ᓯᕗᓪᓕᖅᐹᒥ ᑕᐃᒪᖓᓂᑦ ᓄᓇᕗᒥ ᒐᕙᒪᒃᑯᓐᓂᒃ ᓂᕈᐊᓚᐅᖅᑎᓪᓗᒋᑦ, ᓂᕆᐅᒋᔭᖃᖅᐳᖓ −− ᐃᑲᔪᖅᑐᐃᑉᓗᖓᓗ −− ᓯᕗᓕᖅᑎᐅᓂᐊᖅᑐᖅ ᑭᕙᓪᓕᕐᒥᐅᑕᐅᖁᑉᓗᒍ.
ᖁᕕᐊᓱᑦᓯᐊᕋᔭᖅᐳᖓ ᓇᓕᐊᑐᐃᓐᓇᖅ ᑲᖏᖅᖠᓂᕐᒥᐅᑕᐃᑦ ᓗᐊᓐ ᑯᓱᒐᒃ ᐅᕙᓘᓐᓃᑦ ᑳᑎ ᑕᐅᑐᖏ ᓯᕗᓕᖅᑎᖑᕐᓂᖅᐸᑎᒃ.
ᑕᐃᒪᒃᑲᓐᓂᕐᓗ ᒪᓕᒐᓕᐅᖅᑎ ᑭᕙᓪᓕᕐᒥ, ᐊᕐᕕᐊᒥᐅᑕᖅ ᔮᓐ ᒦᓐ, ᐃᑲᔪᖅᑐᕋᔭᖅᐸᕋ ᓯᕗᓕᖅᑎᖑᕋᓱᐊᕐᓂᖅᐸᑦ, ᑭᓯᐊᓂ ᒫᓐᓇᐅᓂᖓᓂ ᓯᕗᓕᖅᑎᖑᕋᓱᐊᕐᓂᐊᖏᑉᐳᖅ.
ᐃᒡᓗᐊᒍᑦ, ᑕᐃᒪᑐᖅ ᑭᕙᓪᓕᕐᒥᐅᑦ ᒪᓕᒐᓕᐅᖅᑎᑦ ᒥᓂᔅᑕᖑᕋᓱᐊᖅᑕᐃᓕᓂᐊᖅᐳᑦ ᐱᔪᓐᓇᕈᑎᒃ.
ᑕᐃᒪᓐᓇ, ᓂᕈᐊᖅᑕᐅᒃᑲᓐᓂᕈᒪᓛᕈᑎᒃ.
ᐅᑭᐅᓂ ᖁᓕᓂᑦ−15-ᓄᑦ, ᑭᕙᓪᓕᕐᒥ ᒪᓕᒐᓕᐅᖅᑎᑦ ᒥᓂᔅᑕᖑᖅᑐᑦ 8−ᓂᒃ ᓄᑖᓂᒃ ᐅᖃᐅᓯᖃᓕᖃᑦᑕᖅᐳᑦ ᐱᐅᒋᖏᑦᓯᐊᖅᑕᒻᓂᒃ: “ᑕᑯᓐᓇᕆᐊᖃᕋᑉᑯ ᐊᖏᔫᑎᓪᓗᒍ.”
ᐃᑲᔪᖅᑐᖅᐸᒃᑲᒃ ᑕᐅᑐᖏ ᑯᓱᒐᕐᓗ ᓯᕗᓕᖅᑎᖑᑦᓯᐊᕈᓐᓇᕐᒪᑎᒃ, ᐊᔾᔨᒌᖏᑦᑐᒃᑯᑦ ᐃᓕᖁᓯᖃᕋᓗᐊᖅᖢᑎᒃ.
