Skip to content

ᓄᓇᕗᑦ ᐲᖅᓯᕗᑦ ᐃᓚᖏᓐᓂ ᓄᕙᒡᔪᐊᕐᓇᖅ-19–ᒧᑦ ᑭᒡᓕᖃᖅᑎᑕᐅᓂᐅᔪᓂ

ᓄᓇᕗᒻᒥ ᒐᕙᒪᒃᑯᑦ ᖃᓱᒋᐊᖅᑎᑦᑎᓕᖅᐳᑦ ᐊᒥᓱᓄᑦ ᖃᓂᒻᒪᓐᓇᐅᔪᒥ-ᐱᔾᔪᑎᓕᖕᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓂ ᐃᓕᓯᒪᔪᓂ ᑕᐃᒪᙵᓂ ᒫᔾᔨᒥ. ᐱᒋᐊᕐᓗᓂ ᐅᓪᓗᒥ, ᐸᐃᕆᕝᕖᑦ ᐊᒻᒪ ᓯᓚᒥ ᐱᙳᐊᕐᕕᐅᔪᓂ ᒪᑐᐃᖓᓕᖅᐳᑦ ᐊᒻᒪ ᓯᓚᒥ ᑲᑎᓐᓂᐅᔪᓂ ᑎᑭᓪᓗᒍ 25 ᐃᓄᖕᓄᑦ.

ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓ ᓘᒃᑖᖅ ᒪᐃᑯᓪ ᐹᑐᓴᓐ ᐅᖃᐅᓯᖃᓚᐅᖅᐳᖅ ᔫᓂ 1–ᒥ, ᐊᑐᓕᕐᓗᓂ ᐃᕐᙲᓐᓇᑲᐅᑎᒋ, ᑭᒡᓕᖃᖅᑎᑕᐅᓂᐅᔪᓄᑦ ᓄᓇᕘᑉ–ᐃᓗᐊᓂ ᐊᐅᓪᓛᕐᓂᐅᔪᒥ ᓄᓇᓕᖕᓂ ᐲᖅᑕᐅᕗᑦ. ᑭᓯᐊᓂ, ᐊᐅᓪᓛᕐᓂᖅ ᓄᓇᕘᑉ ᓯᓚᑖᓄᑦ ᓱᓕ ᐊᑐᖁᔭᐅᓇᔭᙱᓚᖅ.

"ᐃᓄᑐᐃᓐᓇᐃᑦ ᐊᐅᓪᓛᕈᒪᔪᓄᑦ ᓄᓇᕘᑉ ᓯᓚᑖᓄᑦ ᐅᔾᔨᕈᓱᒋᐊᖃᖅᐳᑦ ᐅᐸᒃᑕᐅᑦᑕᐃᓕᒪᓂᐅᔪᒥ ᐱᓕᕆᔭᕆᐊᓕᖕᒥ ᐅᑎᕐᓂᕐᒧᑦ, ᑭᓯᐊᓂ ᐱᓕᕆᓂᐅᔪᓂ ᐊᓯᖏᓐᓂ ᐱᔪᓐᓇᕐᓂᖃᕐᓂᐅᔪᓄᑦ ᐃᓕᓯᒪᑐᐃᓐᓇᕆᐊᓕᖏᓐᓂᑦᑕᐅᖅ ᑭᒡᓕᖃᖅᑎᑦᑎᓂᕐᒧᑦ ᐅᕝᕙᓘᓐᓃᑦ ᐊᐅᓪᓛᖁᔭᐅᙱᓐᓂᐅᔪᓄᑦ," ᐅᖃᓚᐅᖅᐳᖅ.

ᓄᓇᕗᓕᐊᕐᓂᕐᒧᑦ, ᓄᓇᕗᒻᒥᐅᑦ ᐱᓕᕆᔭᕆᐊᖃᖅᐳᑦ ᐅᓪᓗᓂ–14-ᓂ ᐅᐸᒃᑕᐅᑦᑕᐃᓕᒪᓂᐅᔪᒥ ᐊᑯᓂᐅᓂᐅᔪᒥ ᐊᑕᐅᓯᕐᒥ ᓄᓇᕗᒻᒥ ᒐᕙᒪᒃᑯᓐᓂ ᓇᓗᓇᐃᖅᑕᐅᓯᒪᔪᓄᑦ ᑐᔪᕐᒥᕕᐅᔪᓂ ᖃᓪᓗᓈᑦ ᓄᓇᖓᓐᓂ.

