ᐊᑐᕐᓂᖃᑦᓯᐊᖅᑐᒃᑯᑦ ᑲᑎᒪᖃᑎᒌᖕᓂᖅ ᑐᑭᓯᐅᒪᑦᓯᐊᖅᑎᑕᐅᓪᓗᓂ ᑲᑎᒪᓂᖅ ᐃᓚᒋᔭᐅᒋᐊᖃᖅᑐᑦ ᐱᖃᑎᒋᔭᐅᓗᑎᒃ ᑕᒪᕐᒥᒃ. ᐸᕐᓇᒃᓯᒪᑦᓯᐊᕐᓗᑎᒃ ᑐᑭᓯᐅᒪᑦᓯᐊᕐᓗᑎᒃ ᖃᓄᐃᓕᖓᓂᐊᕐᓂᖓᓄᑦ ᑕᒪᓐᓇ ᑲᑎᒪᒍᑕᐅᔪᖅ.
ᕿᒥᕐᕈᓗᑕ ᐊᕙᓗᒥᐅᑕᑦᑎᓐᓂᒃ, ᑕᒪᒃᑯᐊ ᐃᓄᓕᕆᓂᕐᒧᑦ ᐱᔾᔪᑎᖃᖅᑐᑦ ᐱᔭᕆᐊᑐᖕᒪᑕ ᐊᒃᑐᐊᖃᑦᑕᐅᑎᒐᓗᐊᖅᖢᑎᒃ; ᑲᑎᖓᖃᑦᑕᐅᑎᓪᓗᑎᒃ ᐊᓯᖏᓐᓄᑦ ᖃᓄᐃᓕᐅᕈᑕᐅᓂᐊᖅᑐᓄᑦ.
ᓱᕐᓗ ᐃᒪᓐᓇ, ᐅᔭᕋᖕᓂᐊᖅᑐᓕᕆᓂᕐᒧᑦ ᐅᖃᐅᓯᖃᕐᓂᐊᓕᕌᖓᑦᑕ ᐃᓱᒪᓇᖅᐳᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓄᓇᖁᑎᓂᒃ, ᐃᓄᐃᑦ ᓄᓇᖁᑎᖏᓐᓂᒃ, ᐊᕙᑎᒥᐅᑕᐃᑦ, ᐆᒪᔪᑦ ᐃᓄᐃᓪᓗ. ᐋᔩᖃᑎᒌᓕᕋᔭᖅᐳᑦ ᑖᒃᑯᐊ ᓄᓇᖁᑎᖃᖅᑐᓪᓗ ᐊᒻᒪ ᐃᓄᖏᑦ. ᑖᒃᑯᐊ ᐅᔭᕋᖕᓂᐊᕈᒪᔪᑦ ᓄᓇᒥ ᖃᐅᔨᒃᑲᐃᓂᐊᖅᐳᑦ ᐱᒍᒪᓂᕐᒥᖕᓄᑦ ᖃᐅᔨᓴᕆᐊᕐᓗᑎᒡᓗ ᖃᓄᑎᒋ ᐱᐅᑎᒋᔪᓂᒃ ᐊᖏᑎᒋᔪᒥᒡᓗ ᐱᓕᕆᕕᖃᕈᒪᖕᒪᖔᕐᒥᒃ.
