ᑭᕙᓪᓕᕐᒥ ᒪᓕᒐᓕᐅᖅᑏᑦ ᓂᑉᓕᖃᑦᑕᓕᕐᒥᔪᑦ ᐃᓱᒫᓘᑎᖃᖅᖢᑎᒃ ᑐᒃᑐᑦ ᓂᐅᕕᐊᒃᓴᐅᖃᑦᑕᕐᓂᖏᓐᓄᑦ ᑕᐃᒪᓐᓇ ᐅᓗᕆᐊᓇᖅᑐᒦᑎᑦᑎᔪᓐᓇᖅᑐᑦ ᑭᕙᓪᓕᕐᒥ ᑐᒃᑐᖁᑎᒋᔭᐅᔪᓂᒃ.
ᐸᑎᖅ ᓇᑦᓯᖅ ᐊᒻᒪᓗ ᑳᑎ ᑕᐅᑐᙱ ᑕᒪᕐᒥᒃ ᓂᑉᓕᓚᐅᖅᑑᒃ ᐃᓱᒫᓘᑎᖃᖅᖢᑎᒃ ᐱᕗᓕ ᐊᒻᒪᓗ ᖃᒪᓂᕐᔪᐊᑉ ᑐᒃᑐᖁᑎᖏᓐᓂᒃ, ᑕᒪᒃᑯᐊ ᑐᒃᑐᒐᓱᒃᑕᐅᔪᑑᖃᑦᑕᙱᒻᒪᑕ ᓄᓇᕗᒥᐅᓄᑦ, ᑐᒃᑐᒐᓱᒃᑕᐅᖃᑦᑕᕐᒪᑕᑦᑕᐅᖅ ᓄᓇᑦᓯᐊᕐᒥᐅᓄᑦ, ᒫᓂᑑᐸᒥᐅᓄᑦ ᐊᒻᒪᓗ ᓄᓇᕗᒥᐅᓄᑦ.
“ᑐᒃᑐᑦ ᑭᕙᓪᓕᕐᒥ ᐅᓗᕆᐊᓇᖅᑐᒦᑦᑐᑦ. ᐱᔾᔪᑕᐅᖃᑕᐅᓗᐊᖅᑐᖅ ᐱᑕᖅᑕᐅᒐᔪᖕᓂᖅᓴᐅᓕᕐᒪᑕ ᐊᒻᒪᓗ ᖃᕆᑕᐅᔭᒃᑯᑦ ᓂᐅᕕᐊᒃᓴᐅᕙᒃᖢᑎᒃ ... ᒫᓐᓇᐅᔪᖅ ᓂᐅᕕᐊᒃᓴᐅᖃᑦᑕᖅᑐᑦ ᖃᕆᑕᐅᔭᒃᑯᑦ ᐊᐅᓚᑕᐅᓂᖃᙱᒻᒪᑕ, ᐊᒻᒪᓗ ᐃᓚᖏᑦ ᐃᓄᐃᑦ ᓂᐅᕕᐊᒃᓴᖃᓲᑦ ᑐᒃᑐᓂᒃ ᖃᕆᑕᐅᔭᒃᑯᑦ ᐊᑭᑐᔪᒻᒪᕆᐊᓗᒃᑯᑦ. $400-ᑐᖃᑦᑕᖅᑐᑦ $600-ᓄᑦ ᐊᑐᓂ ᑐᒃᑐᐃᑦ. ᐃᑲᔪᖅᑐᕈᒪᔭᒃᑲ ᐊᖑᓇᓱᒃᑏᑦ ᐊᖑᓇᓱᑦᑎᐊᔪᔪᑦ, ᑭᓯᐊᓂ ᑕᐃᒪᐅᖕᒪᑕᑦᑕᐅᖅ ᐊᖑᓇᓱᒃᑏᑦ ᐱᑕᖅᓯᑉᓗᑎᒃ ᕿᒪᐃᒥᐊᓲᑦ,” ᑕᐅᑐᙱ, ᒪᓕᒐᓕᐅᖅᑎ ᑲᖏᖅᖠᓂᐅᑉ ᐅᐊᖕᓇᖓᓄᑦ − ᐃᒡᓗᓕᒑᕐᔪᖕᒧᑦ, ᑕᐃᒪᓐᓇ ᐅᖃᓚᐅᖅᑐᖅ ᒪᓕᒐᓕᐅᕐᕕᖕᒥ ᑕᓪᓕᒻᒥᐅᑎᓪᓗᒍ.
