ᖃᒪᓂᑦᑐᐊᕐᒥ ᕼᐋᒻᓚᒃᑯᑦ ᒍᓛᔾᔪᖓ ᐃᑭᓚᐅᖅᑎᓪᓗᒍ ᓄᖑᑎᕆᓪᓗᓂ ᖃᔅᓯᒐᓚᖕᓂ ᓄᓇᓯᐅᑎᓂᑦ ᐊᒻᒪ ᕿᓚᒻᒥᐅᔪᒥ ᐃᒥᖅᑕᕐᓂᕐᒥᒃ ᐊᒻᒪ ᑯᕕᖅᑕᕐᓂᕐᒥᒃ ᐱᔭᕆᑐᖅᓯᑎᑦᑎᓚᐅᑲᓚᐅᖅᑎᓪᓗᒍ ᔭᓄᐊᕆᒥ, ᒪᓕᒐᓕᐅᖅᑎ ᓯᒥᐅᓐ ᒥᒃᑯᙳᐊᖅ ᓇᖏᓚᐅᖅᐳᖅ ᒪᓕᒐᓕᐅᕐᕕᖕᒥ ᐊᒻᒪ ᓇᓗᓇᐃᖅᓯᒃᑲᓐᓂᓚᐅᖅᐳᖅ ᐱᒻᒪᕆᐅᓂᖓᓂ ᓄᓇᓕᖕᓂ ᑐᐊᕕᕐᓇᖅᑐᓂ ᐸᕐᓇᐅᑎᖃᕐᓂᖏᓐᓂ.
ᒥᒃᑯᙳᐊᖅ ᐅᖃᐅᓯᖃᓚᐅᖅᐳᖅ ᓄᓇᕗᒻᒥ ᑐᐊᕕᕐᓇᖅᑐᓕᕆᓂᕐᒧᑦ ᒪᓕᒐᖓ ᖄᖏᖅᑕᐅᓚᐅᖅᐳᖅ 2007-ᒥ, ᑭᓯᐊᓂ ᐃᓚᖏᑦ ᐊᑐᓕᖅᑎᑕᐅᓯᒪᓚᐅᙱᓚᑦ ᓱᓕ. ᓄᓇᓕᖕᓂ ᐊᒻᒪ ᒐᕙᒪᓕᕆᓕᕐᓄᑦ ᐱᔨᑦᑎᕋᖅᑎᒃᑯᑦ (CGS) ᒥᓂᔅᑕᖓ ᓗᐊᓐ ᑯᓱᒐᖅ ᐅᓂᒃᑳᓚᐅᖅᐳᖅ ᒪᕐᕉᒃ ᓄᓇᓕᐅᔪᑦ ᐱᖃᙱᓚᑦ ᑐᐊᕕᕐᓇᖅᑐᒥ ᐸᕐᓇᐅᑎᓂᑦ: ᐸᖕᓂᖅᑑᖅ ᐊᒻᒪ ᑰᒑᕐᔪᒃ. ᐅᖃᓚᐅᖅᐳᖅ ᐱᓕᕆᕝᕕᖓ ᐃᑲᔪᖅᓱᐃᕗᑦ ᐱᔭᕇᖅᓯᓂᐅᔪᒥ ᑖᒃᑯᓂᖓ ᐸᕐᓴᐅᑎᓂᑦ ᐊᒻᒪᓗ ᐊᓱᐃᓛᒃ ᑐᐊᕕᕐᓇᖅᑐᓕᕆᓂᕐᒧᑦ ᒪᓕᒐᖓ ᑕᒪᐃᑎᒍᑦ ᐊᑐᕐᓂᖃᓕᕋᔭᖅᐳᖅ.
