ᕿᑉᓕᖅᑕᒥᒃ ᐱᑕᖃᒃᑲᓐᓂᓕᖅᐳᖅ ᓄᑖᒥᓂ ᑎᐋᔅᒌᒃᑯᓐᓂᑦ ᐊᕐᕌᒍᑕᒫᖅᓯᐅᑎᒥᒃ ᐃᖅᑲᐅᒪᔭᐅᑉᓗᓂ ᓗᐊᕋ ᒎᑦᑎᐃ ᕙᓕᐹᕐᔪᐊᓚᐅᖅᑎᓪᓗᒋᑦ ᑲᖏᖅᖠᓂᕐᒥ ᑕᖅᑭᐅᓚᐅᖅᑐᒥ.
ᓯᑕᒪᑦ ᐃᓚᒌᑦ ᒎᓗᑎᑖᓚᐅᖅᐳᑦ ᐱᓐᖑᐊᖅᑎᓪᓗᒋᑦ, ᑑᓂ ᑕᐃᐋᔅ, 44, ᐊᒻᒪ ᒪᕐᕉᒃ ᐃᕐᓂᖏᒃ, ᑐᕆᔅᑕᓐ 21 ᐊᒻᒪ ᑕᐃᕇᔅ, 18, ᐱᓐᖑᐊᖃᑎᒌᓚᐅᕐᒪᑎᒃ ᐊᖑᑎᓂ ᓵᓚᒃᓴᓚᐅᖅᑐᓂ, HangNBang, ᐊᒻᒪ ᑑᓂᐅᑉ ᐸᓂᖓ, ᓴᓐᑎ, 15, ᐱᓐᖑᐊᖃᑕᐅᓚᐅᖅᖢᓂ ᐊᕐᓇᓄᑦ ᓯᕗᓪᓕᖅᐹᑦᓯᐊᒥ ᐃᖅᑲᐅᒪᔭᐅᑉᓗᓂ ᓗᐊᕋ ᒎᑦᑎᐃ ᐃᓚᐅᓯᒪᓕᖅᖢᓂ ᕙᓂᐹᖅᑐᓄᑦ.
ᐊᑖᑕᐅᔪᑦ ᐃᖃᐃᓕᓴᐅᑎᓂᒃ ᐱᓐᖑᐊᕈᑎᖃᖃᑕᐅᔪᑦ ᓵᓚᒃᓴᕈᒪᒐᔪᖕᒪᑕ ᐱᓐᖑᐊᖃᑎᖃᕐᓗᑎᒃ ᓄᑕᕋᒥᓂᒃ ᑕᐃᒪᓐᓇᐃᑦᖢᓂᓗ ᑑᓂ.
“ᐅᖃᕆᐊᖃᖅᐳᖓ, ᑲᒪᓇᓚᐅᕐᒪᑦ,” ᐅᖃᓚᐅᖅᐳᖅ ᑑᓂ.
“ᑐᕆᔅᑕᓐ ᐱᓐᖑᐊᕈᓐᓇᑦᓯᐊᕐᒪᑦ ᓯᓚᑦᑐᖅᓴᕐᕕᒡᔪᐊᒥ ᐱᓐᖑᐊᖃᑕᐅᓯᒪᑉᓗᓂ ᐅᑭᐅᓄᑦ ᒪᕐᕉᖕᓄᑦ, ᑭᓯᐊᓂ ᑕᐃᕇᔅᓗ ᐊᔪᖏᖃᑕᐅᓚᐅᖅᐳᒍᒃ.”
ᐱᖓᓱᐃᓐᓇᐅᓚᐅᖅᑎᓪᓗᒋᑦ ᐱᓐᖑᐊᖅᑎᑦ ᐅᑭᐅᒥ ᐊᑐᖅᑐᒥ ᐊᒻᒪ ᐱᖓᓱᑦ ᐊᔾᔨᒌᑦᓯᐊᖅᖢᑎᒃ, ᑑᓂ ᖃᐅᔨᒪᓪᓚᕆᓚᐅᖏᑉᐳᖅ ᐃᓚᒌᑦ ᓵᓚᒃᓴᕐᓂᐊᕐᓂᖏᓐᓄᑦ.
