Skip to content

ᒧᒥᖅᖢᑎᒃ ᐅᐊᔪᓕᐅᖅᑐᑦ ᑲᖏᖅᖠᓂᕐᒥ ᐃᓐᓇᑐᖃᖅ 81-ᓂᒃ ᐅᑭᐅᖅᑖᕐᒪᑦ ᓇᓂᑐᐃᓐᓈᖅᑐᑦ ᐃᓚᐅᖃᑕᐅᔪᑦ

ᑐᙵᓱᒃᑎᑕᐅᑦᑎᐊᓚᐅᖅᑐᖅ ᐊᒻᒪᓗ ᐊᓕᐊᓇᐃᒋᔭᐅᑦᑎᐊᖅᖢᓂ ᐃᓄᐃᑦ ᖃᓂᒌᒃᑑᑎᖁᔭᐅᙱᑎᓪᓗᒋᑦ ᓵᓚᖃᕋᓱᒃᖢᑎᒃ ᓄᕙᒡᔪᐊᕐᓂᖅ - 19-ᒥᒃ ᓴᖅᑭᓚᐅᖅᑐᖅ ᐃᕐᓂᕆᔭᐅᔪᖅ ᖃᐅᔨᓇᓱᒃᑎᓪᓗᒍ ᖃᓄᖅ ᐊᔾᔨᐅᙱᑦᑐᒃᑯᑦ ᓇᓪᓕᐅᓐᓂᖅᓯᐅᖅᑎᑦᑎᓇᔭᕐᓂᕐᒧᑦ ᐊᑖᑕᒥᓂᒃ ᑲᖏᖅᖠᓂᕐᒥ ᐱᓇᓱᐊᕈᓯᐅᓚᐅᖅᑐᒥ.

ᑲᖏᖅᖠᓂᕐᒥᐅᑕᖅ ᕋᐳᑦ ᖃᕝᕖᑦᑐᖅ ᒧᒥᖅᑐᖅ ᐃᒻᖏᐅᑎᒧᑦ Cotton-Eye Joe-ᒧᑦ ᓄᑖᓂᒃ ᑲᒥᒃᓯᒪᑉᓗᓂ ᐊᓈᓇᖓᑕ ᓴᓇᓵᖅᑕᖏᓐᓂᒃ. ᒧᒥᖅᑐᖅ ᐅᐱᒍᓱᒃᖢᓂ ᐊᑖᑕᓂ 81−ᓂᒃ ᐅᑭᐅᖅᑖᕐᓂᐊᕐᓂᖓᓄᑦ ᐱᔫᒥᒍᓱᓕᖅᑎᑦᑎᓚᐅᖅᑐᖅ 120 ᐅᖓᑖᓂ ᒧᒥᖃᑕᐅᓕᓚᐅᖅᑐᓂᒃ ᐃᖕᒥᓂᒃ ᑕᕐᕆᔭᐅᓯᐅᖅᖢᑎᒃ ᒧᒥᓕᓚᐅᖅᑐᑦ ᖁᕕᐊᓱᖃᑎᒋᑉᓗᒍ ᕋᐳᑦ ᐊᑖᑕᖓ ᓇᓪᓕᐅᑎᓂᖓᓄᑦ, ᔮᒃ, ᓇᓪᓕᐅᓐᓂᖅᓯᐅᖅᑕᐅᔪᖅ ᓵᓚᒃᓴᕈᓐᓇᖅᖢᑎᒡᓗ ᑮᓇᐅᔭᓂᒃ.

ᕋᐳᑦ ᖃᕝᕖᑦᑑᑉ ᐊᑖᑕᖓ, ᔮᒃ, ᖃᓄᐃᒃᓴᓚᐅᙱᑦᑐᖅ ᓂᐸᐃᑦᑐᒃᑯᑦ 81-ᓂᒃ ᓇᓪᓕᐅᓐᓂᖅᓯᐅᕈᑎᖃᕐᓂᐊᕐᓂᕐᒧᑦ ᑲᖏᖅᖠᓂᕐᒥ ᓴᓇᑦᑕᐃᓕᐊᕈᓯᐅᓚᐅᖅᑐᒥ ᓄᓇᖅᑲᑎᖏᑦ ᐃᖕᒥᓂᒃ ᐱᓕᕆᑎᓪᓗᒋᑦ ᓄᓇᕗᒧᑦ ᑎᑭᖁᓇᒍ ᓄᕙᒡᔪᐊᕐᓂᖅ - 19.

