Skip to content

ᒥᑭᔪᒐᓗᐊᖅᖢᓂ ᓲᖑᔪᖅ, ᕿᓚᓈᕆᔭᖃᖅᖢᓂ ᓯᕗᓂᒃᓴᒥᓂᒃ

ᑐᖓᓂᖓᓕ ᐅᑭᐅᒥ ᐃᓕᓴᓕᖅᖢᓂ ᐊᕙᑎᓕᕆᔨᐅᓂᕐᒥᒃ ᓄᓇᕗᑦ ᓯᓚᑦᑐᒃᓴᕐᕕᒃᔪᐊᖓᓂ, ᐊᓄ ᐴᓱ ᐊᕐᓇᐅᓪᓗᓂ ᒪᒃᑯᒃᑑᖕᒪᑦ ᕿᓚᓈᕆᔭᖃᖅᖢᓂ ᓯᕗᓂᕆᓂᐊᖅᑕᒥᓂᒃ.

ᐋᓄ ᐳᓱ ᑕᒪᑐᒪᓂ ᐅᑭᐅᒃᑯᑦ ᐃᓕᓴᐅᑏᑦ ᐱᒋᐊᖓᐅᓯᖓᓂᒃ ᐃᓕᓴᖅᑐᖅ ᐊᓯᕙᖅᓯᒪᑎᓪᓗᒋᑦ Crazy Lake-ᒥ ᐃᖃᓗᐃᑦ ᖃᓂᒋᔭᖓᓂ ᑕᒪᑐᒪᓂ ᐅᐱᕐᖔᖅ ᐄᐳᓗᒥ ᐅᑭᐅᑦᑎᓐᓂ, ᑕᐃᑲᓂ ᐃᓕᓴᖅᑕᐅᓚᐅᕐᒪᑕ ᐅᑭᐅᒃᑯᑦ ᐊᓯᐅᓐᓂᕈᑎᒃ ᓇᖕᒥᓂᖅ ᐱᐅᖅᓱᐊᕋᓱᐊᕈᓯᕐᓂᒃ ᐃᒡᓗᓕᐅᖅᑎᑕᐅᓚᐅᕐᒪᑕ ᓴᐳᑎᒋᓂᐊᖅᑕᒥᓂᒃ ᓄᓇᒥ ᓄᓇᕗᑦ ᓯᓚᑦᑐᒃᓴᕐᕕᒃᔪᐊᖓᓂ ᐊᕙᑎᓕᕆᔨᐅᓂᕐᒥᒃ ᐃᓕᓴᖅᑐᑦ.

ᐴᓲᑉ ᕿᓚᓈᕆᔭᖓ ᓯᓐᓇᒃᑐᖕᖑᐊᓪᓚᓪᖤᓚᐅᖅᐸᒃᖢᒍ ᓄᓇᒥ ᓇ`ᖕᒥᓂᖅ ᐱᓕᕆᕝᕕᒃᓴᒥᓂᒃ ᓄᓇᓕᕋᓛᓕᐅᕈᒪᓪᓗᓂ, ᐳᓚᕋᖅᑐᓄᑦ ᑕᒪᐅᖓ ᓄᓇᖓᓄᑦ ᐊᓯᕙᖅᓯᒪᕕᐅᔪᓐᓇᕐᓂᐊᖅᑐᒥᒃ.