ᓇᓂᓯᒍᑎᒃ ᐊᖏᔪᒥᒃ ᐱᒍᒪᔭᕐᒥᖕᓂᒃ ᐱᐅᔪᒥᒡᓗ, ᑐᒃᓯᕋᐅᑎᖃᓕᕋᔭᖅᐳᑦ ᖃᐅᔨᓴᕈᒪᓗᑎᒃ, ᖃᐅᔨᓴᕐᓂᐊᕐᓗᑎᒃ ᐊᒻᒪ ᐱᔪᓐᓇᐅᑎᑖᕋᓱᐊᕐᓂᐊᕐᓗᑎᒃ, ᓚᐃᓯᓐᓯᑖᕐᓂᐊᕐᓗᑎᒡᓗ ᐊᓯᖏᓐᓂᒡᓗ ᐱᒋᐊᖃᖅᑕᒥᖕᓂᒃ. ᑭᒃᑯᑐᐃᓐᓇᐃᑦ ᐃᓚᐅᓕᕐᓗᑎᒡᓗ ᖃᐅᔨᓴᖃᑕᐅᓗᑎᒃ ᐊᐱᖅᓱᖃᑦᑕᕐᓗᑎᒡᓗ ᖃᓄᖅ ᐱᒍᒪᔪᑦ ᐅᔭᕋᖕᓂᐊᕈᒪᔪᑦ ᐱᔾᔪᑎᒋᓪᓗᒋᑦ ᐊᒃᑐᖅᑕᐅᓂᐊᕐᒪᖔᕐᒥᒃ, ᐊᕙᑎᒥᐅᑕᐃᓪᓗ ᐆᒪᔪᐃᓪᓗ ᐊᒃᑐᖅᑕᐅᓂᐊᕐᒪᖔᑕ.
ᑕᐃᒪᓐᓇ ᐊᑐᕐᓂᖃᑦᓯᐊᕐᓂᐊᖅᐸᑦ ᐊᒥᓱᐃᖅᑕᕐᓗᑎᒃ ᑲᑎᒪᖃᑎᒌᒋᐊᖃᖅᐳᑦ ᖃᓄᖅ ᐅᔭᕋᖕᓂᐊᕈᒪᔪᑦ ᑭᒃᑯᑐᐃᓐᓇᕐᓂᒃ ᓴᖑᑎᑦᓯᓇᓱᐊᕈᓐᓇᖁᓪᓗᒋᑦ ᐱᖁᔭᓕᕆᔨᓪᓗ ᐊᑲᐅᖏᓕᐅᕈᑎᖃᖅᑎᑕᐅᑦᑕᐃᓕᓂᐊᕐᓂᖓᓄᓪᓗ ᐊᕙᑎᒥᐅᑕᐃᑦ, ᐆᒪᔪᐃᑦ ᐊᒻᒪ ᐃᒪᕐᒥᐅᑕᐃᑦ ᐃᓄᐃᓪᓗ. ᑲᑎᒪᓂᖅ ᑲᔪᓯᑦᓯᐊᖅᐸᑦ ᖃᓄᐃᖏᑦᑐᐃᓐᓇᖅᐸᓪᓗ, ᒪᑐᐃᖔᑦᓯᐊᖅᐸᓪᓗ ᑐᑭᓯᐅᒪᑎᑕᐅᑦᓯᐊᕐᓗᑎᒡᓗ ᐃᓄᐃᑦ ᐅᔭᕋᖕᓂᐊᕈᒪᔪᑦ ᑲᔪᓯᑎᑕᐅᓂᐊᖅᐳᑦ ᑐᑭᓯᐅᒪᑦᓯᐊᖅᑎᑕᐅᓗᑎᒡᓗ ᐸᕐᓇᐅᑎᖃᑦᓯᐊᕐᓗᑎᒡᓗ ᑎᑎᕋᖅᓯᒪᑦᓯᐊᖅᑐᓂᒃ ᒪᓕᒡᓗᑎᒃ ᓴᓐᖏᓂᖃᑦᓯᐊᕐᓗᓂᓗ ᐃᓄᐃᑦ ᐃᓚᐅᓂᕆᓂᐊᖅᑕᖏᑦ.
