ᓄᓇᖅᑲᑎᒌᖕᓂᖅ ᐃᒃᐱᖕᓇᑦᑎᐊᖅᓯᒪᔪᖅ ᐃᖅᑲᐅᒪᓐᓇᐅᔫᑉ ᐅᑉᓘᑉ ᐱᓇᓱᐊᕈᓯᖓᓂᒃ ᑲᖏᖅᖠᓂᕐᒥ ᓖᔾᔭᓐᒥᐅᑕᑦ ᑐᓂᓯᓚᐅᖅᑎᓪᓗᒋᑦ ᐳᑭᖅᑕᓕᖕᓄᑦ ᑮᓇᐅᔭᒃᓴᒥᒃ $11,000-ᒥᒃ ᑐᓂᕐᕈᑎᒋᑉᓗᒍ ᑭᕙᓪᓕᕐᒥ ᖁᕕᐊᓱᖕᓇᒥ ᓂᕿᑖᖅᑎᑦᑎᖃᑦᑕᖅᑐᓄᑦ ᓄᕕᐱᕆ 9-ᒥ.
ᐊᖏᓂᖅᐹᖑᔪᖅ ᓖᔾᔭᓐᑯᑦ ᐃᓗᐃᑦᑐᒃᑯᑦ ᑐᓂᕐᕈᑎᒋᖃᑦᑕᖅᓯᒪᔭᖏᓐᓂᒃ, ᑕᐃᒪᓐᓇ ᐅᖃᖅᖢᓂ ᐊᑯᓂ ᓖᔾᔭᓐᑯᓐᓄᑦ ᐃᓚᒋᔭᐅᖃᑕᐅᓕᖅᑐᖅ ᐊᒻᒪᓗ ᑲᖏᖅᖠᓂᕐᒥ ᓖᔾᔭᓐᒥ ᐊᖓᔪᖅᑳᖑᓚᐅᖅᓯᒪᔪᖅ ᑎᐅᕆᓐ ᓂᑯᓪ.
“ᑐᓂᓯᒐᔪᒃᑐᒍᑦ ᐃᖅᑲᐅᒪᓇᐅᔫᑉ ᐅᑉᓘᑉ ᑐᖔᓂ. ᓇᓗᓇᐃᒃᑯᑕᐅᔪᖅ ᐱᓕᕆᓇᓱᖃᑦᑕᕋᑉᑕ ᐱᕈᖅᑎᑦᑎᓇᓱᒃᖢᑕ ᐃᑲᔪᖅᑐᐃᑉᓗᑕᓗ ᐱᒻᒪᕆᐅᔪᒃᑯᑦ ᖃᓄᐃᓕᐅᕈᑕᐅᓇᓱᒃᑐᓂᒃ ᑭᕙᓪᓕᕐᒥ,” ᑕᐃᒪᓐᓇ ᐅᖃᖅᖢᓂ.
ᓂᑯᓪ ᐅᖃᖅᖢᓂ ᐱᒻᒪᕆᐊᓗᒎᖅ ᓖᔾᔭᓐᑯᑦ ᑕᑯᒃᓴᐅᓇᓱᖃᑦᑕᕆᐊᖃᕐᓂᖏᓐᓄᑦ ᓄᓇᓕᖕᒥ ᐃᓚᐅᖃᑕᐅᓂᖏᓐᓄᑦ.
ᐅᖃᖅᖢᓂ ᒫᓐᓇᐅᔪᕉᖅ ᑮᓇᐅᔭᖃᑦᑎᐊᕐᓇᙱᑦᑐᖅ ᐊᒻᒪᓗ ᑮᓇᐅᔭᖃᑦᑎᐊᕐᓇᔾᔮᙱᑦᑐᒃᓴᐅᑉᓗᓂ ᐊᑯᓂ ᑎᒥᖁᑎᒋᔭᐅᔪᒃᑯᑦ ᑲᖏᖅᖠᓂᕐᒥ ᐊᒻᒪᓗ ᑭᕙᓪᓕᓗᒃᑖᒥ, ᐊᒻᒪᓗ ᓖᔾᔭᓐᑯᑦ ᐊᐅᓚᑦᑎᔨᖏᑦ ᑲᑎᒪᔩᑦ ᐃᒃᐱᒍᓱᒃᖢᑎᒃ ᓖᔾᔭᓐᑯᑦ ᐃᑲᔪᕈᓐᓇᕋᓱᒋᑉᓗᒋᑦ ᑲᒪᕙᓪᓕᐊᔪᓐᓇᕐᓂᕐᒧᑦ ᖃᑉᓯᑲᓪᓚᖕᓂᒃ ᐃᖢᐊᖏᓕᐅᕈᑕᐅᖃᑦᑕᖅᑐᓂᒃ ᐱᔾᔪᑕᐅᖃᑦᑕᖅᑐᓂᒡᓗ ᐅᔾᔨᕆᔭᖏᓐᓂᒃ.
