ᑲᖏᖅᖠᓂᕐᒥ ᕗᑦᐹᓪᒥ ᐱᙳᐊᖅᑎᐅᔪᑦ (RFC) ᓵᓚᖃᕐᔪᐊᓚᐅᖅᐳᑦ ᐱᙳᐊᖃᑎᒥᓂᑦ ᐱᓂᕐᒧᑦ ᓯᕗᓪᓕᖅᐹᒥ ᕗᑦᓱᓪ ᑲᓇᑕᒥᕝᑲᑎᙵᓂᐅᔪᓄᑦ−ᐱᔪᓐᓇᕐᓂᐅᔪᓄᑦ ᓵᓚᖃᕋᓱᐊᕐᓂᐅᔪᒥ ᐱᓕᕆᐊᖑᔪᒥ ᓄᓇᕗᒻᒥ ᑕᖅᑭᐅᑉ ᐱᒋᐊᕐᓂᖓᓂᐅᓚᐅᖅᑐᒥ ᑲᖏᖅᖠᓂᕐᒥ.
ᐊᑯᓂᐅᔪᒥ FC−ᑯᓐᓂ ᐱᙳᐊᖅᑎ ᑯᕆᔅ ᐅᒃᐸᑕᐅᔭᖅ ᐅᖃᓚᐅᖅᐳᖅ ᑕᒪᕐᒥᒐᓚᑦ ᐱᙳᐊᖅᑎᐅᔪᑦ ᑲᑎᙵᓂᐅᔪᒥ ᑕᐃᒪᓐᓇᑦᑕᐃᓐᓇᖅ ᐅᑭᐅᖃᑎᒌᒃᐳᑦ, ᐊᒻᒪᓗ ᐱᓕᕆᖃᑎᒌᑦᑎᐊᕐᓂᖃᖅᐳᑦ ᐱᙳᐊᖃᑎᒌᒃᓯᒪᖕᒪᑕ ᑕᐃᒪᙵᓂ ᐅᑭᐅᖃᖅᑎᓪᓗᒋᑦ 12−ᓂ 13−ᓂᓪᓘᓐᓃᑦ.
ᐅᖃᓚᐅᖅᐳᖅ ᓵᓚᖃᕋᓱᐊᕐᓂᐅᔪᖅ ᐱᕕᒃᓴᖃᕐᔪᐊᖅᐳᖅ ᐊᒻᒪᓗ ᐱᙳᐊᖃᑎᒌᖑᔪᑦ ᐅᑕᖅᑭᔪᓐᓇᐃᓪᓕᕗᑦ ᓵᓚᖃᕋᓱᐊᕐᓂᕐᒧᑦ ᑲᓇᑕᒥ ᓵᓚᖃᕋᓱᐊᕐᓂᐅᔪᒥ ᑎᑭᑉᐸᓪᓕᐊᔪᒧᑦ ᐊᐃᑉᕆᓕᒥ ᑭᖕᔅᑎᓐ, ᐋᓐᑎᐊᕆᐅᒥ.
"ᑖᒃᑯᓂᖓᑦᑕᐃᓐᓇᖅ ᐃᓕᒃᑯᐊᖑᔪᓂ ᐱᙳᐊᖅᑎᖃᖅᓯᒪᕗᒍᑦ ᐊᑯᓂᒻᒪᕆᐊᓘᓕᖅᑐᒥ, ᐊᒻᒪᓗ ᑕᒪᓐᓇ ᐊᔾᔨᐅᙱᑎᑦᑎᔪᓐᓇᖅᐳᖅ ᓵᓚᖃᕋᓱᐊᕐᓂᐅᔪᒥ," ᐅᖃᓚᐅᖅᐳᖅ ᐅᒃᐸᑕᐅᔭᖅ.
