ᑲᔪᓯᕙᓪᓕᐊᓂᖅ ᐅᖃᐅᓯᕆᔭᐅᒐᔪᓕᖅᐳᖅ ᓇᓂᑐᐃᓐᓇᖅ ᐱᔅᓂᔅᖃᖅᑐᓄᑦ ᐊᒻᒪ ᑲᑎᒪᑐᐃᓐᓇᖅᑐᓄᑦ ᓇᓂᑐᐃᓐᓇᖅ ᖃᓄᐃᓕᐅᕈᒪᓂᕐᒥᖕᓂᒃ ᐃᓱᒫᓗᒍᑎᖃᕐᓂᕐᒥᖕᓂᒡᓗ ᐅᖃᐅᓯᖃᖅᖢᑎᒃ.
ᑕᒪᓐᓇ ᐅᖃᐅᓯᖅ ᐅᖃᐅᓯᕆᔭᐅᒐᔪᖕᓂᐊᖅᐸᑦ ᐱᔅᓂᔅᖃᖅᑐᓄᑦ ᐊᑐᖅᑕᐅᓂᐊᖅᐸᓪᓗ, ᐊᖏᖃᑎᒌᒍᑎᖃᕆᐊᖃᖅᐳᑦ ᐅᕙᓘᓐᓃᑦ ᐊᖏᖃᑎᒌᓯᒪᒋᐊᖃᖅᐳᑦ ᑕᒪᒃᑯᐊ ᖃᓄᐃᓕᐅᖃᑎᒌᖕᓂᐊᖅᑐᑦ. ᑕᒪᒃᑯᐊ ᐊᔾᔨᒌᖏᑦᑐᑦ ᐱᓕᕆᖃᑎᒌᑦ ᐃᓕᑕᕆᔭᐅᓯᒪᓪᓗᑎᒃ ᐱᓕᕆᖃᑎᒌᖕᓂᖏᓐᓄᑦ ᓱᓇᑐᐃᓐᓇᕐᒥᒃ ᐱᓇᓱᐊᖅᖢᑎᒃ ᑐᕌᕐᓂᖃᖅᖢᑎᒡᓗ.
ᑲᑎᒫᓂᒃᖢᑎᒃ ᖃᓄᐃᓕᐅᕆᐊᖃᕈᑎᖏᓪᓗ ᐱᐊᓂᒃᓯᒪᓕᖅᐸᑕ, ᐱᒍᒪᔭᖏᑐᐃᓐᓇᐅᖏᑦᑑᒐᓗᐊᑦ, ᐊᑐᐊᒐᓕᐅᓕᖅᐸᒃᐳᑦ, ᖃᐅᔨᒃᑲᐃᓪᓗᑎᒡᓗ ᐊᔾᔨᒌᖏᑦᑐᓂᒃ ᒐᕙᒪᓂᒃ ᑎᒥᐅᔪᓂᒡᓗ ᒪᓕᒐᓕᐅᖅᑎᓄᓪᓗ ᐊᐃᕙᐅᑎᒃᓴᐅᑎᑦᖢᒍ ᐱᖁᔭᒃᓴᖁᖅᑎᑕᐅᓪᓗᓂᓗ ᒪᓕᒐᓕᖅᖢᓂᓗ ᖃᓄᑐᐃᓐᓇᖅ ᐃᓕᔭᐅᓪᓗᓂ ᐃᓄᖕᓄᑦ ᐋᖅᑭᒃᑕᐅᒍᑕᐅᓂᐊᕐᓗᓂ ᐊᑐᖅᑕᐅᓕᕐᓗᓂ.
ᑕᐃᒪᓐᓇᐃᓕᐅᕐᓗᓂ ᐊᔪᕐᓇᖏᑦᑐᑯᓘᔮᖅᑑᒐᓗᐊᖅ ᑭᓯᐊᓂ ᑭᓱᓂᑭᐊᖅ ᐱᔾᔪᑎᖃᖅᖢᑎᒃ ᐱᓇᓱᐊᕈᓯᓄᑦ ᐊᒥᓱᓄᑦ ᐅᖃᐅᓯᕆᔭᐅᒃᑲᓐᓂᕈᓐᓇᖅᐳᑦ ᑕᖅᑭᓪᓗ ᐊᒥᓱᑦ ᐊᒻᒪᓘᓐᓃᑦ ᐊᕐᕌᒍᑦ ᐊᒥᓱᑦ ᐊᐅᓚᔾᔭᒋᐊᖅᑕᐃᓕᑕᐃᓐᓇᖅᖢᑎᒃ.
ᑕᒪᒃᑯᐊ ᐅᐊᓕᓂᕐᒥᐅᑕᐃᑦ ᑕᐃᒪᓐᓇ ᐃᓚᐅᓯᒪᕗᑦ ᐱᓕᕆᖃᑎᖃᖅᓯᒪᓪᓗᑎᒡᓗ ᒐᕙᒪᓕᕆᓂᕐᒧᑦ ᐊᑯᓂ ᐅᑭᐅᓂ ᐱᒻᒪᕆᐅᔪᓂᒡᓗ ᐃᓕᒍᑎᖃᖅᓯᒪᓕᖅᖢᑎᒃ ᑕᐃᒪᓐᓇ ᐃᓕᓯᒪᓕᖅᖢᑎᒡᓗ ᐃᓄᓕᕆᓂᕐᒧᑦ ᑮᓇᐅᔭᓕᕆᓂᕐᒧᓪᓗ ᒪᓕᑉᐸᓪᓕᐊᒍᑕᐅᔪᓐᓇᖅᑐᓂᒃ ᓄᓇᓕᖕᓂ ᐱᕙᓪᓕᐊᑎᑦᓯᓂᕐᒧᑦ ᑯᐊᐳᕇᓴᓂᑦ ᐊᑐᓂ ᓄᓇᓕᖕ`ᓂ 6-ᓂ ᐃᓄᕕᐊᓗᐃᑦ/ᒍᐃᑦᓯᓐᓗ ᓄᓇᖃᕐᕕᖏᓐᓃᑦᑐᓂ.
