ᐸᖕᓂᖅᑑᒥ ᒪᓕᒐᓕᐅᖅᑎᐅᓚᐅᖅᑐᖅ ᐊᒻᒪ ᒪᐃᔭ ᕼᐃᓯᑲᐃᔭ ᐅᓲᑖᐱᒃ ᐃᓅᔪᓐᓃᑲᓪᓚᓚᐅᖅᐳᖅ ᐱᓇᓱᐊᕈᓯᐅᑉ ᓄᙳᐊᓂ.
ᐅᓲᑖᐱᒃ, 63, ᐃᓅᔪᓐᓃᓚᐅᖅᐳᖅ ᐆᒻᒪᓯᕆᓂᕐᒧᑦ ᓄᓇᒦᑎᓪᓗᒍ ᐅᓐᓄᖓᓂ ᐊᐃᑉᕆᓕ 17-ᒥ, ᐅᖃᐅᓯᐅᓪᓗᓂ ᑎᐊᕈᓪ ᑎᑉᓕᒧᑦ, ᐸᖕᓂᖅᑑᒥ ᓄᓇᓕᖕᓂ ᐊᐅᓚᑦᑎᔨᐅᔪᒧᑦ.
ᓂᕈᐊᖅᑕᐅᓚᐅᖅᐳᖅ ᒪᓕᒐᓕᐅᕐᕕᖕᒧᑦ 2011–ᒥ ᓂᕈᐊᕐᕕᒻᒪᕆᒃ ᐊᓂᒍᖅᓯᒪᑎᓪᓗᒍ ᓂᕈᐊᖅᑎᑦᑎᒃᑲᓐᓂᕐᓂᕐᒥ ᐊᒻᒪ ᐊᑕᐅᓯᕐᒥ ᐊᕐᕌᒍᒥ ᑲᑎᒪᔨᐅᓚᐅᖅᐳᖅ.
ᓄᓇᕗᒻᒥ ᒪᓕᒐᓕᐅᕐᕕᖓ ᐊᐅᓚᖁᑎᒥᓂᒃ ᐊᑦᑎᒃᓯᒋᐊᖅᓯᓚᐅᖅᐳᑦ ᐃᖅᑲᐅᒪᓂᕐᒧᑦ. ᐅᖃᖅᑎ ᐹᓪ ᖁᐊᓴ ᐅᖃᓚᐅᖅᐳᖅ ᓄᒫᑦᑕᓚᐅᕐᓂᖓᓂ ᑐᓴᕋᒥ ᑐᓴᒐᒃᓴᐅᔪᒥ.
"ᓯᔅᑐᕐ ᐅᓲᑖᐱᒃ, ᒪᐃᔭᐅᓚᐅᖅᑐᖅ ᐸᖕᓂᖅᑑᒥ ᐃᓅᔪᓐᓃᖅᑎᓪᓗᒍ, ᐊᖏᐸᓗᒃᑐᒥ ᖃᔅᓯᒐᓚᖕᓂ ᐃᑲᔪᖅᓱᐃᓂᖃᓚᐅᖅᐳᖅ ᓄᓇᓕᖓᓐᓄᑦ ᐱᓕᕆᓂᖓᓄᑦ ᑲᑐᔾᔨᖃᑎᒌᒐᓚᐅᔪᓄᑦ ᓲᕐᓗ ᑲᓇᑕᒥ ᐅᓇᑕᖅᑐᒃᓴᙳᐊᓄᑦ," ᐅᖃᓚᐅᖅᐳᖅ ᖁᐊᓴ. "ᑭᒡᒐᖅᑐᐃᓪᓗᖓ ᑕᒪᒃᑭᓄᑦ ᐃᓚᒋᔭᐅᔪᓄᑦ ᒪᓕᒐᓕᐅᖅᑎᒃᑯᓐᓂ, ᓇᒡᓕᒍᓱᒃᐳᒍᑦ ᐃᓚᖏᓐᓄᑦ ᐊᒻᒪ ᓄᓇᓕᖕᓄᑦ."
ᓇᒡᒐᔾᔭᐅᒥ ᑐᓴᒐᒃᓴᓕᐅᕐᓂᕐᒥ ᓄᕙᒡᔪᐊᕐᓇᖅ–19 ᓄᑖᙳᖅᐸᓪᓕᐊᓂᐅᔪᓄᑦ, ᓯᕗᓕᖅᑎ ᔫ ᓴᕕᑲᑖᖅ ᕿᓚᒻᒥᐅᔪᒥ ᓇᓗᓇᐃᖅᓯᓂᖃᓚᐅᖅᐳᖅ ᐅᓲᑖᐱᐅᑉ ᐃᓅᔪᓐᓃᕐᓂᖓᓂ.
