Skip to content

ᓂᐅᕕᖅᑕᐅᓂᐅᔪᑦ ᐊᖏᒡᓕᒋᐊᖅᐳᖅ Nanook Express−ᑯᓐᓄᑦ ᓄᕙᒡᔪᐊᕐᓇᖅ-19−ᖃᕋᓗᐊᖅᑎᓪᓗᒍ

ᓱᒃᑲᔪᓂ–ᓂᕿᓕᐊᖑᔪᓂ ᓂᐅᕕᖅᑕᐅᑦᑎᐊᖃᑦᑕᖅᐳᑦ, ᐱᔭᐅᒐᔪᒃᑐᓂ ᓂᕿᓕᐊᓂ ᑎᑭᓴᒐᒃᓴᓂ ᐊᒻᒪ ᓂᕿᓕᐅᖅᑎᒻᒪᕆᐅᑉ ᓂᕿᓪᓚᑦᑖᓄᑦ ᑎᑭᓴᒐᒃᓴᐅᔪᓂ

ᓄᕙᒡᔪᐊᕐᓇᖅ-19 ᐊᒥᓱᓄᑦ ᖃᓂᒻᒪᓐᓇᐅᔪᒥ ᐱᐅᙱᑦᑐᒥ ᐊᒃᑐᐃᓂᖃᖅᓯᒪᕗᖅ ᐊᒥᓱᓄᑦ ᓇᖕᒥᓂᖃᖅᑎᐅᔪᓄᑦ ᓄᓇᕗᒻᒥ, ᑭᓯᐊᓂ Nanook Express-ᑯᓐᓄᑦ– ᓂᕿᓂᒃ ᑎᑭᓴᐃᕝᕕᖕᒥ ᓄᓇᓯᐅᒻᒥ ᐃᖃᓗᖕᓂ – ᐊᔾᔨᒋᙱᑉᐸᐅᒃ, ᑖᓕᔅ ᓕᑕᒻᐱᓕᐅᕐ, ᓇᖕᒥᓂᖃᖅᑎᐅᔪᖅ, ᐅᖃᓚᐅᖅᐳᖅ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐊᖏᒡᓕᒋᐊᖅᑎᑦᑎᓯᒪᕗᖅ ᓂᐅᕕᐊᒃᓴᖏᓐᓂ 25 ᐳᓴᓐᑎᒧᑦ ᑕᐅᑐᒃᖢᒍ ᓯᕗᓂᐊᓂ ᐊᕐᕌᒎᑉ ᐃᓚᖓᓐᓂ.

ᐱᓕᕆᓂᕗᑦ “ᐱᓕᕆᑦᑎᐊᖅᑐᒻᒪᕆᐅᓯᒪᕗᖅ,” ᐅᖃᖅᐳᖅ ᑖᓕᔅ ᓚᑎᒻᐱᓕᐅᕐ, ᓇᖕᒥᓂᖃᖅᑎᐅᔪᖅ Nanook Express−ᒥ. Rajnesh Sharma/NNSL photo

"ᑭᖑᓪᓕᕐᓂ ᐱᓇᓱᐊᕈᓯᐅᑉ ᓄᙳᐊᓂᑦ, ᐱᓕᕆᑦᑎᐊᖅᑐᒻᒪᕆᐅᓯᒪᕗᖓ," ᐅᖃᓚᐅᖅᐳᖅ ᓕᑕᒻᐱᓕᐅᕐ ᖁᖓᔮᖅᖢᓂ.