"ᑎᑭᑉᐸᓪᓕᐊᔪᓄᑦ, ᓵᓚᖃᕋᓱᐊᒃᑳᓗᐃᑦ ᐅᑯᓇᓂ ᒪᕐᕉᖕᓂ ᐅᑭᐅᖃᕐᓂᐅᔪᓄᑦ ᐊᕕᒃᓯᒪᓂᐅᔪᓄᑦ, 14 ᐊᒻᒪ 16, ᐊᒻᒪᓗ ᒫᓐᓇᓕᓴᒥ ᐱᓕᒻᒪᒃᓴᕐᓂᖃᖃᑦᑕᖅᐳᒍᑦ ᐊᒻᒪ ᐱᙳᐊᖃᑎᒌᒃᐸᒃᖢᑕ, ᐊᒻᒪᓗ ᑕᒪᓐᓇ ᐅᕙᑦᑎᓐᓄᑦ ᐃᑲᔪᕐᓂᖃᑦᑎᐊᖅᐳᖅ.
"ᐃᓛᑎᒍᑦ ᐱᙳᐊᕈᒪᓯᒪᒋᕗᒍᑦ ᐹᔅᑭᑦᐹᓪᒥᑦᑕᐅᖅ, ᐱᒋᐊᓕᓵᖅᑎᓪᓗᑕ, ᐹᔅᑭᑦᐹᓪᒧᑦ ᐃᓕᓴᐃᔨᖃᑦᑎᐊᓚᐅᙱᓚᖅ ᐊᒻᒪ ᐊᕿᔭᕐᓂᕐᒧᑦ ᐱᖃᑦᑎᐊᖅᖢᑎᒃ, ᑕᐃᒫᒃ ᐊᔾᔨᐅᙱᓐᓂᐅᔪᒃᓴᐅᓚᐅᖅᑐᖅ.
"ᐅᓄᑦ ᐱᒻᒪᕆᐅᕐᔪᐊᕐᓂᐊᖅᑐᖅ ᓵᓚᒃᓴᕈᑦᑕ ᑲᓇᑕᒥ, ᐊᒻᒪᓗ ᐅᖃᖃᑎᖃᓚᐅᖅᐳᒍᑦ ᖃᐅᔨᓴᖅᑎᐅᔪᒧᑦ ᑲᖏᖅᖠᓂᕐᒦᓚᐅᖅᑐᒥ ᐊᒻᒪᓗ ᐱᐅᒃᓴᖅᖢᓂ ᑕᑯᔭᒥᓂᑦ ᑲᑎᙵᓂᕆᔭᑦᑎᓐᓂ, ᐊᒻᒪ ᐅᖃᓚᐅᖅᑐᖅ ᐱᓇᔪᐃᓐᓇᕈᑦᑕ ᐊᒃᓱᕈᕐᓗᑕ ᓵᓚᒃᓴᕈᓐᓇᑐᐃᓐᓇᕆᐊᖃᖅᑐᒍᑦ."
ᐹᓪ ᓱᑐᕉᑕ ᐊᖏᓚᐅᖅᐳᖅ FC−ᑯᑦᐃᓕᓐᓂᐊᖅᑎᑦᑎᔨᒻᒪᕆᐅᓂᖓᓂ ᑐᕌᖅᑐᓄᑦ ᑲᓇᑕᒥ ᐱᔪᓐᓇᕐᓂᐅᓇᓱᐊᖅᑐᒥ.
ᓱᑐᕉᑕ ᐅᖃᓚᐅᖅᐳᖅ ᐊᐱᕆᔭᐅᓚᐅᕐᓂᖓᓂ ᐃᑲᔪᕐᓂᕐᒧᑦ FC−ᑯᓐᓂ ᒪᓕᒐᐅᔪᓄᑦ ᕗᑦᓲᓪᒧᑦ ᐱᙳᐊᖅᑏᑦ ᑳᑉᑕᖓᓐᓄᑦ ᓵᑦ ᒍᕋᐃᔭᒻᒧᑦ, ᐊᒻᒪᓗ, ᑲᓇᑕᒨᖓᔪᓄᑦ ᑎᑭᐅᑎᔪᓐᓇᖅᐸᑕ, ᐱᖃᕋᔭᖅᐳᑦ ᑐᑭᓯᐅᒪᓂᖃᑦᑎᐊᖅᑐᒥ ᒪᓕᒐᖏᓐᓂ ᐃᓚᐅᖃᑕᐅᓂᕐᒧᑦ ᐃᓕᓐᓂᐊᖅᑎᑦᑎᔨᐅᔪᓄᑦ ᑲᑎᒪᓂᐅᔪᓂᑦ ᐊᒻᒪᓗ ᐅᖃᐅᓯᖃᑦᑎᐊᕈᓐᓇᕐᓗᓂ ᐅᖃᐅᓯᒃᓴᓕᒫᓂᑦ ᐱᙳᐊᖅᑎᓄᑦ.
