ᐱᓕᕆᐊᖓ ᐃᓱᓕᓚᐅᖅᐳᖅ ᓄᖅᑲᖅᑎᓪᓗᒍ 2nd Lieut. ᑐᐊᑎ ᑐᑐ ᐊᑎᓕᐅᓚᐅᖅᖢᓂ ᑐᓐᓂᐅᑎᖃᖅᖢᓂ ᐱᓕᕆᐊᒥᓂᒃ 3019 RCACC ᐅᓇᑕᖅᑐᒃᓴᖑᐊᓛᓂᒃ Lieut. (ᐅᒥᐊᖅᑐᖅᑎ) Matt Ayres ᑲᖏᖅᖠᓂᕐᒥ ᐱᓇᓱᐊᕈᓯᐅᓚᐅᖅᑐᒥ.
Ayres ᐅᓇᑕᖅᑐᒃᓴᖑᐊᓛᓕᕆᖃᑕᐅᓯᒪᕗᖅ ᐅᑭᐅᑦ ᐊᕙᑎᑦ ᐅᖓᑖᓄᑦ ᑲᒪᔨᐅᓚᐅᖅᖢᓂᓗ ᐃᖃᓗᒃᑑᑦᓯᐊᒥ, ᒥᑦᑎᒪᑕᓕᖕᒥ, ᐃᒡᓗᓕᖕᒥ ᐊᒻᒪ ᐃᖃᓗᖕᓂ.
ᐅᖃᓚᐅᖅᖢᓂᓗ ᑕᐃᒪᓐᓇ ᐃᓱᒪᓕᐅᓚᐅᕋᒥ ᐃᓇᖏᖅᓯᒍᒪᓪᓗᓂ ᑐᑐᒥᒃ ᓄᖅᑲᖓᔪᓐᓇᖁᑉᓗᒍ ᐱᓕᕆᐊᕆᓯᒪᓕᕐᒪᐅᒃ ᐊᑯᓂ.
“ᑐᐊᑎ ᑕᐃᒪᓐᓇ ᐱᓕᕆᓗᐊᖅᓯᒪᓕᕐᒪᑦ ᑕᒪᑐᒧᖓ ᓄᖅᑲᖓᒋᐊᖃᓕᕐᒪᓪᓗ,” ᐅᖃᓚᐅᖅᐳᖅ Ayres.
“ᑕᐃᒪ, ᑲᒪᔨᐅᒋᐊᖃᕋᓗᐊᕐᒪᑕ ᐅᑭᐅᓄᑦ ᐱᖓᓱᓄᑦ, ᐃᓛᓐᓂᒃᑯᑦ ᐃᓚᒋᐊᖅᑕᐅᔪᓐᓇᖅᖢᓂ, ᑐᓐᓂᐅᑎᒋᓕᕐᓗᒍᓗ ᓄᖅᑲᕐᓗᓂ, ᑭᓯᐊᓂ ᑐᐊᑎ ᐅᑭᐅᓄᑦ 12-ᓄᑦ ᐱᓕᕆᐊᖃᖅᓯᒪᓕᖅᖢᓂ ᓄᖅᑲᓚᐅᖅᓯᒪᖏᑦᖢᓂᓗ.
“ᐱᓕᕆᐊᖃᖃᑦᑕᓚᐅᕋᒪ ᖃᐅᔨᓴᕐᓂᕐᒥᒃ ᑕᒪᐃᓐᓂᒃ ᐅᓇᑕᖅᑐᒃᓴᖑᐊᓛᓂᒃ ᓄᓇᕗᒥ, ᐅᖃᓪᓚᖃᑎᒋᖃᑦᑕᓚᐅᖅᖢᒍᓗ ᑐᐊᑎ ᐊᒻᒪ ᖃᐅᔨᒪᑉᓗᖓ, ᓄᓇᕗᒥ, ᐊᑕᐅᓯᖅ ᒪᕐᕉᒡᓘᓐᓃᑦ ᐊᐅᓚᑦᓯᖃᑦᑕᕋᓗᐊᕐᒪᑕ ᐅᓇᑕᖅᑐᒃᓴᖑᐊᓛᓂᒃ ᐃᖕᒥᓂᒡᓗ ᐱᓕᕆᖃᑦᑕᕐᒪᑦ.
