ᐃᓕᓐᓂᐊᖅᑐᑦ ᒍᕇᑦ 9ᒥ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᓇᐅᔮᓂ ᐃᓕᓐᓂᐊᕈᑎᖃᓚᐅᖅᐳᑦ ᓂᕈᐊᕐᓂᕐᒥᒃ ᓄᓇᕗᒥ ᐊᒻᒪ ᑕᕆᐅᑉ ᐊᑭᐊᓂ ᓂᕈᐊᖃᑕᐅᓚᐅᖅᖢᑎᒡᓗ ᓂᕈᐊᖑᐊᖅᖢᑎᒃ, ᓵᓚᒃᓴᖅᑐᒥᒃ ᓂᕈᐊᓚᐅᖏᑉᐳᑦ.
ᐊᕐᕌᒍᓂ ᓯᑕᒪᐅᓯᒪᓕᖅᑐᓂ, ᓇᐅᔮᓂ ᐃᓕᓐᓂᐊᖅᑎᑦ ᓂᕈᐊᖑᐊᖃᑦᑕᖅᓯᒪᓕᖅᐳᑦ ᓄᓇᕗᒥ ᓂᕈᐊᖅᑕᐅᓂᐊᖅᑐᓂᒃ ᑲᓇᑕᐅᑉ ᒐᕙᒪᒃᑯᖏᓐᓂᓗ, ᐊᒻᒪᓘᓐᓃᑦ ᓂᕈᐊᖑᐊᖅᑎᑕᐅᓚᐅᖅᖢᑎᒃ ᐊᒥᐊᓕᑲᐃᑦ ᐊᖓᔪᖄᖓᑦ ᓂᕈᐊᖅᑕᐅᓇᓱᐊᓕᖅᑎᓪᓗᒍ, ᐃᑲᔪᖅᑐᐃᓚᐅᖅᖢᑎᒃ ᓂᕈᐊᓚᐅᖅᖢᑎᒃ ᕼᐃᓗᕆ ᑭᓕᓐᑕᓐᒥᒃ.
ᓂᕈᐊᖅᑕᐅᓇᓱᐊᖅᑐᑦ ᔮᒃ ᐊᓇᕈᐊᒃ ᐊᒻᒪ ᐸᑎᖅ ᓇᒃᓯᒃ ᑕᒪᕐᒥᒃ ᐅᖃᓪᓚᓚᐅᖅᐳᑦ ᐃᓕᓐᓂᐊᖅᑎᓄᑦ ᐊᕐᕌᒍᒥ, ᐊᒻᒪ ᒍᕇᑦ 9 −ᒥ ᐃᓕᓐᓂᐊᖅᑎᑦ ᐃᑲᔪᖅᑐᐃᓚᐅᖅᑎᓪᓗᒋᑦ ᓇᑦᓯᕐᒥᒃ ᓴᓪᓕᕐᒥᐅᑕᖅ ᐊᒥᓲᓂᖅᓴᐃᑦ ᓂᕈᐊᓚᐅᖅᐳᑦ ᓄᓇᓕᖕᓂᒥᐅᒥᒃ, ᐊᓇᕈᐊᒃ.
ᒍᕇᑦ 9-ᒥ ᐃᓕᓐᓂᐊᖅᑎᑎᔨ ᓗᐃᑦ ᕗᕋᐃᓐᓯᔅ ᐅᖃᓚᐅᖅᐳᖅ ᓂᕈᐊᖅᑕᐅᓇᓱᐊᖅᑐᑦ ᐅᖃᐅᓯᖃᖃᑦᑕᓚᐅᕐᒪᑕ ᒪᒃᑯᒃᑐᓄᑦ ᐊᑐᖅᑕᐅᔪᒃᓴᓂᒃ ᐱᑕᖃᒃᑲᓐᓂᕆᐊᖃᕐᓂᖓᓄᑦ.
“ᐸᑎᒃ (ᓇᒃᓯᒃ) ᐅᖃᓪᓚᓚᐅᖅᐳᑦ ᓄᑕᖃᓄᑦ ᐃᒻᒪᖄ ᓯᐊᕐᕆᔮᕐᕕᖕᒥ ᓇᑎᖅᑖᖅᑎᑕᐅᒐᔭᕐᓂᖓᓄᑦ ᐊᐅᔭᒃᑯᑦ,” ᐅᖃᓚᐅᖅᐳᖅ ᕗᕋᐃᓐᓯᔅ.
“ᐅᖃᓚᐅᖅᖢᓂ ᓇᑎᖅ ᐊᑭᑐᓗᐊᖏᑦᖢᓂ ᐱᓕᕆᐊᕆᔭᐅᔪᖅ ᐅᒃᑯᐃᖔᖅᑎᑦᓯᖏᓐᓇᕋᔭᖅᖢᓂ ᓯᐊᕐᕆᔮᕐᕕᖕᒥᒃ ᐃᖃᐃᓕᓴᐅᑎᓂᒃ ᖃᓄᐃᓕᐅᕈᑎᒃᓴᓂᒡᓗ ᐊᐅᔭᒃᑯᑦ,” ᐅᖃᓚᐅᖅᐳᖅ ᕗᕋᐃᓐᓯᔅ.
ᐃᓕᓐᓂᐊᖅᑎᑦ ᑕᒪᑐᒧᒥᖓ ᖁᕕᐊᒋᔭᖃᓚᐅᖅᐳᑦ, ᑭᓯᐊᓂ ᐊᓯᖏᓐᓂᒃᑕᐅᖅ ᐅᖃᐅᓯᖃᓚᐅᕆᓪᓗᑎᒃ.
