ᐃᓄᒋᐊᒃᑐᓂ ᐅᐸᓚᐅᖅᐳᑦ ᐃᑲᔪᖅᓱᐃᓂᕐᒧᑦ ᑕᓪᓕᒪᖓᓐᓂ ᐊᕐᕌᒍᑕᒫᒥ ᐃᒻᒥᓃᖅᑎᑦᑕᐃᓕᒪᓂᕐᒧᑦ ᐱᓱᖕᓂᕐᒥ ᑲᖏᖅᖠᓂᕐᒥ ᐋᒍᔅᑎ 28−ᖑᑎᓪᓗᒍ.
ᐊᕐᕌᒍᑕᒫᒥ ᖃᓄᐃᓕᐅᕐᓂᐅᔪᖅ ᐱᓕᕆᐊᖑᓲᖑᕗᖅ ᐃᖅᑲᐅᒪᓂᕐᒧᑦ ᑎᐊᕆᓐᔅ ᑑᑑᒥ.
ᐃᓄᒋᐊᑦ ᐃᓄᖕᓂ ᐱᒋᐊᓚᐅᖅᐳᑦ ᑑᑑᒃᑯᑦ ᐃᓚᒌᓄᑦ ᐊᖏᕐᕋᖓᓐᓂ, ᐊᕙᓗᓪᓗᒍ ᐅᐃᓕᐊᒻᓴᓐ ᑕᓴᖓᓂ ᐱᕈᖅᓴᐃᓂᕐᒧᑦ ᐅᔾᔨᕈᓱᖕᓂᐅᔪᒥ ᐃᒻᒥᓃᖅᑎᑦᑎᑦᑕᐃᓕᒪᓂᕐᒧᑦ ᑲᖏᖅᖠᓂᕐᒥ, ᐊᒻᒪ ᐅᑎᓚᐅᖅᐳᑦ ᐃᓚᒌᓄᑦ ᐊᖏᕐᕋᖓᓄᑦ ᐅᖃᓪᓚᖃᑎᖃᕐᓂᕐᒧᑦ ᐊᒻᒪ ᑕᒪᓗᒐᒃᓴᒐᓛᓄᑦ.
ᑎᐊᕆᓐᔅ ᐊᑖᑕᖓ, ᐹᕐᓂ, ᐅᖃᓚᐅᖅᐳᖅ ᓄᓕᐊᖓ, ᕉᔅ, ᐱᓕᕆᕐᔪᐊᓲᖑᕗᖅ ᖃᓄᐃᓕᐅᕐᓂᐅᔪᒧᑦ ᐊᕐᕌᒍᑕᒫᒥ.
ᐹᕐᓂ ᐅᖃᓚᐅᖅᐳᖅ ᐋᓐᓂᕐᓇᖅᑐᒻᒪᕆᐊᓗᒃ ᐊᒥᓱᐊᓗᐃᑦ ᐃᓄᐃᑦ ᑭᕙᓪᓕᕐᒥ ᐊᓯᐅᔨᓯᒪᓂᖏᓐᓂ ᓇᒡᓕᒋᔭᒥᓂᑦ ᐃᒻᒥᓃᕐᓂᕐᒧᑦ.
ᑭᓯᐊᓂ 100 ᐳᓴᓐᑎᒥ ᐱᐅᓂᖅᓴᐅᕗᖅ ᓴᖅᑭᑎᑕᐅᓂᖓᓂ ᒪᑐᐃᖓᓂᐅᔪᒧᑦ ᐃᔨᖅᓯᒪᑐᐃᓐᓇᙱᓪᓗᒍ ᒪᑐᓯᒪᔪᓄᑦ ᐹᖑᔪᓂᑦ, ᐅᖃᓚᐅᖅᐳᖅ.
