ᐱᓇᓱᐊᕈᓯᐅᓚᐅᖅᑐᒥ ᑎᑎᕋᓚᐅᖅᑕᕐᒪ ᐊᔾᔨᐸᓗᖏᓐᓂᒃ ᖃᐅᔨᓇᓱᐊᕐᓂᖅ ᖃᓄᖅ ᑐᑭᑖᖅᑎᑕᐅᓯᒪᓂᖓᓄᑦ ᑭᒃᑯᓕᒫᓂᒃ ᐊᔾᔨᒌᒃᑎᑎᓂᖅ ᑲᒪᑦᓯᐊᕆᐊᖃᕐᓂᕐᓗ, ᑕᒪᕐᒥᒃ ᑭᒃᑯᑐᐃᓐᓇᐃᑦ ᑕᒪᑐᒥᖓ ᑐᑭᓯᐅᒪᒋᐊᖃᖅᐳᑦ, ᐊᖏᖃᑎᒌᒡᓗᑎᒃ ᐊᒻᒪ ᐊᒃᓱᕈᕈᑕᐅᔪᓂᒃ ᐱᓕᕆᐊᖃᕐᓗᑎᒃ ᐃᖢᐃᓪᓕᐅᕈᑕᐅᔪᓂᒡᓗ. ᐊᑕᐅᓯᐅᖏᑦᖢᓂ ᐱᓕᕆᐊᒃᓴᐅᖕᒪᑦ. ᑕᒪᒃᑯᐊ ᓱᓇᑐᐃᓐᓇᐃᑦ ᐅᖃᐅᓯᕆᕙᒃᑕᕗᑦ, ᐱᓕᕆᐊᕆᕙᒃᑕᕗᑦ ᐃᓱᒪᒋᕙᒃᑕᕗᑦ ᑕᒪᕐᒥᒃ ᐊᒃᑐᐊᖓᖃᑦᑕᐅᑎᖕᒪᑕ. ᐅᖃᐅᓯᕆᓚᐅᖅᖢᒍᓗ ᐋᓐᓂᐊᖅᑖᖅᑕᐃᓕᒪᓂᕐᒧᑦ ᐅᖃᐅᓯᖃᖅᑎᓪᓗᖓ ᑕᐃᒪᓐᓇ ᓄᒫᓱᒃᑯᕕᑦ ᓂᐊᖁᖑᖃᑦᑕᕋᔭᖅᐳᑎᑦ, ᑲᑉᐱᐊᓱᒃᑯᕕᑦ ᓈᖑᖃᑦᑕᕐᓗᑎᑦ, ᓂᖓᐅᒪᒍᕕᑦ ᓄᑭᒃᑎᑦ ᓄᒃᑎᕆᖃᑦᑕᕐᓗᑎᒃ ᐊᓯᖏᓪᓗ ᐃᒃᐱᒋᔭᐅᔪᓐᓇᕆᓪᓗᑎᒃ. ᑕᒪᒃᑯᐊ ᖃᓄᐃᓕᐅᕈᑎᒋᔭᖅᐳᑦ ᑕᒪᕐᒥᒃ ᐊᑭᒋᐊᖃᕐᒪᑕ ᖃᓄᑐᐃᓐᓇᖅ ᐊᑲᐅᔪᒃᑯᑦ ᐊᑲᐅᖏᑦᑐᒃᑯᓪᓘᓐᓃᑦ.