“ᐊᒻᒪᓗᑦᑕᐅᖅ, ᐃᓛᓐᓂᒃᑯᑦ ᑕᑯᖃᑦᑕᖅᓯᒪᔪᒍᑦ ᑐᒃᑐᑕᐅᔪᕕᓂᕐᓂᒃ ᐃᒋᑕᐅᑐᐃᓐᓇᖅᓯᒪᔪᓂᒃ ᑐᓐᓄᖃᙱᓐᓂᖏᓐᓄᑦ. ᕿᒪᒃᑕᐅᑐᐃᓐᓇᓲᑦ. ᐅᖃᖏᑦ ᐱᔭᐅᑐᐃᓐᓇᖅᖢᑎᒃ, ᑕᒪᓐᓇ ᐃᓄᐃᑦ ᐃᓕᖅᑯᓯᑐᖃᕆᙱᑕᖓ. ᐃᓱᒪᒃᓴᖅᓯᐅᕆᐊᖃᖅᑐᒍᑦ ᖃᓄᖅ ᐃᓕᓐᓂᐊᖅᑎᑦᑎᓇᔭᕐᓂᑉᑎᓐᓄᑦ ᒪᒃᑯᒃᑐᖁᑎᑉᑎᓐᓂᒃ ᐊᖑᓇᓱᒃᑎᓂᒃ ᖃᓄᖅ ᐋᒃᑐᐃᑦᑎᐊᖃᑦᑕᕋᔭᕐᒪᖔᑕ ᑐᒃᑐᓂᒃ, ᐊᒻᒪᓗ ᑐᒃᑐᑦ ᓱᓇᖏᑦ ᖃᓄᖅ ᐊᑐᖅᑕᐅᔪᓐᓇᕐᓂᖏᓐᓄᑦ, ᐆᒃᑑᑎᒋᓗᒍ, ᐊᓐᓄᕌᒃᓴᐅᓲᑦ.”
ᓇᑦᓯᖅ ᐅᖃᖅᖢᓂ ᓄᓇᖅᑲᑎᒌᒃᑐᓄᒡᒎᖅ ᐅᖃᐅᑎᔭᐅᖃᑦᑕᕋᒥ ᖃᓄᐃᓕᒋᐊᕈᑎᖃᕆᐊᖃᓕᕐᓂᖓᓄᑦ ᓴᐳᓐᓂᐊᖅᑕᐅᔪᓐᓇᖁᑉᓗᒋᑦ ᑐᒃᑐᑦ.
“ᐱᖏᖕᓇᖅᓯᖕᒪᑦ ᓴᓪᓕᖅ ᕿᑭᖅᑕᐅᑎᓪᓗᒍ, ᐊᒻᒪᓗ ᕿᑭᖅᑕᖓ ᐊᖏᔫᒐᓗᐊᖅᑎᓪᓗᒍ, ᐱᖏᖕᓇᖅᓯᔪᖅ ᐃᓄᐃᑦ ᓂᐅᕕᐊᒃᓴᖃᖃᑦᑕᕐᒪᑕ ᑐᒃᑐᓂᒃ ᑕᐃᑲᙶᖅᑐᓂᒃ. ᐱᖏᒋᓕᖅᑕᖅᐳᑦ. ᓂᕈᐊᖅᑕᐅᕝᕕᒋᓯᒪᔭᕋᓂᒃ ᐅᖃᓗᒡᕕᐅᖏᓐᓇᖃᑦᑕᕋᒪ ᑕᒪᑐᒪ ᒥᒃᓴᓄᑦ, ᐅᖃᖃᑦᑕᖅᑐᑦ ᖃᓄᐃᓕᒋᐊᕆᐊᖃᕐᓂᑉᑎᓐᓄᑦ,” ᑕᐃᒪᓐᓇ ᐅᖃᖅᖢᓂ ᓇᑦᓯᖅ, ᐊᐃᕕᓕᖕᒧᑦ ᒪᓕᒐᓕᐅᖅᑎ. “ᓄᓇᕗᒥ ᓄᓇᑖᕐᕕᐅᑉ ᐊᖏᕈᑎᓕᐊᖓᑕ ᐃᓗᐊᓂ, ᐅᖃᖅᓯᒪᖕᒪᑦ ᑭᓇᑐᐃᓐᓇᖅ ᐃᓄᒃ ᓂᐅᕕᐊᒃᓴᖃᕈᓐᓇᕐᒪᑦ ᑐᒃᑐᒥᒃ. ᑭᓯᐊᓂᓕ, ᓯᕗᓂᒃᓴᑉᑎᓐᓂᒃ ᐃᓄᖁᑎᕗᑦ ᐊᖑᓇᓱᖃᑦᑕᖁᓂᐊᕈᑉᑎᒍᑦ, ᖃᓄᐃᓕᒋᐊᕈᑎᒋᔭᕆᐊᖃᓕᖅᑕᖅᐳᑦ. ᐱᖏᖕᓇᖅᓯᔪᖅ. ᑕᐃᒪᐃᒻᒪᑦ ᐊᔭᐅᖅᑐᖅᑕᕋ ᒥᓂᔅᑕᒋᔭᖅᐳᑦ ᑲᑎᒪᖃᑎᖃᖁᑉᓗᒍ ᓄᓇᕗᑦ ᑐᙵᕕᒃᑯᑦ ᑎᒥᖓᓂᒃ ᑕᒪᑐᒪ ᒥᒃᓴᓄᑦ. ᐱᐅᔫᓇᔭᖅᑐᖅ ᑕᐃᒪᐃᓕᐅᖅᐸᑕ ᑐᒃᑐᐃᕈᑎᖅᑳᖅᑎᓐᓇᑕ.”
