ᐊᕐᕌᒍᑦ 170 ᐊᓂᒍᖅᓯᒪᓕᖅᑐᓂ ᕗᕌᖕᒃᓕᓐ ᐃᖏᕐᕋᓂᐅᓚᐅᖅᑐᒥ ᐅᒥᐊᕐᔪᐊᖓᑦ HMS Erebus ᐊᒻᒪ Terror ᑭᕕᓚᐅᖅᑎᓪᓗᒋᑦ, ᐃᑦᑕᕐᓂᓴᐃᑦ ᓇᓂᔭᐅᔪᓂ ᐅᑭᐅᖅᑕᖅᑐᒥ ᑕᕆᐅᖓᑦᑕ ᓇᖅᑲᖓᓂ ᐅᑎᖅᑎᑕᐅᓯᒪᕗᑦ ᐊᒻᒪ ᑕᑯᒃᓴᐅᑎᑕᐅᓚᐅᑲᒃᖢᑎᒃ ᕿᑎᕐᒥᐅᑕᐅᔪᓄᑦ.
9−ᖑᔪᓂ ᐱᖁᑎᓂᑦ ᐱᔭᐅᓚᐅᖅᐳᑦ ᑕᒪᑐᒪᓂ ᐊᐅᔭᐅᔪᒥ ᐱᓂᕐᓗᖕᓂᑰᔪᒥ 1845−ᒥ ᐊᐅᓪᓛᕐᓂᐅᔪᒥ ᐳᕆᑎᓐᒥᐅᑕᒧᑦ ᕿᓂᖅᑎᐅᔪᒧᑦ ᓲᕐ ᔮᓐ ᕗᕌᖕᒃᓕᓐᒧᑦ ᑕᑯᒃᓴᐅᑎᑕᐅᓚᐅᖅᐳᑦ ᐅᖅᓱᖅᑑᒥ ᐊᒻᒪ ᐃᖃᓗᒃᑑᑦᑎᐊᒥ ᓯᑎᐱᕆᒥ. ᐃᓚᒋᔭᐅᔪᓂ ᐃᑦᑕᕐᓂᓴᐅᔪᓂ ᒪᕋᕐᒥ ᓴᓇᓯᒪᔪᒥ ᐃᒪᖃᐅᑎᒥ ᐊᒻᒪ ᑲᓐᓄᔭᖅ ᓴᕕᕋᔭᐅᓪᓗᓂ ᐅᒥᐊᕐᔪᐊᓄᑦ ᐱᓕᕆᔾᔪᑕᐅᔪᖅ ᖃᐅᔨᒪᔭᐅᓪᓗᓂ ᓯᓚᒧᑦ ᕿᓚᙳᐊᖓᓂ, ᑕᒪᒃᑭᑦ ᓇᓂᔭᐅᓪᓗᑎᒃ ᐱᓕᕆᔨᐅᔫᑉ ᐃᒡᓗᕈᓯᖓᓐᓂ ᐊᑦᑎᖕᓂᖅᓴᐅᔪᒥ ᓇᑎᖓᓐᓂ Erebus−ᒥ. ᓄᓱᒋᐊᓕᖕᓂ ᐊᒃᓴᓗᐊᓕᖕᓂ, ᑭᑭᐊᖕᒥ, ᑲᑭᖅᑯᐊᕈᑎᒥ ᐊᒻᒪ ᐊᐅᓚᑦᑎᔾᔪᑕᐅᔪᓄᑦ ᐅᒥᐊᕐᔪᐊᑉ ᐊᒃᖢᓈᖏᓐᓂᑦ ᖁᓛᓂ ᓇᑎᖓᓐᓂ ᐱᔭᐅᓚᐅᕆᕗᑦ.
ᐅᖅᓱᖅᑑᕐᒥᐅᑕᖅ ᓵᒥ ᑯᒡᕕᒃ ᐃᓅᖃᑕᐅᓚᐅᖅᐳᖅ ᕿᒥᕐᕈᓚᐅᖅᑐᒥ Erebus ᐃᑦᑕᕐᓂᓴᐅᔪᓂ ᑕᑯᒃᓴᐅᑎᑕᐅᔪᓂ.
“ᖁᕕᐊᓇᖅᑐᒻᒪᕆᐅᕗᖅ ᐅᕙᓐᓄᑦ. ᑕᑯᓚᐅᖅᐳᖓ ᑭᓱᕈᓘᔭᓂ ᑕᑯᓚᐅᖅᓯᒪᙱᑦᑎᐊᖅᑕᓐᓂ,” ᐅᖃᓚᐅᖅᐳᖅ.
