Rankin Inlet North-Chesterfield Inlet MLA Cathy Towtongie: “In this day and age, cyber-bullying is a reality, especially during elections.”
photo courtesy of the Government of Nunavut

ᐊᒥᓱ ᑲᑎᒪᔨᕐᔪᐊᖑᔪᑦ ᐃᑲᔪᖅᓱᐃᕗᑦ ᐊᐅᐸᔪᒃᑐᒥ ᐅᕕᓂᕈᕐᒥ ᐅᓪᓗᖓᓂ ᐊᒻᒪᓗ ᐃᓚᒋᔭᖓᓂ ᖃᓄᖓᓴᖅᑕᐃᓕᓂᕐᒧᑦ ᐅᖃᐅᓯᒃᓴᖓᓂ.

ᐃᓚᖏᑦ ᑕᐃᒃᑯᓇᙵᑦ ᑲᑎᒪᔨᕐᔪᐊᖑᔪᓂ ᐃᒻᒥᓂᒃ ᐸᒡᕕᓵᕆᔭᐅᕙᒃᐳᑦ, ᐱᓗᐊᖅᑐᒥ ᖃᕋᓴᐅᔭᑎᒍᑦ.

“ᐅᓪᓗᒥᐅᔪᒥ ᐊᒻᒪ ᐅᑭᐅᖑᔪᒥ, ᖃᕋᓴᐅᔭᑎᒍᑦ ᖃᓄᖓᓴᖅᑐᑦ ᐱᓪᓚᕆᐅᕗᖅ, ᐱᓗᐊᖅᑐᒥ ᓂᕈᐊᕐᓇᐅᑎᓪᓗᒍ.” ᐅᖃᖅᐳᖅ ᑳᑎ ᑕᐅᑐᙱ, ᑲᖏᖅᖠᓂᖅ ᐅᐊᖕᓇᖅ-ᐃᒡᓗᓕᒑᕐᔪᖕᒧᑦ ᒪᓕᒐᓕᐅᖅᑎ.

ᐃᓛᓐᓂᒃᑯᑦ ᐱᒋᐊᖅᑕᐅᕙᓚᐅᖅᐳᖅ ᖃᕋᓴᐅᔭᑎᒍᑦ – ᐃᓄᖕᓂ ᓇᓗᓇᖅᑎᑦᑎᓯᒪᔪᓂ ᐃᒻᒥᓂᒃ – ᑭᓯᐊᓂᑦᑕᐅᖅ ᐃᓚᖏᓐᓂ ᐱᕋᔭᒃᑕᐅᖃᓯᐅᑎᖃᑦᑕᓚᐅᖅᐳᑦ.

“ᑕᒪᓐᓇ ᐋᓐᓂᕐᓇᖅᐳᖅ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᑕᐃᒪᐃᑦᑐᓂ ᐊᑭᕋᖅᑐᕐᔪᐊᖅᑐᓂ ᐅᖃᐅᓯᒃᓴᓂ ᐃᓛᓐᓂᓚᐅᓱᖓᕐᒥ ᐃᓱᒪᒃᓴᖅᓯᐅᕆᓐᓇᖅᐳᖅ ᑲᑎᒪᔨᕐᔪᐊᖑᐃᓐᓇᕐᓂᕐᒥ. “ᐊᓯᐊᒍᑦ, ᓱᓕᙱᑦᑐᒥ ᐅᖃᐅᓯᖃᕐᓂᐅᔪᒥ ᐊᓯᒥᓂᒃ ᐊᑐᖅᑕᐅᓲᖑᕗᖅ. ᓲᕐᓗ, ᐹᖅᓯᓲᖑᕗᒍᑦ ᑕᑯᒃᓴᐅᙱᑦᑐᒥ ᑭᒡᓕᐅᔪᒥ– ᐊᓱᐃᓛᒃ ᑐᕌᒐᒃᓴᙳᖅᖢᑕ, ᓲᕐᓗ ᑭᒃᑯᓕᒫᓄᑦ ᐱᒋᐊᖅᑕᐅᓂᐅᔪᒧᑦ. ᓄᓇᕗᑦ ᒥᑭᑦᑐᒻᒪᕆᑯᓗᒃ – ᓱᕋᑦᑎᑦᑎᐊᕈᓐᓇᖅᐳᖅ ᐃᓅᑉ ᐃᓅᓯᖓᓂ.”