“ᐃᑲᔪᕆᐊᕈᒪᓚᐅᖅᐸᕋ ᐃᓇᖏᖅᖢᒍ.”
Ayres ᑲᖏᖅᖠᓂᕐᒧᑦ ᓄᒃᑎᓚᐅᖅᐳᖅ ᑕᖅᑭᑦ ᖁᓕᐅᓚᐅᖅᑐᓂ ᐃᓚᐅᓕᓚᐅᖅᖢᓂᓗ ᑲᖏᖅᖠᓂᕐᒥ ᐅᓇᑕᖅᑐᒃᓴᖑᐊᓛᓕᕆᓂᕐᒧᑦ ᒥᓚᐅᖅᖢᓂ ᑲᖏᖅᖠᓂᕐᒧᑦ.
ᐅᖃᓚᐅᖅᖢᓂᓗ ᐊᒥᓱᓂᒃ ᐅᓇᑕᖅᑐᒃᓴᖑᐊᓛᓂᒃ ᖃᐅᔨᒪᒐᒥ ᓄᓇᕗᒥ ᓵᓚᒃᓴᐅᑎᖃᑦᑕᐅᑎᔭᖅᑐᕌᖓᑕ ᖃᐅᔨᒪᓕᖅᓯᒪᑉᓗᓂᒋᑦ, ᑐᑐᒥᒡᓗ ᐱᓕᕆᖃᑎᖃᖅᓯᒪᑉᓗᓂ ᑭᕙᓪᓕᕐᒥ ᓄᓇᕗᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᓕᕆᔨᒃᑯᓐᓂ, ᑕᐃᒪᓐᓇ ᖃᓄᐃᓚᐅᖏᑉᐳᖅ ᐱᕙᓪᓕᐊᓂᕆᔭᖓ.
“ᑲᖏᖅᖠᓂᕐᒥ ᐅᓇᑕᖅᑐᒃᓴᖑᐊᓛᑦ ᑲᓇᑕᒥ ᖁᑭᐊᔪᓴᕐᓂᕐᒧᑦ ᓵᓚᒃᓴᐅᑎᖃᑦᑕᐅᑎᖃᑕᐅᓯᒪᖕᒪᑕ ᓇᓂᑐᐃᓐᓇᖅ, ᖃᐅᔨᓐᓇᖅᐳᖅ ᑐᐊᑎ ᐃᑲᔪᖅᓯᒪᓪᓚᕆᖕᓂᖓᓄᑦ ᐅᓇᑕᖅᑐᒃᓴᖑᐊᓛᓂᒃ, ᐊᔪᖏᑦᓯᐊᕐᒪᑕ ᑕᒡᕙᓂ ᐅᓇᑕᖅᑐᒃᓴᖑᐊᓛᑦ, ᑕᐃᒪᓐᓇ ᑐᐊᑎ ᐱᓕᕆᑦᓯᐊᖅᓯᒪᓂᖓᓄᑦ.
“ᓂᕆᐅᒋᔭᖃᖃᑦᑕᕐᒪᑕ ᑲᔪᓯᑎᑕᐅᖁᑉᓗᒍ ᑕᒪᓐᓇ ᐱᓕᕆᐊᕆᔭᐅᔪᖅ ᑕᐃᒪᓐᓇᑦᓴᐃᓐᓇ ᐊᓯᔾᔨᖏᓪᓗᓂ ᐅᑭᐅᓂ ᖁᓕᓂ ᐱᓕᕆᐊᕆᔭᐅᓯᒪᓂᖓ, ᑕᐃᒪᓐᓇ ᐱᓕᕆᐊᖃᕐᓂᐊᖅᐳᖓᑐᖅ.