"ᕼᐃᓯᑲᐃᔭ ᐅᓲᑖᐱᒃ ᓴᙱᓪᓗᓂ ᓯᕗᓕᐅᖅᑎᐅᓚᐅᖅᐳᖅ ᓄᓇᓕᖓᓐᓂ, ᐊᒻᒪ ᐃᓅᔪᓐᓃᑳᓪᓚᖕᓂᖓ ᕿᒪᐃᓯᓯᒪᕗᖅ ᐊᖕᒪᔪᕐᔪᐊᕐᒥᑦ, ᐅᖃᓚᐅᖅᐳᖅ ᓴᕕᑲᑖᖅ. "ᐱᖃᓐᓇᕆᔭᖏᑦ ᐊᒻᒪ ᐃᓚᖏᑦ ᓇᒡᓕᒋᕙᕗᑦ ᑕᒪᑐᒪᓂ ᐊᒃᓱᕈᕐᓇᖅᑑᔪᒥ, ᐊᒻᒪ ᐸᖕᓂᖅᑑᒥ ᐃᓄᖏᑦ ᓴᙱᖁᕙᒃᑲ ᐃᓚᐃᓕᖅᑭᓂᖃᖅᑎᓪᓗᒋᑦ."
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐃᖅᑲᐅᒪᓂᖃᓚᐅᕆᕗᑦ ᓯᕗᓕᐅᖅᑎᐅᓚᐅᖅᑐᒧᑦ.
"ᐃᓱᒪᒋᕙᒃᑲ ᕼᐃᓯᒃᑲᐃᔭ ᐅᓲᑖᐱᑉ ᐃᓚᖏᑦ, ᐱᖃᓐᓇᕆᔭᖏᑦ ᐊᒻᒪ ᓄᓇᓕᖕᓂ ᐸᖕᓂᖅᑑᒥ ᑕᒪᑐᒪᓂ ᐊᔪᕐᓇᖅᑐᒃᑰᕐᓂᐅᔪᒥ" ᐅᖃᓚᐅᖅᐳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᖓᔪᖅᑳᖓ P.J. ᐊᕿᐊᕈᖅ, "ᕼᐃᓯᒃᑲᐃᔭ ᑐᕌᖓᑦᑎᐊᖅᖢᓂ ᓯᕗᓕᐅᖅᑎᐅᓚᐅᖅᐳᖅ ᐱᔨᑦᑎᕋᓚᐅᖅᑐᒥ ᐸᖕᓂᖅᑑᒥ ᐊᕐᕌᒍᒐᓴᓄᑦ ᒪᓕᒐᓕᐅᖅᑎᐅᓪᓗᓂ ᐊᒻᒪ ᒪᐃᔭᐅᓪᓗᓂ. ᐃᖅᑲᐅᒪᔭᐅᓂᐊᖅᐳᖅ."
ᓯᕗᓂᐊᓂ ᑲᑎᒪᔨᐅᖃᑦᑕᕐᓂᕐᒧᑦ, ᐅᓲᑖᐱᒃ ᐃᖅᑲᓇᐃᔭᖅᐸᓚᐅᖅᐳᖅ ᐃᓕᓴᖅᓯᒪᓪᓗᓂ ᐱᓕᕆᐊᒥᓂᑦ ᓱᓪᓗᓕᕆᔨᐅᓪᓗᓂ ᐊᒻᒪ ᐅᖅᓱᐊᓗᖕᒨᖅᑐᓂ ᐊᐅᓚᐅᓯᕆᔨᐅᓚᐅᖅᐳᖅ. ᐃᖅᑲᓇᐃᔮᖃᓚᐅᕆᕗᖅ ᐃᒡᓗᓕᕆᔨᒃᑯᓐᓂ ᐋᖅᑭᐅᒪᑎᑦᑎᔨᐅᓂᕐᒧᑦ ᐊᒻᒪ ᐃᒃᓯᕙᐅᑕᐅᓚᐅᖅᓯᒪᕗᖅ ᐸᖕᓂᖅᑑᒥ ᐃᖃᓗᓕᕆᔨᒃᑯᓐᓄᑦ.