ᑕᐅᑐᖏ ᓱᓕᑦᓯᐊᖅᖢᓂ ᐱᖑᐊᑐᐃᓐᓇᖏᑦᖢᑎᒃ ᐱᓕᕆᐊᖃᖅᐸᒃᖢᓂ ᓈᒻᒪᒃᓴᖅᓯᒪᖏᑦᖢᓂᓗ ᑮᓇᐅᔭᓕᐅᖅᑎᑕᐅᓗᐊᕐᓂᖏᓐᓄᑦ ᑕᒪᒃᑯᐊ ᐊᐅᓚᑦᓯᔨᐅᖃᑕᐅᔪᑦ.
ᐱᓕᕆᑦᓯᐊᓚᐅᖅᐳᑦ ᐊᖓᔪᖄᕆᔭᐅᓪᓗᓂ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓄᑦ ᖃᐅᔨᒪᓐᓇᖅᐳᕐᓗ ᐊᔪᖏᑦᓯᐊᕋᔭᕐᓂᖓᓄᑦ ᓯᕗᓕᖅᑎᐅᓂᕐᒧᑦ.
ᑕᐅᑐᖏ ᐊᒃᓱᕈᕐᓇᖅᑐᓂᒃ ᐊᐱᖅᓱᖃᑦᑕᖅᐳᖅ ᑭᐅᔭᐅᑦᓯᐊᕈᒪᕙᒃᖢᓂᓗ. ᓯᒃᑲᖓᔪᓕᕆᔨᐅᖏᑉᐳᖅ ᑕᐃᒪᓐᓇᐃᓐᓇᖅ ᐊᔾᔨᒌᓂᒃ ᑭᐅᖃᑦᑕᕈᒪᖏᑦᖢᓂ, ᑕᐃᒪᓐᓇᑐᐃᓐᓇᕈᓗᒡᓗ ᑭᐅᖃᑦᑕᖏᑦᖢᓂ ᐅᖃᓪᓚᑐᐃᓐᓇᖃᑦᑕᖏᑦᖢᓂᓗ.
ᐱᓕᕆᖃᑎᖃᕈᒪᒃᑲᐅᑉᓗᓂ ᐱᓕᕆᑦᓯᐊᖃᑕᐅᓂᐊᖅᑐᓂᒃ ᐱᓕᕆᐊᕆᒍᒪᔭᖏᓐᓄᑦ − ᐃᖢᐊᖅᓴᕆᐊᖁᑉᓗᒋᑦ ᓄᓇᕗᒥᐅᑦ ᐃᓅᓯᒃᑯᑦ − ᐊᑭᕋᖅᑐᖅᑕᐅᖁᔭᐅᓇᔭᖏᑦᖢᓂᓗ ᒐᕙᒪᓕᕆᓂᖓᓄᑦ.
ᐊᒻᒪ ᑕᐃᒪᓐᓇᐃᑦᑐᒥᒃ ᓯᕗᓕᖅᑎᖃᕆᐊᖃᕐᒪᑕ ᓄᓇᕗᒥ ᒫᓐᓇ.
ᑕᐃᒪᓐᓇᑦᑕᐅᖅ ᑯᓱᒐᖅ, ᑭᓯᐊᓂ ᐃᖅᑲᐅᒪᒍᓂ ᓇᑭᖔᖅᓯᒪᓂᕐᒥᓄᑦ ᖃᐅᔨᒃᑲᓐᓂᕐᓗᓂᓗ ᒪᐃᔭᐅᑦᓯᐊᕙᓚᐅᖅᓯᒪᓂᕐᒥᓄᑦ ᖃᓄᖅ ᓄᓇᓕᖕᓂ ᓯᕗᓕᖅᑎᐅᑎᓪᓗᒍ ᑕᐃᒪᓐᓇᐃᑦᑐᒥᒃ ᐊᔪᖏᑦᓯᐊᖅᑐᒥᒃ ᑕᑯᓚᐅᖅᓯᒪᖏᓐᓇᒪ ᓄᓇᓕᖕᓂ ᒥᑭᔪᓂ, ᐊᖏᔪᓂ ᐊᖏᓂᖅᓴᐅᔪᓂᓗ ᑕᐃᒪᓐᓇᐃᓕᐅᖅᑐᓂᒃ.