Nanook Express ᐊᑐᐃᓐᓇᖃᖅᑎᑦᑎᕗᖅ ᑕᒪᒃᑭᓂ ᐱᔭᐅᒐᔪᒃᑐᓂ ᐊᒻᒪᓗ ᓂᕿᓕᐅᖅᑎᒻᒪᕆᐅᑉ ᓂᕿᓕᐊᓂ ᑎᑭᓴᒐᒃᓴᓂ ᓂᐅᕕᖅᐸᒃᑐᓄᑦ. Rajnesh Sharma/NNSL photo

Nanook Express ᐊᑐᐃᓐᓇᖃᖅᐳᖅ ᓱᒃᑲᔪᓂ–ᓂᕿᓕᐊᖑᔪᓂ ᑎᑭᓴᒐᒃᓴᓂ ᓲᕐᓗ ᐳᑏᓐ, ᕼᐊᒻᐳᒍ, ᕗᕋᐃᔅ ᐊᒻᒪ ᐊᕿᒡᒋᖅ ᐃᓴᕈᖏᓐᓂ ᐱᔭᐅᒐᔪᒃᑐᓂ ᑎᑭᓴᒐᒃᓴᓂ. ᓂᕿᓕᐅᖅᑎᒻᒪᕆᐅᑉ ᓂᕿᓪᓚᑦᑖᓄᑦ ᑎᑭᓴᒐᒃᓴᐅᔪᖃᕆᕗᖅ ᐃᓚᖃᖅᑐᒥ ᓇᓄᖅ ᐳᑏᓐᒥ ᐊᒻᒪ ᐴᒍᓂᑦ ᓴᓇᓯᒪᔪᓂ ᐸᐃᓴᓐᒥ, ᑐᒃᑐᒥ ᐊᒻᒪ ᐃᖃᓗᖕᒥᑦ.

ᐱᖃᓐᓇᕆᔭᖏᓐᓂ ᐃᑲᔪᖅᑕᐅᓪᓗᓂ, ᓕᑕᒻᐱᓕᐅᕐ ᐱᒋᐊᓚᐅᖅᐳᖅ ᓇᖕᒥᓂᕆᔭᖓᓂ ᐊᕐᕌᒍᑦ 6-ᓂ ᐊᓂᒍᖅᓯᒪᓕᖅᑐᓂ ᐊᖓᔪᖅᑳᖃᕐᕕᖕᒥ.

ᑕᒪᑐᒪᓂ ᐊᕐᕌᒎᔪᒥ ᐱᒋᐊᓚᐅᖅᐳᖅ ᐊᕐᕌᒎᑉ ᐃᓚᖓᓐᓂ ᒪᐃᒥ ᐱᔾᔪᑎᖃᖅᑐᒧᑦ ᓯᓚᒧᑦ ᐊᑲᐅᙱᓕᐅᕈᑕᐅᔪᓄᑦ ᐊᒻᒪ ᓄᕙᒡᔪᐊᕐᓇᖅ-19–ᒨᙱᑦᑐᖅ. ᐊᕐᕌᒎᑉ ᐃᓚᖓᓐᓂ ᐊᐅᓚᒐᔪᒃᐳᖅ ᐊᐃᕐᕆᓕᒥ ᒪᐃᒥᓪᓘᓐᓃᑦ ᐅᒃᑐᐱᕆᐅᑉ–ᕿᑎᖅᐸᓯᐊᓄᑦ, ᐅᖃᓚᐅᖅᐳᖅ ᓇᖕᒥᓂᖃᖅᑎᐅᔪᖅ ᑯᐸᐃᖕᒥ.

ᓕᑕᒻᐱᓕᐅᕐ ᐅᒃᐱᕈᓱᒃᐳᖅ ᓇᖕᒥᓂᕆᔭᖓ ᐱᐅᙱᑦᑐᒥ ᐊᒃᑐᖅᑕᐅᓂᖃᙱᓐᓂᖓᓂ ᐊᒥᓱᓄᑦ ᖃᓂᒻᒪᓐᓇᐅᔪᒧᑦ ᑎᑭᓴᖅᑕᐅᔪᓂ ᓂᕿᓂᑦ ᓄᓇᓯᐅᑎᖓᓐᓂ ᐱᔨᑦᑎᕋᓲᖑᖕᒪᑦ ᐊᒻᒪ ᓂᐅᕕᖅᑐᑦ ᐃᒃᓯᕙᐅᑕᖃᕆᐊᖃᙱᓚᑦ. ᓱᓕᓂᐅᔪᖅ ᓂᕆᕝᕖᑦ ᒪᑐᓯᒪᓂᖏᓐᓂ ᑕᐃᒪᙵᓂ ᒫᔾᔨᒥ "ᐃᑲᔪᕈᑎᕐᔪᐊᖑᒋᕗᖅ,"ᐅᖃᓚᐅᖅᐳᖅ.

