Skip to content

ᓄᓇᑦᓯᐊᕐᒥ ᒐᕙᒪᒃᑯᑦ ᐅᒥᐊᕐᔪᐊᖓᓂ ᑕᒻᒪᕐᓂᐅᔪᖅ ᐊᑲᐅᙱᓕᐅᕈᑎᖃᖅᐳᖅ ᕿᑎᕐᒥᐅᓄᑦ

ᓇᒡᓕᖕᓇᐅᒐᓗᐊᑦ ᕿᑎᕐᒥᐅᓂ ᐃᓄᖁᑎᖏᑦ ᓇᖕᒥᓂᖅ ᑮᓇᐅᔭᒥᓂᑦ ᐊᑐᕆᐊᖃᕐᓂᖏᓐᓂ ᓄᓇᑦᓯᐊᕐᒥ ᒐᕙᒪᒃᑯᑦ ᑕᕆᐅᒃᑯᑦ ᐅᓯᑲᑦᑕᕐᓂᕐᒧᑦ ᐱᔨᑦᑎᕋᖅᑎᐅᔪᑦ ᐅᒥᐊᕐᔪᐊᖏᑦ ᑎᑭᐅᑎᔪᓐᓇᓚᐅᙱᓐᓂᖓᓐᓄᑦ ᐅᐸᒐᓱᐊᖅᑕᒥᓄᑦ.
ᐅᒥᐊᕐᔪᐊᑦ – ᐅᓯᔪᓄᑦ $3 ᒥᓕᐊᓐ ᐅᖓᑖᓂ ᐱᖁᑎᓂᑦ – ᑭᖑᕙᓗᐊᖅᖢᑎᒃ ᐊᐅᓪᓚᓚᐅᖅᐳᑦ ᓯᑯᖓ ᐃᔾᔪᓗᐊᓕᖅᑎᓪᓗᒍ ᐊᒻᒪ ᑭᓱᓕᒫᑦᑎᐊᓂ ᕿᒪᐃᔭᕆᐊᖃᓚᐅᖅᐳᑦ ᐃᓅᕕᖕᒥ, ᐸᕐᓇᐅᑎᓕᐅᖅᖢᑎᒃ ᐅᓯᔭᐅᓛᕐᓂᖏᓐᓂ ᐊᕐᕌᒍᒃᑲᓐᓂᕐᒥ.
ᐅᒥᐊᕐᔪᐊᖅ ᑎᑭᓪᓗᐊᓚᐅᖅᐳᖅ ᓯᑎᐱᕆᐅᑉ ᓄᙳᐊᓂ, ᐊᒻᒪ ᐅᓯᔭᓕᒫᖏᓐᓂ ᐊᑐᖅᑕᐅᒐᔪᒃᑐᓂ ᐱᔭᕆᐊᖃᕐᓂᐅᔪᓄᑦ – ᐅᖅᓱᐊᓗᒃ, ᓱᕋᑦᑎᔭᙱᑦᑐᑦ ᓂᖀᑦ, ᓇᖕᒥᓂᒃᓴᕆᔭᐅᔪᑦ, ᐃᒡᓗᓕᐊᒃᓴᒧᑦ ᓱᓇᒃᑯᑖᖏᑦ, ᐊᒻᒪ ᓄᓇᓯᐅᑎᑦ – ᐱᒻᒪᕆᐅᕗᑦ ᐊᐅᓚᓂᖓᓄᑦ ᐅᑭᐅᖅᑕᑦᑐᒥ ᓄᓇᖁᑎᑦᑎᓐᓄᑦ.
ᓄᓇᑦᓯᐊᕐᒥ ᒐᕙᒪᒃᑯᑦ ᐊᑐᕐᓂᐊᖅᐳᑦ $1.75 ᒥᓕᐊᓐᓂ ᐱᔭᕇᖅᓯᓂᕐᒧᑦ ᐱᔭᕆᐊᖃᖅᑐᒥ. ᐅᕝᕙᓘᓐᓃᑦ ᑕᒪᕐᒥᒐᓚᖕᓄᑦ ᐱᔭᕆᐊᖃᖅᑐᒧᑦ.
ᑎᑭᐅᑎᔪᒧᑦ 100−ᓄᑦ ᖃᖓᑕᓂᐅᔪᓂᑦ, ᓇᑉᐸᐅᑉ ᐅᖓᑖᓂ ᐅᓯᓂᐊᖅᐳᑦ ᐅᖅᓱᐊᓗᖕᒥ ᐹᓚᑕᒃ, ᓄᓇᑦᓯᐊᕐᒧᑦ, ᓈᒻᒪᔾᔮᙱᑦᑐᒥ ᐅᑭᐅᖑᔪᒧᑦ.
