Bantam-ᑯᓐᓄᑦ Hᐊᑭᖅᑎ ᑲᖏᖅᓕᓂᕐᒥᐅᑕᖅ ᐊᐅᓪᓚᓚᐅᖅᑐᖅ ᐳᐃᒍᑲᐅᑎᒋᔾᔮᙱᑕᖓ ᐊᐅᓪᓚᖅᓯᒪᓂᕆᓚᐅᖅᑕᖓ ᑖᒻᓇ ᐅᑭᐅᖅ ᐱᒋᐊᓕᓵᖅᑎᓪᓗᒍ.
ᒥᐃᔭ ᐊᐅᑐᖅ, 14-ᓂᒃ ᐅᑭᐅᓕᒃ, ᓂᕈᐊᖅᑕᐅᓚᐅᖅᑐᖅ ᓄᓇᕐᔪᐊᕐᒥᐅᑦ ᓂᕕᐊᖅᓵᑯᓗᐃᑦ Hᐊᑭᒋᐊᖅᑐᖅᑎᑕᐅᓚᐅᖅᑎᓪᓗᒋᑦ ᓯᒡᓄ Hᐃᐅᓪ, ᓂᖁᕕᓐᓛᓐᒧᑦ, ᕕᕗᐊᕆ 7-ᒥ 10-ᒧᑦ.
ᐊᐅᑐᑦ, ᐱᙳᐊᕆᐊᖅᑐᖅᑐᑐᐊᖅ ᓄᓇᕗᒥᐅᑕᖅ, ᐅᖃᓚᐅᖅᑐᖅ ᐊᓕᐊᓇᐃᒋᑦᑎᐊᕐᓂᕋᓚᐅᖅᖢᓂᐅᒃ ᑕᒪᓐᓇ.
ᐅᖃᖅᖢᓂ ᐃᓕᓐᓂᐊᖅᑎᑦᑎᔨᖃᓚᐅᖅᑐᕉᖅ ᐊᔾᔨᒌᙱᑦᑑᑕᐅᔪᒃᑯᑦ ᐃᓕᓐᓂᐊᕈᑎᒃᑯᑦ Hᐊᑭᒋᐊᖅᑐᖅᓯᒪᑎᓪᓗᒋᑦ ᐊᒻᒪᓗ ᐊᓕᐊᓇᐃᓚᐅᖅᑐᕉᖅ ᑕᑯᒋᐅᖅᖢᓂ ᐊᒥᓱᓂᒃ ᓂᕕᐊᖅᓵᕐᓂᒃ Hᐊᑭᖅᑎᓂᒃ ᐊᒻᒪᓗ ᒥᐊᓂᖅᓯᔨᓂᒃ ᓄᓇᕐᔪᐊᕐᒥ ᓇᑭᑐᐃᓐᓇᖅ ᑎᑭᓯᒪᔪᓂᒃ.
“ᓂᕈᐊᒐᒃᓴᙳᖅᑎᑕᐅᓚᐅᖅᑐᖓ ᑕᒪᑐᒧᙵ ᒥᐊᓂᖅᓯᔨᒐᓄᑦ, ᑕᐃᕕᑎ ᑲᓛᒃᒧᑦ, ᑭᓯᐊᓂ ᖃᐅᔨᒪᙱᑦᑐᖓ ᖃᓄᖅ ᐊᒻᒪᓗ ᓱᖕᒪᑦ ᓂᕈᐊᖅᑕᐅᓚᐅᕐᒪᖔᕐᒪ,” ᑕᐃᒪᓐᓇ ᐅᖃᖅᖢᓂ ᐊᐅᑐᑦ.
“ᐃᓕᑦᑎᓚᐅᖅᑐᒍᑦ ᐱᓇᓱᐊᖃᑦᑕᕆᐊᖃᕐᓂᑉᑎᓐᓄᑦ, ᐊᒻᒪᓗ ᖃᓄᐃᓕᐅᖃᑦᑕᕆᐊᖃᕐᒪᖔᑉᑕ Hᐊᑭᖅᑎᑦᑎᐊᕙᐅᓂᐊᕐᓗᑕ ᑎᒥᒃᑯᑦ ᐊᒻᒪᓗ ᖃᓄᖅ ᐱᓕᕆᖃᑦᑕᕆᐊᖃᕐᒪᖔᑉᑕ ᐊᑑᑎᖃᖅᑐᒃᑯᑦ ᐱᙳᐊᖃᑎᒌᒃᑎᐅᑉᓗᑕ ᐃᓅᖄᑎᒌᒃᑑᑉᓗᑕ.
“ᑕᒪᕐᒥᒃ ᐃᓕᓐᓂᐊᖅᑎᑦᑎᔨᒋᔭᖅᐳᑦ ᐊᕐᓇᐃᓐᓇᐅᓚᐅᖅᑐᑦ ᐊᒻᒪᓗ ᐃᓕᓐᓂᐊᖅᑎᑦᑎᔨᑦᑎᐊᕚᓘᓚᐅᖅᑐᑦ.”