“ᑐᓴᕈᒪᓚᐅᕐᒪᑕ ᓂᕈᐊᖅᑕᐅᓇᓱᐊᖃᑕᐅᔪᑦ ᖃᓄᖅ ᐃᓱᒪᖃᕐᒪᖔᑕ ᐊᑭᑭᓐᓂᖅᓴᐅᓕᖅᑎᑕᐅᔪᓐᓇᕋᔭᕐᓂᖏᓐᓄᑦ ᓂᕿᑦ ᐊᑭᖏᑦ ᓇᐅᔮᓂ ᐃᒡᓗᖃᖅᑎᑦᓯᓂᖅᓴᐅᒃᑲᓐᓂᕐᓗᑎᒡᓗ.”
ᑕᐃᒪᓐᓇᐅᓕᐅᕌᓂᒃᑲᒥᒃ, ᐃᓕᓐᓂᐊᖅᑎᑦ ᐊᐱᖅᓱᓕᓚᐅᖅᐳᑦ ᐊᓇᕈᐊᕐᒥᒃ ᓇᒃᓯᕐᒥᒡᓗ ᐃᒡᓗᓕᕆᓂᕐᒥᒃ, ᓂᕿᑦ ᐊᒻᒪ ᐃᖃᐃᓕᓴᕐᓂᕐᒧᑦ ᐱᓐᖑᐊᕈᑎᑦ ᒥᒃᓵᓄᑦ ᑎᑭᓯᒪᑎᓪᓗᒋᑦ.
ᕗᕋᐃᓐᓯᔅ ᐅᖃᓚᐅᖅᐳᖅ ᐊᓇᕈᐊᒃ ᓇᑦᓯᕐᓗ ᐅᐱᑦᑑᔮᓚᐅᕐᒪᑕ ᑕᒪᒃᑯᓂᖓ ᐅᖃᐅᓯᕆᔭᐅᔪᓂᒃ ᐃᓕᓐᓂᐊᖅᑎᓄᑦ, ᖃᐅᔨᒪᓂᖏᓐᓄᓪᓗ ᐊᑐᓂ ᐅᖃᐅᓯᕆᔭᒥᖕᓂᒃ.
ᐅᖃᓚᐅᖅᖢᓂᓗ ᑕᒪᕐᒥᒃ ᓂᕈᐊᖅᑕᐅᓕᐊᕿᓚᐅᖅᑐᒃᓴᐅᕗᑦ ᐅᑭᐅᖁᖅᑐᓂᖅᓴᓄᑦ ᐃᓕᓐᓂᐊᖅᑎᓄᑦ ᑎᑭᓯᒪᓚᐅᖅᑎᓪᓗᒋᒃ.
“ᖃᐅᔨᒪᑦᓯᐊᓚᐅᖅᐳᑦ ᒍᕇᑦ 9-ᒥ ᐃᓕᓐᓂᐊᖅᑎᑦ ᓂᕈᐊᕐᓇᐅᓂᐊᓕᓵᖅᑎᓪᓗᒍ ᑕᖅᑭᐅᓚᐅᖅᑐᒥ, ᐊᒻᒪ ᐃᓕᓐᓂᐊᖅᑎᑦ ᐱᓕᕆᓚᐅᖅᑐᑦ ᓂᕈᐊᕆᐊᖅᑐᕐᕕᖑᐊᓂ ᖁᕕᐊᒋᖃᑦᓯᐊᓚᐅᖅᖢᑎᒃ ᐱᓕᕆᐊᒥᖕᓂᒃ,” ᐅᖃᓚᐅᖅᐳᖅ ᕗᕋᐃᓐᓯᔅ.
“ᐃᒪᓐᓇᓗ ᓂᕈᐊᓚᐅᖅᖢᑎᒃ ᐊᓇᕈᐊᒃ ᓵᓚᒃᓴᖅᑎᑕᐅᓪᓗᓂ 55ᓂᒃ ᐱᖃᑎᖓ 52, ᑭᓯᐊᓂ ᑕᒪᓐᓇ ᐃᓕᓐᓂᐊᕈᑎᑐᐃᓐᓇᐅᓚᐅᖅᐳᖅ, ᓂᕈᐊᕆᐊᖃᕐᓂᕐᒧᑦ ᑕᐃᒪᓐᓇ ᖃᓄᐃᓕᐅᕈᑎᖃᕐᓂᐊᕐᓂᖏᑦ ᑐᓴᓚᐅᖅᖢᒋᑦ.
“ᓂᕈᐊᖅᑕᐃᑦ ᓵᓚᒃᓴᖅᐸᑦ, ᐱᐅᕗᖅ, ᑭᓯᐊᓂ ᑕᒪᒃᑯᐊ ᓂᕈᐊᕈᓐᓇᖅᑐᑦ ᐊᒥᓲᓗᐊᖏᒻᒪᑕ ᐊᑐᓂ ᓄᓇᕗᒥ ᓂᕈᐊᖅᑕᐅᕕᐅᔪᓂ, ᐊᒻᒪ 60% ᓂᕈᐊᕈᓐᓇᖅᑐᑦ ᓂᕈᐊᓪᓚᕆᒃᐸᑕ, ᑕᒪᕐᒥᒃ ᓂᕈᐊᕈᑎᑦ ᐱᒻᒪᕆᐅᕗᑦ ᐊᑐᕐᓂᖃᕐᒪᑕ.”