“ᖃᓪᓗᓈᓂᒥᐅᑐᐃᓐᓇᐅᖏᑦᑐᓄᑦ. ᑕᒫᓂᕐᒥᐅᓄᑦ ᒪᒃᑯᒃᑐᓄᑦ ᑭᒃᑯᑐᐃᓐᓇᓄᑦ ᐊᓯᕙᖅᓯᒪᓚᐅᑲᒍᒪᔪᓄᑦ. ᐃᒻᒪᖄ ᐃᓛᓐᓂᒃᑯᑦ ᓄᓇᓕᖕᒥᐅᓂᒃ ᒪᒃᑯᒃᑐᓂᑦ ᐊᓯᕙᖅᓯᒪᕕᐅᖃᖅᑕᕐᓗᓂ ᐃᓛᓐᓂᒃᑯᑦ ᐃᓚᐅᔪᓐᓇᖅᑎᑦᑎᖃᑦᑕᕐᒪᑕ, ᐃᓱᒪᓇᕐᒪᑦ ᐃᒻᒪᖄ ᒪᒃᑯᒃᑐᐃᑦ ᓄᓇᕗᒥᐅᑦ ᓄᓇᓕᖏᓐᓂᑦ ᐱᔪᑦ ᑐᓐᖓᓇᖅᑐᓂᒃ ᐊᐅᓪᓚᖅᓯᒪᕕᖃᕈᑎᒃ ᐊᓯᕙᕆᐊᖃᑦᑕᕈᓐᓇᕋᔭᕐᒪᑕ ᐱᔭᒃᓴᖃᖏᑦᑐᑦ. ᖃᓄᑐᐃᓐᓇᖅ ᓱᓕᕆᔭᒃᓴᖃᖃᑦᑕᖏᒻᒪᑕ ᐃᓚᖏᑦ ᐊᐅᔭᒃᑯᑦ ᓄᓇᓕᖕᓂ ᐃᓄᐃᑦ ᐱᖅᑯᓯᑐᖃᖏᓐᓄᑦ ᐅᑎᖅᓯᒪᓚᐅᑲᒍᓐᓇᕐᓂᐊᕐᒪᑕ - ᐃᓅᓯᖏᓐᓄᑦ ᐊᑲᐅᓕᖅᐸᓪᓕᕈᓐᓇᖅᑐᒥ ᒥᕐᖑᐃᖅᓯᕕᖃᕐᓗᑎᒃ ᓄᓇᓕᕋᓛᒥ,” ᐅᖃᕆᓪᓗᓂ.

ᑭᓯᐊᓂᓕ ᑕᒪᓐᓇ ᐊᑯᓂ ᐃᓱᒪᒋᑐᐃᓐᓇᖅᓯᒪᔭᖓ ᐊᑐᕋᓱᐊᓚᐅᕐᓇᓂᐅᒃ ᐊᐅᓪᓚᓚᐅᕐᓇᓂ ᑲᖏᖅᖠᓂᕐᒥᑦ ᐃᓕᓴᕆᐊᓪᓚᒃᑲᓐᓂᕋᓱᐊᕐᓗᓂ.

“ᐊᒃᓱᐊᓗᒃ ᐊᒃᓱᕈᕐᓇᖅᑐᖅ ᕿᒪᐃᓇᓱᐊᖅᖢᓂ ᐅᖓᒋᔭᕐᓂᒃ ᐊᖏᕐᕋᒥᒃ,” ᐅᖃᕆᓪᓗᓂ.

“ᐊᓈᓇᒐ ᐅᖃᐅᑎᒐᒃᑯ ᑕᕝᕗᖓ ᐃᓕᓴᕐᕕᖕᒧᑦ ᐃᓯᕈᓐᓇᕐᒪᖔᕐᒪ ᑎᑎᕋᕐᓂᕋᖅᖢᖓ, ᐅᐱᒍᓱᓚᐅᖅᑑᒐᓗᐊᖅ. ᐅᖃᐅᑎᒐᒃᑯᓕ ᐊᖏᖅᑕᐅᓂᓐᓂᒃ, ᕿᐊᓚᐅᕐᒪᑦ. ᐊᒃᓱᕈᕐᓇᓚᐅᖅᑐᖅ ᑕᕝᕙᐅᕗᑏᖅᐸᓪᓕᐊᓪᓗᒋᑦ ᐃᓚᒃᑲ ᐅᓐᓃᑦ ᒪᕐᕈᐃᓐᓈᑯᓗᖕᓂᒃ ᐅᑭᐅᓂᒃ ᐃᓕᓴᕆᐊᖅᓯᒪᓂᐊᖅᑎᓪᓗᖓ.”

ᑖᒃᑯᐊ ᓄᑲᕇᒃ ᐊᕐᓈᒃ ᒪᕐᕉᒃ ᖃᓂᒌᖕᒪᑎᒃ, ᐊᒻᒪᓗ ᐃᑲᔪᖃᑎᒌᖏᓐᓇᐅᔭᖅᖢᑎᒃ ᑕᐃᒪᖓᓂᑦ.

