ᑲᖏᖅᖠᓂᐅᑉ ᖃᑉᑎᕆᔨᖏᑦ ᐊᑭᓕᖅᑐᖅᑕᐅᙱᖦᖢᑎᒃ ᐱᓕᕆᕙᒃᑐᑦ ᐅᖃᓪᓚᒋᐊᖅᑐᖅᓯᒪᓚᐅᖅᑐᑦ ᐃᑭᑦᑐᖃᖅᑎᑦᑎᑦᑕᐃᓕᒪᓂᕐᒧᑦ ᐃᓕᓐᓂᐊᖅᑐᓄᑦ ᑲᖏᖅᖠᓂᕐᒥ ᐃᑭᑦᑐᖃᖅᑎᑦᑎᑦᑕᐃᓕᒪᓂᕐᒧᑦ ᐱᓇᓱᐊᕈᓯᖅ ᑐᕌᖓᓂᖃᓚᐅᖅᑎᓪᓗᒍ ᓄᓇᓕᖕᒥ ᐅᑭᐅᓖᑦ 7-ᒥ 13-ᒧᑦ.
ᑲᖏᖅᖠᓂᕐᒥ ᖃᑉᑎᕆᔨᒃᑯᑦ ᐊᖓᔪᖅᑳᕐᔪᐊᖓ ᒪᑯᓯ ᕙᐃᔭᑦ ᐅᖃᓚᐅᖅᑐᖅ ᑕᓪᓕᒪᒡᒎᖅ ᖃᑉᑎᕆᔩᑦ ᐅᖃᓪᓚᓚᐅᖅᑐᑦ ᐃᓕᓐᓂᐊᖅᑐᓄᑦ ᓯᕗᓕᖅᑎᒋᔭᐅᑉᓗᓂ ᑲᑦᑐᓕᒃ ᑕᑎ - ᖃᕝᕖᑦᑐᖅ.
"ᐃᑭᑎᑦᑎᑦᑕᐃᓕᒪᓂᕐᒧᑦ ᐃᑲᔫᑏᑦ ᐃᑲᔪᖅᐹᓪᓕᖅᓯᒪᔫᔭᖅᑐᑦ ᐃᑭᑦᑐᖃᕋᔪᙱᓐᓂᖅᓴᐅᓕᖅᑎᓪᓗᒍ, ᑕᒫᓂᑐᐃᓐᓇᐅᙱᑦᑐᖅ ᐅᑭᐅᖅᑕᖅᑐᒥ ᑭᓯᐊᓂᓕ ᑲᓇᑕᓗᒃᑖᒥ," ᑕᐃᒪᓐᓇ ᐅᖃ
Photo courtesy Mark Wyatt
ᖅᖢᓂ ᕙᐃᔭᑦ.
ᐅᖃᖅᖢᓂᓗ ᖁᔭᓕᓯᒪᑦᑎᐊᖅᑐᕉᖅ ᐱᓕᕆᓯᒪᓂᖏᓐᓄᑦ ᖃᑉᑎᕆᔩᑦ ᐃᑲᔪᐃᓐᓇᕐᒪᑕ ᖃᑉᑎᕆᔨᒃᑯᑦ ᖃᓄᐃᓕᐅᖅᑎᑦᑎᕈᓘᔭᖅᑎᓪᓗᒋᑦ ᐃᑭᑦᑐᖃᖅᑕᐃᓕᒪᑎᑦᑎᓂᕐᒧᑦ ᐱᓇᓱᐊᕈᓯᕐᒥ.
"ᑲᑦᑐᓕᒃ (ᑕᑎ-ᖃᕝᕖᑦᑐᖅ) ᐱᓕᕆᑦᑎᐊᖅᑐᒻᒪᕆᐊᓘᓚᐅᖅᑐᖅ ᓄᑕᖅᑲᓄᑦ ᐅᖃᓪᓚᒋᐊᖅᑐᖅᓯᒪᑎᓪᓗᒍ ᑕᒡᕙᓂ ᐅᑭᐅᒥ," ᑕᐃᒪᓐᓇ ᐅᖃᖅᖢᓂ. "ᐅᖃᖃᑎᖃᑦᑎᐊᖃᑦᑕᓚᐅᖅᑐᖅ ᓄᑕᖅᑲᓂᒃ ᐊᒻᒪᓗ ᐃᓄᐃᑦ ᓵᖓᓂᒃ ᐅᖃᓪᓚᑦᑎᐊᖅᖢᓂ ᐃᓗᐃᑦᑐᒃᑯᑦ."
ᖃᑉᑎᕆᔩᑦ ᐅᖃᓪᓚᓚᐅᖅᑐᑦ ᐃᓕᓐᓂᐊᖅᑐᓄᑦ ᓕᐅ ᐅᓴᒃ ᐃᓕᓐᓂᐊᕐᕕᖕᒥ ᑕᒡᕙᓂ ᐅᑭᐅᒥ ᑕᒪᓐᓇ ᑕᐃᒎᓯᓕᒃ ᐃᒪᓐᓇ, ᑕᑯᒋᐊᕆᑦ, ᑐᓵᒋᑦ ᐊᒻᒪᓗ ᐃᓕᑦᑎᒋᑦ, ᑕᐃᒪᓐᓇ ᐅᖃᖅᖢᓂ ᕙᐃᔭᑦ.
