Skip to content

ᓂᕆᐅᒋᔭᖃᑦᓯᐊᖅᑐᖅ, ᐊᖏᔪᒥᒃ ᓂᕆᐅᒃᖢᓂ

ᖃᒪᓂ'ᑐᐊᒥ ᒪᓕᒐᓕᐅᖅᑎ ᓯᒥᐊᓐ ᒥᑭᖑᐊᒃ ᒪᑐᐃᖔᑦᓯᐊᖅᖢᓂ ᓂᕆᐅᒋᔭᖃᖅᐳᖅ ᖃᓄᐃᓕᐅᕐᓂᐊᕐᓂᖏᓐᓄᑦ ᓄᓇᕗᑦ ᒐᕙᒪᒃᑯᖏᑦ ᐅᑭᐅᓂ ᓯᑕᒪᐅᓂᐊᖅᑐᓂ.

ᖃᐅᔨᒪᔭᐅᑉᓗᓂ ᐊᖑᑕᐅᓂᖓᓄᑦ ᓄᓇᓕᖕᒥ, ᖃᒪᓂ'ᑐᐊᒥ ᒪᓕᒐᓕᐅᖅᑎ ᓯᒥᐊᓐ ᒥᑭᖑᐊᒃ ᓴᖅᑭᑲᐅᑎᒋᓯᒪᖃᑦᑕᖅᐳᑦ ᓇᓂᑐᐃᓐᓇᖅ ᐃᓄᐃᑦ ᑲᑎᑎᑕᐅᓯᒪᕕᖏᓐᓂ ᓄᓇᓕᖕᒥ, ᓲᕐᓗ ᑐᓂᓯᔭᖅᑐᖅᓯᒪᑉᓗᓂ ᒍᕇᑦ 12-ᒥ ᐃᓕᓐᓂᐊᕌᓂᒃᑐᒧᑦ ᔪᔩᓪ ᓯᕗᕋᖅ ᓇᓗᓇᐃᒃᑯᑕᖓᓂᒃ. NNSL file photo

ᒥᑭᖑᐊᒃ, ᐱᖓᔪᒋᔭᐅᖃᑕᐅᑉᓗᓂ ᑭᕙᓪᓕᕐᒥᐅᑕᖅ ᒪᓕᒐᓕᐅᖅᑎ ᓂᕈᐊᖅᑕᐅᒃᑲᓐᓂᓚᐅᖅᑐᖅ ᓂᕈᐊᕐᓇᐅᓚᐅᖅᑐᒥ ᐊᒃᑐᐱᕆᐅᑎᓪᓗᒍ, ᐃᓱᒪᓕᐅᕈᑎᖃᓚᐅᖅᐳᖅ ᐱᓕᕆᐊᖃᖅᐸᓚᐅᖅᖢᓂ ᓄᓇᓕᖕᓂ ᐊᑯᓂ ᐅᑭᐅᓂ ᑐᓴᖅᑎᑕᐅᓚᐅᖅᖢᓂᓗ ᐃᓐᓇᑐᖃᓄᑦ ᐅᕐᓂᒃᑕᐅᔪᓐᓇᑦᓯᐊᖅᑐᒥᒃ ᒪᓕᒐᓕᐅᖅᑎᖃᖁᑉᓗᒋᑦ ᖃᒪᓂ'ᑐᐊᒥ.

ᐅᖃᓚᐅᖅᐳᖅ, ᐃᓱᒪᓕᐅᖅᓯᒪᓕᐊᓂᖕᓂᕋᖅᖢᓂ ᒪᓕᒐᓕᐅᖅᑎᑦ ᓱᓕ ᑲᑎᒫᓂᓚᐅᖏᑎᓪᓗᒋᑦ ᓂᕈᐊᖅᑕᐅᓇᓱᐊᒃᑲᓐᓂᕐᓂᐊᕈᒪᑉᓗᓂ ᓂᕈᐊᖅᑕᐅᕕᖕᒥᓂ.

