ᒫᓐᓇᓕᓴᒥ ᐅᖃᓪᓚᖃᑎᖃᓚᐅᖅᐳᖓ ᓄᓇᕗᑦ ᐱᔪᓐᓇᕐᓂᖅᓴᐅᓇᔭᕐᓂᖓᓂ ᐅᓄᕐᓂᖅᓴᐅᔪᓂ ᐊᕐᓇᓂᑦ ᓂᕈᐊᖅᑕᐅᔪᖃᖃᑦᑕᖅᐸᑦ ᑲᑎᒪᔨᐅᓂᕐᒧᑦ.
ᓈᓚᓚᐅᖅᑎᓪᓗᖓ ᐊᒥᓱᐊᓗᖕᓂ ᐅᖃᓪᓚᖕᓂᐅᔪᓂ ᐅᓄᕐᓂᖅᓴᓂᒃ ᐊᕐᓇᓂᑦ ᑲᑎᒪᔨᙳᕐᓂᖏᓐᓂ ᓄᓇᕗᒻᒥ – ᐊᒻᒪ ᐃᖅᑲᐅᒪᓪᓗᖓ ᑕᐃᔅᓱᒪᓂ ᐊᔾᔨᐸᓗᖏᓐᓂ ᑎᑎᕋᖅᑕᐅᓯᒪᓂᐅᔪᓂ ᐃᓅᖃᑎᒌᖕᓄᑦ ᓯᐊᒻᒪᖅᑎᑦᑎᓂᐅᔪᓂ ᑭᖑᓪᓕᕐᒥ ᓂᕈᐊᕐᓂᐅᔪᒥ – ᐃᓗᐊᙱᓐᓂᐅᔪᖅ ᑎᑎᕋᖅᑎᐅᓪᓗᖓ ᓈᓐᓂᑦ ᐱᒋᐊᖅᐳᖅ ᐱᔾᔪᑎᖃᖅᑐᒥ ᐊᑕᐅᓯᕐᒥ ᒥᑭᑦᑐᑯᓗᖕᒥ ᐱᖓᓱᓂᒃ-ᐅᖃᐅᓯᕐᓂᑦ ᐊᐱᖅᑯᑕᐅᔪᒥᒃ ᐊᐅᓚᑦᑎᓯᒪᔪᒧᑦ ᑕᐅᓴᓐ-ᖏᓐᓂ ᑎᑎᕋᖅᑎᐅᕙᒃᑐᓂᑦ ᐃᒥᐊᓗᖃᑦᑕᕐᓂᕐᒧᑦ ᐊᕐᕌᒍᒐᓵᓗᖕᓂᑦ – ᖃᓄᐃᒻᒪᑦ? ᖃᓄᐃᒻᒪᑦ ᐊᕐᓇᓂᒃ ᑲᑎᒪᔨᑖᒃᑲᓐᓂᕆᐊᖃᖅᐱᑕ?
ᓯᕗᓪᓕᖅᐹᒥ ᐊᒻᒪ ᐱᒻᒪᕆᐅᓛᒥ ᐃᓄᑐᐃᓐᓇᐅᕗᒍᑦ.
ᒫᓐᓇ, ᑎᑎᕋᖅᑎᐅᓪᓗᖓ, ᐱᓗᐊᖅᑐᒥ ᓄᓇᓕᖕᓂ ᑐᓴᒐᒃᓴᓕᐊᖑᔪᒧᑦ ᐅᖃᓕᒫᒐᒃᓴᒧᑦ, ᐅᔾᔨᖅᓱᑦᑎᐊᕆᐊᖃᖅᐳᖓ ᐳᓪᓚᒃᓴᖅᓯᓂᕐᒧᑦ ᐊᒃᓴᓗᐊᓂᑦ ᑎᑎᕋᖅᓯᒪᓂᐅᔪᒥ ᑲᑎᒪᔨᑐᐃᓐᓇᐅᔪᒥ ᓂᕈᐊᕐᓇᐅᑎᓪᓗᒍ, ᐅᕝᕙᓘᓐᓃᑦ ᐳᓪᓚᐃᖅᓯᓂᕐᒧᑦ ᐅᖃᐅᓯᐅᔪᒧᑦ.
