50 ᑭᓗᒍᕌᒻᓂ ᑐᒃᑑᑉ ᓂᕿᖓᓂ ᐊᐅᓪᓚᖅᐸᓪᓕᐊᓕᖅᐳᖅ ᐃᓄᖕᒧᑦ ᐊᕐᓇᒧᑦ ᕆᔭᐃᓇᒧᑦ ᑕᖅᑭᑲᓴᖕᓂ ᒪᕐᕉᖕᓂ ᐊᐅᓪᓚᖅᑎᑕᐅᓚᐅᖅᑎᓪᓗᒍ ᑕᓗᕐᔪᐊᕐᒥ, ᒪᓕᒃᑐᒥ ᐊᐱᖅᓱᖅᑕᐅᓂᐅᔪᒥ ᖃᓄᐃᓐᓂᕆᔭᖓᓄᑦ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓂ.
ᓲᓴᓐ ᐳᕋᐃᑦ, ᐃᖃᓗᒃᑑᑦᑎᐊᒥᐅᑕᓪᓚᕆᐅᔪᖅ ᑭᓯᐊᓂ ᓄᓇᖃᖅᓯᒪᔪᒥ ᕆᔭᐃᓇᒥ ᐊᕐᕌᒍᓄᑦ 20−ᓄᑦ, ᐅᖃᖃᑎᖃᓚᐅᖅᐳᖅ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᐊᐱᕆᔭᐅᓚᐅᕐᓂᖓᓂ ᐊᑭᓖᒃᑲᓐᓂᖁᔭᐅᓪᓗᓂ ᐱᓂᖓᓄᑦ ᐊᖏᔪᒥ ᓇᒃᓯᐅᔾᔭᐅᔪᒥ ᑐᒃᑐᒥ ᐊᐅᓪᓚᖅᑎᑕᐅᓂᑯᒥ ᐃᕐᓂᖓᓄᑦ.
ᐳᕋᐃᑦ ᐅᖃᓚᐅᖅᐳᖅ ᐃᕐᓂᖓ ᐊᐅᓪᓚᖅᑎᑦᑎᓚᐅᖅᐳᖅ 46 ᑭᓗᒍᕌᒻᓂ ᑐᒃᑐᑕᐅᓵᖅᑐᒥ ᓯᑎᐱᕆ 11−ᒥ ᐊᖑᓇᓱᒋᐊᖅᓯᒪᓚᐅᖅᑎᓪᓗᒍ. ᓂᖀᑦ ᐊᐅᓪᓚᖅᑎᑕᐅᓚᐅᖅᐳᑦ ᑲᓇᐃᑎᐊᑦ ᓄᐊᑦᑯᑦ, ᑭᓯᐊᓂ ᓴᖅᑭᓚᐅᖅᓯᒪᙱᓚᖅ.
“ᐃᕐᓂᕋ ᑐᒃᑐᓕᐊᓚᐅᖅᐳᖅ ᑕᓗᕐᔪᐊᓂ ᑕᐃᒪᐃᒐᔪᒃᑲᒥ ᐊᒻᒪ ᑐᒃᑐᓚᐅᖅᐳᖅ ᐅᕙᓐᓄᑦ. ᐊᑭᓖᓚᐅᖅᐳᖅ ᐅᓯᔭᐅᔾᔪᑎᖓᓂ ᐊᒻᒪ ᐅᓯᔭᐅᓂᖓᓄᑦ ᓇᓗᓇᐃᒃᑯᑕᖅᑖᓚᐅᖅᐳᖅ ᐊᒻᒪᓗ ᑭᓱᓕᒫᓂᒃ.” ᐅᖃᓚᐅᖅᐳᖅ ᐳᕋᐃᑦ.
