ᐊᒥᓱᑦ ᐃᓄᐃᑦ ᑕᐅᑐᕐᕉᖃᑦᑕᖅᑐᑦ ᖃᑯᒍᑭᐊᖅ ᖁᕕᐊᒋᔭᒥᓂᒃ ᐱᓕᕆᐊᖃᕈᒪᓕᕈᒫᕐᓂᕐᒧᑦ ᑮᓇᐅᔾᔭᒃᓴᕈᑎᒋᓕᕐᓗᒍᓗ, ᔪᕗᕆ ᖃᓗᔾᔭᖅ ᑲᖏᖅᖠᓂᕐᒥᐅᑕᖅ ᖃᓂᓪᓕᕙᓪᓕᐊᔪᖅ ᑐᕌᒐᕆᔪᒪᔭᕐᒥᓄᑦ.
Hᐊᒻᓚᒃᑯᑦ ᐱᕙᓪᓕᐊᔪᓕᕆᔨᖓ, ᖃᓗᔾᔭᖅ ᐅᓐᓄᒃᑯᑦ ᐊᒻᒪᓗ ᐱᓇᓱᐊᕈᓯᐅᑉ ᓄᙳᐊᓂ ᖁᑭᐅᑎᓂᒃ ᑲᒪᖃᑦᑕᖅᑐᖅ ᓇᖕᒥᓂᖅ ᐱᓕᕆᐊᕆᓕᖅᑕᒥᓂᒃ ᑲᒪᑉᓗᓂ, KAL-SHOT-ᒥᒃ ᑕᐃᔭᐅᔪᖅ.
ᖃᓗᔾᔭᖅ, 42-ᓂᒃ ᐅᑭᐅᓕᒃ, ᐅᖃᖅᖢᓂ ᒪᑐᐃᓚᐅᖅᑕᖓᒎᖅ ᓄᑖᖅ ᓇᖕᒥᓂᖅᑖᕆᔭᖓ ᒪᕐᕉᒃ ᑕᖅᑮᒃ ᐱᐊᓂᒃᓯᒪᓕᖅᑑᒃ. ᐅᖃᖅᖢᓂ ᓚᐃᓴᓐᓯᖃᑦᑎᐊᓕᖅᑐᕉᖅ ᒐᕙᒪᑐᖃᒃᑯᑎᒍᑦ ᖁᑭᐅᓯᕆᔨᐅᓂᕐᒧᑦ ᐊᒻᒪᓗ ᐃᓄᖕᓂᒃ ᑐᓴᖅᑎᑦᑎᕙᓪᓕᐊᓕᖅᖢᓂ ᐱᔨᑦᓯᕋᐅᑎᒋᔪᓐᓇᖅᑕᖏᓐᓂᒃ, ᖁᑭᐅᑎᓕᐅᕈᓐᓇᕐᓂᕐᒥᒃ ᐊᒻᒪᓗ ᐋᖅᑭᒃᓱᐃᔪᓐᓇᖃᑦᑕᕐᓂᕐᒥᒃ, ᖄᓕᖅᑐᐃᔪᓐᓇᕐᓂᕐᒥᒃ ᐊᒻᒪᓗ ᒥᙳᐊᖃᑦᑕᕐᓂᕐᒥᒃ ᖁᑭᐅᑎᓂᒃ.
Darrell Greer/NNSL photo
"ᖁᑭᐅᓯᕆᖃᑦᑕᖅᓯᒪᒐᒪ ᐃᓅᓯᓗᒃᑖᒻᓂᒃ," ᑕᐃᒪᓐᓇ ᐅᖃᖅᖢᓂ ᖃᓗᔾᔭᖅ.
"ᕕᓂᐲᒃᒧᑦ ᓅᓚᐅᖅᓯᒪᒐᒪ ᓴᓇᔭᖅᑐᖅᖢᖓ ᑕᐃᑲᓂ ᓴᓇᕝᕕᒐᓂ ᐃᓕᓐᓂᐊᖅᑎᑕᐅᓚᐅᕋᒪ ᖃᓄᖅ ᑕᑭᔪᓂᒃ ᖁᑭᐅᑎᓂᒃ ᓴᓇᔪᓐᓇᕐᓂᕐᒧᑦ.
"ᐊᓕᐊᓇᐃᒋᑦᑎᐊᖅᑕᕋ, ᑕᐃᒪᐃᒻᒪᑦ ᖁᕕᐊᒌᓐᓇᖅᑕᕋ ᑕᐃᒪᙵᓂᓗᒃᑖᖅ."
ᖃᓗᔾᔭᖅ ᐅᖃᖅᖢᓂ ᐊᒥᓲᔪᒡᒎᖅ ᖁᑭᐅᑏᑦ ᑭᕙᓪᓕᕐᒥ ᐊᑐᕐᓂᑰᓯᒪᓕᖅᑐᑦ, ᓲᕐᓗ ᐊᑐᖅᑕᐅᒐᔪᓗᐊᒧᑦ ᓄᑕᐅᙱᓕᖅᑐᑦ.