ᐅᖃᓚᐅᖅᐳᖅ ᑲᓇᑕᒥ ᓵᓚᖃᕋᓱᐊᕐᓂᐅᔪᖅ ᐊᐅᓚᓂᖃᕐᓂᐊᖅᐳᖅ ᐊᐃᑉᕆᓕ 19-22−ᒧᑦ, ᐊᒻᒪᓗ ᑲᖏᖅᖠᓂᕐᒥ FC ᑎᑭᓵᓕᓛᕈᒪᕗᑦ ᖃᔅᓯᐊᕐᔪᖕᓂ ᐅᓪᓗᓂᑦ ᓯᕗᓂᐊᓂ ᐃᓚᐅᖃᑕᐅᓂᕐᒧᑦ ᐃᓚᖏᓐᓂ ᑕᑯᒃᓴᐅᑎᑕᐅᓂᐅᔪᓂ ᐱᙳᐊᕐᓂᓂᑦ ᕗᑦᓱᓪ ᑲᑎᙵᓂᐅᔪᓄᑦ ᐋᑐᕚᒥ ᐊᕕᒃᓯᒪᓂᐅᔪᓄᑦ.
"ᓇᓗᓇᙱᑦᑎᐊᖅᐳᖅ ᑲᖏᖅᖠᓂᖅ FC ᐱᐅᓛᖑᓪᓗᑎᒃ ᐱᙳᐊᖅᑎᐅᔪᓄᑦ ᑕᓪᓕᒪᓂ ᓵᓚᖃᕋᓱᐊᕐᓂᐅᓚᐅᖅᑐᒥ ᑲᖏᖅᖠᓂᕐᒥ ᐱᓇᓱᐊᕐᓂᐅᔪᒥᑦ," ᐅᖃᓚᐅᖅᐳᖅ ᓱᑐᕉᑕ.
"ᐅᑯᐊ ᐱᙳᐊᖅᑎᐅᔪᑦ ᓵᓚᖃᕋᓱᐊᓪᓚᕆᒍᓐᓇᖅᑐᑦ ᑭᖕᔅᑎᓐᒥ ᑲᑎᙵᓂᑦᑎᐊᕙᐅᖕᒪᑕ ᐊᑯᓂᐊᓗᒃ ᐱᙳᐊᖃᑎᒌᒃᓯᒪᓪᓗᑎᒃ, ᐋᔩᖃᑎᒌᑦᑎᐊᖅᐸᒃᖢᑎᒃ, ᐊᒻᒪᓗ ᐃᒻᒥᖕᓂᒃ ᑐᑭᓯᐅᒪᖃᑎᒌᑦᑎᐊᖅᖢᑎᒃ ᐊᒻᒪᓗ ᖃᓄᖅ ᐱᙳᐊᕆᐊᖃᕐᓂᖏᓐᓂ.
"ᓱᖏᐅᑎᔭᕆᐊᖃᕐᓂᐊᖅᐳᑦ ᐊᖏᓂᖅᓴᐅᔪᒥ ᐱᙳᐊᕐᕕᐅᔪᒥ, ᑭᓯᐊᓂ, ᒥᑭᑦᑐᒥ ᕿᑎᕐᕕᕋᓛᒥᒃ ᐱᙳᐊᓛᕋᑦᑕ ᐊᖏᐸᓗᒃᑐᐊᓗᖕᒥ ᕿᔪᖕᒥ ᓇᑎᖃᖅᑐᒥᑦ.