ᑯᒡᕕᒃ ᓂᕆᐅᒃᐳᖅ ᖃᖓᑐᐃᓐᓇᖅ ᑕᑯᒃᑲᓐᓂᓛᕐᓂᖓᓂ ᑎᖏᕐᕋᐅᑎᐅᑉ ᓇᑉᐸᖅᑯᑎᖏᓐᓂᑦ Terror−ᒧᑦ. ᐊᒃᑐᓚᐅᖅᓯᒪᔭᖓ ᖁᑦᑎᖕᓂᖅᓴᐅᔪᒥ ᐃᓚᖓᓐᓂ Terror ᑎᖏᕐᕋᐅᑎᐅᑉ ᓇᑉᐸᖅᑯᑎᖏᓐᓂᑦ ᑎᑭᐅᑎᖕᒪᒍ ᐅᖅᓱᖅᑑᑉ ᕿᑭᖅᑕᖓᑕ ᖃᓂᒋᔭᖓᓐᓂ, ᖃᔅᓯᒐᓚᖕᓂ ᐊᕐᕌᒍᓂ ᐅᒥᐊᕐᔪᐊᑉ ᓱᕋᑦᑎᓯᒪᓂᐅᔪᖅ ᖃᐅᔨᔭᐅᓚᐅᖅᑳᕐᓇᓂ ᖃᐅᔨᓴᖅᑎᐅᔪᓄᑦ.
“ᑕᑯᒃᑲᓐᓂᕈᒪᓇᔭᑦᑎᐊᖅᑕᕋ,” ᐅᖃᓚᐅᖅᐳᖅ.
ᒫᓐᓇᓕᓴᒥ ᐅᑎᖅᑎᑕᐅᔪᑦ ᐱᖁᑎᑦ Erebus−ᒥ ᑕᒪᕐᒥᒃ ᑲᑐᔾᔭᐅᔾᓗᑎᒃ ᓇᖕᒥᓂᕆᔭᐅᕗᑦ ᐃᓄᐃᑦ ᐱᖁᑎᖏᓐᓂ ᓇᐅᑦᑎᖅᓱᖅᑎᓂᑦ ᐊᒻᒪ ᑲᓇᑕᒥ ᒐᕙᒪᒃᑯᓐᓄᑦ.
ᕿᓚᒻᒥᐅᓂᐊᖅᑐᒥ, ᐃᑦᑕᕐᓂᓴᐃᑦ ᓇᒃᓯᐅᔾᔭᐅᓂᐊᖅᐳᑦ ᖃᓪᓗᓈᑦ ᓄᓇᖓᓐᓄᑦ ᑲᓇᑕᒥ ᒥᕐᙳᐃᖅᓯᕐᕕᖓᑕ ᖃᐅᔨᓴᕐᕕᖓᓄᑦ ᖃᐅᔨᓴᖅᑕᐅᓂᕐᒧᑦ ᐊᒻᒪ ᐸᐸᑕᐅᑦᑎᐊᒃᑲᓂᕐᓂᕐᒧᑦ ᐱᔾᔪᑕᐅᔪᒧᑦ. ᐃᓄᐃᑦ ᐱᖁᑎᖏᓐᓂ ᓇᐅᑦᑎᖅᓱᖅᑎᖏᑦ ᐊᒻᒪ ᑲᓇᑕᒥ ᒥᕐᙳᐃᖅᓯᕐᕕᖓᑦ ᐋᔩᖃᑎᒌᒃᐳᑦ ᐊᑯᓂᐅᔪᒃᑯᑦ ᐃᓂᒃᓴᖓᓂ ᐱᖁᑕᐅᔪᓄᑦ.
65−ᓂ ᐃᑦᑕᕐᓂᓴᓂᑦ ᓯᕗᓂᐊᓂ ᐱᔭᐅᓂᑯᓂ ᐱᒋᔭᐅᕗᑦ ᐳᕆᑎᓐᒥ ᒐᕙᒪᐅᔪᓄᑦ, ᑐᓂᕐᕈᑎᖃᖅᓯᒪᔪᓂ ᐊᒥᐊᒃᑯᖏᓐᓂ ᑲᓇᑕᒧᑦ.