ᒪᐃ 5-11 ᓇᓗᓇᐃᖅᓯᓚᐅᖅᐳᑦ ᑐᐊᕕᕐᓇᖅᑐᒥ ᐸᕐᓇᒃᐸᒌᖅᓯᒪᓂᐅᔪᒥ ᐱᓇᓱᐊᕈᓯᐅᔪᒥ ᑲᓇᑕᓕᒫᒥ, ᑕᒪᑐᒪᓂ ᐊᕐᕌᒎᔪᒥ ᐅᖃᐅᓯᐅᓂᐅᔪᒥ ᐅᓇᐅᓪᓗᓂ "ᑐᐊᕕᕐᓇᖅᑐᒧᑦ ᐸᕐᓇᒃᓯᒪᒋᑦ." ᓇᓗᓇᐃᖅᑕᐅᓚᐅᖅᐳᖅ ᓄᓇᓕᖕᓂ ᐊᒻᒪ ᒐᕙᒪᐅᔪᓄᑦ ᐱᔨᑦᑎᕋᕐᓂᕐᓄᑦ ᑐᓴᒐᒃᓴᓕᐊᖑᔪᒥ.
ᑭᓯᐊᓂ ᐸᖕᓂᖅᑑᒥ, ᓵᙵᓂᖃᓚᐅᖅᑐᒥ ᑕᖅᑭᓕᒫᒥ ᑐᐊᕕᕐᓇᖅᑐᒦᓐᓂᐅᔪᒥ 2015-ᒥ ᐆᒻᒪᖅᑯᑎᖃᕐᕕᖓ ᓄᖑᓚᐅᖅᑎᓪᓗᒍ ᐃᑭᑦᑐᒧᑦ, ᓱᓕ ᐱᑕᖃᙱᑦᑎᐊᖅᐳᖅ ᑐᐊᕕᕐᓇᖅᑐᒥ ᐸᕐᓇᐅᑎᒃᓴᓪᓗᐊᖑᔪᒃᓴᒥ. ᒪᐃᔭ ᓯᑏᕕ ᖁᒻᒧᐊᖅᑐᖅ, ᓂᕈᐊᖅᑕᐅᓚᐅᖅᑐᒥ ᑎᓯᐱᕆ 2017-ᒥ, ᐊᐱᖅᑯᑎᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᒥ ᐱᓇᓱᐊᕈᓯᐅᓚᐅᖅᑐᒥ ᓄᓇᓕᖕᓄᑦ ᐊᐅᓚᑦᑎᔨᐅᔪᒧᑦ ᓈᓐᓯ ᐊᓂᕐᓂᓕᐊᕐᒧᑦ. ᐱᒋᐊᓕᓵᓚᐅᖅᐳᖅ ᐃᖅᑲᓇᐃᔮᖓᓂ ᔭᓄᐊᕆᒥ ᐊᒻᒪ ᖃᐅᔨᒪᙱᓚᖅ ᑭᓱᒧᑦ ᓄᖅᑲᖅᑎᑦᑎᓯᒪᓂᖓᓂ ᐸᕐᓇᐅᑎᒥᒃ ᐃᓕᔭᐅᓯᒪᓂᖓᓐᓂ.
"ᓇᓗᓇᙱᓚᖅ ᐱᑕᖃᕆᐊᖃᕐᓂᖓᓂ," ᐊᓂᕐᓂᓕᐊᖅ ᐅᖃᓚᐅᖅᐳᖅ. "ᐱᓕᕆᕙᓪᓕᐊᕗᖓ ᐊᒥᓱᓂᑦ ᐱᓕᕆᐊᓯᒪᙱᑦᑐᓂ ᐋᖅᑭᒃᓱᖅᑕᐅᖏᓐᓂ ᐊᒻᒪ ᐅᓇ ᐊᑕᐅᓯᐅᖃᑕᐅᕗᖅ ᐱᓕᕆᐊᒃᓴᓄᑦ... ᓯᕗᓪᓕᐅᔾᔭᐅᖁᔭᐅᔪᓂ ᐋᖅᑭᒃᓱᐃᓂᐅᕗᖅ ᕼᐋᒻᓚᒃᑯᓐᓄᑦ ᐅᕙᓂ."