ᐳᕋᐃᑦ ᖃᐅᔨᓇᓱᐊᖃᑦᑕᓚᐅᖅᐳᖅ ᑲᓇᐃᑎᐊᓐ ᓄᐊᑦᒧᑦ ᖃᔅᓰᖅᓱᒐᓚᒃᖢᓂ ᖃᐅᔨᓇᓱᐊᕐᓂᖓᓂ ᖃᓄᐃᓐᓂᐅᔪᒥ. ᐅᖃᐅᔾᔭᐅᓚᐅᖅᐳᖅ ᐊᑕᐅᓯᕐᒥ ᐱᓕᕆᔨᐅᔪᒥ ᓂᖀᑦ ᖁᐊᖃᐅᒻᒦᓐᓂᖏᓐᓂ ᐃᐊᑦᒪᓐᑕᓐᒥ ᐊᒻᒪᓗ ᐊᑭᓖᒃᑲᓐᓂᕆᐊᖃᕐᓂᖓᓂ $300−ᓂ ᓇᒃᓯᐅᔾᔭᐅᓂᖓᓄᑦ ᐊᖏᕐᕋᖓᓄᑦ ᕆᔭᐃᓇᒧᑦ.
“ᖁᐊᖃᐅᒻᒦᑐᐃᓐᓇᖅᐳᖅ ᐃᐊᑦᒪᓐᑕᓐᒥ. ᓇᓗᓕᑦᑎᐊᖅᐳᖓ ᖃᓄᐃᓕᐅᒃᑲᓐᓂᕆᐊᒃᓴᖅ. ᐅᕙᑦᑎᓐᓂ ᐊᑭᓖᒃᑲᓐᓂᖁᔨᓕᖅᐳᑦ $300-ᑲᓴᖕᓂ. ᐱᓕᕆᑦᑎᐊᓪᓗᐊᖅᐳᑦ ᐊᒻᒪ ᐅᕙᓐᓄᑦ ᓇᒃᓯᐅᔾᔭᐅᓗᓂ.”
ᐳᕋᐃᑦ ᑕᑯᑎᑦᑎᓯᒪᕗᖅ ᐅᓯᔭᐅᓂᖓᓄᑦ ᓇᓗᓇᐃᒃᑯᑕᖓᓐᓂ, ᑕᑯᒃᓴᐅᑎᑦᑎᔪᒥᒃ ᐃᕐᓂᖓ ᐊᑭᓖᓚᐅᕐᓂᖓᓂ $151.38−ᓂ ᓂᕿᓂᑦ ᐅᓯᔭᐅᓂᖓᓄᑦ ᕆᔭᐃᓇᒧᑦ, ᐊᒻᒪᓗᑦᑕᐅᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᓂ ᑲᓇᐃᑎᐊᓐ ᓄᐊᑦᒧᑦ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ. ᑐᒃᓯᕋᐅᑕᐅᓂᖓᓂ ᐊᑕᐅᓯᕐᒥ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ, ᐅᖃᓗᓚᐅᖅᐳᖅ ᐋᖅᑭᒃᓯᓇᓱᐊᕐᓂᕐᒧᑦ ᖃᓄᐃᓐᓂᐅᔪᒥ. ᐅᖃᓚᐅᖅᐳᖅ ᐅᖃᐅᔾᔭᐅᓚᐅᕐᓂᖓᓂ ᐱᓕᕆᔨᐅᔪᒧᑦ ᐅᖃᖃᑎᒋᓚᐅᖅᑕᖓᓂ ᐱᔾᔪᑎᒋᔭᐅᔪᖅ ᓂᕿᑦ ᑎᑭᓚᐅᙱᓐᓂᖓᓂ ᓱᓕ ᑭᒡᓕᖃᖅᑎᑕᐅᓂᐅᔪᓄᑦ ᐱᔾᔪᑎᖃᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ.