ᑕᐅᓯᓐ−ᖏᓐᓂ ᐱᖁᑎᓂᑦ, ᐃᓚᖃᖅᑐᒥ ᑎᑎᕋᖅᓯᒪᔪᓂ ᑎᑎᖅᑲᖁᑕᐅᔪᓂ, ᓱᓕ ᐃᓗᐊᓃᑉᐳᑦ ᒪᕐᕉᖕᓂ ᐅᒥᐊᕐᔪᐊᓂᑦ ᓱᕋᑦᑎᓯᒪᔪᓂ, ᑲᓇᑕᒥ ᒥᕐᙳᐃᖅᓯᕐᕕᖓᑕ ᖃᐅᔨᒪᔨᕐᔪᐊᖑᔪᓄᑦ ᓇᓚᐅᑦᑖᕆᕗᑦ.
ᐊᖅᑲᐅᒪᔨᐅᔪᑦ ᑕᑯᓯᒪᙱᓚᑦ ᓴᐅᓃᓐᓇᓂ ᐅᒥᐊᕐᔪᐊᕐᒥᐅᑕᐅᓚᐅᖅᑐᓄᑦ ᐊᒻᒪ ᓱᓕ ᐊᑐᐃᓐᓇᖃᖅᓯᒪᙱᓚᑦ ᕗᕌᖕᒃᓕᓐ ᐃᒡᓗᕈᓯᒋᓚᐅᖅᑕᖓᓂ, ᐅᖃᐅᓯᐅᓪᓗᓂ ᐃᓚᒋᔭᐅᔪᓂ ᑲᓇᑕᒥ ᒥᕐᙳᐃᖅᓯᕐᕕᖓᑦᑕ ᐊᖅᑲᐅᒪᔨᐅᔪᓄᑦ.
ᕿᓂᒃᑲᓐᓂᕐᓂᐅᔪᒥ Erebus−ᒥ ᐊᒻᒪᓗ Terror−ᒥ ᐱᓕᕆᐊᖑᒃᑲᓐᓂᕐᓂᐊᖅᐳᖅ ᐊᐅᔭᐅᒃᑲᓐᓂᐅᓛᖅᑐᒥ.
ᑕᒪᓐᓇ ᓇᓗᓇᐃᖅᓯᓯᒪᕗᖅ ᓯᕗᓪᓕᖅᐹᒥ ᐊᐅᔭᓗᒃᑖᒥ ᐃᓄᐃᑦ ᓇᐅᑦᑎᖅᓱᖅᑎᐅᔪᑦ ᐱᓕᕆᐊᖑᔪᒥ, ᐃᖅᑲᓇᐃᔭᖅᑎᑦᑎᓪᓗᑎᒃ ᐅᖅᓱᖅᑑᕐᒥᐅᑕᓂᑦ, ᓇᐅᑦᑎᖅᓱᖅᖢᑎᒃ Erebus ᐊᒻᒪ Terror−ᒥ ᓱᕋᑦᑎᓂᐅᓚᐅᖅᑐᒥ ᐃᓂᐅᔪᓂᑦ.
ᓱᕋᑦᑎᓯᒪᓂᐅᔫᑉ Erebus−ᒥ ᓇᓂᔭᐅᓚᐅᖅᐳᖅ 2014−ᒥ. Terror, ᑯᒡᕕᐅᑉ ᐱᒻᒪᕆᐅᔪᒥ ᑐᓴᒐᒃᓴᓕᐊᒥᓂᑦ, ᓇᓂᔭᐅᓚᐅᖅᐳᖅ 2016−ᒥ. ᑕᒪᕐᒥᒃ 129−ᖑᔪᑦ ᐅᒥᐊᕐᔪᐊᕐᒥᐅᑕᑦ ᐱᓕᕆᔨᖏᑦ ᐃᑭᒪᔪᓄᑦ ᑕᒪᒃᑭᓂ ᐅᒥᐊᕐᔪᐊᓂᑦ ᑐᖁᓚᐅᖅᓯᒪᕗᑦ – ᐃᓚᖏᑦ ᕿᓚᒻᒥᐅᔪᒥ, ᐊᓯᖏᑦ ᐊᕐᕌᒍᒐᓴᓄᑦ – ᐊᔪᖅᓯᓯᒪᓚᐅᖅᑎᓪᓗᒋᑦ ᐅᑭᐅᖅᑕᖅᑐᒥ ᓯᑯᖓᓐᓂ.