“ᐊᖓᔪᒐ ᓄᓇᑦᑎᓐᓂ ᐃᓱᒪᓐᓂᐊᖅᑎᓂ ᐃᖅᑲᓇᐃᔮᖃᓚᐅᕐᒪᑦ ᐊᒻᒪᓗ ᐊᖓᔪᒃᖠᐅᓪᓗᓂ ᐅᕙᓐᓂᑦ 12-ᓂᒃ ᐅᑭᐅᓂᒃ. ᐅᕙᓐᓄᑦ ᓲᕐᓗ ᐊᓈᓇᒃᑲᓐᓂᕆᓚᐅᕋᒃᑯ. ᐅᖃᐅᑎᓚᐅᖅᑖᖓ ᑕᒫᓂᒎᖅ ᓯᓚᑦᑐᒃᓴᕐᕕᒃᔪᐊᒥ ᐃᓕᓴᓕᕈᒪ ᕿᒥᕈᖃᑦᑕᕐᓂᐊᖅᑐᖅ GPA-ᖓᓂᒃ ᐊᖑᒻᒪᑎᒐᓗᐊᕐᒪᖔᓐᓂᒃ. ᐊᒃᓱᕈᒃᑲᓐᓂᕆᐊᖃᓕᖅᑐᖓ ᐊᖑᒻᒪᑎᓇᓱᐊᕐᓗᖓ ᐊᖓᔪᓐᓄᑦ,” ᐅᖃᕆᓪᓗᓂ ᐴᓱ.

“ᓄᑲᑯᓗᒐᓕ, ᐃᓚᓐᓈᓪᓚᑦᑖᑎᑐᑦ ᐱᒐᒃᑯ. ᐅᖃᐅᑎᓚᐅᕐᒫᖓ ᐅᕙᓐᓂᒃ ᑕᐅᑦᑐᒐᖃᕐᓂᕋᖅᖢᓂ. ᑕᐃᒪᓐᓇ ᐱᑦᑎᐊᕋᓱᐊᖏᓐᓇᕆᐊᖃᕐᒥᔪᖓ ᑕᐃᒪᖓᓄᑦ. ᐅᔾᔨᖅᓱᕆᐊᖃᖅᑐᖓ ᓱᔭᓐᓂᒃ ᑕᐅᑐᒐᕆᔭᐅᑦᑎᐊᕐᓂᐊᕋᒪ ᓄᑲᑯᓗᓐᓄᑦ ᒫᓇᒥᑦ ᖁᑦᑎᖕᓂᖅᓴᐅᓗᖓ.”

“ᓄᑲᑯᓗᒐᓕ, ᐃᓚᓐᓈᓪᓚᑦᑖᑎᑐᑦ ᐱᒐᒃᑯ. ᐅᖃᐅᑎᓚᐅᕐᒫᖓ ᐅᕙᓐᓂᒃ ᑕᐅᑦᑐᒐᖃᕐᓂᕋᖅᖢᓂ. ᑕᐃᒪᓐᓇ ᐱᑦᑎᐊᕋᓱᐊᖏᓐᓇᕆᐊᖃᕐᒥᔪᖓ ᑕᐃᒪᖓᓄᑦ. ᐅᔾᔨᖅᓱᕆᐊᖃᖅᑐᖓ ᓱᔭᓐᓂᒃ ᑕᐅᑐᒐᕆᔭᐅᑦᑎᐊᕐᓂᐊᕋᒪ ᓄᑲᑯᓗᓐᓄᑦ ᒫᓇᒥᑦ ᖁᑦᑎᖕᓂᖅᓴᐅᓗᖓ.”

ᑭᓯᐊᓂᓕ, ᖃᖓ ᐊᐅᓪᓚᓛᕈᓯᕐᒥᓂᒃ ᐃᓱᒪᓕᐅᕈᑎᒋᓯᒪᓕᖅᖢᒍ, ᓄᓇᕗᑦ ᓯᓚᑦᑐᒃᓴᕐᕕᒃᔪᐊᖓᓂ ᐊᕙᑎᓕᕆᔨᐅᓂᕐᒥᒃ ᐃᓕᓴᕆᐊᕐᓗᓂ ᓇᓗᓇᖏᑦᑎᐊᓚᐅᖅᑐᖅ ᐋᕿᑐᐊᕋᖅᑯ.

“ᐊᒃᓱᐊᓗᒃ ᖁᕕᐊᒋᒐᒃᑯ ᓯᓚᒥ ᐱᓕᕆᒋᐊᒃᓴᖅ. ᐊᖑᓇᓱᖃᑕᐅᖃᑦᑕᕋᒪ ᑕᐃᒪᖓᓂᑦ ᐊᖏᕐᕋᑦᑎᓐᓂ. ᐊᒻᒪᓗ ᓄᓇᑦᑎᓐᓂ ᐊᕙᑎᑦᑎᓐᓂᒃ ᓴᐳᔾᔨᔨᐅᓂᕐᒥᒃ ᖃᐅᔨᒪᑦᑎᐊᖅᖢᖓ ᑕᐃᒪᓐᓇ ᓄᓇᕗᒥᐅᓕᒫᓄᑦ ᐊᕙᑎᓕᕆᔨᐅᓂᕐᒥᒃ ᐃᓕᓴᖅᓯᒪᒍᒪ ᐱᒃᑯᒥᒍᓱᓕᓚᐅᖅᑐᖓ ᐅᕙᓐᓄᑦ ᐊᑐᕋᓱᐊᕆᐊᒃᓴᖅ,” ᐅᖃᕆᓪᓂ ᐴᓱ.