ᒪᓂᒐᓕᐅᖅᑎ ᖃᒪᓂ’ᑐᐊᕐᒧᑦ ᑯᕆᒃ ᓯᒪᐃᓚᒃ ᐊᐱᕆᓚᐅᖅᑐᖅ ᐊᕙᑎᓕᕆᔨᒃᑯᑦ ᒥᓂᔅᑕᖓᓂᒃ ᔫ ᓴᕕᑲᑖᕐᒃᒥ ᐱᓕᕆᕝᕕᖓ ᑲᑎᒪᖃᑎᖃᖃᑦᑕᕐᒪᖔᑦ ᓯᓚᓕᕆᔭᑉᑎᓐᓂᒃ ᖃᓄᐃᓕᖓᓕᕐᓂᖏᓐᓄᑦ ᐱᕗᓕ ᐊᒻᒪᓗ ᖃᒪᓂᕐᔪᐊᑉ ᑐᒃᑐᖏᑦ ᓄᓇᖏᓐᓂᒃ, ᐊᒻᒪᓗ ᐊᖏᕈᑎᓂᒃ ᐱᑕᖃᕐᒪᖔᑦ ᑕᒪᕐᒥᒃ ᓄᓇᓖᑦ ᐱᓕᕆᔪᓐᓇᖁᑉᓗᒋᑦ ᐱᔪᓐᓇᕐᓂᓗᒃᑖᒃᑯᑦ ᓄᖑᑉᐸᓪᓕᐊᖁᓇᒋᑦ ᑐᒃᑐᑦ.
ᓴᕕᑲᑖᖅ ᐅᖃᓚᐅᖅᑐᖅ ᐱᓕᕆᖃᑎᖃᐃᓐᓇᕐᒪᑕ ᐊᐅᓚᑦᑎᔨᐅᖃᑕᐅᔪᓂᒃ ᓄᓇᑦᓯᐊᕐᒥ ᐊᒻᒪᓗ ᓄᓇᓕᖕᓂᒃ ᖃᑉᓗᓈᑦ ᓄᓇᖏᓐᓂᒃ, ᐊᒻᒪᓗᑦᑕᐅᖅ ᐱᕗᓕ ᐊᒻᒪᓗ ᖃᒪᓂᕐᔪᐊᑉ ᑐᒃᑐᖏᓐᓂᒃ ᐊᐅᓚᑦᑎᔨᒃᑯᑦ ᑲᑎᒪᔨᖏᓐᓂᒃ. ᐅᖃᖅᖢᓂᓗ ᑐᒃᑐᒍᑎᒃᓴᑦ ᐋᖅᑭᒃᑕᐅᔪᓐᓇᕐᒪᑕ ᓄᓇᕗᒥ,” ᓄᖑᑎᕆᓗᐊᖅᑕᐅᓕᒪᓂᕐᒧᑦ ᐱᓕᕆᔭᕆᐊᖃᕋᓱᒋᒍᑉᑕ.”
ᓯᒪᐃᓚᒃ ᐅᖃᖅᖢᓂ ᐅᒃᐱᕈᓱᒃᑲᒥ ᓄᓇᕗᑦ ᒐᕙᒪᒃᑯᖏᑦ ᐸᕐᓇᒃᓯᒪᔭᕆᐊᖃᕐᓂᖏᓐᓄᑦ ᒪᑐᐃᖅᓯᒃᑲᓐᓂᕋᔭᕐᓂᖏᓐᓄᑦ ᐃᓚᖓᓂᒃ ᓄᓇᕗᒥ ᐊᖏᕈᑎᓕᐊᒃᑰᖓᔪᓂᒃ ᓴᐳᓐᓂᐊᖅᑕᐅᑦᑎᐊᖁᑉᓗᒋᑦ ᑐᒃᑐᑦ ᑭᕙᓪᓕᕐᒥ, ᐱᔭᕆᐊᖃᕈᑎᒃ.