ᔮᒃᓕ ᖃᐅᔨᒪᓚᐅᙱᑦᑐᖅ ᓇᓪᓕᐅᑎᕝᕕᖓᓂᒃ ᐅᑉᓗᕐᒥ ᓂᐸᐃᓐᓂᐊᖅᑐᒃᓴᐅᒐᓗᐊᖅᑎᓪᓗᒋᑦ, ᑭᓯᐊᓂ ᖃᑉᓯᑲᓪᓚᑦ ᐃᓄᐃᑦ ᒧᒥᑲᑕᖕᓂᐊᖅᑐᒃᓴᐅᓂᖏᓐᓄᑦ ᖁᕕᐊᓱᖃᑎᖃᕐᓗᑎᒃ ᔮᒃᒥ ᐱᓇᓱᐊᕈᓯᐅᓚᐅᖅᑐᒥ ᐱᒋᐊᓕᓵᖅᑎᓪᓗᒍ; ᐊᒻᒪᓗ ᐃᖕᒥᓂᒃ ᐃᓱᒪᓕᐅᕈᓐᓇᓚᐅᖅᖢᑎᒃ ᒧᒥᕋᔭᕐᓂᕐᒧᑦ ᐃᓗᐊᓂ ᐅᕝᕙᓘᓐᓃᑦ ᓯᓚᒥ.

ᕋᐳᑦ ᐅᖃᖅᖢᓂ ᐃᓄᐃᑦ ᐃᓂᑦᑕᐃᓕᔭᕆᐊᖃᖅᑎᓪᓗᒋᑦ ᓄᕙᒡᔪᐊᕐᓂᖅ - 19 ᐱᔾᔪᑎᒋᑉᓗᒍ, ᐃᓚᒌᑦ ᐱᒡᒍᓴᐅᔾᔪᐊᖅᑎᑦᑎᔪᓐᓇᓚᐅᙱᑦᑐᑦ ᐃᒻᖏᒡᒎᓂᕐᒧᑦ ᐅᕝᕙᓘᓐᓃᑦ ᒧᒥᒡᒎᓂᕐᒧᑦ ᖁᕕᐊᓲᑕᐅᖁᑉᓗᒍ ᐊᑖᑕᓂ ᓇᓪᓕᐅᑎᓂᖓᓄᑦ. ᑭᓯᐊᓂᓕ, ᕋᐳᑦ ᐱᓕᕆᕐᔪᐊᖅᓯᒪᓂᑰᖕᒪᑦ ᐱᙳᐊᖅᑐᓕᕆᓂᒃᑯᑦ ᐱᙳᐊᖅᑎᐅᖃᑕᐅᓂᒃᑯᑦ ᒥᐊᓂᖅᓯᔨᐅᓂᒃᑯᓪᓗ ᐱᙳᐊᖅᑐᓂᒃ ᐊᒥᓱᓂᒃ ᐅᑭᐅᓂᒃ ᐊᒻᒪᓗ, ᖃᐅᔨᒪᔭᐅᓕᖅᖢᓂ ᐃᓱᒪᒃᓴᖅᓯᐅᒃᑲᐅᓂᖓᓄᑦ ᖃᓄᐃᓕᐅᖅᑎᑦᑎᔪᒪᓂᕐᒧᑦ ᐃᓄᖕᓂᒃ ᓄᓇᒥᓂᒃ ᐃᓚᐅᖃᑕᐅᔪᒪᓇᔭᖅᑐᓂᒃ ᐅᕝᕙᓘᓐᓃᑦ ᑕᐅᑐᑐᐃᓐᓇᕐᓗᑎᒃ.