“ᑖᓐᓇ ᐃᓕᓴᕈᑎᒃᓴᖅ ᐅᕙᓐᓂᒃ ᓈᒻᒪᓈᖅᓯᑦᑎᐊᓚᐅᕐᒪᑦ ᐃᒫᒃ ᐃᓕᓴᕆᐊᕆᐊᖃᕐᓂᕈᒪ ᖃᓪᓗᓈᓄᑦ, ᐃᔨᓗᐊᓄᖔᖅ ᓵᖓᔪᓂᒃ ᐃᓕᓴᕆᐊᖃᕋᔭᓚᐅᕋᒪ. ᑕᒫᓂ ᓄᓇᑦᑎᓐᓂ ᐃᓕᓴᖅᖢᓂ ᐃᓕᖅᑯᓯᑦᑎᓐᓂᒃ ᐃᓕᓴᕐᕕᖕᒥ, ᐃᓕᓴᖅᑕᐅᓐᓇᕐᒪᑦ ᓄᓇᑦᑕ ᐆᒪᔪᖏᓐᓂᒃ ᒪᑯᓂᖓ ᑐᒃᑐᓂᒃ, ᐳᐃᔨᓂᒃᓗ ᐊᕙᑦᑎᓐᓄᒃ ᐊᑐᕐᓂᖃᖅᑐᓂᒃ. ᑕᒫᓂᕐᒥᐅᖔᓄᑦ ᓵᖓᓂᖅᓴᐅᖕᒪᑕ ᐃᓕᓴᐃᔪᑏᑦ ᓈᓴᐅᑎᖏᑦ ᐃᓕᓴᕐᓂᐊᖅᑕᕗᑦ.”

ᐃᓛᒃ ᑖᒃᑯᐊ ᐃᓕᓴᖃᑎᒋᔭᒃᑲ ᓇᒥᑐᐃᓐᓇᖅ ᓄᓇᕗᓕᒫᒥᑦ ᐱᒐᓗᐊᖅᖢᑎᒃ, ᐳᓱ ᐅᖃᕆᓪᓗᓂ ᐃᓅᓯᖅᐳᑦ ᖃᓂᒌᖕᒪᑦ ᖃᐅᔨᒪᔭᑦᑎᓐᓂᒃ ᐃᓕᓴᕋᑦᑕ.

“ᑕᐃᒪᖓᓂᑦ ᐃᓄᑑᓚᐅᖅᓯᒪᖏᑦᑐᖓ. ᐃᓅᖃᑎᖃᐃᓐᓇᐅᔭᖅᑐᖓ ᐃᓕᓴᖃᑎᓐᓂᒃ ᑭᐱᖑᓕᕐᓇᖏᑦᑐᖅ,” ᐅᖃᕆᓪᓗᓂ, “ᓄᓇᓕᖕᒥᐅᑦ ᐊᒃᓱᐊᓗᒃ ᐅᕙᑦᑎᓐᓂᒃ ᐃᑲᔪᖃᑦᑕᕐᒪᑕ - ᐊᖏᕐᕋᖅᓯᒪᔪᑎᑐᑦ ᑐᓐᖓᓇᖅᑎᒋᔪᑦ ᐅᕙᑦᑎᓐᓄᑦ ᐅᖓᓯᒃᑐᒧᑦ ᐊᐅᓪᓚᖅᓯᒪᒐᓗᐊᖅᑎᓪᓗᑕ ᐊᖏᕐᕋᑦᑎᓐᓂᑦ.”

ᐴᓱ ᖃᐅᔨᒪᔪᖅ ᖃᖓᑐᐃᓐᓇᖅ ᐃᑲᔪᖅᑕᐅᔪᒪᓕᓂᕈᓂ ᐃᓕᓴᖃᑎᒥᓄᑦ ᓵᑦᑐᓐᓇᕋᒥ.