“ᐊᒥᓱᐊᓗᖕᓂ ᖃᐅᔨᒪᕗᖓ ᐊᓯᐅᔨᓯᒪᔪᓂ ᓇᒡᓕᒋᔭᒥᓂᑦ ᐃᒻᒥᓃᕐᓂᕐᒧᑦ ᐊᒻᒪ ᐅᖃᐅᓯᕆᔪᒪᙱᓚᖓᑦ, ᑭᓯᐊᓂ ᑐᑭᖃᙱᓚᖅ ᐃᓗᐊᓃᑎᑐᐃᓐᓇᕐᓂᕐᒧᑦ ᐱᕈᖅᐸᓪᓕᐊᑐᐃᓐᓇᕐᓂᐊᕐᒪᑦ ᑭᓯᐊᓂ ᐃᓅᓯᓕᒫᓐᓂᑦ ᐱᒍᓂ ᖃᓄᑐᐃᓐᓇᒃᑯᑦ,” ᐅᖃᓚᐅᖅᐳᖅ.
ᐹᕐᓂ ᐅᖃᓚᐅᖅᐳᖅ ᑕᐃᒪᑐᖅ ᐃᒻᒥᓃᖅᑎᑦᑕᐃᓕᒪᓂᕐᒧᑦ ᐱᓱᖕᓂᖅ ᐃᑲᔪᓲᖑᓂᖓᓂ ᐅᖃᐅᓯᐅᓂᐅᔪᖅ ᑕᑯᒃᓴᐅᕐᔪᐊᕐᓂᖓᓂ ᐊᕕᒃᓯᒪᓂᐅᔪᒥ, ᐊᒻᒪ ᐃᖅᑲᐃᑎᑦᑎᕗᖅ ᓄᓇᕗᒻᒥ ᒐᕙᒪᒃᑯᓐᓂ ᐱᔭᒃᓴᖃᕐᔪᐊᕐᓂᖏᓐᓂ ᓱᓕ, ᐱᓗᐊᖅᑐᒥ ᐃᓂᐅᔪᒥ ᐃᓱᒪᒧᑦ ᖃᓄᐃᙱᑦᑎᐊᕐᓂᐅᔪᒧᑦ.
ᐹᕐᓂ ᐅᖃᓚᐅᖅᐳᖅ ᐱᒻᒪᕆᐅᕗᖅ ᖃᓄᐃᓕᐅᕐᓂᐅᔪᓂ ᑖᔅᓱᒥᖓᑎᑐᑦ ᐃᒻᒥᓃᖅᑎᑦᑕᐃᓕᒪᓂᕐᒧᑦ ᐱᓱᖕᓂᕐᒥ ᐊᒻᒪ ᐊᕐᕌᒍᑕᒫᒥ ᑎᐊᕆᓐᔅ ᑑᑑ ᐃᖅᑲᐅᒪᓂᕐᒧᑦ ᕼᐋᑭᒧᑦ ᓵᓚᖃᕋᓱᐊᕐᓂᐅᔪᒥ ᐱᓕᕆᐊᖑᓲᒧᑦ ᐃᖅᑲᐅᒪᓂᕐᒧᑦ ᐃᕐᓂᖓᓄᑦ ᐃᖏᕐᕋᐃᓐᓇᕐᓂᖓᓂ ᓄᓇᓕᐅᔪᒥ.
ᐅᖃᓚᐅᖅᐳᖅ ᐊᓯᖏᑦ ᓄᓇᓕᐅᔪᑦ ᐱᓕᕆᓲᖑᕗᑦ ᐊᔾᔨᐸᓗᖏᓐᓂ ᖃᓄᐃᓕᐅᕐᓂᐅᔪᓂᑦ ᑕᒪᑐᒧᖓᑦᑕᐃᓐᓇᖅ ᐱᔾᔪᑕᐅᔪᒧᑦ ᐊᒻᒪ ᐊᕐᕌᒍᑕᒫᒥ ᐊᖏᓖᕙᓪᓕᐊᑐᐃᓐᓇᖅᑑᔨᕗᑦ.