ᑕᐅᑐᙱ ᓴᖅᑭᑎᑦᑎᓯᒪᕗᖅ ᐊᑲᐅᙱᓕᐅᕈᑕᐅᔪᒥ ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓᓐᓂ, ᕿᓂᖅᖢᓂ ᐱᓕᕆᓂᐅᔪᓂ ᐃᓄᐃᑦ ᐱᐅᙱᑎᑦᑎᔪᓐᓇᙱᓐᓂᖏᓐᓂ ᑲᑎᒪᔨᕐᔪᐊᙳᕋᓱᐊᖅᑐᓂ ᖃᕋᓴᐅᔭᑎᒍᑦ ᐊᑎᖏᓐᓂ ᓴᖅᑭᑎᑕᐅᙱᓪᓗᑎᒃ ᐃᓱᒪᒋᓗᒍ ᓵᙵᔭᒃᓴᐅᔪᓐᓇᕐᓂᕐᒧᑦ. ᐊᑭᖓ ᑭᓇᐅᓂᖓᓂ ᓇᓗᓇᖅᑎᑕᐅᓗᓂ ᐱᑦᑎᐊᙱᓐᓂᐅᔪᒥ ᐃᒪᐃᑎᑦᑎᔪᓐᓇᖅᐳᑦ ᐃᓚᖏᓐᓂ ᑲᑎᒪᔨᕐᔪᐊᙳᕋᓱᐊᑐᐃᓐᓇᕆᐊᓕᖕᓂ ᐱᓇᓱᐊᔾᔮᙱᓚᑦ ᑲᑉᐱᐊᓵᕆᔭᐅᔪᒪᓇᑎᒃ, ᐃᓚᒋᐊᖅᓯᓚᐅᖅᐳᖅ.

“ᖃᓄᑭᐊᖅ ᓴᖅᑭᑎᑦᑐᓐᓇᖅᐸᕗᑦ ᐃᓚᖏᓐᓂ ᐅᑯᓂᖓ ᐱᐅᙱᑎᑦᑎᕐᔪᐊᖅᑐᓂ ᐱᒋᐊᖅᑎᐅᔪᓂ ᓴᖅᑭᑎᑕᐅᔭᕆᐊᖃᕋᔭᖅᑐᓂ ᐊᑎᖏᓐᓂ ᐱᒋᐊᕈᑎᒃ ᓂᕈᐊᒐᒃᓴᐅᔪᓂ ᑭᓇᐅᓂᖓᓂ ᓇᓗᓇᖅᑎᓪᓗᒍ ᖃᕋᓴᐅᔭᑎᒍᑦ, ᐅᕝᕙᓘᓐᓃᑦ ᐅᖃᐅᓯᒃᓴᓕᐅᑐᐃᓐᓇᖅᐸᒡᓗᑎᒃ ᐊᑎᓪᓚᕆᖏᓐᓂ ᐊᑐᕐᓗᑎᒃ ᓂᕈᐊᒐᒃᓴᐅᔪᓂ ᑲᑎᒪᓂᐅᔪᒥ ᐊᒻᒪ ᐊᐱᖅᓱᖅᑕᐅᓂᐅᔪᒥ, ᐱᐅᒋᓂᖅᓴᐅᓇᔭᖅᑕᓐᓂ,” ᑕᐅᑐᙱ ᐅᖃᓚᐅᖅᐳᖅ ᒪᓕᒐᓕᐅᖅᑎᒃᑯᑦ ᑲᑎᒪᕝᕕᖓᓐᓂ ᓯᑎᐱᕆᐅᓚᐅᖅᑐᒥ.