“ᐃᑲᔪᕈᓐᓇᕈᑎᒃ, ᑕᐃᒪᖓᓂᑦ ᒪᑐᐃᖓᐃᓐᓇᖅᑐᑦ.”

ᐴᓱ ᐅᖃᕆᓪᓗᓂ ᐊᒃᓱᐊᓗᒎᑦ ᐊᐃᑦᑕᓐᓈᖅᓯᐅᖅᑐᖅ ᑕᒪᑐᒪᓂ ᐊᒻᒪᓗ ᒎᑎᒧᑦ ᓴᐃᒻᒪᖅᑎᑕᐅᓯᒪᓪᓗᓂ ᑕᒫᓃᓂᖓᓂ ᐃᓕᓴᕆᐊᖅᓯᒪᓂᕐᒥᓂ ᓄᓇᕗᒥ ᓯᓚᑦᑐᒃᓴᕐᕕᒃᔪᐊᒥ.

“ᐊᓯᒃᑲ ᒪᒃᑯᒃᑑᖃᑎᒃᑲ ᐱᒃᑯᒥᒋᔭᒥᓂᒃ ᓄᓇᕗᒥ ᐃᓕᓴᕐᕕᒃᓴᓂᒃ ᓇᓂᓯᒋᐊᒃᓴᖅ ᐊᔪᖅᓴᖅᓯᒪᖕᒪᑕᓕ ᑐᖓᓕᖓᓂ ᐃᓕᓵᓂᒃᓯᒪᓕᖅᖢᑎᒃ, ᐅᕙᖓᓕ ᐊᐃᑦᑕᓈᖅᓯᐅᖅᑐᖓ. ᑕᐃᒪᓐᓇ ᐃᓕᓴᖅᖢᓂ ᐊᑲᐅᓂᖅᓴᐅᔪᖅ ᐃᓅᓯᕐᒧᑦ ᑕᒫᖓᑦ ᐃᓕᓴᖅᑕᑦᑎᓐᓂᒃ ᐃᓅᓯᑦᑎᓐᓂ ᐊᑐᕈᓐᓇᖅᖢᑕ ᑕᒪᑐᒪᓂᓴᐃᓐᓇᖅ ᐅᖃᐅᓯᑦᑎᓐᓂᒃ ᐊᑐᖅᖢᑕ,” ᐅᖃᕆᓪᓗᓂ.

“ᐃᒪᓐᓇ, ᒫᓐᓇ, ᐃᓄᒃᑎᑐᑦ ᐅᖃᐅᓯᕐᒥᒃ ᐃᓕᓴᖅᑐᓂ ᐃᓚᐅᒐᒪ ᐅᕙᓐᓄᑦ ᐱᐅᔪᖅ ᐃᓛᒃ ᐃᓄᒃᑎᑑᕈᓯᕐᓂᒃ ᖃᐅᔨᒪᓗᐊᖏᓐᓇᒪ. ᐊᒻᒪᓗ ᖁᕕᐊᒋᓪᓗᒍ ᑕᒪᑐᒪᓂ ᐃᖅᑲᓇᐃᔮᒥᒃ ᐃᓕᓴᖅᖢᖓ ᐃᓄᒃᑎᑐᑦ ᑕᒫᓂ ᐆᒪᔪᐃᑦ ᐊᑎᖏᓐᓂᒃ ᐊᑐᖃᑦᑕᕋᑦᑕ ᖁᕕᐊᓇᓗᐊᕈᓯᐊ ᑭᖑᓪᓕᕐᒥ ᐃᓕᓴᕆᐊᓪᓚᒃᑲᓐᓂᕆᐊᒃᓴᖅ ᑕᐃᒪᓐᓇᒑᖅ.

“ᐊᒥᓱᐊᓘᖕᒪᑕ ᐃᓕᕈᒪᔭᒃᑲ ᐃᓅᓯᓐᓂ ᖃᐅᑕᒫᑦ ᐱᕚᓪᓕᐅᑕᐅᔪᓐᓇᖅᑐᓂᒃ ᐃᓕᓴᕋᑦᑕ, ᐅᓐᓂᓘᓐᓃᑦ ᐊᓱᐃᓚᒃ ᑕᒪᑐᒪᓂ ᐅᑭᐅᑦᑎᓐᓂ, ᐱᒋᐊᖓᕐᕕᐊᓂᑦ ᐱᑦᓯᓕᐅᕆᐅᓚᐅᖅᑐᖓ.”