ᐊᐅᑐᑦ ᐅᖃᖅᖢᓂ ᐃᓕᓐᓂᐊᖅᑎᓪᓗᒋᒡᒎᖅ ᒪᕐᕉᓕᖓᔪᒃᑯᑦ 20-ᐅᔪᑦ ᐱᙳᐊᖅᑏᑦ ᐊᕕᒃᑐᖅᑕᐅᓚᐅᖅᑐᑦ, ᐊᐅᐸᓗᒃᑐᑦ ᐊᒻᒪᓗ ᖃᐅᓪᓗᖅᑐᑦ, ᐊᑭᕋᕇᓕᖅᖢᑎᒃ ᐱᙳᐊᓚᐅᖅᑐᑦ.
ᐅᖃᖅᖢᓂ ᐱᙳᐊᖅᑎᓪᓗᒋᒡᒎᖅ ᐊᓕᐊᓇᐃᑦᑐᐊᓘᓚᐅᖅᑐᖅ ᑭᓯᐊᓂ ᐊᔪᙱᓐᓂᕆᔭᖏᑦ ᐃᒪᓐᓈᓗᓗᐊᓚᐅᙱᑦᑐᑦ ᓂᕆᐅᒋᔭᒥᒍᓪᓕ.
“ᖃᓄᐃᒋᙱᑦᑎᐊᓚᐅᖅᑕᕋ Hᐊᑭᖃᑕᐅᑉᓗᖓ ᐃᓅᖄᑎᒋᑐᐃᓐᓇᖅᑑᔭᓚᐅᖅᑕᒃᑲ.
“ᐊᔪᕐᓇᖅᑐᐊᓘᓚᐅᙱᑦᑐᖅ ᐊᔪᕐᓇᖅᑐᐊᓘᓂᐊᕋᓱᒋᓚᐅᕋᓗᐊᕋᑉᑯ.
“ᐊᔪᙱᑦᑐᐊᓘᓚᐅᖅᑐᑦ ᑭᓯᐊᓂ ᐊᔪᙱᓐᓂᖅᓴᐅᓂᐊᕋᓱᒋᓚᐅᖅᑕᒃᑲ, ᐃᒻᒪᖄ ᓄᑲᑉᐱᐊᓂᒃ ᐱᙳᐊᖃᑕᐅᒐᔪᒃᑲᒪ ᑲᖏᖅᖠᓂᕐᒥ.”
ᐊᐅᑐᑦ ᐅᖃᖅᖢᓂ ᐃᓕᑦᑎᔾᔪᑎᒋᓂᖅᐹᕆᓚᐅᖅᑕᖓᒎᖅ ᑕᒡᕘᓇ ᐃᓕᓐᓂᐊᕐᓂᒃᑯᑦ ᖃᓄᖅ ᐃᖃᐃᓕᓴᖃᑦᑕᕆᐊᖃᕐᒪᖔᕐᒥ ᓄᓇᒥ ᐊᖏᓕᐊᙱᑦᑐᒥ.
ᐅᖃᖅᖢᓂ ᑕᒪᓐᓇ ᑐᑭᖃᖅᑐᖅ ᐃᖃᐃᓕᓴᖃᑦᑕᕐᓂᖅ ᐊᑑᑎᖃᖅᑐᒃᑯᑦ ᓱᓇᓂᒃ ᐱᖁᑎᓕᔭᙱᒃᑲᓗᐊᕐᓗᓂ.
“ᑐᓴᕈᒥᓇᑦᑎᐊᓚᐅᖅᑐᑦ ᐃᓕᑦᑎᓪᓗᓂ ᖃᓄᖅ ᑕᐃᒪᐃᓕᐅᕋᔭᕐᓂᕐᒧᑦ, ᐊᒻᒪᓗ ᑕᐃᒪᐃᑦᑐᖅᑰᖁᓇᔭᑦᑎᐊᖅᑕᒃᑲ ᓂᕕᐊᖅᓵᖑᖃᑎᒃᑲ ᓄᓇᕗᒥ.
“ᑕᐃᒪᐃᓕᐅᕈᓐᓇᖅᑎᑕᐅᒍᑎᒃ ᐱᓇᓱᖃᑕᐅᓇᔭᕐᒪᑕ ᐃᓕᑦᑎᓐᓇᖅᑐᒻᒪᕆᐊᓘᖕᒪᑦ.
“ᑕᑯᑎᑦᑎᓚᐅᖅᑐᑦ ᖃᓄᖅ ᐱᕚᓕᖅᕈᓐᓇᖅᑎᒋᖕᒪᖔᕐᒪ Hᐊᑭᕐᓂᒃᑯᑦ ᐊᒻᒪᓗ ᖃᓄᖅ ᐊᓕᐊᓇᐃᑎᒋᖕᒪᖔᑦ ᐱᓇᓱᐊᕐᓗᓂ. “ᐊᒻᒪᓗ ᐊᓕᐊᓇᐃᑦᑐᒻᒪᕆᐊᓗᒃ ᐊᓯᖏᓐᓂᒃ ᐃᓄᖕᓂᒃ ᑕᑯᒋᐅᖅᖢᓂ ᐊᔾᔨᒌᙱᑦᑑᑕᐅᔪᓂᒃ ᓄᓇᓕᖕᓂᙶᖅᑐᓂᒃ ᐊᒻᒪᓗ ᐃᓕᑦᑎᑉᓗᓂ ᐃᓕᖅᑯᓯᑐᖃᕆᔭᖏᓐᓂᒃᑕᐅᖅ.”