ᑰᒑᕐᔪᒃᑕᐅᖅ, ᐊᖏᔪᓂ ᑐᐊᕕᕐᓇᖅᑐᖃᐅᓚᐅᖅᐳᖅ ᒫᓐᓇᓕᓴᓂ ᐊᕐᕌᒍᓂᑦ. ᓄᓇᓕᖕᓂ ᐊᐅᓚᑦᑎᔨᐅᔪᖅ ᔮᓐ ᐊᐃᕕ, ᐃᓂᒋᔭᒥᓃᓯᒪᔪᒥ ᐅᓄᕐᓂᖅᓴᐅᔪᓂ ᐊᕐᕌᒍᓄᑦ ᐱᖓᓱᓄᑦ, ᐅᖃᓚᐅᖅᐳᖅ ᓇᓂᓯᓯᒪᓂᖓᓂ ᕼᐋᒻᓚᒃᑯᑦ ᑐᐊᕕᕐᓇᖅᑐᒧᑦ ᐸᕐᓇᐅᑎᖓᓂ ᖃᕋᓴᐅᔭᑎᒍᑦ ᑐᖅᑯᐃᕕᐅᔪᒧᑦ ᑭᓯᐊᓂ ᐸᐃᑉᐹᑎᒍᑦ ᑎᑎᕋᖅᓯᒪᓂᐅᔪᖅ ᐱᑕᖃᙱᓚᖅ. ᑎᑎᖅᑲᖁᑕᐅᔪᖅ ᐋᖅᑭᒋᐊᖅᑕᐅᓚᐅᖅᐳᖅ 2013-ᒥ ᑭᓯᐊᓂ, ᖃᓄᐃᒻᒪᒃᑭᐊᖅ, ᐊᖏᖅᑕᐅᓪᓚᕆᓚᐅᖅᓯᒪᙱᓚᖅ ᑲᑎᒪᔨᐅᔪᓄᑦ. ᐊᐃᕕ ᐅᖃᓚᐅᖅᐳᖅ ᐊᖏᖅᓯᒪᓂᖓᓐᓂ ᕿᒥᕐᕈᓇᖕᓂᕐᒧᑦ ᐸᕐᓇᐅᑎᒥᒃ ᐊᑕᐅᓰᒃᑲᓐᓂᕐᓗᓂ, ᓄᑖᙳᕆᐊᖅᑎᑦᑎᓗᓂ ᖃᐅᔨᒋᐊᕐᕕᒃᓴᐅᔪᓄᑦ ᐅᖃᐅᓯᒃᓴᖏᓐᓂ ᐊᒻᒪᓗ ᑎᑎᖅᑲᖁᑕᐅᔪᒥ ᑐᓂᓂᐊᕐᓂᖓᓂ ᑐᐊᕕᕐᓇᖅᑐᓕᕆᓂᕐᒧᑦ ᑲᑐᔾᔨᖃᑎᒌᖏᓐᓄᐊᖅᓯᓛᖅᐳᖅ ᔫᓂᐅᑉ-ᕿᑎᖅᐸᓯᐊᓄᑦ ᐅᖓᑖᓅᙱᓪᓗᓂ.
ᔨᒥ ᓅᐳᓪ, ᓄᓇᕗᒻᒥ ᒐᕙᒪᒃᑯᑦ ᑐᑭᒧᐊᒃᑎᑦᑎᔨᖓ ᑐᐊᕕᕐᓇᖅᑐᒥ ᐊᐅᓚᑦᑎᓂᐅᔪᒥ, ᐅᖃᓚᐅᖅᐳᖅ ᑐᐊᕕᕐᓇᖅᑐᒥ ᐸᕐᓇᐅᑏᑦ ᑐᑭᓯᓇᖅᑎᑦᑎᓲᖑᕗᑦ ᑭᓇᒧᑦ ᐅᖃᐅᔾᔨᔭᕆᐊᖃᕐᓂᖏᓐᓂ ᑐᐊᕕᕐᓇᖅᑐᖃᖅᑎᓪᓗᒍ – ᐃᓚᖃᖅᑐᒥ ᑎᑎᕋᖅᓯᒪᓂᐅᔪᒥ ᖃᐅᔨᒋᐊᕐᕕᒃᓴᐅᔪᓄᑦ ᐅᖃᐅᓯᒃᓴᓂ – ᐊᒻᒪᓗ ᐊᑐᓂ ᐃᓄᒃ ᑲᑎᙵᓂᐅᔪᓪᓘᓐᓃᑦ ᐊᑐᕐᓂᖃᐅᑎᒋᓇᔭᖅᑕᖏᓐᓂ.