ᐊᒻᒪᓗ, ᐱᓇᓱᐊᕈᓯᐅᓚᐅᖅᑐᒥ, ᐃᓱᒪᒃᓴᖅᓯᐅᑲᑕᓐᓇᓚᐅᖅᖢᓂ.

ᐃᓱᒪᒃᓴᖅᓯᐅᕋᓱᓚᐅᕋᒪ ᖃᓄᖅ ᒧᒥᖅᑎᑦᑎᔪᓐᓇᕋᔭᕐᒪᖔᕐᒪ ᐃᓄᐃᑦ ᑲᑎᓗᒃᑖᙱᒃᑲᓗᐊᕐᓗᑎᒃ ᐊᑕᐅᓯᕐᒥ ᑕᐃᒪᓐᓇᐃᒐᔪᒃᑲᑉᑕ,” ᑕᐃᒪᓐᓇ ᐅᖃᖅᖢᓂ ᕋᐳᑦ.

Hᐊᓕ (ᒧᕐᓱᕐ) ᐅᖃᓚᐅᖅᑐᖅ ᐱᐅᓂᖅᓴᐅᓇᔭᕐᓂᖓᓄᑦ ᒧᒥᕈᒪ ᐅᐊᔪᓕᐊᖑᔪᒃᑯᑦ, ᑭᓯᐊᓂ ᐊᖏᖃᑎᒋᓚᐅᙱᑕᕋ ᐊᒻᒪᓗ ᒧᒥᕈᒪᓗᐊᕐᓇᖓ ᑭᓯᐊᓂ ᐅᖃᕐᒪᑦ ᑐᑭᖃᕐᓂᖅᓴᐅᓇᔭᕐᓂᖓᓄᑦ ᐊᖓᔪᖅᑳᒃᑲᓄᑦ, ᑕᐃᒪᐃᒻᒪᑦ ᐊᖏᖃᑎᒋᓕᓚᐅᖅᑕᕋ ᐊᒻᒪᓗ ᑕᐃᒪᓐᓇ ᐱᒋᐊᓕᓚᐅᖅᑐᖅ.

ᑐᕌᖓᓂᐊᓚᐅᖅᑐᖅ Facebook-ᑯᑦ ᐃᓚᒋᔭᒃᑲᓄᑦ ᑐᓂᓯᔪᒪᔪᓄᑦ ᐅᐊᔪᓕᐊᖑᓯᒪᔪᒥᒃ ᒧᒥᖅᑎᓪᓗᒋᑦ ᐊᑖᑕᒐ 81-ᓂᒃ ᐅᑭᐅᖅᑖᖅᑎᓪᓗᒍ, ᐊᒻᒪᓗ ᓵᓚᒃᓴᑐᐃᓐᓇᕐᓂᐊᓚᐅᖅᖢᑎᒃ ᒥᑭᔪᒥᒃ, ᑭᓯᐊᓂ ᐱᕙᓪᓕᐊᓪᓚᕆᓕᓚᐅᖅᑐᖅ.”

ᐃᒪᓐᓇᐃᓚᐅᖅᑐᖅ ᕋᐳᑦ ᐃᓱᒪᓚᐅᙱᒻᒪᑦ ᐋᖅᑭᒋᐊᖅᓯᓇᔭᕐᓂᕐᒧᑦ ᑕᑯᔪᓐᓇᖅᑐᓂᒃ ᐅᐊᔪᓕᐊᒥᓂᒃ ᐊᒻᒪᓗ ᐊᒥᓱᒃᑲᓐᓂᕐᓄᑦ ᑕᑯᔭᐅᓕᖅᖢᓂ ᒧᒥᓚᐅᕐᓂᖓ.