ᐃᖅᑲᐅᒪᕗᖓ ᓱᓕ, ᑕᐅᑐᖅᑰᑦᓯᐊᖅᖢᖓ, ᑲᑎᒪᑎᓪᓗᒋᑦ ᕼᐊᒻᓚᒃᑯᑦ ᑲᖏᖅᖠᓂᕐᒥ ᑯᓱᒐᒃ ᐱᓕᕆᐊᒃᓴᒥᒃ ᐊᔭᐅᖅᓯᒍᑎᖃᖅᖢᓂ ᓄᓇᒥᓂ.
ᐃᑲᕋᑲᓴᒃ ᐊᐅᕙᐅᑎᖃᓚᐅᖅᖢᑎᒃ ᐃᖢᐊᖏᑦᑐᓂᒃ, ᑲᑎᒪᔨᑦ ᐅᖃᐅᓯᖃᓚᐅᕐᒪᑕ ᐊᔾᔨᒌᖏᑦᑐᓂᒃ ᐱᔾᔪᑎᖃᕐᓂᕋᖅᖢᑎᒃ ᑕᐃᒪᓐᓇ ᓴᓇᒋᐊᖁᔨᖏᑦᑐᑦ, ᑯᓱᒐᒃ ᖁᕕᐊᓱᖏᓕᖅᐸᓪᓕᐊᓕᓚᐅᖅᐳᖅ.
ᐅᖃᓚᐅᖅᖢᓂᓗ ᑲᑎᒪᔨᓄᑦ ᑕᖃᓂᕋᖅᖢᓂ ᑐᓴᐃᓐᓇᓕᕋᒥ ᓱᓇᒥᒃ ᐱᔾᔪᑎᖃᖅᖢᑎᒃ ᐱᖁᔨᖏᓐᓂᖏᓐᓄᑦ ᓴᓇᒋᐊᖁᔨᖏᓐᓂᖏᓐᓄᑦ ᑐᓴᕈᒪᓕᖅᖢᓂᓗ ᖃᓄᖅ ᐋᖅᑭᒃᑕᐅᔪᓐᓇᕋᔭᕐᓂᖓᓄᑦ. ᐊᐱᕆᑉᓗᖏᓪᓗ ᑲᑎᒪᔪᑦ, “ᐅᖃᐅᑎᔭᐅᒍᒪ ᐃᖢᐊᕐᓂᖅᓴᒧᑦ ᐊᑐᒐᒃᓴᖃᖁᑉᓗᒋᑦ ᓄᓇᓕᖕᓂᒥᐅᑦ ᐋᖅᑭᒃᑕᐅᔪᓐᓇᖏᑉᐸᑦ ᐊᒃᓱᕈᕐᓇᓗᐊᕐᓂᖏᓐᓄᑦ, ᓱᖕᒪᑦ ᑕᒡᕙᓃᑉᐱᑕ?”
ᖃᑦᓯᒥᓂᑐᐃᓐᓇᐅᓕᖅᑎᓪᓗᒍ, ᐅᖃᐅᓯᕆᔭᐅᔪᑦ ᐃᒡᓗᐊᓄᖔᖅᑕᐅᓕᓚᐅᖅᐳᑦ. ᒪᐃᔭᓪᓚᕆᒃ ᑯᓱᒐᒃ. ᑯᓱᒐᒃ ᑕᐅᑐᖕᒪᑦ ᐃᒥᐅᑎᒥᒃ ᑕᑕᑲᓴᒃᑐᒥᒃ ᑕᐃᒪᓐᓇ ᑕᖃᓚᐅᖅᓯᒪᔪᔮᖏᑦᖢᓂᓗ ᐱᓕᕆᕙᒃᖢᓂ ᑕᐃᒪᓐᓇ ᑕᑕᑎᓐᓇᓱᐊᖅᖢᓂᐅᒃ.