ᑲᖏᖅᖠᓂᕐᒥᐅᑦ ᐊᑭᕋᒥᖕᓂᒃ ᐱᓐᖑᐊᖃᑎᖃᓚᐅᖅᐳᑦ, ᐃᖃᓗᐃᑦ, ᑭᖑᓪᓕᖅᐹᖅᓯᐅᓕᖅᑎᓪᓗᒋᑦ ᐊᒻᒪ ᑖᒃᑯᐊ ᓯᕗᓪᓕᐅᑉᓗᑎᒃ ᓵᓚᒃᓴᓚᐅᖅᖢᑎᒃ HangNBang ᒪᕐᕈᐃᖅᑕᖅᖢᑎᒃ, ᐃᖃᓗᐃᑦ ᐱᓐᖑᐊᖅᑎᖏᑦ ᐅᑎᕆᐊᓚᐅᖅᐳᑦ ᒪᕐᕉᖕᓂᒃ ᓵᓚᒃᓴᐅᑎᖃᖅᖢᑎᒃ.
ᑭᖑᓪᓕᕐᒥ ᐅᑎᖅᑕᖃᑦᑕᐅᑎᓚᐅᖅᖢᑎᒃ, ᑲᖏᖅᖠᓂᕐᒥᐅᑦ ᓵᓚᒃᓴᓕᓚᐅᖅᖢᑎᒃ 15-8.
ᑑᓂ ᐅᖃᓚᐅᖅᐳᖅ ᐱᓐᖑᐊᖃᑎᖓᓗ ᑲᐃᔪ ᔮᓐᓴᓐ ᐋᓐᓂᓚᐅᕐᒪᑎᒃ ᐃᑲᔪᖅᑐᐃᓕᖅᖢᑎᒃᓴ ᐱᓐᖑᐊᖅᑐᓂᒃ ᑭᖑᓪᓕᖅᐹᖅᓯᐅᓕᖅᑎᓪᓗᒋᑦ.
ᐅᖃᓚᐅᖅᖢᓂᓗ ᖁᕕᐊᓇᓚᐅᕐᓂᖓᓄᑦ ᐊᔪᖏᓚᐅᖅᑐᑦ, ᓵᓚᐅᒍᑕᐅᔪᒃ ᐳᐃᒍᖅᑕᐅᑉᓗᑎᒃ ᑭᖑᓪᓕᖅᐹᒥ ᓵᓚᒃᓴᕈᑎᖃᓕᖅᖢᑎᒃ.
“ᑐᕆᔅᑕᓐ, ᖃᐅᔨᒪᑦᓯᐊᕋᒥ ᐱᓐᖑᐊᖃᑕᐅᖃᑦᑕᓕᓂᐅᑉᓗᓂ ᓯᓚᑦᑐᖅᓴᕐᕕᒡᔪᐊᒥ, ᐊᔪᖏᑦᓯᐊᓚᐅᖅᐳᖅ ᑭᖑᓪᓕᖅᐹᖅᓯᐅᓕᖅᑎᓪᓗᒋᑦ,” ᐅᖃᓚᐅᖅᐳᖅ ᑑᓂ.
“ᐊᐃᑦᑖᖑᒐᓗᐊᖅᐳᖅ, ᓵᓚᒃᓴᓚᐅᖅᑐᑦ, ᓇᐅᔮᑦ, ᑎᑭᒍᓐᓇᓚᐅᖏᑉᐳᑦ ᓯᓚᑦᓯᐊᖑᓚᐅᖏᓐᓂᐊᓄᑦ ... ᑕᐃᒪᓐᓇ ᓵᓚᒃᓴᓚᐅᖅᓯᒪᔪᑦ ᓯᓚᒥᒃ ᐱᔾᔪᑎᖃᖅᖢᑎᒃ ᑎᑭᒍᓐᓇᖏᑦᑐᑦ ᓈᒻᒪᓚᐅᖅᓯᒪᖏᑉᐳᖅ.