"ᐊᓯᔾᔨᕐᓂᐅᕐᔪᐊᕐᓂᐊᖅᐳᖅ, ᐅᖓᓯᖕᓂᖅᓴᒨᕆᐊᖃᖃᑦᑕᕐᓂᐊᕐᒪᑕ, ᐊᒻᒪᓗ ᐃᒋᑦᑎᓂᖏᑦ ᐱᓕᕆᑦᑎᐊᕆᐊᖃᕐᓂᐊᖅᐳᑦ ᐊᒻᒪ ᐱᓕᕆᑦᑎᐊᕆᐊᕐᓗᑎᒃ ᐅᕝᕙᓘᓐᓃᑦ ᐊᖅᓴᒥᒃ ᐊᓯᐅᔩᓐᓇᐅᔭᕐᓂᐊᖅᐳᑦ.” ᓯᑐᕉᑕ ᐅᖃᓚᐅᖅᐳᖅ ᑲᖏᖅᖠᓂᖅ ᓴᖅᑭᑦᑐᓄᑦ ᑲᓇᑕᒥ ᖃᓄᐃᓐᓂᐅᔪᒥ ᐱᒻᒪᕆᕐᔪᐊᖑᕗᖅ ᕗᑦᓱᓪᒧᑦ ᓄᓇᕗᒻᒥ.
ᐅᖃᓚᐅᖅᐳᖅ ᑕᑯᒃᓴᐅᑎᑦᑎᓂᖓᓐᓂ ᒪᒃᑯᒃᑐᓄᑦ ᐱᙳᐊᖅᑎᓄᑦ ᐅᑭᐅᖅᑖᓕᖅᑐᓂ 18−ᓂ 19−ᓄᓪᓗ ᐊᒻᒪᓗ ᓄᓇᕗᒻᒥ ᐊᕿᔭᕐᓂᕐᒧᑦ ᑲᑐᔾᔨᖃᑎᒌᖑᔪᓄᑦ ᓄᓇᕗᒻᒥ ᐱᙳᐊᕈᓐᓇᐃᔾᔨᑎᓪᓗᒋᑦ ᐅᔾᔨᕆᕙᓪᓕᐊᕗᑦ, ᑲᑎᙵᐃᓐᓇᕈᑎᒃ, ᑲᓇᑕᒥ ᐱᔪᓐᓇᕐᓂᐅᔪᒨᕈᓐᓇᕐᓂᖏᓐᓂ ᐃᖃᓗᖕᓂ, ᑲᖏᖅᖠᓂᕐᒥ ᐃᖃᓗᒃᑑᑦᑎᐊᕐᒧᓪᓘᓐᓃᑦ ᐊᒻᒪᓗ ᐱᕕᒃᓴᖃᖅᑎᑕᐅᓗᑎᒃ ᐱᙳᐊᖏᓐᓇᕐᓂᕐᒧᑦ ᖁᑦᑎᖕᓂᖅᓴᐅᔪᒥ ᑭᒡᓕᐅᔪᒥ, ᐃᒃᓯᓐᓇᐃᑐᐃᓐᓇᙱᓪᓗᑎᒃ ᐃᓯᒐᐅᔭᒥᖕᓂᑦ.
"ᑕᐃᒪᑐᖅ ᑲᖏᖅᖠᓂᖅᐅᑉ ᓴᖅᑭᓐᓂᕆᔭᖓᑦ ᑭᖕᔅᑎᓐᒥ ᐃᓕᓯᓂᐊᖅᐳᖅ ᓄᓇᕗᒻᒥ ᑲᓇᑕᒥ ᕗᑦᓲᓪ ᓄᓇᙳᐊᖓᓂ.” ᐅᖃᓚᐅᖅᐳᖅ ᓯᑐᕉᑐ.
"ᐊᒥᓱᐊᓗᐃᑦ ᐃᓄᖕᓂ ᑲᒪᓂᐊᖅᑰᖅᑐᑦ ᐅᕙᑦᑎᓐᓂ.
"ᐅᑯᐊ ᐊᖑᑏᑦ ᐊᖏᐸᓗᒃᑐᐊᓗᖕᒥ 'ᑖᒃᑯᐊᖑᓂᖏᓐᓂ' ᐱᔾᔪᑎᖃᖅᐳᑦ, ᐊᒻᒪᓗ ᐱᓕᕆᑦᑎᐊᕐᓂᐊᖅᑰᖅᑐᑦ ᑭᖕᔅᑎᓐᒥ.