ᑕᔅᑎᓐ ᕗᕋᑦᓚᓐ, ᓄᓇᕘᑉ ᓂᕈᐊᖅᑐᓕᕆᓂᕐᒧᑦ ᐊᖓᔪᖅᑳᖓ ᑭᐅᓚᐅᖅᐳᖅ ᓂᕈᐊᕐᓂᕐᒧᑦ ᓄᓇᕗᑦ ᓇᐅᑦᑎᖅᓱᓲᖑᕗᑦ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ ᑭᓯᐊᓂ ᑲᓇᑕᒥ ᐸᓖᓯᒃᑯᓐᓂ ᑲᒪᒋᔭᕆᐊᖃᖅᐸᖓ ᐱᓕᕆᓂᕐᒧᑦ ᖃᐅᔨᓴᖅᓯᓂᐅᔪᒥ ᑐᙵᕕᖃᖅᑐᓂ ᐅᖃᐱᓗᖕᓂᐅᔪᓂ ᐃᓄᓕᒫᓄᑦ.

ᕗᕋᑦᓚᓐ ᐅᓂᒃᑳᓚᐅᖅᐳᖅ ᓄᓇᕗᒻᒥ ᓂᕈᐊᕐᓂᕐᒧᑦ ᒪᓕᒐᖓ ᓂᕈᐊᒐᒃᓴᐅᔪᓂ ᓴᒡᓗᔭᕆᐊᖃᙱᓚᑦ ᓂᕈᐊᒐᒃᓴᐅᖃᑎᒋᓇᓱᐊᕐᑕᖏᓐᓂ “ᐊᒻᒪᓗ ᑕᐃᑲᓂ ᓄᖅᑲᓲᖑᕗᖅ.”

“ᓂᕈᐊᒐᒃᓴᐅᔪᒥ ᑭᓇᑐᐃᓐᓇᕐᒥᓪᓘᓐᓃᑦ ᓄᓇᓕᖕᓂ ᐅᒃᐱᕈᓱᒃᑯᑎᒃ ᑭᓇᑐᐃᓐᓇᖅ ᐅᖃᐅᓯᖃᑲᑕᒃᑯᓂ ᓴᒡᓗᓂᐅᔪᓂ ᐊᓯᖓᓂ ᓂᕈᐊᒐᒃᓴᐅᖃᑕᐅᔪᒥ, ᑕᒪᓐᓇ ᒪᓕᒐᕐᒥ ᓱᕋᐃᓂᐅᕗᖅ ᐊᒻᒪᓗ ᑕᐃᒃᑯᐊ ᐃᓄᐃᑦ ᐅᖃᓗᒍᓐᓇᖅᐳᑦ ᑎᑎᕋᕐᕕᑦᑎᓐᓄᑦ ᐊᒻᒪ ᐃᑲᔪᕋᓱᐊᕐᓂᐊᖅᐸᕗᑦ ᑕᑕᑎᕆᓕᐊᓕᖕᓂ ᑕᑕᑎᕆᓂᕐᒧᑦ ᐅᕝᕙᓘᓐᓃᑦ ᑕᐃᑯᙵᑦᑎᐊᒻᒪᕆᒡᓗᓂ ᑲᓇᑕᒥ ᐸᓖᓯᒃᑯᓐᓄᑦ ᐅᖃᐅᓯᕆᔭᖅᑐᕐᓗᒍ ᐅᖃᐱᓗᖕᓂᐅᔪᒥ. ᑲᓇᑕᒥ ᐸᓖᓯᒃᑯᑦ ᐃᑲᔪᕐᔪᐊᓚᐅᖅᐳᑦ ᓂᕈᐊᕐᓂᐅᓚᐅᖅᑐᒥ ᐱᓕᕆᓂᕐᒧᑦ ᖃᐅᔨᓴᕐᓂᐅᔪᓂ,” ᐅᖃᓚᐅᖅᐳᖅ ᕗᕋᑦᓚᓐ.

ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᖅ ᓈᓚᙱᓚᖅ ᐊᑭᕋᖅᑐᖅᑎᐅᔪᓂ

ᓄᓇᕗᒻᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᓕᖅᑎᓪᓗᒍ 25−ᓂ ᐅᑭᐅᖃᖅᑎᓪᓗᒍ, ᒧᒥᓛᖅ ᖃᖅᑲᖅ ᑐᓴᓚᐅᖅᐳᖅ ᖃᓄᑐᐃᓐᓈᓗᒃ ᐊᑭᕋᖅᑐᖅᑐᓂ ᐅᖃᐅᔾᔨᔪᒪᔪᓂ ᐸᕐᓇᒃᓯᒪᙱᓐᓂᖓᓂ ᐱᓕᕆᐊᖑᔪᒧᑦ.

“ᑭᓇᑐᐃᓐᓇᖅ ᖃᕋᓴᐅᔭᒃᑰᕈᑎᓕᐅᕈᓐᓇᖅᐳᑦ. ᑭᓇᑐᐃᓐᓇᖅ ᖃᕋᓴᐅᔭᒃᑰᕈᓐᓇᖅᐳᑦ ᐊᒻᒪ ᐃᓕᖕᓂ ᐊᑭᕋᖅᑐᕐᓗᓂ … ᐃᓚᖏᑦ ᐅᖃᐅᓯᒃᓴᓕᐊᖏᑦ ᐊᒻᒪᓗ ᐅᖃᓪᓚᖕᓂᖏᑦ ᐃᓱᒪᒋᔭᕆᐊᖃᙱᓚᑦ,” ᐅᖃᓚᐅᖅᐳᖅ, ᐅᖃᓚᐅᖅᖢᓂᓗ ᐅᖃᓕᒫᓗᐊᖃᑦᑕᓚᐅᕐᓂᖓᓂ ᐅᖃᐅᓯᒃᓴᐅᔪᓂ ᐊᒻᒪᓗ ᓄᖅᑲᕐᔫᒥᔭᕆᐊᖃᓚᐅᖅᐳᖅ.

ᑭᓯᐊᓂ ᐃᓚᖓᓐᓂ ᓇᓂᓯᕗᖅ ᐃᒃᐱᒍᓱᖕᓂᐅᔪᒥ ᑎᑭᐅᑎᑦᑎᐊᕈᓐᓇᕐᓂᐅᔪᒥ ᐱᓕᕆᑦᑎᐊᕐᓂᖓᓂ ᐃᓱᒪᒋᓇᒋᑦ ᐊᑭᕋᖅᑐᖅᑎᐅᔪᓂ.