“ᐃᓄᐃᑦ ᑲᑎᖃᑎᒌᒍᒪᔫᔮᓕᖅᐳᑦ ᐊᒻᒪ ᐅᖃᓪᓚᒡᓗᑎᒃ ᒫᓐᓇᐅᓕᖅᑐᒥ, ᐱᐅᓪᓗᓂ” ᐅᖃᓚᐅᖅᐳᖅ. “ᐃᓚᖓᒍᑦ, ᑲᒪᒋᔭᖃᖅᖢᓂ ᐅᑯᓇᓂ ᖃᓄᐃᓕᐅᕐᓂᐅᔪᓂᑦ ᐊᔪᕐᓇᓲᖑᕗᖅ ᐅᕙᑦᑎᓐᓄᓗᒃᑖᖅ ᐃᓚᒌᖑᔪᑎᒍᑦ, ᐱᓗᐊᖅᑐᒥ ᕉᔅᒧᑦ, ᑭᓯᐊᓂ ᖃᐅᔨᒪᐸᓗᒃᐳᖓ ᐃᒻᒥᓃᕐᓂᖅ ᐊᒃᑐᖅᓯᒪᕗᖅ ᑕᒪᒃᑭᓂ ᐃᓚᒌᖑᔪᓄᑦ ᑭᕙᓪᓕᕐᒥ, ᑕᐃᒪᓐᓇ ᐃᓄᑑᙱᓚᒍᑦ ᑖᔅᓱᒧᖓ.”
ᐹᕐᓂᐅᑉ ᐃᕐᓂᖓ, ᑲᓇᑕᒥ ᕼᐋᑭᖅᑎᐅᔪᓄᑦ ᕼᐋᑭᖅᑎᐅᔪᖅ ᔪᐊᑕᓐ, ᐱᓕᕆᕐᔪᐊᓲᖑᒋᕗᖅ ᖁᕝᕙᖅᓴᐃᓂᕐᒧᑦ ᐃᒻᒥᓃᕐᓂᕐᒧᑦ ᐅᔾᔨᕈᓱᖕᓂᐅᔪᒥ ᐊᐅᓪᓛᕈᓘᔭᖅᑎᓪᓗᒍ, ᐊᒻᒪ ᑲᔪᖏᖅᓴᐃᓲᖑᕗᖅ ᓄᑕᖅᑲᓂ ᓄᓇᕗᓕᒫᒥ ᐊᓕᐊᓇᐃᒋᔭᖃᑦᑎᐊᕐᓂᕐᒥ ᐃᓅᓯᕐᒥ ᐊᒻᒪ ᐱᓕᕆᐊᕆᔪᒪᔭᒥᓂᑦ ᒪᓕᒡᓗᑎᒃ, ᐅᖃᓚᐅᖅᐳᖅ.
“ᔪᐊᑎᓐ ᑐᓂᓯᓲᖑᕗᖅ ᐱᐅᑦᑎᐊᖅᑐᒥ ᐅᖃᐅᓯᒃᓴᓕᐊᒥ ᓇᒧᙵᐅᓂᕆᔭᓕᒫᖓᓄᑦ, ᐊᒻᒪ ᐅᐱᒋᑦᑎᐊᖅᐸᕋ ᐱᓕᕆᓂᕆᕙᒃᑕᒥᓂᑦ ᓴᖅᑭᑎᑦᑎᓂᕐᒧᑦ ᒪᑐᐃᖓᓂᐅᔪᒧᑦ ᐅᖃᐅᓯᐅᓂᐊᕐᓗᓂ,” ᐅᖃᓚᐅᖅᐳᖅ. “ᐃᓄᖕᓂ ᖃᐅᔨᒪᑎᑦᑎᓲᖑᕗᖅ ᐃᑲᔪᖅᑕᐅᕕᒃᑕᖃᕐᓂᖓᓂ ᑕᖅᑳᓂ, ᐊᒻᒪ ᐃᓄᒃᑕᖃᖅᐳᖅ ᑕᖅᑳᓂ ᓇᒡᓕᒍᓱᑦᑎᐊᖅᑐᓂ.”