ᔫᓂ 8–ᒥ, ᐅᖃᓕᒫᒐᖃᕐᕖᑦ, ᑕᑯᔭᒐᖃᕐᕕᑦ ᐊᒻᒪ ᑕᑯᔭᖅᑐᕐᕕᐅᓲᑦ ᒪᑐᐃᒃᑲᓐᓂᕈᓐᓇᓛᖅᐳᑦ, ᑭᓯᐊᓂ ᐃᓄᑐᐊᒧᑦ ᕿᒥᕐᕈᓇᖕᓂᕐᒧᑦ. ᐊᓯᐊᒍᑦ ᐅᖃᕐᓗᓂ, ᑲᑎᙵᓂᐅᔪᓂ ᐱᓕᕆᓂᐅᔪᓂ ᐃᓗᐊᓂ ᐃᓂᐅᔪᓂᑦ ᓱᓕ ᐱᔭᕆᐊᖃᙱᓚᑦ. ᓄᓇᕗᓕᒫᒥ, ᐊᖏᒡᓕᒋᐊᖅᑐᒥ ᐊᑐᐃᓐᓇᖃᓕᕐᓂᐊᖅᐳᖅ ᐅᐸᒃᓯᒪᔪᒥ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖅᑕᐅᓂᐅᔪᒥ ᐋᓐᓂᐊᕕᖕᓂ.

ᒐᕙᒪᒃᑯᑦ ᐃᖅᑲᓇᐃᔭᕐᕕᖏᑦ ᐊᒻᒪ ᓂᐅᕕᕐᕕᕋᓛᑦ ᒪᑐᐃᕈᓐᓇᖅᓯᑎᑕᐅᓂᐊᖅᐳᑦ ᔫᓂ 8–ᒥ. ᐊᑦᑕᓇᔾᔭᐃᖅᓯᒪᓂᐅᔪᓂ ᐱᓕᕆᓂᖃᕆᐊᖃᖅᐳᑦ ᐊᒻᒪ ᒪᓕᒋᐊᖃᖅᖢᑎᒃ ᐃᓅᖃᑎᒥᓂᒃ ᐅᖓᓯᒌᒋᐊᖃᕐᓂᐅᔪᒥ ᒪᓕᒋᐊᓕᖕᓂ. ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᖅᑎᐅᔪᑦ ᒫᓐᓇᐅᔪᒥ ᐊᖏᕐᕋᒥᓂᒃ ᐃᖅᑲᓇᐃᔭᖅᑐᑦ ᐅᑎᕐᓂᐊᓕᖅᐳᑦ ᐃᖅᑲᓇᐃᔭᕐᕕᖏᓐᓄᑦ, ᐅᖃᓚᐅᖅᐳᖅ ᓗᐊᓐ ᑯᓱᒐᖅ, ᒥᓂᔅᑕ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᓐᓂ
"ᐅᓇ ᐃᓱᒪᓕᐊᖑᔪᖅ ᓴᓇᔭᐅᓚᐅᖅᐳᖅ ᐅᖃᖃᑎᖃᖅᖢᑎᒃ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᑲᑎᙵᓂᐅᔪᓂ ᐊᒻᒪ ᐃᖅᑲᓇᐃᔭᖅᑎᓄᑦ ᐊᑦᑕᓇᑐᓂᒃ ᐊᒻᒪ ᐃᓄᓕᒫᓄᑦ ᓇᓪᓕᐅᒃᑯᒫᓄᑦ ᖃᐅᔨᓴᖅᑎᐅᔪᓂ," ᑯᓱᒐᖅ ᐅᖃᓚᐅᖅᐳᖅ.