ᓂᖀᑦ ᐊᒻᒪ ᓇᖕᒥᓂᒃᓴᖏᓐᓂ ᒪᓕᖕᓂᐊᖅᐳᑦ, ᐊᒻᒪ ᐃᒻᒪᖄ ᐃᒡᓗᒃᓴᒧᑦ ᓱᓇᒃᑯᑖᓂ, ᒪᓕᒃᑐᒥ ᖃᓄᑎᒋ ᐱᒻᒪᕆᐅᓂᖏᓐᓂ.
ᓄᓇᓯᐅᑏᑦ ᐊᒻᒪ ᐅᖁᒪᐃᑦᑐᓄᑦ ᐱᓕᕆᔾᔪᑎᓂᑦ ᓄᓇᓯᐅᑎᑦ ᖃᖓᑕᓲᒃᑰᖅᑎᑕᐅᔾᔮᙱᓚᑦ ᑕᒪᑐᒪᓂ ᐊᕐᕌᒎᔪᒥ.
ᓄᓇᑦᓯᐊᕐᒥ ᒐᕙᒪᒃᑯᑦ ᐅᖃᐃᓐᓇᖅᐳᑦ ᖃᖓᑕᓲᒃᑰᖅᑎᑦᑎᔭᕆᐊᖃᓪᓗᐊᙱᓐᓂᖓᓐᓂ ᑭᓱᑐᐃᓐᓇᒧᑦ ᑭᓯᐊᓂ ᓈᒻᒪᒋᙱᓚᒍᑦ. ᐃᓄᖏᑦ ᕿᑎᕐᒥᐅᓄᑦ ᑕᐃᒪᓐᓇ ᐃᓱᒪᒋᕗᑦ.
ᐃᓱᒪᓂᐅᔪᖅ ᓄᓇᑦᓯᐊᕐᒥ ᒐᕙᒪᒃᑯᑦ ᓴᐳᔾᔭᐅᓯᒪᓚᐅᖅᐳᑦ ᑕᐃᒪᐃᒐᔪᒃᑐᒥ ᑐᓂᔭᐅᓯᒪᓂᐅᔪᒥ ᐅᓯᔭᐅᓂᖓᓄᑦ ᑎᑭᐅᑎᓂᖓᓄᑦ – ᐅᓯᔭᐅᔪᑦ ᑎᑭᙱᒃᑯᑎᒃ, ᑎᑭᓐᓂᐊᖅᐳᑦ ᐅᐊᑦᑎᐊᕈᒃᑲᓐᓂᖅ – ᓈᒻᒪᙱᓚᖅ ᐃᓱᒪᒋᓪᓗᒍ ᐅᑯᐊ ᐱᖁᑏᑦ ᑎᑭᓐᓂᐊᕐᓂᖏᓐᓂ ᐊᕐᕌᒍᒃᑲᓐᓂᕐᓂᐅᔪᒥ.
ᓈᒻᒪᒍᓱᒃᑐᐃᓇᐅᓲᖑᕗᒍᑦ ᐃᓱᒪᓂᐅᔪᒥ ᐅᑕᖅᑭᓂᕐᒧᑦ ᖃᖓᑕᓲᒃᑲᓐᓂᖃᕐᓂᐅᓂᐊᖅᑐᒧᑦ ᐊᓐᓄᕌᒃᑯᕕᑦᑎᓐᓂ ᑎᑭᓐᓂᐊᕐᓂᖓᓄᑦ – ᖃᖓᑕᓲᒃᑲᓐᓂᖃᕐᓂᐊᕐᓂᖓ ᖃᐅᒃᐸᐅᒍᓂ ᐱᓇᓱᐊᕈᓯᐅᓂᐊᖅᑐᒥᓪᓘᓐᓃᑦ.
ᑭᓯᐊᓂ ᐊᕐᕌᒍᒃᑲᓐᓂᕐᓂᐅᓂᐊᖅᑐᒥ? ᐊᒻ, ᐋᒃᑲ.
ᐅᖅᑰᓴᐅᒻᒥ ᐅᖅᓱᐊᓗᖕᒥ ᓇᒃᓯᐅᔾᔨᔪᓐᓇᙱᓚᑎᑦ ᐊᕐᕌᒎᓂᐊᖅᑐᒥ ᐊᒻᒪ ᐃᓕᓯᓗᓂ ᓄᓇᖃᖅᑎᐅᔪᓄᑦ ᐅᓗᕆᐊᓇᕐᓂᐅᔪᒥ ᕿᕿᓐᓂᕐᒧᑦ ᑐᖁᓗᓂ.