ᐅᐊᔪᓕᐊᖑᔪᖅ ᖃᕆᑕᐅᔭᒃᑯᑦ ᓇᒧᓗᒃᑖᖅ ᑕᑯᔭᐅᓕᓚᐅᖅᑐᖅ ᑭᕙᓪᓕᕐᒥᐅᑦ ᒪᓕᖃᑦᑕᖅᑕᖏᑦ ᒪᓕᒃᖢᒋᑦ ᐊᒻᒪᓗ, ᐸᕐᓇᐃᓯᒪᓚᐅᕋᓗᐊᖅᑎᓪᓗᒋᑦ ᑕᒪᓐᓇ ᐅᖓᑖᒍᓗᐊᕌᓗᒃ ᓴᖅᑭᓐᓇᔭᙱᓐᓂᖓᓄᑦ, ᕋᐳᑦ ᐅᔾᔨᕈᓱᓕᓚᐅᖅᑐᖅ ᐊᒥᓱᒃᑲᓐᓂᐊᓗᐃᑦ ᑐᓴᐅᒪᓕᕐᓂᖏᓐᓄᑦ ᐊᒻᒪᓗ ᒪᑐᐃᖓᓕᖅᖢᓂ ᑭᓇᑐᐃᓐᓇᕐᒧᑦ ᐃᓚᐅᖃᑕᐅᔪᒪᔪᓄᑦ.

ᐃᓚᐅᖃᑕᐅᔪᒪᓗᖓ ᐱᓚᐅᙱᒃᑲᓗᐊᖅᑐᖓ ᑭᓯᐊᓂ ᐃᓚᐅᖃᑕᐅᖁᔨᔪᑦ ᓴᖅᑭᑉᐸᓪᓕᐊᑐᐃᓐᓇᓕᓚᐅᕐᒪᑕ ᐊᒻᒪᓗ ᐅᔾᔨᕈᓱᓕᖅᖢᖓ ᑐᕌᖓᓂᖓᓄᑦ ᐊᑖᑕᒐ ᐅᑭᐅᖅᑖᕐᓂᐊᕐᓂᖓᓄᑦ 81−ᓂᒃ, ᑕᐃᒪᐃᒻᒪᑦ ᐃᓚᐅᖃᑕᐅᓕᓚᐅᖅᑐᖓ,” ᑕᐃᒪᓐᓇ ᐅᖃᖅᖢᓂ ᕋᐳᑦ.

ᖃᑉᓰᓐᓇᑦ ᐅᐊᔪᓕᐊᖑᔪᑦ ᓂᕈᐊᖅᑕᐅᓂᐊᓚᐅᖅᖢᑎᒃ ᖃᐃᑕᐅᔪᑦ ᐃᓱᒪᒋᓗᒋᑦ ᐊᒻᒪᓗ ᕋᐳᑦ ᐊᐱᕆᑉᓗᓂ ᖃᑕᙳᑎᒥᓄᑦ ᐃᓕᓯᔪᓐᓇᕐᒪᖔᑕ ᑮᓇᐅᔮᕐᔪᖕᒥᒃ ᓵᓚᒃᓴᖅᑕᐅᓇᔭᖅᑐᓂᒃ. ᐃᓚᒋᔭᖏᑦ ᑐᓂᐅᖅᑲᐃᓕᑲᐅᑎᒋᓚᐅᖅᑐᑦ.

ᓵᓚᒃᓴᒐᒃᓴᑦ ᐱᕈᖅᐸᓪᓕᐊᓪᓚᕆᓕᓚᐅᖅᑐᑦ ᐃᓚᒌᒃ ᑐᓂᐅᖅᑲᐃᓕᕐᒪᑕ, ᐊᒻᒪᓗ ᐊᓯᖏᑦ ᐃᓄᐃᑦ ᓄᓇᓕᖕᒥ ᑎᑎᕋᖃᑦᑕᓕᖅᖢᑎᒃ ᕋᐳᑦᒧᑦ ᖃᐅᔨᓇᓱᒃᖢᑎᒃ ᑐᓂᓯᔪᓐᓇᕐᒪᖔᕐᒥᒃ ᑮᓇᐅᔭᓂᒃᑕᐅᖅ, ᑕᐃᑯᙵᑐᐃᓐᓇᖅ ᑎᑭᓚᐅᙱᑦᑐᖅ.