ᐅᖃᖅᖢᓂ ᑕᐃᒪᐃᑦᑐᖃᖅᑎᓪᓗᒍᒎᖅ ᖁᑭᐅᑎᑦ ᐃᒍᑉᑎᖃᑦᑕᖅᑕᖏᑦ, ᓄᑖᒥᒃ ᖁᑭᕆᐊᕐᕕᖓᓂᒃ ᐃᓕᓯᑉᓗᓂ ᓴᙱᓂᖓ ᒪᓕᒃᖢᒍ ᖁᑭᐅᑎᖃᖅᑑᑉ ᐱᔪᒪᔭᖓ. ᐱᐊᓂᒃᑳᖓᒥ, ᖃᐅᔨᓴᖅᐸᒃᑕᖏᑦ ᓈᒻᒪᑦᑎᐊᕐᒪᖔᑕ ᖁᑭᐅᑎᖃᖅᑐᕐᓗ ᐃᖅᑯᒃᓱᓂᐊᕐᒪᖔᑦ ᑕᐃᒪᐃᓕᐅᖁᔨᒃᐸᑦ ᖁᑭᐅᑎᓕᒃ.
"ᐱᓕᕆᐊᑦ ᓄᖅᑲᙱᓐᓇᖅᓯᒪᔪᑦ ᑕᐃᒪᙵᓂ ᓇᖕᒥᓂᖁᑎᒐ ᒪᑐᐃᓚᐅᖅᑳᖅᑎᓪᓗᒍ ᐅᑉᓗᒥᒧᑦ," ᑕᐃᒪᓐᓇ ᐅᖃᖅᖢᓂ. "ᑲᒪᒋᔭᕆᐊᖃᖅᑕᒃᑲ ᑕᐃᒪᐅᔪᑦ ᖃᐃᑕᐅᓯᒪᔪᑦ ᐊᖑᒻᒪᑎᓯᒪᐃᓐᓇᕋᓱᒃᑐᖓ. ᐃᓄᑑᑉᓗᖓ ᑕᒪᓐᓇ ᐱᓕᕆᐊᕆᒐᑉᑯ, ᑭᓯᐊᓂ ᐱᓕᕆᑦᑎᐊᕋᓱᒃᑐᖓ ᐊᖑᒻᒪᑎᓇᓱᒃᖢᖓ."
ᖃᓗᔾᔭᖅ ᑲᒪᖃᑦᑕᕐᒥᔪᖅ ᐃᓕᓐᓂᐊᕈᑎᒥᒃ ᑲᓇᑕᒥ ᖁᑭᐅᓯᕆᓂᒃᑯᑦ ᐊᑦᑕᓇᖅᑐᒦᖁᔨᓇᓂ ᐃᓕᓐᓂᐊᕈᑕᐅᕙᒃᑐᒥᒃ.
ᐅᖃᖅᖢᓂ ᐃᓕᓐᓂᐊᕈᒪᔪᒡᒎᖅ ᐊᒥᓲᓂᖏᑦ ᓈᒻᒪᒃᓯᑐᐊᖅᐸᑕ ᖁᑭᐅᓯᕆᓂᕐᒧᑦ ᐊᓕᓚᔪᖅᑖᕈᒪᔪᓂᒃ, ᐱᓇᓱᐊᕈᓯᐅᑉ ᓄᙳᐊᓂ ᐃᓕᓐᓂᐊᖅᑎᑦᑎᔪᒫᖅᑐᖅ.
"ᐃᓕᓐᓂᐊᖅᑎᑦᑎᖃᑦᑕᖅᑐᖓ ᑕᒪᐃᓐᓂᒃ ᒪᓕᒐᓕᖅᑐᖅᑕᐅᓯᒪᙱᑦᑐᒥᒃ, ᑕᑭᔪᓄᑦ ᖁᑭᐅᑎᓄᑦ ᑐᕌᖓᔪᖅ, ᐊᒻᒪᓗ ᒪᓕᒐᓕᖅᑐᖅᑕᐅᓯᒪᔪᒥᒃ, ᐊᒡᒐᖕᒥᐅᑕᓂᒃ ᖁᑭᐅᓯᕆᓂᕐᒧᑦ ᐅᕝᕙᓘᓐᓃᑦ ᖃᓄᐃᑦᑐᑐᐃᓐᓇᕐᓂᒃ ᒪᓕᒐᓕᖅᑐᖅᑕᐅᓯᒪᕙᒃᑐᓂᒃ ᖁᑭᐅᑎᓂᒃ.
"ᑐᕌᒐᕆᔭᕋ ᑕᒪᓐᓇ ᖃᑯᒍᑭᐊᖅ ᐱᓕᕆᐊᖅᑕᕆᓪᓚᑦᑖᕈᒪᑉᓗᒍ
"ᑕᐃᒪᐃᒻᒪᑦ, ᑕᐃᒪᑐᖅ ᖃᑯᒍᑭᐊᖅ ᓴᓇᕝᕕᒋᔭᕋ ᕿᒪᒍᓐᓇᕈᒫᖅᐸᕋ ᑕᒪᓐᓇ ᐱᓕᕆᐊᖅᑖᕆᓪᓚᑦᑖᕐᓗᒍ.
"ᑕᐃᒪᓐᓇ ᐃᓱᒪᒐᒪ ᒫᓐᓇᐅᔪᖅ, ᓇᓗᓇᕈᓐᓃᕈᒫᕐᒥᔪᖅ ᑕᐃᒪᐃᓪᓚᑦᑖᕈᒫᕐᒪᖔᕐᒪ."