ᐃᓄᐃᑦ ᑲᖏᖅᖠᓂᕐᒥ ᑕᑯᓐᓇᖅᑎᑕᐅᓚᐅᖅᐳᑦ ᐊᕐᕌᒍᒥ ᓄᑖᒥ, ᖃᑉᑎᕆᔨᒃᑯᓐᓄᑦ ᐊᒻᒪ ᐱᓐᖑᐊᖅᑐᓕᕆᔨᒃᑯᓐᓄᑦ ᑲᖏᖅᖠᓂᖅᒥ ᑎᓴᐱᕆ 31-ᒥ.
ᖃᑉᑎᕆᔨᒃᑯᑦ ᐊᖓᔪᖄᖓᑦ ᒫᒃ ᕙᐃᐊᑦ ᓚᐃᓯᓐᓯᖃᖅᐳᖅ ᖄᖅᑕᖅᑐᓂᒃ ᑯᒻᒧᐊᒃᑎᑕᐅᕙᒃᑐᓂᒃ ᑲᒪᔨᐅᓂᕐᒧᑦ ᐱᓕᕆᐊᖃᕐᓂᕐᒧᓪᓗ, ᐊᒻᒪ ᕼᐊᒻᓚᒃᑯᑦ ᑎᑎᕋᖅᑎᖓᓪᓗ ᔭᔅᑕᓐ ᒥᐅᕆᑦ ᐱᓕᕆᖃᑎᒌᓚᐅᖅᐳᒃ ᐱᖓᓱᑦ ᖃᑉᑎᕆᔨᑦ (ᔪᐊᔾ ᐊᒃᓴᒡᔪᐊᒃ, ᑲᐃᔪ ᓘ ᐊᒻᒪ ᑭᓕ ᖃᑉᕖᒃᑐᒃ) ᐊᒻᒪ ᒪᕐᕉᒃ ᐱᓐᖑᐊᖅᑐᓕᕆᔨᒃ (ᑏᕕᑦ ᑲᓛᒃ ᐊᒻᒪ ᑰᑎ ᑐᓗᒐᒃ) ᐃᓕᓐᓂᐊᖅᑎᑕᐅᓚᐅᖅᖢᑎᒃ ᑕᐃᒪᓐᓇᐃᑦᑐᓕᕆᔨᐅᓂᕐᒧᑦ.
ᕙᐃᐊᑦ ᐅᖃᓚᐅᖅᐳᖅ ᐱᓕᕆᖃᑎᖃᓚᐅᕋᒥ ᕙᓂᐹᖕᒥᐅᑕᓂᒃ Archangel Fireworks Inc. ᓇᓗᓇᐃᒃᑯᑕᖅᑖᓚᐅᖅᖢᓂ Energy, Mines and Resources Canada ᑯᓐᓂᑦ ᑕᐃᒪᓐᓇ ᑯᒻᒧᐊᒃᑎᑎᖃᑦᑕᕈᒪᑉᓗᓂ ᑲᖏᖅᖠᓂᕐᒥ.
ᐅᖃᓚᐅᖅᖢᓂᓗ ᑕᓪᓕᒪᑦ ᐃᓕᓐᓂᐊᕌᓂᓚᐅᕐᒪᑕ ᓇᓗᓇᐃᒃᑯᑕᖃᓕᖅᖢᑎᒃ ᑕᐃᒪᓐᓇ ᑯᒻᒧᐊᒃᑎᑕᐅᖃᑦᑕᖅᑐᓕᕆᔪᓐᓇᕐᓂᕐᒧᑦ.
"ᐃᓕᓐᓂᐊᕌᓂᓚᐅᖅᖢᑎᒃ ᑐᑭᖃᖅᐳᖅ ᑕᓪᓕᒪᑦ ᑖᒃᑯᐊ ᑕᐃᒪᓐᓇᐃᑦᑐᓕᕆᔨᐅᔪᓐᓇᕐᓂᐊᓕᖅᐳᑦ, ᑭᓯᐊᓂ − ᐱᖓᓱᐊᖅᑎᕐᓗᑎᒃ ᑕᐃᒪᓐᓇᐃᑦᑐᓕᕆᒋᐊᖃᖅᐳᑦ ᓇᓗᓇᐃᒃᑯᑕᖅᑖᓚᐅᖏᓐᓂᕐᒥᖕᓂ, ᑕᐃᒪᓐᓇ ᓕᕗ 1ᖃᕆᐊᖃᕐᓂᐊᖅᖢᑎᒃ," ᐅᖃᓚᐅᖅᐳᖅ ᕙᐃᐊᑦ.
"ᐱᓕᕆᖃᑎᖃᕐᓂᐊᕐᒪᑕ ᐅᕙᒻᓂᒃ ᐱᖓᓱᐊᖅᑎᕐᖢᑕ ᑕᐃᒪᓐᓇᐃᓕᐅᖅᑎᓪᓗᑕ: ᓄᑖᒥ ᐅᑭᐅᖑᓕᖅᐸᑦ ᐱᐊᓂᓚᐅᖅᓗᑕ, ᐅᐱᖔᒥᓗ ᑕᐃᒪᓐᓇᐃᓕᐅᕐᓂᐊᖅᖢᑕ, ᐊᒻᒪ ᑎᓴᐱᕆ 31, 2018-ᒥ.