ᓂᕆᕝᕖᑦ ᓄᓇᕗᒻᒥ ᒪᑐᐃᒃᑲᓐᓂᓚᐅᖅᐳᑦ ᓇᑉᐸᓪᓗᐊᖓᓂ–ᐃᓐᓄᒍᓐᓇᖅᑎᑕᐅᓪᓗᑎᒃ ᔫᓂ 22–ᒥ ᒪᑐᓯᒪᓚᐅᖅᑎᓪᓗᒋᑦ ᑕᐃᒪᙵᓂ ᒫᔾᔨᒥ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19–ᒧᑦ.

ᓂᕆᕝᕖᑦ ᐃᓚᖓᒍᑦ ᒪᑐᐃᖅᓯᒪᓕᕋᓗᐊᖅᑎᓪᓗᒋᑦ, ᓕᑕᒻᐱᓕᐅᕐ ᐅᖃᖅᐳᖅ ᓇᖕᒥᓂᕆᔭᖓ ᓱᓕ ᐱᓕᕆᑦᑎᐊᖅᐳᖅ.
"ᖁᕕᐊᓱᒃᐳᖓ,"ᐅᖃᓚᐅᖅᐳᖅ, ᐅᖃᐅᓯᖃᖅᖢᓂ ᒫᓐᓇᐅᔪᒥ ᖃᓄᐃᓕᖓᓂᐅᔪᒥ.

Nanook Express ᒪᓕᑦᑎᐊᖅᐳᖅ ᐃᓅᖃᑎᒌᖑᔪᓄᑦ ᐅᖓᓯᒌᒋᐊᖃᕐᓂᐅᔪᒥ ᐱᓕᕆᓂᐅᔪᓂ ᐊᒻᒪ ᐊᒡᒐᓄᑦ ᐃᕐᕈᖅᑐᕈᑎᐅᔪᓂ ᐊᑐᐃᓐᓇᐅᑎᑦᑎᕗᖅ.

ᓕᑕᒻᐱᓕᐅᕐ ᐅᖃᓚᐅᖅᐳᖅ ᓂᐅᕕᖅᐸᒃᑐᑦ ᐃᕐᙲᓐᓇᑲᐅᑎᒋ 6 ᐃᓯᒐᓪᓗᐊᓂ ᐅᖓᓯᒌᖃᑦᑕᖅᐳᑦ. ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖅᑎ ᐱᔪᓐᓇᖅᑎᑦᑎᕗᖅ ᐊᖏᓛᖑᔪᒥ ᒪᕐᕈᐃᓐᓇᓂ ᐃᓄᖕᓂ ᐃᖅᑲᓇᐃᔭᕐᓂᖏᓐᓄᑦ ᓄᓇᓯᐅᑎᐅᑉ ᐃᓗᐊᓂ ᐊᑕᐅᑦᑎᒥ.

ᑐᖑᔪᖅᑐᖅ ᓄᓇᓯᐅᑎ ᓇᓂᔭᐅᔪᓐᓇᖅᐳᖅ ᐊᖅᑯᑎᒥ ᓂᐅᕕᖅᑎᒃᑯᑦ ᑐᖔᓂ ᐱᖓᔪᐊᓐᓂ ᑕᐃᑯᖓ ᓈᑦᑎᖑᔭᒧᑦ.