ᓂᕿᓂᑦ ᓇᒃᓯᐅᔾᔨᔪᓐᓇᙱᓚᑎᑦ ᐊᕐᕌᒎᓂᐊᖅᑐᒥ ᐊᒻᒪ ᖄᖏᐅᑎᑎᓪᓗᒍ ᐱᐅᓂᖅᐹᕆᔭᖓᓄᑦ ᐅᓪᓗᖓᓂ ᓂᕆᐅᖑᔮᕐᔪᒡᓗᑎᑦ ᓄᓇᖃᖅᑎᐅᔪᓂ ᑮᓇᐅᔭᖏᓐᓂ ᐊᑐᖅᑕᒃᓴᒥᓂᑦ ᐊᑐᙱᓐᓂᖅᓴᐅᓂᖓᓐᓄᑦ.
ᕿᒪᐃᔭᕆᐊᖃᙱᑦᑐᑎᑦ ᓄᓇᓕᖕᓂ ᐱᕈᖅᐸᓪᓕᐊᔪᒥ ᓄᓇᕘᔪᒥ ᐃᒡᓗᒃᓴᒧᑦ ᓱᓇᒃᑯᑖᖏᓐᓂ ᐋᖅᑭᒃᓯᓂᕐᒧᑦ ᐱᑕᖄᓂᒃᑐᓄᑦ ᐊᖏᕐᕋᕆᔭᐅᔪᓄᑦ ᐅᕝᕙᓘᓐᓃᑦ ᓴᓇᓂᕐᒧᑦ ᓄᑖᖑᔪᓂᑦ.
ᐱᔨᑦᑎᕋᕐᓂᕐᒧᑦ ᑐᓂᓯᔨᐅᔪᒥ ᑭᓇᑐᐃᓐᓇᒥ ᐅᑕᖅᑭᑎᑦᑎᓇᔭᙱᓚᖅ ᑕᐃᒪᓐᓇ ᐊᑯᓂᐅᑎᒋᔪᐊᓗᖕᒥ ᐊᑲᐅᒃᓴᙱᑦᑐᖃᙱᓪᓗᓂ.
ᑕᕆᐅᒃᑯᑦ ᐅᓯᑲᑦᑕᕐᓂᕐᒧᑦ ᐱᔨᑦᑎᕋᖅᑎᐅᔪᑦ ᑲᓇᑕᐅᑉ ᒐᕙᖏᖏᑕ ᑎᒥᖁᑕᐅᓐᓂᕈᓂ– ᑕᐃᒪᐃᑦᑑᙱᑦᑐᖅ (ᓱᓕ) – ᐅᕝᕙᓘᓐᓃᑦ ᓇᖕᒥᓂᕆᔭᐅᓗᓂ ᑲᒻᐸᓂᐅᓗᓂ, ᓇᓪᓕᐅᒃᑯᒫᑦ ᐊᑐᓕᕋᔭᖅᐳᖅ ᐊᒻᒪ ᓂᕆᐅᖕᓂᖃᕋᔭᖅᐳᑦ ᐃᓄᐃᑦ ᐊᓯᐅᔨᔪᓄᑦ ᐃᓗᐃᑦᑐᙳᖅᑎᑕᐅᓂᖓᓂ. ᓇᓪᓕᐅᒃᑯᒫᒥ ᐊᑭᓕᖅᑕᐅᓂᐅᙱᑦᑐᒥ, ᐅᕙᓂ ᖃᓄᐃᓐᓂᐅᔪᒥ ᑮᓇᐅᔭᑦ ᐃᓄᓕᒫᓂᙶᕆᐊᖃᖅᐳᑦ.