"ᐱᐊᓂᒃᑯᑉᑕ, ᓇᓪᓕᐊᑐᐃᓐᓇᖅ ᓂᐅᕕᕈᓐᓇᕐᓂᐊᖅᖢᑎᒃ ᑕᐃᒪᓐᓇᐃᑦᑐᓂᒃ ᐊᒻᒪ ᑕᑯᒃᓴᐅᑎᑦᓯᓗᑎᒃ.
"ᑕᐃᒪ, ᑕᐃᒪᓐᓇᐃᓕᐅᓚᐅᖅᐳᒍᑦ ᐱᓕᕆᖃᑎᒌᒍᓐᓇᕈᒪᑉᓗᑕ, ᐱᓕᕆᖃᑎᒋᑉᓗᒋᓪᓗ Archangel Fireworks ᓄᑖᒥ ᐊᕐᕌᒍᒥ ᖃᐅᒻᒪᓪᓛᔪᓂᒃ ᑯᒻᒧᐊᒃᑎᑎᒍᒪᓪᓗᑎᒃ ᑲᑉᐸᓂᒃᑯᓪᓗ ᐱᓕᕆᖃᑎᒋᔭᐅᑦᓯᐊᓚᐅᖅᐳᑦ.
ᕙᐃᐊᑦ ᐅᖃᓚᐅᖅᐳᖅ ᕼᐊᒻᓚᒃᑯᑦ ᑎᑭᓴᐃᓚᐅᖅᖢᑎᒃ ᓄᑖᒥᒃ ᖃᐅᒻᒪᓪᓛᓂᒃ ᐱᑕᖃᕆᐊᖃᕐᓂᖅᓴᐅᓚᐅᕐᒪᑦ ᑕᑯᒃᓴᐅᑎᑕᐅᔪᒃᓴᓂᒃt."
ᐅᖃᓚᐅᖅᖢᓂᓗ ᐋᖅᑭᒃᓱᐃᓚᐅᕐᒪᑕ ᖃᐅᒻᒪᓪᓛᔪᓕᕆᒍᒪᓪᓗᑎᒃ ᓄᑖᖑᓂᐊᖅᑐᒥ ᐊᕐᕌᒍᒥ ᑎᓴᐱᕆ 31-ᒥ, ᑕᑯᒃᓴᐅᑎᑦᓯᓚᐅᖅᖢᑎᒡᓗ.
"ᑲᔪᓯᑦᓯᐊᓚᐅᖅᐳᓪᓗ ᑭᒃᑯᑐᐃᓐᓇᐃᓪᓗ ᑕᑯᔭᒃᑐᐃᓚᐅᖅᖢᑎᒃ.
"ᑕᐃᑉᓱᒪᓂ, ᕼᐊᒻᓚᒃᑯᑦ ᐊᑐᖃᑦᑕᓚᐅᕐᒪᑕ ᐃᓚᒌᓄᑦ ᐊᑐᒐᒃᓴᐅᕙᒃᑐᓂᒃ ᑯᐊᐸᒃᑯᓐᓂᑦ ᓂᐅᕕᖅᑕᐅᕙᒃᑐᓂᒃ.
"ᐱᑕᖃᓚᐅᖅᐳᖅ 60-ᕖᑦᓄᑦ ᑯᒻᒧᐊᒍᓐᓇᖅᑐᓂᒃ, ᐊᑐᖃᑦᑕᖅᐳᒍᓪᓕ ᑕᒪᒃᑯᓂᖓ 100ᓂᒃ ᑮᒃᖃᖅᑐᓂᒃ ᒪᕐᕉᖕᓂᒡᓗ−, ᐱᖓᓱᓂᒡᓗ- ᐊᒻᒪ ᓯᑕᒪᓂᒃ −ᐃᓐᓯᓯᖃᖅᑐᓂᒃ ᑕᑭᓂᖃᖅᑐᓂᒃ.
"ᓯᑕᒪᓂᒃ ᐃᓐᓯᓯᓂᒃ ᐊᑐᕈᓐᓇᖅᖢᑕ 600−ᕖᒃᓄᑦ ᑯᒻᒧᐊᒍᓐᓇᖅᑐᓂᒃ, ᐊᔾᔨᐅᖏᑦᓂᖏᓐᓂᕆᔭᖏᑦ ᐃᒡᓗᒃᑕ ᑐᓄᐊᓂ ᑕᐃᒪᓐᓇᐃᓕᐅᕈᑎᑦ, ᐊᒻᒪ ᑕᑯᒃᓴᐅᑉᓗᑎᒡᓕ ᑕᒪᒃᑯᐊ ᓄᓇᓕᕐᔪᐊᓄᑦ ᐊᑐᖅᑕᐅᕙᒃᑐᑦ ᖁᕕᐊᓱᒍᑎᒋᔭᑉᓗᑎᒃ."