ᓴᓇᐅᒐᕗᑦ: ᓴᓇᐅᒐᐃᑦ ᑭᙵᕐᓂ ᓯᓚᑦᑐᒃᓴᕐᕕᒡᔪᐊᒥ ᐃᓕᓐᓂᐊᖅᑎᒧᑦ ᓱᓕᓂᕋᐅᑎᐅᔪᒥ ᑎᑎᕋᖅᑕᐅᔪᕕᓂᕐᒥ ᐊᒻᒪ ᑕᑯᒃᓴᐅᑎᑕᐅᓂᐅᔪᒥ ᐅᕙᓐᓄᑦ, ᐃᓅᓪᓗᖓ-ᕕᓂᔅ ᐃᓱᓕᑦᑎᓪᓗᖓ ᐃᓕᓐᓂᐊᖅᑎᐅᓪᓗᖓ ᐱᓇᖕᓇᕐᒥ
ᓯᓚᑦᑐᖅᓴᕐᕕᒡᔪᐊᒥ ᓚᓐᑎᓐ, ᐋᓐᑎᐊᕆᐅᒥ ᑕᑯᒃᓴᐅᑎᑕᐅᓂᐅᔪᖅ ᐊᐅᓚᓚᐅᖅᐳᖅ ᒪᐃ 3, 2019–ᒥ ᔫᓂ
16, 2019–ᒧᑦ ᐱᓇᖕᓇᕐᒥ ᓯᓚᑦᑐᖅᓴᕐᕕᒡᔪᐊᖓᑕ ᒫᑭᓐᑖᔅ ᑕᑯᓐᓇᒐᖃᕐᕕᖓᓂ.
ᑕᑯᒃᓴᐅᑎᑕᐅᓂᐅᔪᖅ ᐊᒻᒪ ᐸᐃᑉᐹᓕᐊᖓ ᐃᑲᔪᖃᑎᒌᑦᑎᐊᖅᐳᑦ ᑕᑯᒃᓴᐅᑎᑕᐅᓂᐅᔪᖅ ᑕᐅᑦᑐᒧᑦ ᐊᑐᕐᓂᑰᖕᒪᑦ ᐊᒻᒪ
ᐸᐃᑉᐹᖑᔪᖅ ᓇᓗᓇᐃᖅᓯᕗᖅ ᐅᓂᒃᑳᖅᑐᐊᓂ ᐊᒻᒪ ᐃᓅᓯᐅᔪᓂᑦ ᓴᓇᐅᒐᓕᕆᔨᐅᔪᓄᑦ ᓴᖅᑭᔮᖅᑎᑕᐅᓚᐅᖅᑐᓂ ᑕᑯᒃᓴᐅᑎᑕᐅᓂᐅᔪᒥ. ᓴᓇᐅᒐᕗᑦ ᐱᒻᒪᕆᕐᔪᐊᖑᕗᖅ ᐃᑲᔪᖅᓱᐃᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᐃᒻᒥᒃᑯᑦ–ᑭᒡᒐᖅᑐᐃᔪᓄᑦ ᓯᓚᑦᑐᖅᓴᕐᕕᒡᔪᐊᓂ ᐊᒻᒪ ᑕᑯᓐᓇᒐᖃᕐᕕᓂᑦ ᑕᑯᒃᓴᐅᑎᑦᑎᓲᖑᖕᒪᑕ ᓯᑯᓰᓚᖅ ᖃᓄᐃᑉᐸᓚᐅᕐᓂᖏᓐᓂ ᐃᓱᒪᒋᔭᐅᕙᓚᐅᖅᓯᒪᙱᑦᑐᓂ ᐅᖃᓕᒫᒐᕐᓂᑦ, ᐃᓅᑉ ᐃᓱᒪᒋᔭᖓᑎᒍᑦ.
