2018-ᒥ ᖁᕕᐊᓱᖕᓇᒥ ᕿᑎᒃᑐᑦ ᑲᔪᓯᑎᑕᐅᑦᑎᐊᓚᐅᖅᑐᑦ ᑲᖏᖅᖠᓂᕐᒥ.
ᖁᕕᐊᓱᖕᓇᒥ ᕿᑎᒃᑎᑦᑎᓚᐅᖅᑐᑦ ᑎᓯᐱᕆ 22-ᒥ ᔭᓄᐊᕆ 1-ᒧᑦ ᐊᒻᒪᓗ ᑕᒪᕐᒥᒃ ᕿᑎᒃᑎᑕᐅᑉᓗᑎᒃ ᐊᔾᔨᒌᙱᑦᑑᑎᓂᒃ ᐅᑭᐅᓖᑦ. ᐃᒪᓐᓇᐃᓕᐅᖅᑎᑕᐅᓚᐅᖅᑐᑦ ᓄᓇᖅᑲᑎᒌᒃ ᓂᕆᕕᒡᔪᐊᖅᑎᑕᐅᑉᓗᑎᒃ, ᒧᒥᒡᒍᓴᐅᔾᔪᐊᖅᖢᑎᒃ, ᐃᓐᓇᑐᖃᐃᑦ ᐅᑉᓛᕈᒥᑕᖅᑐᖅᑎᑕᐅᑉᓗᑎᒃ, ᐱᙳᐊᕐᕕᖕᒥᓗ ᕿᑎᒃᑎᑕᐅᑉᓗᑎᒃ, ᐃᒻᖏᒡᒍᓴᐅᔾᔪᐊᖅᖢᑎᒃ ᑎᑕᒡᒍᓴᐅᔾᔪᐊᖅᖢᑎᒃ, ᓄᑕᖅᑲᑦ ᐱᙳᐊᖅᑎᑕᐅᑉᓗᑎᒃ, ᓯᓚᓗ ᖃᐅᒻᒪᒃᑎᑕᐅᑉᓗᓂ ᑕᑯᕋᓐᓂᖅᑐᒻᒪᕆᐊᓗᖕᓂᒃ, ᐊᕐᕌᒍᑖᒃᑯᓪᓗ ᑭᕙᓐ ᕗᕆᑦᓚᓐ ᐃᖅᑲᐅᒪᑉᓗᒍ Hᐊᑭᖃᑦᑕᖅᑐᑦ Hᐊᑭᖅᖢᑎᒃ (ᑐᕌᓐᑐ ᐊᒻᒪᓗ ᒪᓐᑐᕇᔮᒥ ᐃᑲᔪᖅᐸᒃᑐᑦ ᐊᑭᕋᕇᒃᖢᑎᒃ) ᐃᓐᓇᐅᓂᖅᓴᐅᔪᑦ Hᐊᑭᖅᖢᑎᒃ, ᐊᒻᒪᓗ ᓴᓐᑕᒃᑲᓛᓯ ᑎᑭᓯᒪᓚᐅᕆᑉᓗᓂ.