"ᑐᙵᕕᖃᖅᑐᒥ ᒫᓐᓇᐅᔪᒥ ᑕᑯᒃᓴᐅᓂᐅᔪᒥ ᐅᓗᕆᐊᓇᕐᓂᖓᓂ ᐊᒻᒪ ᐊᒃᑐᐃᓂᐅᔪᓄᑦ ᐱᓕᕆᓂᐅᔪᓂ, ᒪᑐᐃᖅᓯᒃᑲᓐᓂᕐᓂᕐᒥ ᐃᖅᑲᓇᐃᔭᕐᕕᓂᑦ ᐃᓱᒪᒋᔭᐅᕗᖅ ᐊᑦᑎᒃᑐᒥ ᐅᓗᕆᐊᓇᕐᓂᐅᔪᒥ ᐱᓕᕆᓂᐅᓂᖓᓂ."

ᓄᓇᕗᒻᒥ ᒐᕙᒪᒃᑯᑦ ᑎᑎᕋᕐᕕᖏᑦ ᒪᑐᐃᕐᓂᐊᕋᓗᐊᖅᑎᓪᓗᒋᑦ, ᑭᒡᓕᖃᖅᑐᒥ ᐃᓄᓕᒫᓄᑦ ᐊᑐᐃᓐᓇᖃᕐᓂᐊᖅᐳᑦ ᐃᑲᔪᖅᓱᐃᔪᓐᓇᕐᓂᕐᒧᑦ ᐃᓅᖃᑎᒌᖕᓂ ᐅᖓᓯᒌᒋᐊᖃᕐᓂᐅᔪᒥ. ᑯᓱᒐᖅ ᐃᓚᒋᐊᖅᓯᓚᐅᙱᓚᖅ ᐆᒥᖓ ᑭᒡᓕᖃᖅᑎᑕᐅᓂᐅᔪᒥ.

ᒪᓕᒃᑕᐅᔭᕆᐊᖃᓪᓚᕆᒃᑐᒥ ᐱᔭᕆᐊᖃᕐᓂᖅᑕᖃᙱᓚᖅ ᓄᓇᕗᒻᒥ ᐃᖅᑲᓇᐃᔭᖅᑎᐅᔪᓄᑦ ᒪᑐᐊᕐᓂ ᐊᑐᕐᓂᕐᒧᑦ ᐃᖅᑲᓇᐃᔭᕐᕕᖕᒥ. ᓄᕙᒡᔪᐊᕐᓇᖅ-19–ᑕᖃᓕᕐᓂᕈᓂ ᓄᓇᕘᑉ ᐃᓗᐊᓂ, ᒪᑐᐊᕐᓂ ᐊᑐᕆᐊᖃᕐᓂᐅᔪᒥ ᖃᐅᔨᓴᖅᑕᐅᒃᑲᓐᓂᕐᓂᐊᖅᐳᖅ.

ᓄᓇᕗᒻᒥ ᒐᕙᒪᒃᑯᓐᓂ ᓴᓇᔨᐅᔪᑦ ᐱᕕᒃᓴᖃᕆᐊᖃᕈᑎᒃ ᐋᖅᑭᒃᓱᐃᓂᕐᒧᑦ ᓱᕈᓯᖏᓐᓄᑦ ᐸᖅᑭᔭᐅᓂᖏᓐᓄᑦ ᓂᕈᐊᒐᒃᓴᓂ, ᖃᐅᔨᒋᐊᖅᑎᑦᑎᓪᓗᐊᖅᐳᑦ ᐊᖓᔪᖅᑳᕆᔭᒥᓂ, ᐅᖃᓚᐅᖅᐳᖅ ᒥᓂᔅᑕ.
ᔫᓂ 15–ᒥ ᐃᖃᐃᓕᓴᐃᓂᕐᒥ, ᑭᒍᑎᓕᕆᓂᕐᒧᑦ, ᖃᓱᓴᐃᓂᕐᒧᑦ ᐃᓅᓕᓴᖅᑕᐅᓂᐅᔪᒥ ᐊᒻᒪ ᕿᒥᕐᓗᒃᑯᑦ ᐃᓗᐊᖅᓴᐃᓂᕐᒥ ᐱᔨᑦᑎᕋᕐᓂᐅᔪᑦ ᐱᒋᐊᒃᑲᓐᓂᕈᓐᓇᕐᓂᐊᖅᐳᑦ. ᒪᕐᕉᖕᓂ ᐱᓇᓱᐊᕈᓯᕐᓂ, ᐃᖃᐃᓕᓴᕐᕖᑦ ᐊᒻᒪ ᐳᐃᔾᔪᕋᕐᕖᑦ ᒪᑐᐃᒃᑲᓐᓂᕈᓐᓇᖅᓯᓂᐊᖅᐳᑦ, ᑭᓯᐊᓂ ᐃᓄᑑᔪᓄᑦ ᐃᖃᐃᓕᓴᕐᓂᐅᔪᓄᑦ ᐊᒻᒪ ᐳᐃᔾᔪᕋᕐᓂᕐᓄᑦ.
ᓴᖑᓴᕋᐃᓐᓂᐅᔪᒥ ᖃᓄᐃᓕᖓᓂᐅᔪᒥ
ᑕᒪᒃᑯᐊ ᐅᖃᐅᓯᐅᖅᑲᐅᔪᑦ ᐱᓕᕆᓂᐅ ᔪᑦ ᐊᓯᔾᔨᑐᐃᓐᓇᕆᐊᖃᖅᐳᑦ ᐃᓚᒋᐊᖅᑕᐅᓗᑎᒡᓘᓐᓃᑦ ᒫᓐᓇᐅᔪᒥ ᖃᓄᐃᓐᓂᐅᔪᑦ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19–ᒧᑦ ᐊᓯᔾᔨᕐᓂᐅᔪᒥ, ᐅᖃᓚᐅᖅᐳᖅ ᐹᑐᓴᓐ.