"ᐱᔾᔪᑎᖃᖅᑐᖅ ᑕᑯᒋᐊᖃᑦᑕᕆᐊᖃᕐᓂᕐᒧᑦ ᐃᑭᑦᑐᖃᖅᑎᓪᓗᒍ ᐱᔾᔪᑕᐅᕙᒃᑐᓂᒃ, ᑐᓵᓇᓱᒋᐊᖃᖃᑦᑕᕐᓂᕐᒧᓪᓗ ᖁᖁᐊᖅᑐᓂᒃ, ᐃᓕᑦᑎᔭᕆᐊᖃᕐᓂᕐᒧᓪᓗ ᖃᓄᖅ ᖃᑉᑎᕆᓇᔭᕐᓂᕐᒧᑦ, ᐊᒻᒪᓗ ᐃᓕᑦᑎᓂᖅ ᖃᓄᖅ ᐊᓂᔭᕆᐊᖃᕋᔭᕐᓂᕐᒧᑦ ᐃᒡᓗᒋᔭᕐᒥ ᐃᑭᓕᕐᓂᖅᐸᑦ," ᑕᐃᒪᓐᓇ ᐅᖃᖅᖢᓂ.
ᕙᐃᔭᑦ ᐅᖃᖅᖢᓂ ᐃᓕᓐᓂᐊᕐᕕᖕᓄᒡᒎᖅ ᐳᓚᕋᕋᔪᒃᑐᑦ ᐃᑭᑦᑐᖃᖅᑕᐃᓕᒪᑎᑦᑎᓂᕐᒧᑦ ᐱᓇᓱᐊᕈᓯᐅᓕᕌᖓᑦ.
ᐅᑭᐅᑉ ᐃᓗᐊᓂ ᓄᑕᖅᑲᑦ ᐳᓚᕋᓲᑦ ᖃᑉᑎᕆᔨᒃᑯᑦ ᐱᓕᕆᕝᕕᖓᓄᑦ ᖃᓄᐃᑦᑑᖕᒪᖔᑦ ᑕᑯᔭᖅᑐᖅᖢᑎᒃ ᐊᒻᒪᓗ ᑕᐃᑲᓃᑎᓪᓗᒋᑦ ᖃᑉᑎᕆᔩᑦ ᐅᖃᓪᓚᓲᑦ ᓄᑕᖅᑲᓄᑦ ᐃᑭᑎᑦᑎᑦᑕᐃᓕᒪᔭᕆᐊᖃᖃᑦᑕᕐᓂᐅᑉ ᒥᒃᓵᓄᑦ.
ᖃᑉᑎᕆᔨᒃᑯᑦ ᐱᓕᕆᕝᕕᖓ ᒪᑐᐃᖓᓚᐅᕐᒥᔪᖅ ᐅᑭᐅᓖᑦ 13-ᒥ ᑭᓇᑐᐃᓐᓇᖅ ᑕᑯᔭᖅᑐᐃᔪᓐᓇᖁᑉᓗᒍ. ᑕᐃᑲᓂ ᐅᖃᓪᓚᒃᑐᖃᖃᑦᑕᓚᐅᖅᑐᖅ, ᕿᒥᕐᕈᔭᐅᑉᓗᓂᓗ ᐱᓕᕆᕝᕕᖓ, ᐊᒧᔭᒃᓴᓂᒡᓗ ᓂᐅᕕᐊᒃᓴᖃᖃᑦᑕᖅᖢᑎᒃ ᐊᒻᒪᓗ ᓂᕆᑎᑦᑎᕙᒃᖢᑎᒃ.
ᐊᒻᒪᓗᑦᑕᐅᖅ, ᕙᐃᔭᑦ ᐅᖃᖅᖢᓂ ᖃᑉᑎᕆᔨᒃᑯᑦ ᕿᓂᕐᒪᑕ ᓄᑖᓂᒃ ᖃᑉᑎᕆᔨᙳᕈᒪᓇᔭᖅᑐᓂᒃ.
"ᐃᑭᑎᑦᑎᑦᑕᐃᓕᒪᔭᕆᐊᖃᖃᑦᑕᕐᓂᖅ ᐱᒻᒪᕆᐊᓗᒃ ᐃᑭᑎᑦᑎᑦᑕᐃᓕᒪᓂᖅ ᐃᑭᑦᑐᖃᖅᑳᖅᑎᓐᓇᒍ ᐱᐅᓂᖅᓴᐅᖕᒪᑦ ᖃᑉᑎᕆᔭᕆᐊᖃᕐᓂᐅᖓᓂᒃ," ᑕᐃᒪᓐᓇ ᐅᖃᖅᖢᓂ.