“ᐅᖃᓚᐅᖅᐳᑦ ᓄᕙᒡᔪᐊᕐᓇᕐᒧᑦ ᐱᔾᔪᑕᐅᓂᖓᓂ,” ᐅᖃᓚᐅᖅᐳᖅ. “ᐊᓱᐃᓛᒃ ᐅᖃᓚᐅᖅᐳᖓ ᖃᓄᐃᒻᒪᑦ ᐊᐅᓪᓚᖅᑎᑕᐅᓚᐅᖅᐸ ᓯᕗᓪᓕᖅᐹᖓᓂ. ᐃᓱᒪᓇᔭᖅᐳᑎᑦ ᓄᖅᑲᖅᑎᑕᐅᓯᒪᓂᖃᕈᓂ ᐊᐅᓪᓚᖅᑎᒐᒃᓴᐅᓇᔭᓚᐅᙱᓐᓂᖓᓂ. ᑭᓯᐊᓂ ᐱᓚᐅᖅᐳᑦ ᐊᑭᓕᖅᑕᐅᓂᐅᔪᒥ.”
ᐅᖃᐅᓯᐅᓪᓗᓂ ᐳᕋᐃᑦᒧᑦ, ᐊᑕᐅᓯᐅᔪᒥ ᐱᓕᕆᔨᐅᔪᒥ ᐅᖃᖃᑎᒋᓚᐅᖅᑕᖓᓂ ᐅᖃᐅᔾᔨᓚᐅᖅᐳᖅ ᐊᓯᖏᓐᓂ ᓂᕆᐅᒃᑐᓂ ᐅᖃᓗᑲᑕᒃᓯᒪᓂᖏᓐᓂ ᐊᔾᔨᐸᓗᐊᓂ ᐅᖃᐱᓗᖕᓂᐅᔪᓄᑦ ᓂᕿᓪᓚᑦᑖᓂ ᑎᑭᓚᐅᙱᓐᓂᖓᓐᓂ.
ᐅᓪᓗᕐᒥ ᐊᑕᐅᓯᕐᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐅᖃᖃᑎᖃᓚᐅᖅᑎᓪᓗᒋᑦ ᑲᓇᐃᑎᐊᓐ ᓄᐊᑦᒥ ᐊᐱᖅᑯᑕᐅᔪᓄᑦ ᐳᕋᐃᑦᒧᑦ ᓇᒃᓯᐅᔾᔭᐅᔪᒧᑦ ᐊᒻᒪ ᐱᑕᖃᑐᐃᓐᓇᕆᐊᖃᖅᑐᒥ ᐊᑐᐊᒐᓄᑦ ᐊᓯᔾᔨᕐᓂᐅᔪᓄᑦ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19−ᒧᑦ, ᐳᕋᐃᑦ ᐃᕐᓂᖓ ᐅᖃᓗᒡᕕᐅᓚᐅᖅᐳᖅ ᑲᒻᐸᓂᐅᔪᒥ ᑭᒡᒐᖅᑐᐃᔨᐅᔪᒥ ᐅᖃᖅᑐᒥ ᓂᕿᑦ ᐊᐅᓪᓚᖅᑎᑕᐅᓂᐊᕐᓂᖓᓂ ᑕᓗᕐᔪᐊᕐᒧᑦ ᐊᒻᒪᓗ ᑮᓇᐅᔭᖏᑦ ᐅᑎᖅᑎᑕᐅᓗᑎᒃ.
ᖃᐅᑎᓪᓗᒍ, ᐳᕋᐃᑦ ᐅᖃᓗᒡᕕᐅᓚᐅᖅᐳᖅ ᖃᐅᔨᑎᑕᐅᓇᓱᐊᖅᖢᓂ ᓂᕿᑦ ᓄᓇᓯᐅᑎᒦᓕᕐᓂᖓᓂ ᖁᐊᖃᐅᑎᓕᖕᒥ ᐊᖏᕐᕋᖓᓄᙵᐅᕙᓪᓕᐊᓪᓗᓂ.