“ᑕᐃᒪᐃᑦᑐᖅ ᓱᓇᑐᐃᓐᓇᒃᑯᑦ ᐃᑲᔪᖅᑐᐃᓂᕐᒧᑦ ᐱᙳᐊᖅᑎᓂᒃ ᐅᔾᔨᖅᑐᕐᓂᕐᒧᓪᓗ ᐊᖏᓂᖅᓴᓂᒃ ᐱᒻᒪᕆᐅᓂᖅᓴᐅᔪᓂᒃ ᖃᓄᐃᓕᐅᕈᑕᐅᔪᒪᔪᓂᒃ ᐱᑕᖃᙱᑦᑐᓂᒃ ᑭᕙᓪᓕᕐᒥ, ᓲᕐᓗ ᐃᓐᓇᑐᖃᐅᓯᕝᕕᒃᓴᖅ ᑭᕙᓪᓕᕐᒥ,” ᑕᐃᒪᓐᓇ ᐅᖃᖅᖢᓂ ᓂᑯᓪ. “ᓂᕆᐅᑦᑎᐊᖅᑐᒍᑦ ᐃᑲᔪᖃᑕᐅᓂᐊᕐᓂᕐᒧᑦ ᑲᒪᕙᓪᓕᐊᓂᕐᒧᑦ ᐃᖢᐊᖏᓕᐅᕈᑕᐅᔪᓂᒃ.”
ᓂᑯᓪ ᐅᖃᖅᖢᓂ ᑲᖏᖅᖠᓂᕐᒥᒎᖅ ᓖᔾᔭᓐ ᐊᔾᔨᐅᙱᑦᑑᙱᑦᑐᖅ ᐊᒃᓱᕈᕐᓇᖅᑐᒃᑰᖃᑦᑕᕐᒥᖕᒪᑕ ᐊᓯᖏᑦᑎᑐᑦ ᓖᔾᔭᒋᔭᐅᕙᒃᑐᑎᑐᑦ ᑲᓇᑕᒥ, ᑭᓯᐊᓂ ᓂᕆᐅᖕᓂᖃᑦᑎᐊᖅᑐᖅ ᓯᕗᓂᒃᓴᒥ.
“ᑲᑎᒪᔨᖃᕋᑉᑕ ᐃᓐᓇᐅᓗᐊᙱᑦᑐᓂᒃ ᐊᒻᒪᓗ ᐊᔾᔨᒌᙱᑦᑑᑕᐅᔪᓂᒃ ᐊᒻᒪᓗ, ᐃᓱᒪᑦᑎᐊᕐᓂᒃᑯᑦ, ᐅᓇᑕᖅᑐᒃᓴᓂ ᐃᓚᐅᖃᑕᐅᖃᑦᑕᖅᓯᒪᔪᑦ ᐃᓚᐅᖃᑕᐅᖃᑦᑕᖅᓯᒪᖕᒪᑕ, ᑲᓇᑕᒥ ᐅᓇᑕᖅᑐᒃᓴᙳᐊᓂᒃ ᐃᓚᐅᖃᑕᐅᓯᒪᒍᑎᒃ, ᐳᑭᖅᑕᓕᐅᖃᑦᑕᖅᓯᒪᓂᑰᒍᑎᒃ ᐅᕝᕙᓘᓐᓃᑦ ᐅᓇᑕᖅᑐᒃᓴᓪᓚᑦᑖᓂᒃ ᐃᓚᐅᖃᑕᐅᖃᑦᑕᖅᓯᒪᒍᑎᒃ.