ᓅᐳᓪ ᐅᖃᓚᐅᖅᐳᖅ ᐊᑐᓂ ᓄᓇᓕᐅᔪᑦ ᑲᒪᒋᔭᕆᐊᖃᕐᓂᕆᕙᖓ ᐱᔭᕇᖅᓯᓂᕐᒧᑦ ᑐᐊᕕᕐᓇᖅᑐᒥ ᐸᕐᓇᐅᑎᖏᓐᓂ ᑭᓯᐊᓂ ᑎᑎᕋᕐᕕᖓ ᐱᓕᕆᓇᓱᓲᖑᕗᑦ ᐱᐊᐅᓚᑦᑎᓂᕐᒧᑦ.
"ᑕᒪᒃᑭᓄᑦ ᓄᓇᓕᖕᓄᐊᖅᓯᒪᕗᒍᑦ (ᐸᖕᓂᖅᑑᖅ ᐊᒻᒪ ᑰᒑᕐᔪᖕᒧᑦ) ᐊᑐᐃᓐᓇᖃᖅᑎᑦᑎᓂᕐᒧᑦ ᐃᑲᔪᖅᓱᐃᓂᕐᒥ ᐱᕙᓪᓕᐊᑎᑕᐅᓂᖓᓄᑦ ᐸᕐᓇᐅᑎᖏᓐᓂᑦ. ᐃᓚᐅᑎᑦᑎᓯᒪᕗᒍᑦ ᑕᒪᒃᑭᓂ ᓄᓇᓕᖕᓂ ᐱᓇᓱᐊᕈᓯᓕᒫᒥ ᐱᓕᒻᒪᒃᓴᕐᓂᐅᔪᒥ ᐱᓕᕆᓂᐅᔪᒥ ᐊᒻᒪ ᑐᓂᓪᓗᑎᒍᑦ ᐊᑐᖅᑕᐅᔪᓐᓇᖅᑐᒥ ᒪᓕᒐᒃᓴᒥ ᐊᒻᒪ ᐋᖅᑭᒃᓱᐃᓪᓗᑕ... ᐱᓕᒻᒪᒃᓴᕐᓂᐅᔪᓂᑦ," ᓅᐳᓪ ᐅᖃᓚᐅᖅᐳᖅ. "ᐊᑐᐃᓐᓇᖃᖅᑎᑦᑎᓯᒪᕗᒍᑦ ᐱᓕᒻᒪᒃᓴᕐᓂᐅᔪᓂ ᒪᕐᕈᐃᖅᓱᖅᖢᑕ ᑰᒑᕐᔪᖕᒧᑦ ᐊᒻᒪ ᐱᖓᓱᐃᖅᓱᖅᖢᑕ ᐸᖕᓂᖅᑑᒧᑦ."