ᑕᐃᒪᓐᓇ ᐊᔪᕐᓇᖏᑦᑐᑯᓘᔮᖅᐳᖅ, ᑭᓯᐊᓂ ᐊᑐᓕᖅᑎᑕᐅᓂᐊᕐᓗᓂ ᐅᔭᕋᖕᓂᐊᕐᕕᖕᒥ, ᓴᓐᖏᓂᖃᖅᑐᓂᒃ ᓯᕗᓕᖅᑎᑕᖃᕆᐊᖃᖅᐳᖅ ᑐᑭᖃᑦᓯᐊᖅᑐᒃᑯᑦ ᑭᒃᑯᑐᐃᓐᓇᕐᓂᒃ ᑐᓴᖅᑎᑎᖃᑦᑕᖁᓪᓗᒋᑦ ᐱᖁᔭᓕᕆᔨᓄᓪᓗ ᑲᔪᓯᑦᓯᐊᕈᓐᓇᖁᓪᓗᒋᓪᓗ. ᐅᓗᕆᐊᓇᖅᑐᖃᖅᐳᖅ ᐱᔪᖃᑦᓯᐊᕈᓐᓇᖅᐳᕐᓗ ᐊᖏᓗᐊᖏᑦᑐᒥᒃ ᐊᖏᔪᒥᒡᓗ ᐱᓕᕆᐊᖃᕐᓂᐊᖅᑐᑦ ᐊᒻᒪ, ᑭᒃᑯᓕᒫᑦ ᐱᓕᕆᐊᕆᒋᐊᖃᖅᑕᒥᖕᓂᒃ ᐱᓕᕆᐊᖃᖅᐸᑕ, ᑮᓇᐅᔭᓕᐅᕈᑎᖃᑦᓯᐊᕈᓐᓇᖅᐳᑦ ᑕᒪᕐᒥᒃ.
ᖃᓄᑐᐃᓐᓇᖅ ᐊᑲᐅᓕᖅᑎᑎᔪᓐᓇᖅᐳᑦ ᑐᑭᓯᐅᒪᑦᓯᐊᖅᑎᑦᓯᓗᑎᒃ ᐃᓄᖕᓂᒃ ᑲᑎᒪᑎᓪᓗᒋᑦ, ᑕᑯᒃᓴᐅᑎᑦᓯᑎᓪᓗᒋᓪᓗ ᐅᔭᕋᖕᓂᐊᖅᑎᑦ ᖃᓄᐃᓕᐅᕐᓂᕐᒥᖕᓄᑦ ᑕᑯᔭᖅᑐᖅᑎᑦᓯᖃᑦᑕᕐᓗᑎᒡᓗ ᑭᒃᑯᑐᐃᓐᓇᕐᓂᒃ ᖃᓄᐃᓕᐅᕐᓂᕐᒥᖕᓄᑦ ᐊᐅᓚᑦᓯᓂᕐᒥᖕᓄᑦ ᐱᓕᕆᐊᒥᖕᓂᒃ.
ᑕᒫᓂ 1990 ᐱᒋᐊᓕᓵᖅᑎᓪᓗᒋᑦ ᓄᓕᐊᕋᓗ ᐅᔭᕋᖕᓂᐊᕐᕕᖕᒧᐊᖃᑕᐅᓚᐅᕋᓐᓄᑦ Lupin Mine -ᒧᑦ ᕼᐊᒻᓚᒃᑯᓐᓂᖔᖃᑕᐅᔪᓪᓗ ᑲᑎᒪᔨᑦ ᑕᑯᔭᖅᑐᖃᑕᐅᓪᓗᑎᒃ ᐅᔭᕋᖕᓂᐊᕐᕕᖕᒥᒃ ᓄᓇᐅᑉ ᐊᑖᓃᑦᑐᒥᒃ. ᐅᓗᕆᐊᓇᖅᑕᐃᓕᒪᒍᑎᓂᒃ ᐊᑐᕆᐊᖃᓚᐅᖅᐳᒍᑦ ᐅᔾᔨᖅᑐᑦᓯᐊᕆᐊᖃᕐᓂᕐᒥᒡᓗ ᐅᖃᐅᔾᔪᖅᑕᐅᓪᓗᑕ ᓄᓇᐅᑉ ᐊᑖᓄᐊᓚᐅᖏᓐᓂᑦᑎᓐᓂ. ᑕᐃᒪᓐᓇᓗ ᑕᑯᑎᑦᓯᔪᓐᓇᕐᒪᑕ ᐱᓕᕆᖃᑎᖃᑦᓯᐊᕈᒪᓂᕐᒥᒃ ᐃᓄᖕᓂᒃ ᐱᓕᕆᔪᓂᒃ ᐅᔭᕋᖕᓂᐊᕐᕕᖕᒥ.