ᖃᐅᔨᓴᕐᓂᐅᔪᖅ ᐊᒻᒪ ᐃᓕᑦᑎᓂᐅᔪᒥ ᐃᓄᐃᑦ ᓴᓇᐅᒐᖏᓐᓂ ᑎᑎᕋᐅᓯᐅᓯᒪᓂᖏᑎᒍᑦ ᐊᒻᒪ ᑭᒡᒐᖅᑐᖅᑕᐅᓂᐅᔪᓂ ᐃᓕᓐᓂᐊᕐᕕᐅᔪᓂ ᐋᖅᑭᒃᓯᒪᓂᐅᔪᓂ ᐊᒻᒪᓗ ᖁᑦᑎᒃᑐᒥ–ᐊᑭᑦᑐᕋᐅᑎᓂᐅᔪᒥ ᓴᓇᐅᒐᓄᑦ ᐱᓕᕆᓂᐅᔪᒥ ᑲᒪᓇᕐᔪᐊᖅᓯᒪᕗᖅ. ᐅᕙᓐᓄᑦ ᑕᑯᑎᑦᑎᓯᒪᕗᖅ ᓯᑯᓰᓚᒥᐅᑦ ᐃᓚᐅᖃᑕᐅᓪᓗᑎᒃ ᐃᑲᔪᖅᓱᐃᖃᑕᐅᓂᕐᒥ ᐱᕈᖅᐸᓪᓕᐊᔪᒧᑦ ᐃᓄᐃᑦ ᓴᓇᐅᒐᖏᓐᓂ ᓂᐅᕕᐊᒃᓴᐅᔭᖅᑐᕐᓂᖏᓐᓄᑦ ᐊᒥᓱᓂ ᐊᔾᔨᒌᙱᑦᑑᑕᐅᔪᓄᑦ ᐃᓂᐅᔪᓂ. ᐃᑲᔪᖅᓱᐃᓪᓗᑎᒃ ᓂᐅᕕᖅᑎᒃᑯᓐᓄᑦ 1900 ᐱᒋᐊᕐᓂᐸᓗᐊᓂ ᐊᒻᒪ ᓴᖅᑭᑎᑦᑎᓪᓗᓂ ᐱᓇᖕᓇᕐᒥ ᕿᑭᖅᑖᓗᖕᒥ ᑯᐊᐸᒃᑯᓐᓂ ᐊᒻᒪ ᑎᑎᕋᐅᔭᕋᖃᕐᕕᖕᒥ ᕿᑎᖅᐸᓯᐊᓂ-1900–ᖏᓐᓂ ᐃᓚᒋᔭᐅᖃᑕᐅᓚᐅᖅᐳᑦ ᐊᖏᔪᒻᒪᕆᐊᓗᖕᒥ
ᑎᑭᐅᑎᔭᐅᔪᓐᓇᖅᓯᒪᔪᒥ ᐱᕙᓪᓕᐊᑎᑕᐅᓂᖏᓐᓄᑦ ᓴᓇᐅᒐᓂᑦ ᓴᖅᑭᑕᐅᔪᓂ ᐅᑭᐅᖅᑕᖅᑐᒥ.
ᑕᐃᑲᙵᑦ ᓴᖅᑭᓚᐅᖅᐳᑦ ᐱᒃᑲᕐᔪᐊᓂ ᐅᔭᖅᑲᒧᑦᓴᓇᙳᐊᖅᓯᒪᔪᓂ ᑎᑎᕋᐅᔭᒐᓕᐅᕐᓂᕐᒧᑦ ᐃᓗᐊᓂ ᑯᐊᐸᒃᑯᑦ ᑎᑎᕋᐅᔭᕐᕕᕋᓛᖓᓂ ᐊᒻᒪ ᐃᓄᖕᓄᑦ ᓴᓇᐅᒐᓕᕆᔨᐅᔪᓄᑦ, ᓲᕐᓗ ᐅᓱᐃᑦᑐᖅ ᐊᐃᐱᓕ ᐊᒻᒪ ᓗᒃᑕ ᑭᐊᑦᓱᒃ, ᐱᖅᑯᓯᑐᖃᖅᑎᒍᑦ
ᓴᓇᕐᕈᑎᓕᐅᖅᐸᓚᐅᖅᑐᒥ ᐊᒻᒪ ᓴᓇᙳᐊᒐᓂᑦ ᓯᕗᓂᐊᓂ ᑯᐊᐸᒃᑯᑦ ᐱᒋᐊᓚᐅᖅᑳᕋᓂ.