"ᑕᐅᑐᙳᐊᕆᑦ ᓵᓚᒃᓴᕈᑎᒃ ᑲᓇᑕᓕᒫᒥ CONCACAF−ᓕᐊᕋᔭᖅᑐᑦ (ᑲᑐᔾᔨᖃᑎᒌᖑᔪᒥ ᐅᐊᖕᓇᒥ, ᕿᑎᖅᐸᓯᐊᓂ ᐊᒥᐊᓕᑲᒥ ᐊᒻᒪ ᑲᕆᐱᐊᓐᒥ ᑲᑐᔾᔨᖃᑎᒌᖑᔪᓄᑦ ᕗᑦᐹᓪᒧᑦ) ᕗᑦᓱᓪ ᐱᙳᐊᕐᓂᐅᔪᓄᑦ ᐱᕕᒃᓴᖃᖅᑎᑕᐅᓂᕐᒧᑦ ᓵᓚᖃᕋᓱᐊᕐᓂᐅᔪᒥ ᓄᓇᕐᔪᐊᒥ ᓵᓚᖃᕋᓱᐊᕐᓂᕐᔪᐊᖑᔪᒥ."
ᓱᑐᕉᑕ ᐅᖃᓚᐅᖅᐳᖅ ᐱᕈᖅᐸᓪᓕᐊᓂᐅᔪᖅ ᑲᓇᑕᒥ ᑲᒪᓇᕐᔪᐊᖅᓯᒪᕗᖅ.
ᐅᖃᓚᐅᖅᐳᖅ ᐅᓄᕐᓂᐅᔪᑦ ᓵᓚᖃᕋᓱᐊᕐᓂᐅᔪᓄᑦ ᑲᑎᙵᓂᐅᔪᓂ ᐱᓇᓱᐊᖅᑐᒥ ᑲᓇᑕᓕᒫᒥ ᑕᐃᒎᓯᖓᓂ ᐱᕈᖅᐸᓪᓕᐊᓯᒪᕗᖅ ᐊᖏᔪᒻᒪᕆᐊᓗᖕᒥ.
"ᐱᖓᓱᐃᓐᓇᑯᓗᖕᓂ ᑲᑎᙵᓂᖃᓚᐅᖅᐳᑦ ᓵᓚᖃᕋᓱᐊᖅᑐᓂ ᐊᖑᑎᓄᑦ ᑲᓇᑕᓕᒫᒥ ᕗᑦᓱᓪ ᑕᐃᒎᓯᖓᓄᑦ ᐊᕐᕌᒎᓚᐅᖅᑐᒥ (ᐋᓐᑎᐊᕆᐅ, ᑯᐸᐃᒃ ᐊᒻᒪ ᓴᔅᑳᑦᓱᐊᓐ), ᑕᒪᑐᒪᓂ ᐊᕐᕌᒍᒥ, 8−ᖑᔪᓂ ᑲᑎᙵᓂᐅᔪᓂ ᓵᓚᖃᕋᓱᐊᖅᑎᓪᓗᒋᑦ.
"ᐱᙳᐊᕐᓂᐊᖅᐳᒍᑦ ᐱᖓᓱᓂ-ᐱᙳᐊᕐᓂᐅᔪᒥ ᐱᙳᐊᖃᑎᖃᕐᓂᐅᔪᒥ ᐊᑕᐅᓯᕐᒥ ᑲᑎᙵᓂᐅᔪᓄᑦ ᐊᒻᒪᓗ ᑕᑯᓂᐊᖅᐳᒍᑦ ᖃᓄᐃᓐᓂᐊᕐᓂᖏᓐᓂ ᑕᐃᑲᙵᑦ.
"ᕗᑦᓱᓪᑕᖃᖅᓯᒪᕗᖅ ᐊᕐᕌᒍᐸᓗᖕᓄᑦ 60−ᓄᑦ ᐋᕗᕆᑲᒥ, ᔫᕋᑉ, ᐊᐃᓴ ᐊᒻᒪᓗ ᓂᒋᕐᒥ ᐊᒥᐊᓕᑲᒥ, ᑭᓯᐊᓂ ᐊᕐᕌᒍᓄᑦ ᖁᓕᓄᑦ ᐱᕙᓪᓕᐊᖏᓐᓇᖅᓯᒪᕗᖅ ᑲᓇᑕᒥ ᐊᒻᒪ ᔫᓇᐃᑎᑦ ᔅᑕᐃᑦᔅᓂ."