ᑕᒪᒃᑯᐊ ᐱᓕᕆᓪᓗᑎᒃ ᖃᖓᑕᔫᖅᑎᐅᓂᕐᒧᑦ, ᐅᒥᐊᖅᑐᖅᑎᐅᓂᕐᒧᑦ ᓄᓇᒥᓗ ᐃᖏᕐᕋᔭᒃᑎᑎᔨᐅᓪᓗᑎᒃ. ᑕᐃᒪᓐᓇ ᐱᓕᕆᐊᖃᖅᖢᑎᒡᓗ ᕿᖓᐅᓂᒃ ᐊᖑᓇᓱᐊᖅᑕᐃᑎᑎᕙᒃᖢᑎᒃ ᐊᒥᓲᓗᐊᖏᑦᑑᒐᓗᐊᓂᒃ ᐊᒻᒪ ᐃᓄᐃᑦ ᐃᓕᖁᓯᑐᖃᖏᓐᓂᒃ ᐱᓕᕆᐊᖃᖅᖢᑎᒃ ᐃᓐᓇᑐᖃᐃᑦ ᐃᓚᒋᔭᐅᓪᓗᑎᒃ ᐃᓕᓐᓂᐊᖅᑎᑎᖃᑦᑕᖅᖢᑎᒡᓗ ᒪᒃᑯᒃᑐᓂᒃ.
ᑕᐃᒪᓐᓇ ᐃᓄᓕᕆᓂᕐᒧᑦ ᐅᔾᔨᖅᑐᕐᓂᖏᓐᓄᑦ ᖃᐅᔨᒪᔭᐅᓪᓗᑎᒃ ᑲᑎᕕᒋᖃᑦᑕᖅᑕᒥᖕᓂ ᐊᒻᒪ ᒪᒃᑯᒃᑐᖃᕐᕕᖕᓂ ᐅᐱᒋᔭᖃᑦᓯᐊᖅᖢᑎᒡᓗ ᐃᓐᓇᑐᖃᐅᓂᖅᓴᐅᔪᓂᒃ. ᐊᒃᓱᕈᖅᖢᑎᒃ ᐱᓕᕆᕙᒃᖢᑎᒡᓗ ᐃᓄᑦᓯᐊᖑᓇᓱᐊᕐᓂᕐᒧᑦ ᐋᖅᑭᐅᒪᔪᒃᑯᑦ ᑲᑎᒪᑎᑦᓯᖃᑦᑕᖅᖢᑎᒃ ᐃᓚᐅᑎᑦᓯᓪᓗᑎᒡᓗ ᑭᒃᑯᑐᐃᓐᓇᕐᓂᒃ, ᒪᒃᑯᒃᑐᓂᒃ, ᐃᓐᓇᑐᖃᓂᒡᓗ ᐊᒻᒪ ᐱᓗᐊᖅᑐᒥᒃ ᐃᓚᔮᕆᖕᓂ.
ᑲᔪᓯᕙᓪᓕᐊᓂᖅ ᐱᑐᐃᓐᓇᐅᖏᑉᐳᖅ ᐋᖅᑭᐅᒪᑦᓯᐊᖅᑐᓄᑦ ᑮᓇᐅᔭᖅᑐᓗᐊᖃᑦᑕᖏᑦᖢᑎᒃ ᐃᓚᔮᕆᓄᑦ ᐊᑐᖅᑕᐅᔪᒃᓴᓂᒃ ᐊᖅᓵᖅᓯᖏᒻᒪᑕ, ᐃᓕᓐᓂᐊᕐᓂᕐᒧᓪᓗ, ᐃᖅᑲᖅᑐᐃᓂᕐᒧᓪᓗ, ᐃᓐᓇᑐᖃᓕᕆᓂᕐᒧᓪᓗ ᒪᒃᑯᒃᑐᓕᕆᓂᕐᒧᓪᓗ ᐊᑐᒐᒃᓴᐅᓂᐊᖅᑐᓂᒃ.
ᑕᐃᒪ ᖃᖓᑐᐃᓐᓇᖅ ᑐᓴᓕᕐᒥᒍᕕᑦ ᐅᖃᓪᓚᒃᑐᒥᒃ ᐃᒪᓐᓇ, "ᑲᔪᓯᕙᓪᓕᐊᓂᖅ", ᐊᐱᕆᓂᐊᖅᐳᑎᑦ ᖃᓄᖅ ᐋᖅᑭᒃᓱᐃᓂᐊᕐᒪᖔᑕ ᐅᖃᐅᓯᖅᑕᒥᖕᓂᒃ.