ᐃᓕᓴᕆᔭᐅᓚᐅᖅᐳᑦ ᓴᓇᙳᐊᖅᑎᒻᒪᕆᐊᓘᓂᖏᓐᓂ ᑲᓇᑕᓕᒫᒧᑦ ᐊᒻᒪ ᓯᕗᕚᑦᑎᓐᓂ ᐊᒥᓱᓄᑦ ᓴᓇᐅᒐᓕᕆᔨᐅᔪᓄᑦ ᐱᓕᕆᕙᒃᑐᓄᑦ ᐅᓪᓗᒥᒥ. ᓲᕐᓗ ᓴᓇᐅᒐᐃᑦ ᐊᐅᓚᓲᖑᕗᑦ ᐃᓚᒌᖑᔪᓄᑦ ᐊᒻᒪ ᑲᑎᙵᓂᐅᔪᓂᑦ. ᐱᐅᒻᒪᕆᒃᐳᖅ.
ᐃᓚᖏᑦ ᓴᓇᐅᒐᓕᕆᔨᐅᔪᓄᑦ ᓂᕈᐊᓚᐅᖅᑕᓐᓂ ᑕᐅᑐᒃᑕᑐᐊᖃᑲᐃᓐᓇᕐᓂᕐᒧᑦ ᓴᓇᐅᒐᕗᒻᒧᑦ ᐃᓚᖃᖅᐳᑦ: ᐃᓚᐃᔭ ᒪᖏᑕᖅ
ᐊᒻᒪ ᓴᐸᖓᓕᒃ ᐊᒪᐅᑎᓕᐊᖓ (2010–ᖏᓐᓂ); ᐋᓂ ᒫᓂᖕ ᓛᒻᐳᕌᓐ ᐃᓅᔭᐃᑦ (1997 ᐊᒻᒪ 2000–ᖏᓐᓂ); ᑎᒻ ᐱᑦᓯᐅᓛᑉ ᐊᕐᓇᒧᑦ ᑑᒑᕐᒥ ᐅᔭᒥᖓ (2014); ᒥᐊᕆ ᐅᓱᑦᓯᐊᖅ ᓴᐸᖓᓕᕆᓂᖓᓐᓄᑦ ᐊᒻᒪ ᓴᓇᙳᐊᒐᒧᑦ ᐅᔭᖅᑲᒥ ᓴᓇᙳᐊᒐᖓᓂ ᓴᓂᓕᖃᖅᑐᒥ ᐊᒃᓴᖓᔪ ᓵᑉ ᐊᐃᕕᖅ ᒧᒥᖅᑐᒥ (2018); ᐊᒻᒪ ᐲᑦᑕᓘᓯ ᓴᐃᓚᐅᑉ ᒪᒃᑯᒃᑐᒥ
ᐅᒃᐱᒡᔪᐊᖓᓂ (1980).
ᐅᓇ ᐱᓕᕆᐊᖑᓚᐅᖅᐳᖅ ᑕᑯᒃᓴᐅᑎᑦᑎᓂᕐᒧᑦ ᒥᖅᓱᕐᓂᖅ ᐊᒻᒪ ᑕᑯᒥᓴᐅᑏᑦ ᓇᓕᒧᑉᐳᑦ ᓴᓇᐅᒐᐅᔪᓄᑦ ᓴᓇᙳᐊᕐᓂᐅᔪᒥ ᐱᓕᕆᓂᐅᔪᒥ ᓯᕗᓂᐊᓂ ᓴᓇᐅᒐᓕᕆᓂᐅᒋᔭᐅᕙᓚᐅᖅᑐᓂ ᐃᓕᓴᕆᔭᐅᔪᓄᑦ
ᓴᓇᐅᒐᓕᕆᔨᐅᔪᓄᑦ ᑕᐃᔅᓱᒪᓂᒃᑲᓐᓂᖅ ᖃᓪᓗᓈᑦ ᓄᓇᖓᓐᓂ.