“ᐊᖏᔪᒻᒪᕆᐊᓗᖕᒥ ᓈᒻᒪᒃᓴᕐᓂᖃᖅᐳᖅ ᓇᖏᖅᖢᓂ ᐃᓂᐅᔪᒥ (ᑲᓇᑕᐅᑉ ᒪᓕᒐᓕᐅᖅᑎᖏᓐᓂ) ᐃᓕᖕᓂ ᑐᖂᑦᑎᓪᓗᐊᓚᐅᖅᑐᓂ ᐊᒻᒪᓗ ᐃᓄᖁᑎᖕᓂᑦ, ᐊᒻᒪᓗ ᓱᓕ ᑕᐃᒪᐃᓐᓇᓱᐊᖅᖢᑎᒃ ᑕᐃᒃᑯᓂᖓᓗᒃᑖᖅ ᐃᓄᖕᓂ ᐃᓕᒃᑐᑦ ᑕᐅᑦᑐᖃᙱᑦᑐᓂ, ᐊᒻᒪᓗ ᐃᓱᒪᓕᐅᕆᓂᕐᒥ ᐃᓄᖕᓄᑦ ᐃᓕᒃᑐᑦ ᑕᐅᑦᑐᖃᖅᑐᓄᑦ ᐊᒻᒪᓗ ᑕᐃᒪᐃᑦᑐᒐᓚᖕᓂ ᐊᑐᕐᓂᑯᖃᖅᑐᓂ ᐃᓅᓯᐅᔪᒥ. ᓴᙱᔪᐊᓘᕗᖅ ᖃᐅᔨᒪᓂᕐᒧᑦ ᓱᓕ ᐅᕙᒦᑦᑐᒍᑦ,” ᐅᖃᓚᐅᖅᐳᖅ. “ᐅᕙᓐᓄᑦ, ᐃᓚᓯᑐᐃᓐᓇᖅᐳᖅ ᐅᖅᓱᐊᓗᖕᒥ ᐃᑭᑦᑐᒧᑦ. ᓴᙳᒃᑲᓐᓂᑐᐃᓐᓇᕈᒥᓐᓇᕆᕙᕋ ᐊᒻᒪ ᐅᖃᕐᓗᖓ, ‘ᖁᙱᐊᙵ.’ ᐊᒻᒪ ᐊᓱᐃᓛᒃ ᑕᑯᒃᓴᐅᑎᖦᖢᒍ.”

ᑕᐃᒪᙵᓂ ᓂᕈᐊᖅᑕᐅᓚᐅᖅᑎᓪᓗᒍ ᐅᒃᑐᐱᕆ 2019−ᒥ, ᖃᖅᑲᖅ ᐅᖃᓚᐅᖅᐳᖅ ᓇᓗᓇᐃᖅᓯᒪᑦᑎᐊᖅᑐᒥ ᑐᑭᓕᐅᕆᓯᒪᕗᖅ ᐱᓕᕆᔨᒻᒪᕆᐅᓂᖓᓂ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᕐᒧᑦ ᖃᕋᓴᐅᔭᒃᑰᕈᑎᖓᓂ ᐊᒻᒪᓗ ᓇᖕᒥᓂᕆᔭᖓᓐᓂ – ᑭᖑᓪᓕᐅᔪᖅ ᐃᒃᓯᖕᓇᖅᓯᒪᕙᖓ, ᐃᓚᒋᐊᖅᓯᓚᐅᖅᐳᖅ, ᐱᕕᒃᓴᖃᙱᑦᑎᐊᖃᑦᑕᕐᒪᑦ.

ᐃᖅᑲᓇᐃᔭᖅᑎᖃᓕᕆᕗᖅ ᐃᑲᔪᓲᖑᔪᓂ ᑲᒪᒋᔭᖃᖃᑦᑕᕐᓂᖏᓐᓂ ᑕᒪᕐᒥᒐᓚᒃ ᐃᓗᓕᖏᓐᓂ ᕿᒥᕐᕈᕙᒃᑕᖏᓐᓂ. ᐃᓚᒋᐊᖅᓯᓚᐅᖅᐳᖅ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᑦ ᐊᑑᑎᖃᕈᓐᓇᕐᓂᖓᓂ ᐱᓕᕆᔾᔪᑕᐅᓪᓗᓂ ᐃᑲᔪᕐᓂᕐᒧᑦ ᑲᑎᒪᔨᕐᔪᐊᖑᔪᓂ ᓂᕈᐊᖅᑎᒋᔭᖏᓐᓂ ᐅᖃᖃᑎᖃᕈᓐᓇᕐᓂᕐᒧᑦ, ᐱᓪᓚᕆᐅᔪᓂ ᐊᑲᐅᙱᓕᐅᕈᑕᐅᔪᓂ ᓴᖅᑭᑕᐅᒑᖓᑕ.