ᐊᒻᒪᓗ ᑕᒪᓐᓇ ᑲᒪᒋᔭᖃᕐᓂᐅᔪᖅ ᐅᕙᓐᓂᑦ ᐲᖅᑕᐅᒍᓂ, ᑕᑯᔪᒪᓇᔭᖅᑕᓕᒫᓐᓂᑦ ᐅᕙᓐᓂᑦ ᑕᐅᑐᙳᐊᕈᓐᓇᙱᓚᖓ ᖁᕝᕙᖅᓴᐃᓂᕐᒥ ᓈᒻᒪᒍᓱᒡᓗᖓᓘᓐᓃᑦ ᓂᕈᐊᒐᒃᓴᐅᔪᒥ ᓂᕈᐊᕐᓂᖓᓄᑦ ᑐᙵᕕᖃᖅᑐᒥ ᐊᖑᑕᐅᓂᖓᓂ ᐊᕐᓇᐅᓂᖓᓂᓘᓐᓃᑦ.
ᐅᕙᖓᓕ, ᐱᐅᖅᓴᖅᐳᖓᓕ ᑲᑎᒪᔨᐅᔪᓂᑦ ᓴᐱᓕᖅᓴᕋᐃᙱᑦᑑᓗᑎᒃ. ᑕᑯᖁᓲᕆᕙᒃᑲ ᐊᖏᔫᔪᒥ ᐊᔾᔨᒥᑦ. ᐊᒻᒪᓗ ᐱᐅᒋᕙᕋ ᐃᓱᒫᓗᓗᐊᙱᑎᓪᓗᒋᑦ ᐃᓄᖕᓂ ᑕᑯᔭᐅᒍᑎᒃ ᐊᒃᓱᕈᒃᑲᐅᓂᖏᓐᓂ ᐱᓇᓱᐊᖅᑎᓪᓗᒋᑦ ᑭᓱᑐᐃᓐᓇᒥᒃ ᐅᒃᐱᕆᓪᓚᕆᒃᑕᒥᓂᑦ, ᐊᑭᕋᖅᑐᕐᓗᑎᒡᓘᓐᓃᑦ ᑕᑯᔭᒥᓂᑦ ᓱᔪᐃᔪᓐᓇᕐᓂᖓᓂ ᓂᕈᐊᖅᑎᖏᓐᓄᑦ.
ᑲᑎᒪᔨᐅᓂᐊᖅᑐᓂ ᑐᓂᙵ ᑕᐃᒪᐃᑦᑐᒥ ᓴᓇᓯᒪᔪᒥ, ᐊᒻᒪᓗ ᓱᖁᑎᒃᓴᙱᓚᖓ ᐊᖑᑕᐅᓂᖓᓂ ᐊᕐᓴᐅᓂᖓᓂ ᐊᐃᑉᐸᕇᖕᓂᕐᒧᓪᓗ ᐱᐅᒋᓂᖅᓴᐅᔭᒥᓂᑦ, ᑕᐅᕘᓈᕈᒪᒍᕕᑦ.
ᖃᐅᔨᒃᑲᓐᓂᕈᒪᕗᖓ ᓂᕈᐊᖅᑕᐅᓯᒪᔪᒧᑦ ᑲᑎᒪᔨᐅᔪᒧᑦ ᐅᓇᑐᐃᓐᓇᐅᙱᑦᑐᖅ ᐊᖑᑕᐅᓂᖓᓄᑦ ᐊᕐᓇᐅᓂᖓᓄᑦ, ᑕᑯᓯᒪᒐᒪ ᑲᑎᒪᔨᑦᑎᐊᕙᐅᙱᑦᑐᐊᓗᖕᓂ – ᑕᒪᕐᒥᑦ ᐊᖑᑎᑦ ᐊᒻᒪ ᐊᕐᓇᐃᑦ.