ᑲᖏᖅᖠᓂᕐᒥ ᐱᙳᐊᖅᑐᓕᕆᔨᒃᑯᑦ ᑲᒪᔨᖓ ᑕᐃᕕᑎ ᑲᓛᒃ 13-ᒋᔭᖓᓂᒃ ᐅᑭᐅᒥᒃ ᑕᒪᑐᒥᙵ ᐸᕐᓇᐃᓯᒪᓕᓚᐅᖅᑐᖅ ᐊᒻᒪᓗ ᕿᑎᒐᒃᓴᒡᒎᖅ ᐃᓚᕙᓪᓕᐊᑐᐃᓐᓇᖅᑐᑦ ᑕᐃᒪᙵᓂ ᑕᒪᑐᒥᙵ ᑲᒪᖃᑦᑕᓕᖅᑎᓪᓗᒍ. ᐅᖃᖅᖢᓂᓗ ᕿᑎᒃᑎᑦᑎᔨᒃᑯᒡᒎᖅ ᐅᑭᐅᑕᒫᑦ ᐃᓕᑉᐹᓪᓕᖅᓯᒪᓲᑦ, ᐃᓚᐅᖃᑕᐅᑎᑦᑎᔪᓐᓃᖅᐹᒃᖢᑎᒃ ᖁᕕᐊᒋᔭᐅᙱᓐᓂᖅᓴᓂᒃ ᐊᒻᒪᓗ ᐃᓚᐅᖃᑕᐅᑎᑦᑎᑉᓗᑎᒃ ᐱᕚᓪᓕᖅᑎᑦᑎᓯᒪᕙᒃᖢᑎᒡᓗ ᐱᙳᐊᖅᑕᐅᒃᑲᓐᓂᕈᒫᖅᑐᓂᒃ ᐊᕐᕌᒍᒧᑦ. "ᐅᐸᒃᑕᐅᑦᑎᐊᖃᑦᑕᓚᐅᖅᑐᑦ ᑕᒪᕐᒥᒃ ᕿᑎᒃᑎᑦᑎᓂᐅᔪᑦ ᐅᑭᐅᖅ," ᑕᐃᒪᓐᓇ ᐅᖃᖅᖢᓂ ᑲᓛᒃ.
"ᐱᙳᐊᕐᕕᒃ ᐃᓐᓄᒃᓯᒪᐃᓐᓇᓚᐅᖅᑐᖅ ᖁᕕᐊᓱᖕᓇᒥ ᐊᒻᒪᓗ ᖁᕕᐊᓇᑦᑎᐊᖅᑐᓂᒃ ᐱᙳᐊᖅᑎᑕᐅᕙᒃᖢᑎᒃ ᑕᒪᐃᓐᓄᑦ ᖁᕕᐊᒋᔭᐅᑦᑎᐊᖅᑑᔭᓚᐅᖅᑐᑦ.
"ᒪᓐᓇᓕ ᐅᕙᖓ, ᑯᑎ ᑐᓗᒐᖅ ᐊᒻᒪᓗ ᖃᑉᑎᕆᔨᒃᑯᑦ ᐃᓕᓐᓂᐊᖅᓯᒪᓕᖅᑎᓪᓗᑕ ᓯᓚᒥᒃ ᖃᐅᒻᒪᖅᑎᑦᑎᓂᕐᒧᑦ ᑲᔾᔮᕐᓇᖅᑐᓂᒃ ᑕᒪᓐᓇ ᖁᔭᒋᔭᐅᓯᒪᑦᑎᐊᓲᖅ ᓄᓇᖅᑲᑎᑉᑎᓐᓄᑦ ᐊᒻᒪᓗ ᓂᕆᐅᒋᔭᐅᑦᑎᐊᓲᖅ ᓄᑖᒥ ᐅᑭᐅᒥ ᑕᐃᒪᐃᓕᐅᖅᑎᑦᑎᕙᒃᑎᓪᓗᑕ."
ᑲᓛᒃ ᐅᖃᖅᖢᓂ Hᐊᒻᓚᒃᑯᒡᒎᖅ ᐃᑲᔪᖅᑕᐅᑦᑎᐊᓚᐅᖅᑐᑦ ᐃᓄᖕᓄᑦ ᐊᑭᓕᖅᑐᖅᑕᐅᙱᖦᖢᑎᒃ ᐃᑲᔪᖅᑐᓄᑦ ᖁᕕᐊᓱᖕᓇᐅᑎᓪᓗᒍ. ᐅᖃᖅᖢᓂᓗ ᑲᖏᖅᖠᓂᕐᒥᒎᖅ ᐃᑲᔪᕈᒪᔪᑦ ᐊᒥᓱᒻᒪᕆᐊᓘᓲᑦ ᖃᓄᐃᓕᐅᖅᑎᑦᑎᓕᕌᖓᑕ, ᑕᐃᒪᐃᒻᒪᑦ ᐱᒋᐊᖅᑎᑦᑎᔪᖃᑐᐊᕌᖓᑦ ᑲᔪᓯᑦᑎᐊᓲᑦ.