“ᑕᒡᕗᖓᕋᔭᓚᐅᕐᒪᑕ ᐱᓐᖑᐊᕐᔪᐊᖃᑕᐅᓗᑎᒃ.”
ᑎᐋᔅ ᐅᖃᓚᐅᖅᐳᖅ ᑕᐃᒪᓐᓇ 6 ᐅᕙᓘᓐᓃᑦ 8 ᑕᐱᕇᑦ ᐱᓐᖑᐊᖅᐸᓚᐅᖅᐳᑦ ᓗᐊᕋ ᒎᑦᑎᐄ ᐃᖅᑲᐅᒪᑉᓗᒍ ᕙᓕᐹᕐᔪᐊᖅᑎᓪᓗᒋᑦ ᐊᖑᑎᑦ ᖃᐅᔨᒪᖏᑉᐳᖅ ᓱᖕᒪᑦ ᑕᒪᓐᓇ ᐊᓯᔾᔨᖅᓯᒪᓕᕐᒪᖔᑦ ᐊᒥᓲᖏᓐᓂᖅᓴᐅᓕᖅᖢᑎᒃ. ᐅᖃᓚᐅᖅᖢᓂᓗ ᐃᓚᖓ ᐱᔾᔪᑎᖃᖅᖢᓂ ᐊᑭᑐᓗᐊᕐᓂᖓᓄᑦ ᐊᒻᒪ ᐃᓚᖏᑦ ᐱᓐᖑᐊᖅᑎᐅᖃᑕᐅᔪᑦ ᐅᑕᕿᖃᑦᑖᓗᐊᕐᓂᖅᐸᑕ ᑮᓇᐅᔭᓂᒃ ᐱᕈᖅᓴᐃᓂᕐᒥᒃ.
“ᐅᖃᓪᓚᖃᑎᒋᓚᐅᖅᐸᒃᑲ ᐃᕐᓂᒃᑲ ᐱᓐᖑᐊᖃᑎᒌᖕᓂᐊᕐᓂᖏᓐᓄᑦ ᖃᓄᐃᓐᓂᐊᕐᒪᖔᓪᓗ
ᓵᓚᒃᓴᐅᑎᖃᕐᓂᖏᓐᓄᓪ,” ᐅᖃᓚᐅᖅᐳᖅ ᑑᓂ, “ᐊᒻᒪᓗ ᖁᕕᐊᓇᖅᐳᖅ ᑕᐃᒪᓐᓇ ᓯᑕᒪᓂᒃ ᒎᓗᑎᑖᓚᐅᕋᑉᑕ ᑕᒡᕙᓂ ᐃᒡᓗᒥ ᐊᑕᐅᓯᕐᒥ ᐃᒡᓗᖃᖃᑕᐅᔪᓂᒃ, ᐊᒻᒪ ᑐᕆᔅᑕᓐ ᐊᑦᓯᖅᑕᐅᓚᐅᕆᑉᓗᓂ ᐊᖑᑎᑦ ᐱᓐᖑᐊᕐᔪᐊᕐᓂᖏᓐᓂ ᐊᒃᓱᕈᓛᖑᓯᒪᓂᖓᓄᑦ.”
“ᓚᑭᐅᕗᖓ ᐊᓐᓇᐅᑉᓗᖓ, ᖃᓄᐃᓗᐊᖏᑦᖢᖓ ᐱᓐᖑᐊᖃᑕᐅᔪᓐᓇᕋᒪ ᕼᐋᑭᕐᓂᕐᒧᑦ, ᐊᓇᐅᓕᒑᕐᓂᕐᒧᑦ ᐊᒻᒪ ᕙᓕᐹᖃᑕᐅᓂᕐᒧᑦ.
“ᑕᐃᒪᓐᓇ ᖁᕕᐊᓇᕋᔭᖅᐳᖅ ᕼᐋᑭᕐᓗᓂ, ᑭᓯᐊᓂ ᑕᐃᒪᓐᓇᐃᒐᔭᕐᒪᖔᑦ ᖃᐅᔨᒪᖏᑉᐳᖓ.”