ᐊᖏᔪᒥ ᐃᓚᑰᓂᖃᐅᖅᐳᖅ ᐅᑯᓇᓂ ᑎᑎᕋᖅᓯᒪᔪᓂ ᐱᓕᕆᐊᖑᓂᑯᓄᑦ ᒥᖅᓱᕐᓂᕐᒧᑦ ᐊᒻᒪ ᖃᓪᓗᓈᖅᑕᓄᑦ ᓴᓇᐅᒐᓕᕆᔨᐅᔪᓄᑦ ᐊᒻᒪ ᑕᑯᒥᓴᐅᑎᓂᒃᓴᓇᕙᒃᑐᓄᑦ ᑕᐅᑐᒃᖢᒍ ᑎᑎᕋᐅᔭᒐᓕᐅᕐᓂᕐᒧᑦ ᐊᒻᒪ ᓴᓇᙳᐊᒐᓂᑦ. ᑕᐃᒪᑐᖅ ᐅᓇ ᐃᓚᑰᓂᐅᔪᖅ ᒥᒃᖠᕚᓪᓕᕐᓂᐊᖅᐳᖅ ᖃᖓᒃᑲᓐᓂᐅᔪᒥ ᐊᒻᒪ ᐱᔪᓐᓇᖅᑎᑦᑎᓗᓂ ᐊᓯᖏᓐᓂ ᓯᑯᓰᓚᕐᒥᐅᓄᑦ ᑎᑎᕋᐅᓯᖃᕐᓂᖏᓐᓂ
ᐊᑐᖅᐸᓚᐅᖅᑕᑦᑎᓐᓂ ᓲᕐᓗ ᐅᕙᖓᑎᑐᑦ, ᓲᕐᓗ ᑕᖕᒫᕐᕕᖕᒥ ᓯᕗᓕᐅᖅᑎᐅᔪᖅ, ᑕᐃᔅᓱᒪᓂᑐᖃᕐᒥ
ᑎᑎᕋᐃᕙᓚᐅᖅᑐᖅ ᐊᒻᒪ ᐊᔾᔨᓕᐅᕆᔨ ᐲᑕ ᐱᑦᓯᐅᓛᖅ, ᑎᑎᕋᐅᔭᒐᕐᓂ ᓴᓇᐅᒐᓕᕆᔨ ᐱᑦᓯᐅᓛᖅ ᐊᓲᓇ ᐊᒻᒪ
ᑲᓈᖏᓐᓇᖅ ᐳᑐᒍᖅ, ᐊᑦᑎᖅᓯᓗᓂ ᖃᔅᓯᐊᕐᔪᖕᓂ.
ᐅᑯᐊ ᐊᔪᙱᑦᑐᒻᒪᕆᐊᓗᐃᑦ ᐃᓄᐃᑦ ᐃᓅᕗᑦ ᐅᕙᓐᓂ ᑲᔪᖏᖅᓴᐃᓚᐅᖅᑐᓂ ᐱᓕᕇᓐᓇᕐᓂᕐᒧᑦ ᖁᑦᑎᖕᓂᖅᓴᒥ
ᐃᓕᓐᓂᐊᕐᓂᕆᔭᓐᓂ ᑕᐃᔅᓱᒪᓂᐅᓚᐅᖅᑐᒧᑦ ᐊᒻᒪ ᐸᖅᑭᔨᐅᓂᕐᒧᑦ ᑕᑯᓐᓇᒐᖃᕐᕕᖕᒥ ᐃᓕᓐᓂᐊᕐᓂᐅᔪᒥ
ᐃᓱᒪᒋᓇᒍ ᓇᖕᒥᓂᖅ ᐊᑲᐅᙱᓕᐅᕈᑎᒋᔭᓐᓂᑦ. ᐆᒃᑐᕋᕋᓱᐊᓲᖑᕗᖓ ᐅᖃᐅᓯᕆᕙᖕᓂᓐᓂ
ᓴᓇᐅᒐᓕᕆᓂᕐᒥ ᐊᒻᒪ ᐃᓕᖅᑯᓯᒥᒃ ᑕᐃᒪᐃᑉᐸᓚᐅᕐᓂᖏᑎᑐᑦ. ᐱᕈᖅᓴᓯᒪᕗᖓ ᓯᑯᓰᓚᕐᒥ ᐃᓅᑎᓪᓗᖓ ᐅᑭᐅᖃᓕᖅᖢᖓ 14–ᓄᑦ, ᐅᕙᓐᓂ ᓴᙱᔪᒥᒃ ᐃᒃᐱᒍᓱᖕᓂᖃᖅᑎᑦᑎᔪᒥᒃ ᐃᓕᖅᑯᓯᓐᓂ ᐊᒻᒪ ᐱᖅᑯᓯᑐᖃᕐᓂᑦ ᐊᒻᒪ ᐅᐱᒍᓱᒃᐳᖓ ᓯᑯᓰᓚᕐᒥᐅᑕᐅᓂᓐᓂ.