ᑕᐃᒪᓐᓇᓗ, ᓯᕗᓕᖅᑎᑦᓯᐊᕙᐅᒐᔭᖅᖢᓂ ᓄᓇᕗᒥ ᒫᓐᓇᐅᔪᖅ.
ᑕᒪᓐᓇ ᓯᕗᓕᖅᑎᐅᑉ ᐃᒃᓯᕙᐅᑕᕆᓂᐊᖅᑕᖓᑕ ᓴᓂᐊᒍᑦ, ᑭᕙᓪᓕᕐᒥᐅᑦ ᓄᓇᕗᑦ ᒐᕙᒪᒃᑯᖏᓐᓄᑦ ᑎᑭᑕᐅᒋᐊᖃᕐᒪᑕ ᑭᕙᓪᓕᕐᒧᑦ ᐱᓕᕆᓂᐊᖅᑐᓂᒃ.
ᑭᕙᓪᓕᕐᒥᐅᑦ ᓂᐱᖓᑦ, ᑕᐃᑉᓱᒪᓂ ᓴᓐᖏᔪᒻᒪᕆᐅᓚᐅᖅᓯᒪᔪᖅ ᑲᑐᔾᔨᖃᑎᒌᑦᓯᐊᖅᖢᑎᒡᓗ, ᖃᓱᕗᖅ ᐊᕕᒃᓯᒪᓕᖅᖢᑎᒡᓗ ᐊᒥᓲᓗᐊᖅᑐᑦ ᓂᕈᐊᖅᑕᐅᔪᑦ 'ᐱᓐᖑᐊᕈᒪᑐᐃᓐᓇᕐᒪᑕ ᒐᕙᒪᐅᓂᕐᒧᑦ' ᑎᑭᒃᑳᖓᒥᒃ ᐃᖃᓗᖕᓄᑦ.
ᐃᓚᖏᑦ ᐃᖢᐊᖅᑐᒦᑉᐳᑦ ᓂᕈᐊᖅᑎᓄᑦ ᐱᔭᐅᒃᑲᓐᓂᓚᐅᕐᒪᑕ, ᐃᓚᖏᓪᓗ ᑐᓴᖅᑕᐅᓚᐅᖅᓯᒪᖏᓕᖅᖢᑎᒃ.
ᒪᕐᕉᖕᓂᒃ ᐊᐅᓚᖁᑎᖃᕆᐊᖃᓕᕐᒪᑦ ᓄᓇᕗᒥ ᐅᑭᐅᖑᓂᐊᖅᑐᓂ. ᐊᑕᐅᓯᖅ ᐃᒪᓐᓇ ᑎᑎᕋᖅᓯᒪᓗᓂ ᑭᕙᓪᓕᖅ ᓯᕗᓕᖅᑎᐅᓂᖓ! ᓯᕗᓕᖅᑎᐅᑉ ᑎᑎᕋᕐᕕᖓᓂᑦ ᐊᐅᓚᖁᑎ ᑕᑯᒃᓴᐅᓗᓂᓗ.
ᐱᖃᑎᖓ ᑎᑎᕋᖅᓯᒪᓗᓂ ᑭᕙᓪᓕᖅ ᓯᕗᓪᓕᐅᓗᓂ! ᐊᐅᓚᖁᑎᒋᔭᐅᓗᓂᓗ ᑕᑯᒃᓴᐅᓗᓂ ᑕᒪᐃᓐᓂ ᑭᕙᓪᓕᕐᒥᑦ ᓂᕈᐊᖅᑕᐅᓯᒪᔪᑦ ᑎᑎᕋᕐᕕᖓᓐᓂ ᓯᕗᓕᖅᑎᓚᓯᒪᖏᑉᐸᑕ ᐊᑎᖏᓪᓗ ᑕᐃᒪᓐᓇᐃᓕᖏᑉᐸᑕ.