“ᑕᒪᓐᓇ ᐱᒻᒪᕆᐊᓗᒃ ᐊᒻᒪᓗ ᑲᓇᑕᒥ ᑎᒥᖁᑎᒋᔭᐅᑎᓪᓗᑕ, ᐱᓕᕆᑦᑎᐊᕆᐊᖃᕐᓂᖅ ᐃᖅᑲᐅᒪᓂᒃᑯᑦ ᐊᒻᒪᓗ ᐅᐱᒍᓱᖕᓂᖅ ᐅᓇᑕᖅᑐᒃᓴᕕᓂᕐᓂᒃ... ᑕᒪᓐᓇ ᑕᒡᕙ ᑐᕌᒐᕆᔭᖅᐳᑦ - ᐱᓕᕆᔪᒪᓂᕆᔭᖅᐳᑦ - ᑕᐃᒪᓐᓇ ᐱᓕᕆᔪᒪᔪᒍᑦ ᐊᑯᓂ ᓯᕗᓂᒃᓴᒥ.”
ᑮᓇᐅᔭᒃᓴᖅ ᑐᓂᕐᕈᑕᐅᓚᐅᖅᑐᖅ ᑐᓂᓯᑉᓗᓂ ᑭᓕ ᖃᓗᔾᔭᖅ ᑭᒡᒐᖅᑐᐃᑉᓗᓂ ᓖᔾᔭᓐᒥᒃ ᐊᒻᒪᓗ ᑐᓂᕐᕈᑎᒋᑉᓗᓂᐅᒃ ᐳᑭᖅᑕᓕᒃ ᐅᕐᓪ ᓕᐸᓛᒃᒧᑦ ᐳᑭᖅᑕᓕᒃᑯᓐᓂᙶᖅᖢᓂ.
ᖃᓗᔾᔭᖅ ᐅᖃᖅᖢᓂ $5000-ᒎᖅ ᑕᒡᕙᙵᖅ ᑐᓂᕐᕈᑕᐅᔪᒥᒃ ᑲᖏᖅᖠᓂᕐᒦᓐᓂᐊᖅᑐᖅ, ᐊᑐᓂ ᐊᓯᖏᑦ ᐊᕐᕕᓂᓖᑦ ᓄᓇᓖᑦ ᑭᕙᓪᓕᕐᒥ ᑐᓂᔭᐅᓂᐊᖅᖢᑎᒃ $1,000.-ᒥᒃ.
ᐅᖃᖅᖢᓂ ᑲᖏᖅᖠᓂᕐᒥᒎᖅ ᓖᔾᔭᓐ ᖁᕕᐊᓱᑦᑎᐊᓲᖅ ᑐᓂᓯᔪᓐᓇᕌᖓᒥ ᓄᓇᓕᖕᒧᑦ ᐱᔪᓐᓇᕐᓂᓗᒃᑖᒃᑯᑦ ᐅᑭᐅᑉ ᐃᓗᐊᓂ.
“ᑐᓂᓯᒐᔪᒃᑐᒍᑦ ᐅᑭᐅᑉ ᐃᓗᐊᓂ ᑎᑎᖅᑲᖅᑖᕋᔪᒃᑲᑉᑕ ᐃᑲᔪᖅᑕᐅᔪᒪᔪᓂᒃ,” ᑕᐃᒪᓐᓇ ᐅᖃᖅᖢᓂ ᖃᓗᔾᔭᖅ. “ᐊᓕᐊᓇᐃᓚᐅᖅᑐᖅ ᑐᓂᓯᔪᓐᓇᓚᐅᕋᑉᑕ ᐃᖅᑲᐅᒪᓇᐅᔫᑉ ᐅᑉᓘᑉ ᖃᓂᒋᔭᑦᑎᐊᖓᓂᒃ, ᑖᒻᓇ ᐱᒻᒪᕆᐅᓂᖅᐹᖑᖕᒪᑦ ᐅᑉᓗᖅ ᓖᔾᔭᓐᒥᐅᑕᐅᔪᓄᑦ.”
ᓖᔾᔭᓐ ᐊᖓᔪᖅᑳᖓ ᐱᓛᔾᔨ ᓴᕐᑉ ᐊᐅᓪᓚᖅᓯᒪᓚᐅᕐᒪᑦ, ᑕᐃᒪᐃᒻᒪᑦ ᐊᖓᔪᖅᑳᑉ ᑐᖏᓕᖓ ᒪᑯᓯ ᕙᐃᔭᑦ ᐸᕐᓇᐃᓚᐅᖅᑐᖅ ᐃᖅᑲᐅᒪᓇᐅᔫᑉ ᐅᑉᓗᖓᓂᒃ ᑲᑎᓐᓂᐅᓂᐊᖅᑐᖅ, ᑕᐃᒪᓐᓇ ᐅᖃᖅᖢᓂ.