“ᑕᒪᕐᒥᒃ ᐅᓇᑕᖅᑐᒃᓴᖑᐊᓛᑦ ᐊᐅᓚᑕᐅᖃᑦᑕᕐᒪᑕ 6−ᓂᒃ ᐊᑭᓕᖅᑐᖅᑕᐅᔪᓂᒃ ᐱᓕᕆᔨᖃᖅᖢᑎᒃ, ᑕᐃᒪᓐᓇ ᑕᒡᕙᓂ ᑕᐃᒪᓐᓇ ᐱᓕᕆᐊᕆᔭᐅᔪᓐᓇᖅᖢᓂᓗ, ᐊᒻᒪ ᐊᑭᖃᖏᑦᖢᓂ, ᐃᓐᓇᕐᓂᒃ ᐱᓕᕆᔨᖃᓕᕈᓐᓇᕈᑉᑕ, ᖃᓄᑐᐃᓐᓇᖅ ᐱᓕᕆᐊᖃᕈᓐᓇᖅᐳᑦ ᒪ ᒃᑯᒃᑐᓂᒃ ᑕᒡᕙᓂ ᓄᓇᓕᖕᒥ.
“ᐅᐱᓐᓇᖅᐳᖅ ᐊᒥᓲᓗᐊᖏᑦᑐᑦ ᐅᓇᑕᖅᑐᒃᓴᖑᐊᓛᑦ ᐃᓚᐅᖏᓐᓇᕐᒪᑕ ᑕᒡᕙᓂ, ᑭᓯᐊᓂ, ᑕᒪᕐᒥᒃ ᐃᓚᐅᒃᐸᑕ, ᑕᐃᒪ ᐊᒥᓲᓂᖅᓴᐃᑦ ᐅᓇᑕᖅᑐᒃᓴᖑᐊᓛᑦ ᐃᑲᔪᕋᔭᖅᐳᑦ ᓄᓇᓕᖕᒥ.”
ᐊᓯᔾᔨᖅᑕᐅᓂᖏᑦ ᑲᒪᔨᐅᔪᑦ ᐅᓇᑕᖅᑐᒃᓴᖑᐊᓛᓄᑦ ᑕᐃᒪᓐᓇᐃᓚᐅᖅᐳᖅᑕᐅᖅ ᑐᑐᒧᑦ, ᑲᒪᔨᐅᓕᓚᐅᖅᓯᒪᑉᓗᓂᓗ ᐅᓇᑕᖅᑐᒃᓴᖑᐊᓛᓂᒃ ᐊᒃᑐᐱᕆ 2005−ᒥ.
ᑐᑐ ᐅᖃᓚᐅᖅᐳᖅ ᓱᒃᑲᐃᓪᓕᔾᔫᒥᒋᐊᖃᓕᕋᒥ, ᑕᐃᒪᓐᓇ ᐱᓕᕆᐊᖓ ᐊᓯᔾᔨᖅᓯᒪᓕᖅᑎᓪᓗᒋᑦ ᐊᓯᖏᓐᓂᒃ ᐅᓇᑕᖅᑐᒃᓴᖑᐊᓛᑦ ᐱᓕᕆᐊᖃᕐᓂᐊᓕᖅᐳᖅ.
ᐱᓕᕆᖃᑕᐅᖏᓐᓇᕐᓂᐊᕋᓗᐊᖅᓗᓂ ᐊᓯᐊᓂᒃ ᐱᓕᕆᐊᖃᕐᓗᓂ, ᐱᓗᐊᖅᑐᒥᒃ ᐃᓕᓐᓂᐊᖅᑎᑎᓂᕐᒥᒃ.
“ᐊᕐᕌᒍᒧᑦ ᓱᓕ ᓂᕆᐅᒃᐳᖓ, ᐅᓇᑕᖅᑐᒃᓴᖑᐊᓛᓂᒃ ᐱᓕᕆᖃᑎᖃᕐᓂᕐᒥᒃ,” ᐅᖃᓚᐅᖅᐳᖅ ᑐᑐ.