ᐱᐊᓂᒃᓯᒪᖏᑦᑐᓂᒃ ᐱᓕᕆᐊᖃᕆᐊᖃᕋᒪ, ᑕᐃᒪᓐᓇ ᐅᖃᓚᐅᖅᖢᖓ ᑕᒻᒪᕇᒃᑯᑎᓕᖕᒥᒃ ᖃᒪᓂ'ᑐᐊᒥ ᒥᕕᖕᒥ ᐱᒋᐊᖃᖁᔨᑉᓗᖓ, ᑕᒪᓐᓇ ᓱᓕ ᐱᐊᓂᒃᓯᒪᖏᒻᒪᑦ, ᖃᐅᔨᓚᐅᖅᐳᖓ ᓂᕈᐊᖅᑕᐅᓇᓱᐊᒃᑲᓐᓂᕆᐊᖃᕐᓂᒻᓄᑦ,” ᐅᖃᓚᐅᖅᐳᖅ ᒥᑭᖑᐊᒃ.

ᐊᑕᐅᑦᓯᒃᑯᓪᓗ, ᖃᒪᓂ'ᑐᐊᒥ ᐊᖏᓂᖅᓴᒥᒃ ᐋᓐᓂᐊᕐᕕᒃᑖᕆᐊᖃᕋᑉᑕ, ᑕᒪᒃᑯᐊᓗ ᐱᓕᕆᐊᕆᒍᒪᑉᓗᒋᑦ.

ᐊᒻᒪ, ᒎᓗᑎᓯᐅᕐᕕᖃᕋᑉᑕᓗ ᖃᒪᓂ'ᑐᐊᑉ ᐅᐊᖕᓇᖓᓂ, ᐊᒻᒪ ᐊᒪᕈᖅ ᐊᖏᒡᓕᒋᐊᖅᑕᐅᓚᐅᖅᑎᓪᓗᒍ, ᐱᕙᓪᓕᐊᔪᓕᕆᓂᖅ ᓄᓇᑉᑎᓐᓂ ᐃᖢᐊᖅᓯᕚᓪᓕᕈᓐᓇᖅᐳᖅ, ᐊᒻᒪ ᐅᒃᐱᕈᓱᒃᐳᖓ ᐱᑕᖃᒃᑲᓐᓂᕈᓐᓇᕐᒪᑦ ᒥᑭᔪᓂᒃ ᐱᓕᕆᕕᖕᓂᒃ ᑕᐃᒪᓐᓇᐃᓕᐅᕈᒪᔪᓄᑦ.”

ᒥᑭᖑᐊᒃ ᖁᕕᐊᓱᖏᔾᔪᑎᖃᖅᐳᖅ ᑕᒻᒪᐅᑕᐅᓚᐅᓂᖏᓐᓄᑦ ᐅᖃᐅᓯᕆᔭᐅᑉᓗᑎᒃ ᑕᓚᕕᓴᒃᑯᑦ ᓂᕈᐊᕐᓇᐅᑎᓪᓗᒍ ᐅᑎᕐᓂᖃᖏᓐᓂᕋᖅᑕᐅᓚᐅᕐᒪᑦ ᐃᖃᓗᖕᓄᑦ ᖃᒪᓂ'ᑐᐊᒧᑦ ᒪᓕᒐᓕᐅᖅᑎᐅᓗᓂ.

ᐃᒡᓚᓚᐅᖅᐳᖅ ᖃᕆᑕᐅᔭᖃᓛᓂᒃ ᐋᖅᑭᒃᓱᕋᓱᐊᓚᐅᕋᒥᐅᒃ ᑕᓚᕕᓴᒃᑯᑦ ᐅᓂᒃᑳᖅᑕᐅᔪᓂᒃ ᑕᑯᒋᐊᒃᑲᓐᓂᕈᒪᑉᓗᓂ ᓂᕈᐊᕐᓂᕐᒧᑦ ᐱᔾᔪᑎᖃᖅᑐᓂᒃ ᑕᐅᑐᒍᒪᑉᓗᓂ.

ᑕᒪᓐᓇ ᓇᕿᖏᓐᓇᖃᑦᑕᓚᐅᖅᐸᕋ ᖃᕆᑕᐅᔭᕋ,” ᐅᖃᓚᐅᖅᐳᖅ ᒥᑭᖑᐊᒃ.