ᐊᐃᑦᑖᖑᒐᓗᐊᖅ, ᑕᐃᒃᑯᐊᖑᐃᓐᓇᐅᔭᖅᐳᑦ ᐊᓯᐅᔨᓂᐅᔪᓄᑦ. ᐅᕙᓂ ᖃᓄᐃᓐᓂᐅᔪᒥ, ᑖᒃᓯᓂᑦ ᐊᑭᓖᓂᑐᐃᓐᓇᐅᙱᑦᑐᑦ ᑭᓯᐊᓂᑦᑕᐅᖅ ᐃᓄᑐᐃᓐᓇᐃᑦ ᐊᒻᒪ ᓇᖕᒥᓂᖃᖅᑏᑦ ᕿᑎᕐᒥᐅᓂ ᐱᔾᔮᙱᑦᑐᓂ ᓱᓇᒃᑯᑖᓂᑦ ᐊᒻᒪ ᓄᓇᓯᐅᑎᓂᑦ ᓂᕆᐅᒋᓚᐅᖅᑕᒥᓂᑦ ᐊᑐᕐᓂᐊᕋᓱᒋᓐᓈᓪᓗᑎᒃ ᐋᖅᑭᒃᓱᐃᓂᕐᒧᑦ ᐊᖏᕐᕋᒥᓂᑦ, ᐊᒻᒪ ᐊᐅᓚᑦᑎᓗᑎᒃ ᐊᒻᒪ ᐱᕈᖅᓴᐃᓗᑎᒃ ᓇᖕᒥᓂᕆᔭᒥᓂᑦ.
ᑕᒪᓐᓇ ᑐᑭᖃᖅᐳᖅ ᐊᕐᕌᒍᒥ ᓄᖅᑲᖓᓂᐅᔪᒥ ᐊᒥᓱᓄᑦ ᐊᕕᒃᓯᒪᓂᐅᔪᒥ ᑕᒪᕐᒥᓕᒫᑦ ᑮᓇᐅᔭᓂ ᐊᑐᕐᓂᖃᕐᓂᖓᓂ.
ᓄᓇᑦᓯᐊᕐᒥ ᒐᕙᒪᒃᑯᓐᓄᑦ ᒪᓕᒐᓕᐅᖅᑎ ᕼᐆᑉ ᓇᑭᒪᔭᒃ ᐊᑐᖁᔨᓇᔭᖅᐳᖅ ᐃᒻᒪᖄ ᑐᓂᓯᓂᕐᒥ ᓄᑖᖑᔪᒥ ᐃᓅᕕᖕᒥ-ᑕᓗᕐᔪᐊᒧᑦ ᐊᖅᑯᑎᐊᓗᖓᓂᑦ ᐃᓚᐅᖃᑕᐅᓂᖓᓂ ᐋᖅᑭᒃᓱᐃᕕᐅᓂᐊᕐᓗᓂ ᐃᓂᐅᓗᓂ ᕿᒪᒡᓗᒋᑦ ᐱᖁᑎᓂᑦ ᐅᒥᐊᕐᔪᐊᕐᒧᐊᖅᑕᐅᓚᐅᖅᑳ?ᑎᒃ, ᐊᒻᒪ ᐃᓱᒪᓂᑦᑎᐊᕙᐅᕗᖅ.
ᑕᒪᓐᓇ ᑕᕆᐅᒃᑯᑦ ᐅᓯᑲᑦᑕᕐᓂᕐᒧᑦ ᐱᔨᑦᑎᕋᖅᑎᐅᔪᓄᑦ ᒪᕐᕈᖓᓂ ᐊᕐᕌᒍᒥ ᐱᓕᕆᓂᕆᕙᖓ ᐊᐅᓚᑦᑎᓂᕐᒧᑦ ᐱᓕᕆᐊᖑᔪᒥ, ᐊᒻᒪ ᐱᓕᕆᓂᖃᕆᐊᖃᖅᐳᖅ ᑕᑯᒃᓴᐅᑎᑦᑎᓂᕐᒧᑦ ᐃᒪᐃᓐᓂᕋᕐᓂᖓᓂ "ᐱᔪᓐᓇᑦᑎᐊᕐᓇᑎᒃ ᐊᐅᓚᑦᑎᔨᐅᙱᓐᓂᖓᓐᓂ.” ᑕᐃᒪᐃᒃᑲᓐᓂᑐᐊᖅᐸᑦ ᒪᓕᒃᑐᓄᑦ ᐊᕐᕌᒍᓄᑦ ᖃᔅᓯᐊᕐᔪᖕᓄᑦ, ᒐᕙᒪᒃᑯᑦ ᑕᑯᒃᓴᐅᑎᑦᑎᓂᖃᕐᓂᐊᖅᐳᑦ ᐱᔪᓐᓇᙱᓐᓂᖓᓂ ᑐᓂᓯᓂᕐᒧᑦ, ᐊᒻᒪ ᐅᒃᐱᕈᓱᖕᓂᐅᔪᒥ ᐱᓕᕆᔾᔪᓯᐅᔪᒥ ᐊᔪᕐᓇᕐᔪᐊᖅᓂᐊᖅᐳᖅ ᐅᑎᖅᑎᓐᓇᓱᐊᕐᓂᕐᒧᑦ.