“ᐊᕐᕌᒍᑦ 12 ᐅᒃᐱᕈᓱᒃᑎᑕᐅᒃᑲᓐᓂᓕᕈᑎᒋᓯᒪᕙᕋ ᐃᓄᖕᓂᒃ, ᐱᓗᐊᖅᑐᒥᒃ ᐊᒥᓱᓂᒃ ᒪᒃᑯᒃᑐᓂᒃ ᑕᒪᒃᑯᐊ ᑲᖑᑦᑕᐅᓪᓗᑎᒃ ᐃᓚᓕᐅᑎᓚᐅᖅᖢᑎᒃ ᐊᒻᒪ, ᐃᓚᖑᑦ, ᐃᖢᐃᓪᓕᐅᕈᑎᖃᖅᖢᑎᒃ, ᐃᓚᖏᑦ ᐱᐊᓂᒃᓯᒪᕗᑦ ᐱᖃᓐᓇᕆᔭᖃᓕᖅᖢᑎᒃ ᐅᑭᐅᑦ ᓯᑕᒪᑦ ᑕᓪᓕᒪᓪᓘᓐᓃᑦ ᐊᓂᒍᖅᓯᒪᓕᖅᑎᓪᓗᒋᑦ ᐅᓇᑕᖅᑐᒃᓴᖑᐊᓛᖑᓯᒪᓕᖅᖢᑎᒃ.
“ᐃᓚᖏᑦ ᐅᓇᑕᖅᑐᒃᓴᖑᐊᓛᑦ ᖁᑦᓯᖕᓂᖅᓴᓄᑦ ᐃᓕᓐᓂᐊᕆᐊᖅᓯᒪᕗᑦ ᐊᕐᕌᒍᓂ ᐊᒻᒪ ᐃᓚᖏᑦ ᓴᕆᒪᓱᑦᓯᐊᓚᐅᖅᖢᑎᒃ ᑕᐅᑐᒃᖢᒋᑦ ᓯᓚᕐᔪᐊᒧᑦ ᖃᓄᑐᐃᓐᓇᖅ ᐃᓚᐅᔪᓐᓇᓕᕐᓂᖏᑦ ᐃᖕᒥᓂᒃ ᐸᐃᕆᔪᓐᓇᑦᓯᐊᓕᖅᖢᑎᒡᓗ. ᑕᐃᒪᓐᓇ ᑕᒡᕙ ᐊᑭᓕᖅᑕᐅᓯᒪᕗᖓ.”
ᑐᑐ ᐅᖃᓚᐅᖅᐳᖅ ᐃᓚᒋᔭᐅᓂᖅ ᓇᓗᓇᖏᑉᐳᖅ ᐅᓇᑕᖅᑐᒃᓴᖑᐊᓛᖑᖃᑕᐅᔪᓄᑦ, ᐊᒥᓱᓂᒃ ᒪᒃᑯᒃᑐᑦ ᐃᓕᖃᑦᑕᕐᒪᑕ ᐃᓚᐅᑉᓗᑎᒃ ᐅᓇᑕᖅᑐᒃᓴᖑᐊᓛᓄᑦ.
ᐅᖃᓚᐅᖅᖢᓂᓗ ᐅᓇᑕᖅᑐᒃᓴᖑᐊᓛᑦ ᐅᑭᐅᖏᑦ ᓈᒻᒪᒃᓯᒑᖓᑕ ᐃᓚᐅᖏᓕᖅᖢᑎᒃ ᑕᐃᒪᓐᓇ ᓲᕐᓗ ᐃᓴᕈᖅᑖᖅᑐᑦ ᖃᖓᑕᔪᓐᓇᖅᓯᑉᓗᑎᒡᓗ ᐃᖕᒥᓂᒃ, ᑕᐃᒪᓐᓇᑎᑐᑦ ᐊᖓᔪᖄᕆᔭᐅᔪᑦ ᓄᑕᕋᖏᑦ ᓈᒻᒪᒃᓯᑉᓗᑎᒃ ᐃᖕᒥᓃᓕᕌᖓᑎᑐᑦ ᐱᖕᒪᑦ.