“ᐱᐅᒋᑦᑎᐊᖅᐸᒃᑲ ᐃᑲᔪᖅᓱᐃᔨᒋᔭᒃᑲ ᐊᒻᒪ ᖃᓂᓐᓂᕆᔭᒃᑲ,” ᐅᖃᓚᐅᖅᐳᖅ ᐊᖏᔪᒻᒪᕆᐊᓗᖕᒥ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᕐᒧᑦ ᒪᓕᒃᑎᖏᓐᓂ ᐊᒥᓱᑦ ᐅᐱᒍᓱᒃᐸᒃᑐᓂ ᐊᒻᒪᓗ ᓴᙱᒃᑎᑦᑎᒋᐊᓲᓂᑦ.

ᔮᓕᑦ ᐱᑦᓯᐅᓛᖅ ᐳᕉᔅᑐᕐ, ᐃᖃᓗᖕᓂ ᒪᐃᔭᐅᑉ ᑐᖓᓕᖓ, ᐅᖃᓚᐅᖅᐳᖅ ᐃᓛᓐᓂᒃᑯᑦ ᐱᕙᒃᐳᖅ ᐱᔪᒪᙱᑕᖏᓐᓂ ᓇᖕᒥᓂᖅ ᐅᖃᐅᓯᒃᓴᓕᐊᓂ ᓇᑭᑐᐃᓐᓇᖅ ᐊᖑᑎᓂᑦ, ᑭᓯᐊᓂ ᐊᒥᓱᓗᐊᓂ ᐊᑲᐅᙱᓕᐅᕈᑎᖃᖅᓯᒪᙱᓚᖅ ᖃᕋᓴᐅᔭᑎᒍᑦ.

“ᑕᒪᐃᑎᒍᑦ, ᐃᓱᒪᕗᖓ ᐅᖃᖃᑎᒋᕙᙱᓐᓇᒃᑭᑦ, ᑕᒪᕐᒥᒐᓚᐃᑦ ᖃᓄᖓᓴᕋᓱᐊᓲᖑᙱᓚᑦ ᐅᕙᓐᓄᑦ,” ᐅᖃᓚᐅᖅᐳᖅ

ᐊᑕᐅᓯᐊᖅᑐᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓄᑦ ᓂᕈᐊᕐᓂᐅᔪᒥ, ᑭᓯᐊᓂ, ᐅᔾᔨᕆᒐᒥ ᐊᖏᔪᒥ ᓂᕈᐊᒐᒃᓴᙳᕋᓱᕐᓂᐅᔪᒥ ᓇᓗᓇᐃᒃᑯᑕᐅᔪᒥ ᐊᖅᑯᑎᐅᑉ ᓴᓂᐊᓂ ᖁᕝᕙᖅᓴᐃᔪᒥ ᐊᕐᓇᒥᒃ ᓂᕈᐊᒐᒃᓴᐅᔪᒥ ᐱᐅᔪᓐᓃᖅᑎᑕᐅᓯᒪᓚᐅᖅᐳᖅ ᑎᑎᕋᖅᓯᒪᔪᒥ “ᐊᕐᓇᒥ ᐊᖓᔪᖅᑳᖃᕆᐊᖃᙱᑦᑐᖅ.”

ᐳᕉᔅᑐᕐ ᐅᑎᓚᐅᖅᐳᖅ ᐃᓂᐅᔪᒧᑦ ᑎᑎᕋᖅᓯᒪᔪᒥ−ᐲᔭᐃᔾᔪᑎᒥᒃ ᐊᓪᓚᕈᒻᒥ ᐲᖅᓯᓂᕐᒧᑦ “ᐋᒃᑳᓚᔪᒥ.”

“ᐊᕐᓇᓂ ᐊᖓᔪᖅᑳᖑᔪᓂ ᓇᒥᓕᒫᖅ,” ᐳᕉᔅᑐᕐ ᑲᔪᖏᖅᓴᐃᓚᐅᖅᐳᖅ.

Leave a comment

Your email address will not be published. Required fields are marked *