ᐊᐃᕕ ᓇᓗᓇᐃᖅᓯᓚᐅᖅᐳᖅ ᐱᒻᒪᕆᐅᓂᖓᓂ ᑐᐊᕕᕐᓇᖅᑐᒧᑦ ᐸᕐᓇᒃᓯᒪᕕᒌᔭᕆᐊᖃᕐᓂᕐᒧᑦ. ᑰᒑᕐᔪᒃ ᐃᑲᔪᓚᐅᖅᐳᑦ ᐊᔪᖅᓯᓯᒪᔪᓂ ᐃᑭᒪᔪᓄᑦ ᐳᓚᕋᖅᐸᒃᑐᓄᑦ ᐅᒥᐊᕐᔪᐊᕐᒥ ᐊᔪᖅᓯᓯᒪᓚᐅᖅᑐᒥ ᐊᐅᔭᐅᓚᐅᖅᑐᒥ ᐊᒻᒪ ᓄᓇᓖᑦ ᐃᑭᓐᓂᖃᓚᐅᖅᐳᑦ ᓄᖑᑎᕆᓪᓗᓂ ᐃᓕᓐᓂᐊᕐᕕᖓᓐᓂ ᕕᕈᐊᕆ 2017-ᒥ. ᖃᐅᔨᒪᓪᓗᓂ ᖃᓄᐃᓕᐅᕐᓂᐅᓂᐊᖅᑐᒥ ᐃᑭᑎᓪᓗᒍ ᐱᓪᓚᕆᐅᓚᐅᖅᐳᖅ, ᑕᐅᑦᑐᐊᒍᑦ "ᐅᐃᒪᓇᖅᑑᔮᕋᓗᐊᖅᑎᓪᓗᒍ" ᑕᐃᔅᓱᒪᓂ, ᐅᖃᓚᐅᖅᐳᖅ ᐊᐃᕕ.
"ᑕᒪᑦᑕ ᐱᓕᕆᖃᑎᒌᓚᐅᖅᐳᒍᑦ ᐅᓐᓄᐊᓕᒫᒥ ᓴᐳᔾᔨᓇᓱᐊᕐᓂᕐᒧᑦ ᐃᓕᓐᓂᐊᕐᕕᖕᒥ. ᖃᓄᐃᓐᓂᐅᔪᒥ ᑕᐃᒪᐃᑦᑐᒥ ᑐᑭᖃᓚᐅᖅᐳᖅ ᖃᑦᑎᕆᔨᒃᑯᑦ ᐊᖏᓛᖑᔪᒥ ᐱᓕᕆᓂᖃᓚᐅᕐᓂᖓᓂ; ᖃᑦᑎᕆᔨᓄᑦ ᐊᖓᔪᖅᑳᖓ ᑐᕌᖅᑎᑦᑎᓪᓗᓂ ᖃᑦᑎᕆᓂᕐᒧᑦ ᐊᐅᓚᑕᐅᓂᐅᔪᓂᑦ; ᐸᓖᓯᒃᑯᑦ ᐅᐸᒃᑕᐅᑦᑕᐃᓕᒪᑎᑦᑎᓪᓗᑎᒃ; ᕼᐋᒻᓚᒃᑯᑦ ᐊᐅᓚᑦᑎᓪᓗᑎᒃ ᓂᕆᔭᒃᓴᖃᖅᑎᑦᑎᓂᕐᓄᑦ ᐊᒻᒪ ᐆᓇᖅᑐᓂ ᓂᐅᖅᑲᒐᒃᓴᖏᓐᓂ ᖃᑦᑎᕆᔨᓄᑦ, ᐅᖃᐅᔾᔨᓪᓗᑎᒃ ᓄᓇᓕᖕᓂ ᐊᒻᒪ ᒐᕙᒪᒃᑯᓐᓄᑦ ᐱᔨᑦᑎᕋᖅᑎᓂᑦ ᐃᖃᓗᖕᓂ ᖃᓄᐃᓐᓂᐅᔪᒧᑦ ᐊᒻᒪ ᖃᐅᔨᒋᐊᖏᓐᓇᖅᖢᑎᒃ ᐃᒡᓗᖃᖅᑎᐅᔪᓄᑦ ᑐᕌᖓᓂᖃᓚᐅᖅᑐᓂ ᐳᔫᕐᔪᐊᕐᓂᐅᓂᖓᓄᑦ ᓱᐴᕐᓂᖓᓂ," ᐊᐃᕕ ᐃᖅᑲᐅᒪᓚᐅᖅᐳᖅ.