢᓂ, ᐃᓱᒫᓗᓚᐅᕋᒥ ᐃᑯᐊᓪᓚᑐᐃᓐᓇᕆᐊᖃᕐᓂᖓᓄᑦ, ᑐᑐ ᑐᖏᓕᐊᓂ ᐊᓂᑉᓗᓂ ᑭᖑᓪᓕᖅᐹᐅᓚᐅᖅᖢᓂᓗ ᒦᓕ.
“ᖃᓄᐃᑳᓪᓚᓚᐅᕋᑉᑕ ᕿᓚᒥᐊᓗᒃ, ᑕᒡᕙᐅᓚᐅᖅᖢᓂ ᐊᓂᒍᑲᐅᑎᒋᑉᓗᓂᓗ,” ᐅᖃᓚᐅᖅᐳᖅ. “ᑲᑕᒋᐊᓕᕋᑉᑕ; ᐅᔭᖃᑦ ᐊᓂᒍᒍᒪᓚᐅᖅᐸᒃᑲ ᓄᓇᑐᐃᓐᓇᖅ ᐋᓐᓂᕐᓇᖏᓐᓂᖅᓴᐅᖕᒪᑦ ᐅᔭᖃᓂᑦ; ᑎᖕᒥᓲᑉ ᐃᒐᓛᖓᓗ ᖃᒡᓕᑉᓗᓂ; ᑯᔾᔭᖓᓕᖅᖢᖓᓗ ᑕᑉᓯᓯᒪᑉᓗᖓ; ᓄᖅᑲᖅᖢᑕᓗ ᐊᒻᒪ ᑕᒪᑉᑕ ᐃᓅᑉᓗᑕ.”
ᒦᓕ ᐅᖃᓚᐅᖅᐳᖅ ᐊᓃᓕᖅᖢᓂ ᕿᒥᕐᕈᓕᖅᖢᓂᓗ ᑎᖕᒥᓲᒥᒃ ᓱᕋᒃᓯᒪᔪᒥᒃ, ᐅᐱᑦᓯᐊᓚᐅᖅᐳᖅ ᑕᒪᕐᒥᒃ ᐋᓐᓂᖅᓯᒪᕐᔪᐊᓚᐅᖏᒻᒪᑕ.
ᐅᖃᓚᐅᖅᖢᓂᓗ, ᑕᐃᒪᓐᓇ ᑲᑕᒃᑐᖃᕌᖓᑦ ᐱᐅᖏᓂᖅᓴᐅᖃᑦᑕᕋᓗᐊᕐᒪᑦ.
“ᑕᒪᕐᒥᒃ ᑖᒥᓗ In-Reachᖃᓚᐅᕋᒻᓄᑦ, ᑎᑎᕋᕈᓐᓇᖅᖢᑕ ᖁᒻᒧᐊᒃᑎᑕᐅᓯᒪᔪᒃᑰᖅᑐᒥᒃ ᐅᖃᓗᕕᖃᕐᓗᑕ,” ᐅᖃᓚᐅᖅᐳᖅ, “ᑕᐃᒪᓐᓇ ᐃᕐᓂᕋ ᑎᑎᕋᕐᕕᒋᑲᐅᑎᒋᑉᓗᒍ ᖃᐅᔨᒪᑉᓗᖓᓗ ᑖᑉᑯᐊ ᐃᑲᔪᖅᑎᐅᕙᒃᑐᑦ ᐊᑎᖃᖅᑐᑦ Joint Rescue Co-ordination Centre−ᑯᑦ ᖃᐅᔨᑲᐅᑎᒋᓚᐅᕐᒪᑕ ᑎᖕᒥᓲᒥᑦ ᓇᓗᓇᐃᒃᑯᑕᖓᓂᑦ ᑐᐊᕕᕐᓇᖅᑐᒃᑯᑦ ᑲᑕᖕᓂᖓᓄᑦ ᓇᓗᓇᐃᒃᑯᑕᖅ.”
“ᖃᐅᔨᒪᓕᕐᒪᑕ ᑲᑕᖕᓂᑉᑎᓐᓄᑦ, ᖃᓄᐃᖏᑦᖢᑕᓗ, ᐅᑎᓚᐅᖅᐳᒍᑦ ᑕᐃᑯᖓ ᐃᒡᓗᕐᔪᐊᖃᖅᑐᓄᑦ ᓯᑕᒪᓕᖕᒥᒃ ᕼᐊᑦᑕᒥᒃ ᐱᑉᓗᖓ ᐱᖁᑎᕗᑦ ᐊᒡᔭᓕᓚᐅᖅᐸᒃᑲ, ᖃᐅᔨᒪᓚᐅᖏᓐᓇᑉᑕ ᖃᓄᖅ ᐊᑯᓂᐅᑎᒋᔪᖅ ᑕᒡᕙᓃᓐᓂᐊᕐᒪᖔᑉᑕ.
ᓚᑭᐅᓚᐅᖅᐳᓪᓗ, ᒦᓕ ᐅᖃᓚᐅᖅᐳᖅ ᑲᖏᖅᖠᓂᕐᒥ ᐳᑭᖅᑕᓕᒃ ᕿᓂᖅᑎᖏᑦ ᐅᔭᕋᒃᑕᕆᐊᓄᑦ Agnico Eagle ᐅᖃᖃᑎᖃᖅᖢᑎᒃ ᖁᓕᒥᒎᓕᖅᑖᓚᐅᕐᒪᑕ ᐊᐃᒃᖠᖅᖢᑎᒃ ᐅᕙᑉᑎᓐᓂᒃ ᐃᑲᕋᑦ ᒪᕐᕉᒃ ᑲᑕᓚᐅᖅᖢᑕ.
“ᐊᓂᒍᖅᓯᒪᓕᕐᒪᑦ − ᕿᒥᕐᕈᑉᓗᒍ ᑎᖕᒥᓲᖅ ᓄᓇᒥ ᑲᑕᒃᑐᖅ − ᖁᕕᐊᓱᑦᓯᐊᓚᐅᖅᐳᒍᑦ ᖃᓄᐃᖏᑦᖢᑕ ᒥᑖᕈᑎᒋᓕᕋᑉᑎᒍ,” ᐅᖃᓚᐅᖅᐳᖅ, “ᐊᒻᒪ ᐅᑉᓗᑕᒫᑦ ᑲᑕᓚᐅᖅᖢᑕ, ᐃᓱᒪᓕᐅᖃᑦᑕᓚᐅᖅᐳᖓ ᖃᓄᐃᓕᐅᕆᐊᒃᑲᓐᓂᕈᓐᓇᓚᐅᕐᓂᒻᓂᒃ ᑲᑕᒐᔭᓚᐅᖏᓐᓂᑉᑎᓐᓂᒡᓗ, ᐃᓱᒪᖃᑦᑕᖅᖢᑕᓗ ᑐᖁᒐᔭᓚᐅᖅᑐᒃᓴᐅᒐᓗᐊᖅᐳᒍᑦ ᑕᒪᑉᑕ.”