ᓄᓇᕗᑦ ᓱᒃᑲᐃᓐᓂᖅᓴᐅᒐᓚᒃᐳᖅ ᒪᑐᐃᒃᑲᓐᓂᕐᓂᕐᒧᑦ "ᒥᑭᑦᑐᒥ ᐃᓱᒫᓘᑎᖃᕐᓂᖓᓂ ᓄᕙᒡᔪᐊᕐᓇᖅ-19–ᑕᖃᕋᓱᒋᔭᐅᓂᖓᓂ ᓄᓇᕗᒻᒥ ᖃᐅᔨᓚᐅᙱᑕᑦᑎᓐᓂ," ᐅᖃᓚᐅᖅᐳᖅ ᐹᑐᓴᓐ. "ᐊᒻᒪᓗ ᒪᑐᐃᖅᐸᓪᓕᐊᑎᓪᓗᑕ ᑕᑯᓂᐊᖅᐳᒍᑦ ᐃᓅᖃᑎᒌᖑᔪᓄᑦ ᐅᖃᖃᑎᒋᕙᒃᑕᑦᑎᓐᓂ ᐊᖏᒡᓕᒋᐊᕐᓂᖓᓂ, ᑕᑯᔪᓐᓇᖅᐳᒍᑦ ᐊᐃᑦᑐᐃᓂᐅᔪᒥ ᐱᒋᐊᖅᐸᓪᓕᐊᓂᐅᔪᒥ ᓄᓇᓕᖕᓂ ᐊᒻᒪᓗ ᓱᓕ ᐊᑐᖅᐸᒃᑲᑦᑕ ᑭᖑᕙᕆᐊᖅᑐᓄᑦ ᓱᖅᑯᐃᖅᑕᐅᓂᐅᔪᓂ."

"ᐃᓂᒦᑎᓪᓗᑕ ᐊᓯᔾᔩᔪᓐᓇᕐᓂᕐᒧᑦ ᐱᓕᕆᓂᐅᔪᓂ, ᐃᓂᒦᙱᓚᒍᑦ ᐃᓅᖃᑎᒌᒥᒃ ᐅᖓᓯᒌᒋᐊᖃᕐᓂᐅᔪᒥ ᑕᐃᒪᐃᖏᓐᓇᕐᓂᐊᕐᓂᖓᓄᑦ."

ᐅᕘᓇ ᐅᐸᒃᑐᖅᑕᐅᓂᑯᓂ ᖃᐅᔨᒋᐊᕐᓂᐅᔪᒥ ᐃᓄᖕᓄᑦ ᖃᐅᔨᓴᖅᑕᐅᔪᓄᑦ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐃᖅᑲᓇᐃᔭᖅᑎᖏᑦ ᐅᔾᔨᕆᓯᒪᕗᑦ ᐃᓄᐃᑦ ᐅᐸᖃᑦᑕᖅᓯᒪᓂᕆᔭᖏᓐᓂ ᐅᔾᔨᕐᓇᖅᑐᒥ ᐊᖏᒡᓕᕙᓪᓕᐊᓂᖏᓐᓂ.