ᑐᐸᓚᐅᕋᒪ 6ᒥ ᐅᑉᓛᒃᑯᑦ ᓂᕈᐊᕐᓇᐅᓕᖅᑎᓪᓗᒍ, ᑕᐃᒪ, ᐅᑉᓗᖑᖃᑦᑖᓕᐊᓂᓚᐅᕐᒪᑦ ᐅᖃᐃᓐᓇᖅᖢᖓᓗ ᑕᒪᓐᓇ ᐃᓱᒪᖅᓱᕈᑕᐅᓂᐊᓕᕐᒪᑦ ᓂᕈᐊᖅᑎᓄᑦ ᑭᓇᒥᒃ ᒪᓕᒐᓕᐅᖅᑎᖃᕈᒪᖕᒪᖔᕐᒥᒃ.

ᐃᖃᓗᖕᓄᑦ ᑎᑭᓐᓇᒪ ᐱᓇᓱᐊᕈᓯᐅᓚᐅᖅᑐᒥ, ᑕᒪᒃᑯᐊ ᒐᕙᒃᑯᓐᓂᒃ ᓂᕈᐊᓚᐅᖅᑐᑦ ᑲᒪᓇᓚᐅᕐᓂᖏᓐᓄᑦ, ᐊᒻᒪ, ᐆᒃᑐᑎᒋᑉᓗᒋᑦ ᓯᑕᒪᒋᔭᐅᔪᓄᑦ ᒪᓕᒐᓕᐅᖅᑎᓄᑦ, ᐊᔾᔨᒌᖏᔾᔪᑎᖃᕐᒪᑕ. ᐊᔾᔨᒌᖏᓚᐅᕐᒪᑕ ᐊᒻᒪ, ᑐᓴᖅᖢᒋᑦ ᐃᓚᖏᑦ ᑲᑎᒪᔨᐅᓕᖅᑐᑦ, ᐃᓱᒪᒋᑉᓗᒋᓪᓗ, ᒪᓕᒐᓕᐅᖅᑎᐅᓕᖅᑐᑦ ᐃᓄᓕᕆᓂᕐᒧᑦ ᐱᓕᕆᐊᖃᕐᓂᖅᓴᐅᑉᓗᑎᒃ ᓴᓐᖏᓂᖃᑦᓯᐊᖅᖢᑎᒡᓗ.”

ᒥᑭᖑᐊᒃ ᐅᖃᓚᐅᖅᐳᖅ ᓄᑖᒥ ᒪᓕᒐᓕᐅᕐᕕᖕᒥ ᐋᖅᑭᒃᓱᐃᖃᑕᐅᓂᐊᕋᒥ ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᕐᓂᒃ.

ᐅᖃᓚᐅᖅᖢᓂᓗ ᒪᓕᒐᖅ ᓴᖅᑭᑕᐅᒃᑲᓐᓂᕐᓂᐊᕐᒪᑦ ᐊᒻᒪ, ᐃᓱᒪᒋᔭᖏᑦ ᒪᓕᒃᖢᒋᑦ, ᐃᓱᒪᓕᐅᕈᑎᖃᑦᓯᐊᓚᐅᕐᒪᑕ ᒪᓕᒐᓕᐅᖅᑎᐅᓚᐅᖅᑐᑦ ᐱᓕᕆᐊᖃᖅᖢᑎᒃ ᐊᒻᒪ ᑕᓐᓇ ᑐᓐᓂᐅᑕᐅᓂᖓᓗ ᐱᓕᕆᐊᕆᔭᐅᒋᐊᖃᓚᐅᕐᒪᑦ ᒪᓕᒐᓕᐅᖅᑎᓄᑦ.