“ᓴᕆᒪᓱᑦᓯᐊᖅᐳᖓ ᑭᒡᒐᖅᑐᐃᑉᓗᖓ ᐅᓇᑕᖅᑐᒃᓴᖑᐊᓛᓂᒃ, ᐊᒥᓱᑦ ᐃᓄᐃᑦ ᐃᓚᒋᔭᐅᓯᒪᖕᒪᑕ ᐅᓇᑕᖅᑐᒃᓴᖑᐊᓛᓄᑦ ᑲᖏᖅᖠᓂᕐᒥ.
“ᓇᓕ ᐊᒻᒪ ᕼᐅᑉ ᓱᕆᐅ ᑲᓇᑕᒥ ᕇᔾᔪᒃᑯᓐᓂᑦ ᐃᑲᔪᖅᓯᒪᖕᒪᑦ ᐅᑭᐅᓂ ᓄᑕᕋᖏᑦ ᐅᓇᑕᖅᑐᒃᓴᐊᓛᖑᓚᐅᖅᖢᑎᒃ, ᐊᒥᓱᑦ ᐃᓄᐃᑦ ᖃᑉᓗᓈᑦ ᓄᓇᖓᓐᓂᑦ ᐃᑲᔪᐃᓐᓇᖃᑦᑕᖅᖢᑎᒃ ᓱᓕ, ᐊᒻᒪ ᐃᓐ ᐳᐊᑐ ᐃᑲᔪᖅᓯᒪᑉᓗᓂ ᑕᐃᒪᖓᓂᑦ ᓱᓕ ᐃᑲᔪᖃᑦᑕᖅᖢᓂ, ᐃᑲᔪᖅᑕᐅᓚᐅᕋᑉᑕ ᖁᔭᓐᓇᒦᕈᑎᖃᑦᓯᐊᖅᐳᒍᑦ, ᓴᓐᖏᓕᖅᐸᓪᓕᐊᓯᒪᕗᒍᓪᓗ ᓄᑕᖃᑦ ᓴᓐᖏᓕᖅᐸᓪᓕᐊᓂᖏᓐᓂ ᑕᐃᒪᓐᓇ ᐃᑲᔪᖅᓯᒪᑉᓗᒋᑦ.
“ᓴᕆᒪᓱᒃᐳᖓᓗ ᐃᓐᓇᑐᖃᐃᑦ ᐃᑲᔪᖃᑕᐅᓯᒪᖕᒪᑕ ᐅᓇᑕᖅᑐᒃᓴᖑᐊᓛᓕᕆᓂᕐᒧᑦ 2008-ᒥ, ᐊᒻᒪ ᐊᓯᖏᑦ, ᑕᒪᒃᑯᐊ ᓇᐅᔮᒥᐅᑦ, ᐃᓐᓇᑐᖃᖃᓕᕆᑉᓗᑎᒃ ᐅᓇᑕᖅᑐᒃᓴᖑᐊᓛᖏᓐᓂ, ᐃᑲᔪᕐᓂᖃᖅᖢᓂᓗ ᐅᓇᑕᖅᑐᒃᓴᖑᐊᓛᓄᑦ, ᐱᓗᐊᖅᑐᒥᒃ ᐃᓄᒃᑎᑐᑦ ᐅᖃᐅᓯᕐᓂᒃ.
“ᐱᕈᖅᐹᓪᓕᖅᓯᒪᕗᖓ ᐅᑭᐅᓂ 12-ᖑᓯᒪᓕᖅᑐᓂ ᓄᖅᑲᖅᐳᖓᓗ ᐱᐊᓂᑦᓯᐊᖅᓯᒪᑉᓗᖓ!”