ᓄᓇᕗᒻᒦᓯᒪᓪᓗᖓ ᐱᒋᐊᕐᓂᖓᓂ, ᑕᑯᓯᒪᕗᖓ ᐊᖑᑎᓂᑦ ᓂᕈᐊᖅᑕᐅᔪᓄᑦ ᑲᑎᒪᔨᐅᓂᕐᒧᑦ ᐊᕐᕌᒍᓂ ᑕᐅᓴᓐᓂ ᓂᕈᐊᕋᔭᓚᐅᙱᑕᓐᓂᑦ, ᐊᒻᒪ ᖁᙱᐊᖅᓯᒪᕗᖓ ᐊᕐᓇᓂᒃ ᓄᑲᕇᖕᓂᑦ ᓂᕈᐊᖅᑕᐅᔪᓄᑦ ᐊᔾᔨᒌᙱᑦᑐᓄᑦ ᑭᒡᓕᐅᔪᓄᑦ ᐊᐅᓚᑦᑎᓂᐅᔪᓄᑦ ᐅᒡᒍᐊᖅᓯᒪᓪᓚᕆᒃᑕᓐᓂ ᓂᕈᐊᕈᓐᓇᓚᐅᙱᓐᓂᓐᓂᑦ.
ᐊᒻᒪᓗ, ᐅᖃᐅᓯᖃᑦᑎᐊᓚᐅᑲᒍᓐᓇᕈᒪ, ᒪᕐᕉᖕᓂ ᐊᖑᑎᓂᑦ ᑲᑎᒪᔨᐅᔪᓂᑦ ᓱᕋᐃᓯᒪᓂᖏᓐᓂ ᑲᑎᒪᔨᐅᓂᕐᒧᑦ ᐆᒻᒪᑎᓐᓂᑦ ᓄᓇᕗᒻᒥ; ᐊᑕᐅᓯᖅ ᓱᓕ ᐅᒃᐱᕈᓱᒃᐳᖓ ᓄᓇᕘᑉ ᓯᕗᓪᓕᖅᐹᖓᓂ ᓯᕗᓕᖅᑎᒋᓚᐅᖅᑕᖓ ᓱᓕ ᐱᐅᓛᖑᓂᖓᓂ, ᐊᒻᒪᓗ ᒪᕐᕈᖓ, ᐃᓅᔪᖅ ᐅᒃᐱᕆᑦᑎᐊᓚᐅᖅᑕᕋ ᑎᑭᐅᑎᓕᒑᓚᐅᙱᑦᑐᒥ ᖁᑦᑎᖕᓂᐅᔪᓄᑦ ᑕᐅᑐᙳᐊᓚᐅᖅᑕᓐᓂᑦ. ᐊᓕᐊᓇᐃᒍᓱᒃᐳᖓ ᒪᕐᕈᖓᓂ ᐱᕕᒃᓴᖃᖅᑎᑕᐅᓂᖓᓂ.
ᓂᕈᐊᖅᓯᓂᕐᒥ ᐃᓄᖕᒥ ᐊᕐᓇᐅᓂᖓᑐᐃᓐᓇᖅ ᐊᖑᑕᐅᑎᓂᖓᓐᓘᓐᓃᑦ, ᕼᐋᑭᖅᑎᐅᔪᒥᓪᓘᓐᓃᑦ ᐱᓕᕆᓂᐅᕗᖅ ᐊᒃᓱᕈᖅᑎᕐᔪᐊᖑᓂᕐᒥ, ᐃᓱᒪᖃᑦᑎᐊᙱᑦᑐᒥ ᐊᕿᑦᑐᖓᔪᒥᓪᓘᓐᓃᑦ.