ᐃᑲᔪᖅᑐᕐᓂᖅ ᐊᔪᓚᐅᕋᑉᑯ ᑕᐃᑉᓱᒪᓂ, ᓄᓇᑉᑎᓐᓂᒃ ᐃᖢᐃᓪᓕᐅᕈᑎᖃᖅᑎᑦᓯᓂᐊᓚᐅᕐᒪᑦ ᐊᒻᒪ, ᑕᒡᕙᖓᑦ ᐊᕐᕕᐊᒥᐅᑕᓂᒡᓗ ᐃᖢᐃᓪᓕᐅᕈᑎᖃᕐᒥᓗᓂ,” ᐅᖃᓚᐅᖅᐳᖅ.

ᐅᖃᕈᓐᓇᖅᖢᖓᓗ, ᑕᐃᑉᓱᒪᓂ ᐊᕐᕕᐊᓂ ᒪᓕᒐᓕᐅᖅᑎᑦ ᑕᒪᕐᒥᒃ ᒥᓂᔅᑕᐅᑉᓗᑎᒃ, ᑕᐃᒪ...ᐃᓛ, ᑕᒡᕙᑐᐊᖅ ᑕᐃᒪᓐᓇ ᐃᓱᓕᑉᐳᖅ. ᓄᑖᒥᒃ ᓯᕗᓕᖅᑎᖃᓕᕋᑉᑕ ᐊᒻᒪ, ᑐᓴᖅᑎᑕᐅᓚᐅᖅᖢᖓᓗ, ᒥᓂᔅᑕᖑᕈᒪᔪᓂᒃ ᐱᑕᖃᕐᒪᑦ.

ᐊᔾᔨᐅᖏᓕᕐᒪᑦ ᓄᑖᖑᑉᓗᑎᒃ ᒪᓕᒐᓕᐅᖅᑎᑦ, ᓯᑕᒪᒋᔭᐅᔪᓂ ᒪᓕᒐᓕᐅᖅᑎᓂ, ᐃᓱᒥᑦ ᐃᓱᒫᓗᓗᐊᓚᐅᖏᒻᒪᑕ, ᑭᓯᐊᓂ ᑕᒡᕙᐅᓕᖅᑎᓪᓗᒍ, ᑲᒪᓇᕆᔭᖃᕐᒪᑕ ᑕᒪᕐᒥᒃ ᓯᕗᓕᖅᑎᓗ ᑕᒪᒃᑯᐊᓗ ᒥᓂᔅᑕᐅᔪᑦ.

ᒥᑭᖑᐊᒃ ᐅᖃᓚᐅᖅᐳᖅ ᑕᐃᒪᓐᓇ ᒪᓕᒐᓕᐅᖅᑎᐅᓯᒪᓕᖅᑐᑐᖃᐅᑉᓗᓂ ᑐᑭᓯᕚᓪᓕᕐᓂᖅᓴᐅᓕᕐᒪᑦ ᐊᔾᔨᒌᖏᑦᑐᓂᒃ ᐱᓕᕆᕕᖏᓐᓂᒃ ᒐᕙᒪᒃᑯᑦ ᖃᓗᕐᓗ ᐊᐅᓪᓛᖅᐸᖕᓂᖏᓐᓄᑦ ᒪᓕᒐᓕᐅᖅᑎᑦ.

ᐅᖃᓚᐅᖅᖢᓂᓗ ᖃᓄᑐᐃᓐᓇᖅ ᐃᓕᓐᓂᐊᕈᑎᖃᓚᐅᕐᒪᑦ ᓯᕗᓪᓕᕐᒥ ᒪᓕᒐᓕᐅᖅᑎᐅᑉᓗᓂ ᖃᒪᓂ'ᑐᐊᒧᑦ.

ᑕᒪᓐᓇ ᐃᓕᓐᓂᐊᕈᑎᒋᓚᐅᖅᑕᕋ ᓴᓐᖏᓂᕆᓕᖅᐸᕋ ᒫᓐᓇ, ᐅᖃᓚᐅᖅᐳᖅ.

ᑕᑯᓐᓇᕐᓗᓂ ᓯᕗᒻᒧᑦ, ᐱᑦᓯᐊᕐᓂᐊᕐᒪᑕ ᑕᒪᒃᑯᐊ ᒐᕙᒪᒃᑯᑦ ᓯᕗᒻᒧᒃᐸᓪᓕᐊᓂᐊᖅᖢᑎᒃ.”