ᐳᐃᒍᑲᐅᑎᒋᖃᑦᑕᕋᑦᑕ ᑕᒪᒃᑯᐊ ᐃᓄᐃᑦ ᖁᑦᓯᒃᑐᓄᑦ ᐱᓕᕆᐊᒃᓴᓄᑦ ᐃᓕᔭᐅᕙᒃᑐᑦ ᐱᓕᕆᐊᒃᓴᖃᓪᓚᕆᖕᒪᑕ ᓴᓐᖏᓂᖃᖅᖢᑎᒡᓗ ᐊᑐᐊᒐᓕᐅᕈᓐᓇᓕᖅᖢᑎᒡᓗ ᐱᖁᔭᓕᐅᕈᓐᓇᓕᖅᓗᑎᒡᓗ ᑭᒡᒐᖅᑐᖅᑕᒥᖕᓂᒃ ᐃᓱᒪᑦᓯᐊᕐᓗᑎᒃ. ᑕᒪᒃᑯᐊ ᐊᖓᔪᖃᐅᑎᑦ ᑎᒎᑎᑦᓯᐊᕈᓐᓇᖏᑦᑕᕗᑦ ᓱᓕ ᑕᐃᒪᖓᓂᓪᓗ ᓵᓚᒋᔭᐅᓇᓱᐊᖏᓐᓇᖅᖢᑕ ᐊᓯᔾᔨᖅᑕᐅᑦᑕᐃᓕᒪᓪᓗᑕ. ᐅᓇ ᐅᖃᐅᓯᖅ ᑕᖃᒋᑦᓯᐊᖅᐸᕋ, “ᑕᐃᒪᓐᓇᐃᒻᒪᑦ” ᐊᓯᔾᔨᖅᑕᐅᔪᓐᓇᕋᓗᐊᖅᖢᓂ ᐃᒪᓐᓇ, “ᑕᒪᓐᓇ ᐋᖅᑭᒍᓐᓇᖅᐸᕗᑦ ᐱᓕᕆᖃᑎᒌᑦᓯᐊᖅᓗᑕ.” ᑕᐃᒪᓐᓇ ᐅᖃᕆᐊᖃᕋᓗᐊᖅᖢᑕ.
ᐅᖃᓪᓚᖃᑎᖃᓚᐅᕋᒪ ᐃᓅᖃᑎᓐᓂᒃ ᑕᒪᐃᓐᓄᑦ ᐊᒃᑐᐊᖓᓪᓗᓂᓗ ᐅᖃᐅᓯᕆᔭᖅᐳᑦ ᐊᑕᐅᓯᑐᐃᓐᓇᕐᒥᒃ ᐱᔾᔪᑎᖃᖏᑦᖢᓂᓗ. ᑕᒪᓐᓇ ᑕᒪᐃᓐᓄᑦ ᑐᕌᖓᔪᖅ ᐊᒃᑐᐊᖓᔪᖅ ᐱᔾᔪᑎᖃᖅᖢᓂ ᐃᒡᓗᖃᖅᑎᑕᐅᒋᐊᖃᕐᓂᑦᑎᓐᓄᑦ. ᐅᖃᐅᓯᖃᓚᐅᕋᒪ ᐃᒡᓗᖃᕐᓂᖅ ᐃᒡᓗᑐᐃᓐᓇᕐᒥᒃ ᐱᔾᔪᑎᖃᖏᒻᒪᑦ ᓴᓇᔭᐅᓯᒪᔪᒥᒃ ᐅᓪᓗᑕᒫᖅᓯᐅᑎᑦᑎᓐᓄᓪᓗ ᐊᒃᑐᐊᓪᓗᓂ. ᐃᒡᓗᖃᖏᓐᓂᖅ ᐊᑲᐅᖏᓕᐅᕈᑕᐅᖕᒪᑦ ᐃᓕᓐᓂᐊᕐᓂᕐᒧᑦ, ᓄᑕᕿᕆᓂᕐᒧᑦ, ᐱᖃᑎᒌᑦᓯᐊᕋᓱᐊᕐᓂᕐᒧᑦ ᐊᐃᑉᐸᕇᑦᓯᐊᕐᓂᕐᒧᑦ, ᓴᓐᖏᓕᖅᓴᐃᓂᖅ ᐊᐃᑉᐸᕇᖕᓂᕐᒥᒃ ᓄᑕᕋᖏᓪᓗ ᐃᓐᖑᑕᖏᓪᓗ ᐃᓚᐅᓪᓗᑎᒃ ᑕᐃᒪᓐᓇ ᐃᓂᖃᑦᓯᐊᖅᑎᑕᐅᒋᐊᖃᖅᖢᑎᒃ ᐃᓄᒋᐊᓗᐊᖏᓪᓗᑎᒃ ᐃᒡᓗᒥ ᐊᑕᐅᓯᕐᒥ ᑕᐃᒪᓐᓇ ᐃᓅᖃᑎᒌᑦᓯᐊᕈᓐᓃᕈᓐᓇᕐᒪᑕ ᐃᖢᕐᕆᔮᖏᓪᓗᑎᒡᓗ.