"ᐃᑲᔪᖅᑎᖃᒃᑲᓐᓂᓚᐅᖅᑐᖓ ᑕᒡᕙᓂ ᐅᑭᐅᒥ ᒪᕐᕉᒃᑲᓐᓂᕐᓂᒃ ᓴᓇᑎᑦᑎᔪᓐᓇᓚᐅᕋᑉᑕ ᖁᕕᐊᓱᖕᓇᒥ ᑕᒪᓐᓇ ᐃᑲᔪᕐᓂᖃᓪᓚᕆᓚᐅᖅᑐᖅ.
"ᑕᐃᒪᐃᒻᒪᑦ ᑲᔪᓯᑦᑎᐊᖅᑐᐊᓘᓚᐅᖅᑐᑦ.
"ᖁᕕᐊᒋᔭᐅᓂᖅᐹᖑᖃᑕᐅᓚᐅᖅᑐᑦ ᐅᑭᐅᖅ; ᒧᒥᒡᒍᓴᐅᔾᔪᐊᖅᑐᑦ ᑕᒪᓐᓇ ᖁᕕᐊᒋᔭᐅᒡᒍᖕᒪᑦ ᐊᒻᒪᓗ ᐱᙳᐊᕐᕕᖕᒥ ᕿᑎᒃᑎᑕᐅᑎᓪᓗᒋᑦ ᐃᓄᐃᑦ ᑖᑉᑯᐊ ᑕᒡᕙ ᐃᓐᓄᒐᔪᖕᓇᖅᑑᒃ.
"ᐃᓐᓇᑐᖃᐃᑦ ᓂᕆᑎᑕᐅᓂᖏᑦ ᖁᕕᐊᒋᔭᐅᑦᑎᐊᓲᑦ ᐊᒻᒪᓗ ᑐᕌᓐᑐᒥ ᒪᓐᑐᕆᔮᒥᓗ ᐃᑲᔪᖅᐸᒃᑐᑦ ᐊᑭᕋᕇᒃᖢᑎᒃ Hᐊᑭᓕᕌᖓᑕ (ᑭᕙᓐ ᕗᕆᑦᓚᓐ ᐃᖅᑲᐅᒪᑉᓗᒍ Hᐊᑭᕐᓂᐅᕙᒃᑐᖅ ᖁᕕᐊᓱᖕᓇᒥ) ᖁᕕᐊᒋᔭᐅᓪᓚᕆᖃᑦᑕᕐᒥᔪᑦ ᐊᕐᕌᒍᑕᒫᒃᑯᑦ ᓯᐊᕐᕆᔮᕐᕕᒃ ᐃᓐᓄᓪᓚᕆᓲᖅ."
ᑲᓛᒃ ᐊᒻᒪᓗ ᐅᐃᔅᓕ ᐃᓄᒃᓱᒃ ᐱᓕᕆᑦᑎᐊᔪᔪᒻᒪᕆᐊᓘᒃ ᐱᙳᐊᕐᕕᖕᒥ ᕿᑎᒃᑎᑦᑎᑉᓗᑎᒃ ᑕᒪᓐᓇ ᕿᓂᖅᑎᒃᑯᑦ ᑲᑎᒪᔨᖏᓐᓄᑦ ᑲᒪᒋᔭᐅᓲᖅ, ᐊᒻᒪᓗ ᓈᓚᒡᕕᓕᕆᔨᒃᑯᓐᓄᑦ.
ᐅᖃᖅᖢᓂᓗ ᐃᓄᒃᓱᒃᑯᒡᒎᖅ ᐃᑲᔪᖃᑦᑕᕐᓂᖏᑦ ᖁᕕᐊᓱᖕᓇᒥ ᖁᔭᒋᔭᐅᓪᓚᕆᓲᑦ ᐱᙳᐊᖅᑐᓕᕆᔨᒃᑯᓐᓄᑦ.