“ᑮᓇᐅᔭᓂᒃ ᐅᑎᖅᑎᑦᑎᓂᐊᕐᓂᕋᓚᐅᖅᐳᑦ ᐊᒻᒪ ᑐᒃᑐ ᓂᖀᑦ ᐅᑎᖅᑎᑕᐅᓗᑎᒃ. ᐊᒻᒪ ᐅᓪᓗᒥ ᐅᖃᓗᒡᕕᐅᓚᐅᖅᐳᖓ. ᐅᕙᓐᓄᑦ ᐅᖃᓗᓚᐅᖅᑐᑦ ᐊᒻᒪ ᒪᒥᐊᖦᖢᑎᒃ ᑕᒻᒪᖅᓯᒪᓂᖏᓐᓄᑦ.”
ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ, ᑭᒡᒐᖅᑐᐃᔨᐅᔪᒥ ᑲᒻᐸᓂᐅᔪᒧᑦ ᐅᖃᓚᐅᖅᐳᖅ ᐅᖃᓪᓚᐅᓯᖃᕈᓐᓇᙱᓐᓂᖏᓐᓂ ᓇᓗᓇᐃᖅᑕᐅᓯᒪᔪᓄᑦ ᐱᓕᕆᓂᐅᔪᓄᑦ ᐱᔾᔪᑎᖃᖅᑐᒧᑦ ᑐᓴᖅᑕᐅᔭᕆᐊᖃᙱᓐᓂᐅᔪᓄᑦ ᐱᔾᔪᑕᐅᔪᓄᑦ. ᑭᐅᓚᐅᙱᓚᑦ ᐊᐱᖅᑯᑎᒃᑲᓐᓂᐅᔪᓄᑦ ᐊᓯᖏᓐᓂ ᐱᓕᕆᔾᔪᔾᔭᐅᕙᒃᑐᓄᑦ ᓂᕿᖏᑦ ᑎᒍᒥᐊᖅᑕᐅᑐᐃᓐᓇᖅᑐᓄᑦ ᐅᕝᕙᓘᓐᓃᑦ ᐱᑕᖃᑐᐃᓐᓇᕆᐊᓕᖕᓂ ᐊᑐᐊᒐᕐᓄᑦ ᐊᓯᔾᔨᕐᓂᐅᔪᓄᑦ ᐱᔾᔪᑎᖃᖅᑐᒧᑦ ᓄᕙᒡᔪᐊᕐᓇᖅ-19−ᒧᑦ.
ᐳᕋᐃᑦ ᐊᑲᐅᒃᓴᙱᒃᑲᓗᐊᖅᑎᓪᓗᒍ ᐊᑯᓂᐊᓘᓚᐅᕐᓂᖓᓂ ᑲᓇᐃᑎᐊᓐ ᓄᐊᑦᑯᓐᓂ ᐋᖅᑭᒍᑎᒃᓴᓕᐅᕐᓂᕐᒧᑦ, ᐅᖃᓚᐅᖅᐳᖅ ᖁᕕᐊᑉᐳᖅ ᓂᕿᓪᓚᑦᑖᒥᒃ ᓂᕆᓛᕐᓂᖓᓂ.
“ᑕᖃᓚᐅᖅᐳᖓ ᐅᓂᒃᑳᕆᓇᓱᐊᕐᓂᕐᒥ ᖃᔅᓰᖅᓱᒐᓚᒃᖢᖓ ᐅᓇ ᑕᒻᒪᕐᓂᐅᓂᖓᓂ,” ᐅᖃᓚᐅᖅᐳᖅ. “ᑕᐸᐃᖅᐳᖓ ᑕᐃᒪᓐᓇᑎᒋᐊᓗᒃ ᐊᑯᓂᐅᑎᒋᓂᖓᓂ ᑭᓯᐊᓂ ᖁᔭᓕᕐᔪᐊᖅᐳᖓ ᒫᓐᓇ ᓂᕿᓪᓚᑦᑖᖃᕐᓂᐊᕐᓂᑦᑎᓐᓂ ᐊᑯᓂᐊᓗᒃ.”