ᐊᒻᒪᓗ, ᑐᑭᓯᐅᒪᑦᓯᐊᖅᑎᑦᓯᒋᐊᖃᖅᐳᓪᓗ ᒪᑐᐃᖔᑦᓯᐊᕐᓗᑎᒡᓗ ᓴᓐᖏᓂᖅᓴᒃᑯᑦ ᐱᓕᕆᖃᑎᒌᑦᓯᐊᖁᓪᓗᒋᑦ ᐋᖅᑭᐅᒪᔪᖃᖏᑉᐸᓪᓗ ᐋᖅᑭᐅᒪᑦᓯᐊᖅᑐᓂᒃ ᐱᓕᕆᐊᖃᖁᓪᓗᒋᑦ.
ᐃᓅᓯᖅ ᓱᑲᑦᑐᐊᓘᕗᖅ ᐱᔭᕆᐊᑐᓪᓗᓂᓗ ᐃᓚᐅᒋᐊᖃᖅᖢᑎᒡᓗ ᐊᒥᓱᑦ ᐃᓄᐃᑦ. ᓄᑕᕋᕗᑦ ᐃᒃᐱᖕᓂᐊᕐᓂᖃᕐᒪᑕ ᐊᖓᔪᖄᒥᖕᓂᑦ ᐸᕐᓇᐅᑎᖃᐃᓐᓇᖅᐸᒃᖢᑕᓗ ᓂᕿᖃᖅᑎᑎᔨᐅᓪᓗᑕᓗ ᐊᖓᔪᖄᖑᔪᒍᑦ, ᐊᓐᓄᕌᖃᖅᑎᑎᔨᐅᓪᓗᑕᓗ ᐃᒡᓗᖃᖅᑎᑎᔨᐅᓪᓗᑕᓗ, ᑭᓯᐊᓂ ᐱᓗᐊᖅᑐᒥᒃ ᓇᒡᓕᒋᔭᐅᒋᐊᖃᕐᒪᑕ ᐱᕈᖅᐸᓪᓕᐊᓂᖏᓐᓂ. ᐅᖃᓪᓚᖃᑎᒋᑦᓯᐊᖃᑦᑕᕆᐊᖃᖅᐸᕗᓪᓗ ᐃᓚᐅᑎᑕᐅᑦᓯᐊᕐᓗᑎᒡᓗ ᐸᕐᓇᐅᑎᑦᑎᓐᓂ ᖃᐅᔨᒪᑦᓯᐊᖅᑎᑕᐅᓗᑎᒡᓗ ᐃᓅᖃᑎᒋᑦᓯᐊᕈᒪᒐᑦᑎᒍ.
ᑕᐃᒪᓐᓇ 'ᑐᑭᖃᑦᓯᐊᕐᓂᖅ' ᑐᑭᖃᕐᒪᑦ.
ᐱᕈᖅᐸᓪᓕᐊᓪᓗᓂ ᖃᐅᔨᒪᑦᓯᐊᕐᓗᓂᓗ ᑐᑭᓯᐅᒪᑦᓯᐊᕐᓗᓂᓗ, ᖃᓄᐃᓕᐅᖃᑎᒋᔭᐅᓯᒪᕗᑦ ᐃᓚᐅᑎᑕᐅᑦᓯᐊᕐᓗᑎᒃ ᐃᓚᐅᑦᓯᐊᖅᑎᑎᓂᕐᓗ ᐃᓚᒥᖕᓂᒃ ᑐᑭᖃᕐᒪᑦ.
ᑕᐃᒪᓐᓇᐃᖏᓐᓇᖁᔨᓇᕋᓗᐊᖅᐳᖅ, ᑭᓯᐊᓂ ᑕᐃᒪᓐᓇᐃᖏᓐᓇᕈᓐᓇᖏᒻᒪᑕ, ᐱᐅᔪᓂᒃ ᓴᖅᑭᑎᑎᔪᓐᓇᖅᐳᒍᑦ, ᐱᐅᖏᑦᑐᓂᒡᓗ. ᐃᓱᒪᒃᓴᖅᓯᐅᑦᓯᐊᕈᑦᑕ, ᑐᑭᖃᑦᓯᐊᖅᑐᒃᑯᑦ ᐱᕈᖅᐸᓪᓕᐊᑎᑎᔪᓐᓇᖅᐳᒍᑦ.