ᓱᒃᑲᔪᒥ ᐃᖏᕐᕋᓗᓂ ᐅᓪᓗᒥᒧᑦ, ᐃᓅᓯᕐᒪ ᓇᑉᐸᓪᓗᐊᖓᓂ ᓄᓇᖃᖅᖢᖓ ᓯᑯᓰᓚᕐᒥ ᐊᒻᒪ ᐊᐃᑉᐸᖓᑕ ᓇᑉᐸᖓᓂ ᓚᓐᑎᓐ,
ᐋᓐᑎᐊᕆᐅᒥᐅᑕᐅᓪᓗᖓ, ᐱᓇᓱᐊᖅᖢᖓ ᐃᓕᓐᓂᐊᕐᓂᕐᒧᑦ ᑐᕌᒐᒃᓴᓐᓂ.
ᓱᖏᐅᓐᓇᙱᑦᑑᓪᓗᓂ ᐱᓕᕆᔾᔪᓯᐅᕗᖅ ᐅᑭᐅᖅᑕᖅᑐᒥ–ᖃᓪᓗᓈᑦ ᓄᓇᖓᓐᓂ ᐱᓕᕆᖃᑎᒌᖕᓂᐅᔪᒥ ᐊᒻᒪ ᐃᓱᒪᒋᔭᐅᓂᐅᔪᓂ ᑭᓯᐊᓂ ᐊᑐᐃᓐᓇᖃᖅᑎᑦᑎᓇᓱᒋᕙᕋ ᑕᑯᔪᒥᓇᖅᑐᒥ ᑕᐅᑦᑐᖓᓂ ᐃᓕᓐᓂᐊᖅᑎᐅᔪᓄᑦ ᐊᒻᒪ ᐅᒃᐱᕈᓱᙱᑦᑐᓄᑦ. ᐸᕐᓇᒃᐳᖓ ᐱᓕᕆᓂᓐᓂ PhD–ᓂ ᑲᓐᑯᐊᑎᐊ ᓯᓚᑦᑐᖅᓴᕐᕕᒡᔪᐊᒥ 2019–ᒥ ᐅᕘᓇ ᓘᒃᑖᖅ ᕼᐊᑐᕐ ᐃᖕᓗᓕᐅᕐᑎ, ᓯᕗᓪᓕᖅᐹᖑᓪᓗᓂ
ᐃᓅᓪᓗᓂ ᓴᓇᐅᒐᓕᕆᓂᕐᒧᑦ ᑕᐃᔅᓱᒪᓂᑐᖃᕐᒥ ᐅᖃᖅᑎᐅᔪᒥ ᐊᒻᒪ ᐃᓄᑦᑎᐊᕙᐅᓪᓗᓂ ᐃᑲᔪᖅᓱᐃᒃᑲᐅᓪᓗᓂᓗ ᐃᓅᓪᓗᓂ
ᐅᑕᖅᑭᔪᓐᓇᙱᑉᐸᓵᕋᒪ ᐱᓕᕆᖃᑎᒋᔭᕆᐊᒃᓴᖅ. ᐱᒻᒪᕆᐅᓇᓱᒋᕙᕋ ᐅᓄᕐᓂᖅᓴᓂ ᐃᓄᖕᓂ ᓄᓇᕗᒻᒥ ᐊᒻᒪ ᐊᓯᖏᓐᓂ ᐃᓄᐃᑦ ᓄᓇᖓᓐᓂ ᐱᓇᓱᐊᕐᓂᖏᓐᓂ ᖁᑦᑎᖕᓂᖅᓴᐅᔪᒥ ᐃᓕᓐᓂᐊᕐᓂᐅᔪᒥ ᐅᕙᑦᑎᓐᓂ ᑭᒡᒐᖅᑐᐃᔪᓐᓇᕐᓂᐊᕋᑦᑕ ᑲᑎᒪᔨᐅᓂᕐᒧᑦ, ᐃᓅᓕᓴᐃᓂᕐᒧᑦ, ᐃᓕᓐᓂᐊᕐᓂᕐᒧᑦ ᐊᒻᒪ ᓇᖕᒥᓂᖃᕐᓂᕐᓄᑦ.