ᑭᒃᑯᓕᒫᓂᒃ ᐊᔾᔨᒌᒃᑎᑎᓂᖅ ᐱᔾᔪᑎᒋᓪᓗᒍ ᐊᒥᓱᑦ ᑎᒥᐅᔪᑦ ᐃᓚᐅᑎᑕᐅᒋᐊᖃᖅᐳᑦ ᐃᓚᒌᑦᓯᐊᕆᐊᖃᖅᖢᑎᒡᓗ ᐱᓕᕆᓂᖏᑦ ᐊᑕᐅᑦᓯᒃᑰᕐᓗᑎᒃ. ᐃᓚᔮᕇᑦ ᐊᒃᓱᕈᖅᐸᑕ ᓂᕿᖃᑦᓯᐊᖏᓐᓂᕐᒧᑦ, ᐃᓄᐃᑦ ᑲᑐᔾᔨᓪᓗᑎᒃ ᐃᑲᔪᕆᐊᖅᐸᒃᐳᑦ ᑕᒪᒃᑯᓂᖓ ᓂᕿᒃᓴᖏᓐᓂᒃ ᐸᔪᒃᖢᑎᒃ, ᐊᖑᓇᓱᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐃᓚᐅᑎᑎᒍᑎᖃᖅᖢᑎᒡᓗ ᐊᖑᓇᓱᐊᕈᓐᓇᕐᓂᖓᓄᑦ ᐃᖃᓗᒃᓯᐅᖃᑕᐅᓗᓂ ᑐᒃᑐᓯᐅᕐᓗᓂᓗ ᐅᒥᖕᒪᒃᓯᐅᕐᓗᓂᓗ ᐊᓯᖏᓐᓂᒡᓗ. ᑕᒪᒃᑯᐊ ᑭᒃᑯᓕᒫᓂᒃ ᐊᔾᔨᒌᒃᑎᑎᓂᕐᒧᑦ ᐱᓕᕆᐊᑦ ᑲᑎᒪᒍᑎᒋᔭᐅᕙᒃᖢᓂ. ᐃᓚᔮᕇᑦ ᑐᖁᔨᐊᖃᖅᐸᑕ ᑕᐃᒪᓐᓇ ᐳᕌᖅᑎᑎᖃᑦᑕᖅᖢᑎᒃ ᐃᓄᑑᑦᑕᐃᓂᖁᓪᓗᒋᑦ ᐃᓚᐃᖅᑐᑦ, ᓂᕿᑖᖅᑎᑎᖃᑦᑕᖅᖢᑎᒡᓗ ᐃᖢᕐᕆᔮᕈᑎᒃᓴᓂᒡᓗ ᐅᖃᐅᔾᔪᐃᔪᖃᖅᖢᓂ ᐃᑲᔪᕈᑎᑎᒍᑦ. ᑕᐃᒪ ᐊᖓᔪᖄᕆᔭᐅᔪᑦ ᑕᒪᑐᒥᖓ ᐊᖏᕈᑎᖃᖏᑉᐸᑕ ᓄᑕᖅ ᓄᑕᖃᓪᓘᓐᓃᑦ ᐅᓗᕆᐊᓇᖅᑐᒦᑉᐸᑕ, ᐊᖏᕐᕋᖃᖅᑎᑕᐅᓕᖅᖢᑎᒃ ᐅᓗᕆᐊᓇᖏᑦᑐᒥ ᐊᕕᒃᓯᒪᑎᑕᐅᓚᐅᐱᓪᓚᒃᖢᑎᒃ ᐊᖓᔪᖄᒥᖕᓂᑦ ᐃᓅᓯᓕᕆᔭᐅᓂᖏᓐᓄᑦ ᐋᖅᑭᒃᓱᕈᔾᔭᐅᑎᓪᓗᒋᓪᓗ ᑲᑎᑎᑕᐅᒃᑲᓐᓂᕐᓂᐊᖅᖢᑎᒃ ᐊᑲᐅᓂᖅᓴᒃᑰᓕᕐᓗᑎᒃ.