"ᐅᓄᕐᓂᖅᓴᐅᔪᓂ ᐅᐸᖃᑦᑕᖅᓯᒪᓂᕆᔭᖏᓐᓂ ᐊᔪᕐᓴᖅᑎᑦᑎᒃᑲᓐᓂᖅᐳᖅ ᓇᓗᓇᐃᖅᓯᓂᕐᒥ ᐊᒻᒪ ᐱᑎᑦᑎᑦᑕᐃᓕᒪᓂᕐᒧᑦ ᐊᐃᑦᑐᐃᓂᐅᔪᒥ ᓄᕙᒡᔪᐊᕐᓇᖅ-19–ᒥ ᐊᒻᒪ ᐊᓯᖏᓐᓂ ᐊᐃᑦᑐᐃᓂᐅᔪᓐᓇᖅᑐᓂ ᓄᓇᓕᑦᑎᓐᓂ," ᐅᖃᓚᐅᖅᐳᖅ ᐹᑐᓴᓐ.

"ᓄᕙᒡᔪᐊᕐᓇᖅ-19 ᓱᓕ ᓴᖅᑭᔮᕐᓂᖃᖅᐳᖅ ᐅᓗᕆᐊᓇᕐᓂᐅᔪᒥ ᓄᓇᕗᒻᒥᐅᓄᑦ ᐊᒻᒪ ᐱᖏᑦᑑᔪᓐᓇᙱᓚᒍᑦ ᐆᒥᖓ ᐊᒥᓱᓄᑦ ᖃᓂᒻᒪᓐᓇᐅᔪᒥ," ᐅᖃᓚᐅᖅᐳᖅ.

ᑐᙵᕕᖃᖅᑐᒥ ᓄᓇᕗᒻᒥ ᒐᕙᒪᒃᑯᑦ ᐸᕐᓇᐅᑎᖓᓐᓂ ᒪᑐᐃᖅᓯᒃᑲᓐᓂᕐᓂᕐᒧᑦ ᓄᓇᕗᒻᒥ, ᖃᐅᔨᓴᐃᓂᐅᔪᑦ ᐊᒻᒪ ᐃᓱᒪᓕᐅᕐᓂᐅᔪᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓂ ᐱᓕᕆᐊᖑᓂᐊᖅᐳᑦ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓᓄᑦ ᐱᓇᓱᐊᕈᓰᑦ ᒪᕐᕉᒃ ᐊᓂᒍᕌᖓᑦ.

ᐅᓪᓗᒥᐅᔪᒥ, 142–ᓂ ᐃᓄᖕᓂ ᒫᓐᓇᐅᔪᒥ ᖃᐅᔨᓴᖅᑕᐅᕙᓪᓕᐊᕗᑦ.

ᐅᓄᕐᓂᐅᔪᓂ ᐃᓄᖕᓂ ᑕᑯᒃᓴᐅᓂᖃᖅᑐᓂ ᐋᓐᓂᐊᕈᑕᐅᖃᑦᑕᖅᑐᓄᑦ ᒪᓕᒃᑐᒥ ᓄᕙᒡᔪᐊᕐᓇᖅ-19–ᒥ ᑲᑕᒃᐹᓪᓕᖅᓯᒪᕗᖅ ᐊᒻᒪ ᑕᐃᒪᐃᓐᓂᖓᓄᑦ ᐅᓄᕐᓂᐅᔪᓂ ᓄᕙᒡᔪᐊᕐᓇᖅ-19–ᒧᑦ ᐱᔾᔪᑎᓕᖕᓂ ᖃᐅᔨᓴᖅᑕᐅᓂᐅᔪᓂ ᑲᑕᒃᓯᒪᕗᑦ, ᐅᖃᓚᐅᖅᐳᖅ ᐹᑐᓴᓐ.

ᓄᓇᕗᑦ ᓱᓕ ᐱᔪᓐᓇᕐᓂᖃᕐᓂᐅᕗᖅ ᑲᓇᑕᒥ ᓄᕙᒡᔪᐊᕐᓇᖅ-19–ᖃᙱᑦᑎᐊᕐᓂᕐᒧᑦ.