ᐊᒥᓱᒻᒪᕆᐊᓗᐃᑦ ᐃᓚᐅᓕᓚᐅᖅᑐᑦ ᐊᒻᒪᓗ ᐃᓄᐃᑦ ᓄᓇᓕᖕᓂ ᑲᖏᖅᖠᓂᐅᑉ ᓯᓚᑖᓂ ᑎᑎᕋᖃᑦᑕᓕᓚᐅᖅᑐᑦ ᕋᐳᑦᒧᑦ ᑐᓴᖅᑎᑦᑎᑉᓗᑎᒃ ᖁᕕᐊᓱᖕᓂᕐᒥᓂᒃ ᑕᐃᒪᐃᓕᐅᖅᑎᑦᑎᓂᖓᓄᑦ, ᖁᕕᐊᒋᔭᐅᑦᑎᐊᕐᓂᖏᓐᓄᓪᓗ ᑕᐅᑐᒃᖢᑎᒃ ᒧᒥᖅᑐᓂᒃ ᖃᕆᑕᐅᔭᒃᑯᑦ ᐊᒻᒪᓗ ᐃᖕᒥᓂᒃᑕᐅᖅ ᑐᓂᓯᖃᑦᑕᖅᖢᑎᒃ ᑮᓇᐅᔭᓂᒃ ᓵᓚᒃᓴᖅᑕᐅᓇᔭᖅᑐᓄᑦ ᐃᓕᔪᒃᓴᓂᒃ.

120 ᐅᖓᑖᓃᑦᑐᑦ ᑐᓂᕐᕈᑕᐅᓚᐅᖅᑐᑦ ᐅᐊᔪᓕᐊᖑᓯᒪᔪᑦ, ᐃᒻᒪᖄ ᓇᑉᐸᖏᑦ ᒧᒥᖅᖢᑎᒃ ᓯᓚᒥ 30 ᓯᑲᓐᓂᒡᓘᓐᓃᑦ.

ᓵᓚᒃᓴᒐᒃᓴᑦ ᐋᖅᑭᒃᑕᐅᓪᓚᑦᑖᓕᓚᐅᖅᑐᑦ, ᓯᕗᓪᓕᖅᐹᒥ ᑕᓪᓕᒪᒋᔭᖓᓄᑦ, $400, $350, $300, $150 ᐊᒻᒪᓗ $80.

ᑕᒪᓐᓇ ᐱᕙᓪᓕᐊᓪᓚᕆᓚᐅᖅᑐᖅ ᓂᕆᐅᒋᔭᕐᒪ ᐅᖓᑖᓄᑦ,” ᑕᐃᒪᓐᓇ ᐅᖃᖅᖢᓂ ᕋᐳᑦ ᐊᒻᒪᓗ ᑕᑯᖃᑦᑕᖅᖢᓂ ᓇᐹᖅᑐᓂᒃ ᐊᒻᒪᓗ ᐊᔾᔨᒌᙱᑦᑑᑕᐅᔪᓂᒃ ᓄᓇᓂᒃ ᐅᐊᔪᓕᐊᖑᓯᒪᔪᒃᑯᑦ ᕿᑭᖅᑖᓗᖕᒥ ᐊᒻᒪᓗ ᖃᑉᓗᓈᑦ ᓄᓇᖓᓂ ᐊᓕᐊᓇᐃᒃᑲᓐᓂᓕᓚᐅᖅᑐᖅ.

Hᐊᓕ ᐃᓱᒪᓕᐅᖃᑕᐅᓚᐅᖅᑐᖅ ᓯᓚᒥ ᒧᒥᖁᑉᓗᒋᑦᑕᐅᖅ, ᑕᐃᒪᐃᒻᒪᑦ ᐱᓕᕆᑦᑎᐊᖅᑐᐊᓘᓚᐅᖅᑐᖅ ᑕᒪᓐᓇ ᑲᔪᓯᑦᑎᐊᖁᑉᓗᒍ.

ᑲᔪᓯᑦᑎᐊᓪᓚᕆᓚᐅᖅᑐᖅ.”