ᐃᓱᒪᒋᒋᐊᖅᖢᒍ ᑕᐃᑦᓱᒪᓂ ᓄᓇᐅᑉ ᐊᑖᓂ ᐅᔭᕋᖕᓂᐊᖅᑎᒃᑯᓐᓄᑦ ᐃᖅᑲᓇᐃᔭᖅᑎᓪᓗᖓ ᓴᓂᒧᑦ ᑕᑯᓐᓇᕈᓐᓇᑦᓯᐊᖏᑦᖢᖓᓗ ᐊᖅᑯᑎᑦ ᓴᓇᔭᐅᓯᒪᓂᖏᑦ ᐱᔾᔪᑎᒋᓪᓗᒋᑦ ᑕᐃᒪᓐᓇ ᑕᑯᓐᓇᑦᓯᐊᕈᓐᓇᖏᓐᓂᕋᖅᑕᐅᓕᖅᖢᖓ ᓱᓕ ᑕᐃᒪᐃᓕᖓᓪᓗᓂ ᐅᔭᕋᖕᓂᐊᕐᕕᖕᒥ ᑕᐃᒪᓐᓇ ᐱᓕᕆᐊᕆᔭᐅᓯᒪᓕᖅᖢᓂᓗ ᑕᒪᒃᑯᐊ ᐃᓄᖕᓂᒃ ᐃᑲᔪᕆᐊᖃᕋᓗᐊᖅᑐᑦ, ᑕᐃᒪᓐᓇ ᐱᑦᓯᐊᕈᒪᓚᐅᖅᖢᑎᒃ ᑕᑯᓐᓇᑦᓯᐊᖏᓕᕐᒪᑕ ᐱᓕᕆᐊᕆᒋᐊᖃᖅᑕᒥᖕᓂᒃ ᐱᔭᕆᐊᑐᓗᐊᕋᔭᕐᓂᖏᓐᓄᑦ, ᑮᓇᐅᔭᖃᖏᓗᐊᕐᓂᕐᒧᓪᓗ, ᐊᐅᓚᑕᐅᑦᓯᐊᖏᓗᐊᕐᓂᖏᓐᓄᓪᓗ, ᐃᒃᐱᒍᓱᖏᓗᐊᕐᓂᖏᓪᓗ ᐊᓯᖏᓐᓂᒡᓗ ᐅᖃᐅᓯᖃᕈᓐᓇᖅᐳᖓ ᐊᒥᓱᓂᒃ ᖃᐅᔨᔪᒃᓴᐅᕗᓯ ᖃᓄᖅ ᐅᖃᕋᓱᐊᕐᒪᖔᕐᒪ.
ᑕᒪᑦᑕ ᐊᔾᔨᒌᒃᑎᑎᖃᑕᐅᔪᓐᓇᖅᐳᒍᑦ ᐅᔾᔨᕐᓇᖏᒃᑲᓗᐊᕐᓗᓂ ᑕᐃᒪᓐᓇ ᐊᔾᔨᒌᒃᑎᑎᓪᓚᕆᒐᔭᕐᓗᑕ ᐃᓄᖕᓂᒃ ᑕᒪᐃᓐᓂᒃ.