ᐊᐅᔭᐅᓚᐅᖅᑐᕐᓕ ᐴᓱ ᐃᓚᐅᓚᐅᕆᓪᓗᓂ ᐅᓪᓗᓂᒃ ᒪᕐᕉᖕᓂᒃ ᒐᕙᒪᑎᑐᖃᒃᑯᑦ ᐃᓕᓴᐃᑎᓪᓗᒋᑦ ᖃᓪᓗᓈᑎᑐᑦ ᑲᓇᑕᒥ En[tour]preneur Experience-ᒥ ᐋᑐᕚᒥ. 50 ᒪᒃᑯᒃᑐᐃᑦ ᑲᓇᑕᒥᐅᑦ 18-ᓂᒃ 24-ᓄᑦ ᐊᕐᕌᒍᓖᑦ ᐃᓚᐅᔪᓐᓇᓚᐅᕐᒪᑕ ᐃᓕᓴᕐᕕᖕᒥ ᓇᖕᒥᓂᖃᖅᑐᓄᑦ ᐳᓚᕋᖅᑐᓕᕆᔨᐅᓂᕐᒥᒃ ᓯᕗᓪᓕᖅᐹᒥ ᐃᓕᓴᖅᑐᓂ.

“ᓇᖕᒥᓂᖅ ᑕᐃᒪᖓᓂᑦ ᐳᓚᕋᖅᑐᓕᕆᔨᐅᓂᕐᒥᒃ ᐱᒃᑯᒥᒍᓱᐃᓐᓇᐅᔭᕋᒪ ᑭᓯᐊᓂᓕ ᑕᐃᑲᓃᓕᖅᖢᑕ ᖃᐅᔨᕚᓪᓗᓚᐅᖅᑐᖓ ᐃᒡᓗᐊᓄᖔᖅ ᐅᑭᐅᖅᑕᖅᑐᒥᐅᓂᒃ ᑕᑯᓚᐅᖅᓯᒪᖏᑦᑐᓂᒃ ᐊᓯᑦᑎᓐᓂ ᐊᒃᓱᐊᓗᒃ ᐱᒃᑯᒥᒋᔭᐅᖕᒪᑕ ᓄᓇᕗᑦ, ᐊᒥᓱᓄᑦ ᑕᑯᔭᖅᑐᖅᑕᐅᔪᒪᓚᐅᕐᒪᑦ ᓇᓗᓇᓚᐅᖏᑦᑐᖅ. ᐅᕙᑦᑎᓐᓂᑦ ᐃᒡᓗᐊᓄᖔᖅᑐᑦ ᐃᓱᒪᒋᓪᓗᒍ ᓯᒃᑲᖓᔫᔮᕋᔭᖅᑑᒐᓗᐊᖅ,” ᐅᖃᕆᓪᓗᓂ ᐴᓱ.

“ᐊᐃᑉᐸᖓᑦᑕᐅᖅ ᐊᑐᕐᓂᖃᓪᓗᑐᕐᒥᔪᖅ ᐅᕙᓐᓄᑦ ᓄᓇᕗᒥᐅᓄᑦ ᓇᓗᓇᐃᒃᑯᑕᖃᖅᑐᓂ ᐃᓚᐅᒐᒪ. ᖃᖓᑐᐃᓐᓇᖅ ᓇᖕᒥᓂᖅ ᐱᓇᓱᐊᒐᕆᔪᒪᔭᓐᓂᒃ ᐋᕿᒃᓱᐃᔪᒪᓕᕐᓂᕈᒪ ᐊᒥᓱᐊᓗᖕᓂᒃ ᐅᕙᓐᓄᑦ ᒪᑐᐃᖅᑐᖃᕋᔭᕐᒪᑦ ᑎᒍᑐᐃᓐᓇᕈᓐᓇᖅᑕᓐᓂᒃ ᐃᑲᔪᖅᓴᕈᑎᓂᒃ. ᖃᓪᓗᓈᓂᒥᐅᑦ ᓄᓇᕗᒥ ᓄᓇᓕᕋᓛᓕᐅᕐᓗᑎᒃ ᐊᓯᕙᖅᓯᒪᕕᓕᐅᕈᓐᓇᖅᐸᑕ, ᓲᖃᐃᒻᒪᑦᑕᐅᖅ ᐅᕙᖓ ᐊᔪᖏᒻᒥᔪᖓ.”

ᐅᖃᖑᐊᕈᓯᖓ ᐃᒻᒥᓅᑦ? “ᒥᑭᒃᑲᓗᐊᖅᖢᖓ, ᓲᖑᔪᖓ.”