ᑲᓇᑕᒥ ᐸᓖᓯᒃᑯᑦ ᐊᖓᔪᖅᑳᕐᔪᐊᖓ ᓄᓇᕗᒻᒥ ᐅᔾᔨᕈᓱᒃᐳᖅ ᐃᓚᖏᑦ ᐃᓄᐃᑦ ᓄᓇᕗᒻᒥ ᐸᓖᓯᒃᑯᓐᓂ ᑲᒪᒋᔭᖃᑦᑎᐊᕐᓂᖅᓴᐅᓂᖏᓐᓂ.
"ᐅᒃᐱᕈᓱᙱᓐᓂᖅᑕᖃᖅᐸᑦ ᑕᐃᒫᒃ ᐱᓕᕆᓂᖃᕆᐊᖃᖅᐸᕗᑦ. ᑕᐃᒪᓐᓇ ᓄᓇᓕᖕᓂ ᐅᕙᑦᑎᓐᓄᑦ ᐅᖃᐅᔾᔨᕗᑦ, 'ᑕᑯᒋᑦ, ᐃᓕᖕᓂ ᐅᒃᐱᕈᓱᙱᓚᒍᑦ.' ᖃᓄᖅ ᑕᒪᓐᓇ ᐱᐅᓯᒋᐊᖅᑎᑦᑐᓐᓇᖅᐸᕗᑦ?" ᐅᖃᓚᐅᖅᐳᖅ ᐊᖓᔪᖅᑳᕐᔪᐊᖅ ᐊᒫᓐᑕ ᔫᓐᔅ. "ᖃᐅᔨᒪᕗᖓ (ᑲᓇᑕᒥ ᐸᓖᓯᕗᑦ) ᐃᓚᒋᔭᐅᔪᑦ ᐊᒃᓱᕈᑦᑎᐊᖅᖢᑎᒃ ᐱᓕᕆᓂᖏᓐᓂ ᑕᖅᑳᓂ ᐊᒻᒪ ᑲᒪᓇᖅᑐᓂ ᐱᓕᕆᕗᑦ ᓄᓇᓕᖕᓂ ᐊᒃᓱᕉᓴᒃᑐᓂ. ᐃᓚᖏᑦ ᐱᓕᕆᑦᑎᐊᖅᐸᒃᐳᑦ, ᑭᓯᐊᓂ ᐱᓕᕆᑦᑎᐊᖏᓐᓇᐅᔭᕈᓐᓇᙱᑉᐳᑦ ᑕᐃᒪᙵᓕᒫᖅ."
ᑐᓄᓂᕐᒥ ᐃᓚᒋᔭᐅᔪᖅ ᒪᓕᒐᓕᐅᖅᑎᒃᑯᓐᓂ ᑕᐃᕕᑦ ᖃᒪᓂᖅ ᑐᕌᖅᑎᑦᑎᓂᖃᖅᐳᖅ ᐱᓕᕆᓇᓱᐊᕐᓂᐅᔪᒥ ᒪᓕᒐᓕᐅᕐᕕᖕᒥ, ᖃᐃᖁᔩᓐᓇᖅᓯᒪᓪᓗᓂ ᑎᒥᒧᑦ ᐊᑕᔪᓂ ᑕᕐᕆᔭᓕᐅᕈᑎᓂᑦ ᓯᕗᓪᓕᖅᐹᒥ ᐱᓕᕆᐊᕆᔭᐅᖁᔨᓂᐅᔪᒥ.
ᔫᓐᔅ ᐅᖃᓚᐅᖅᐳᖅ ᐊᒡᕕᐊᕈᑎᓂᑦ ᐲᖅᓯᔭᕆᐊᖃᕐᓂᖏᓐᓂ ᑎᒥᒧᑦ ᐊᑕᔪᓂ ᑕᕐᕆᔭᓕᐅᕈᑎᓂᑦ ᐊᑐᓕᖅᑎᑕᐅᓚᐅᖅᑳᕐᓂᖏᓐᓂ: ᐊᖏᖅᑕᐅᓂᕐᒥ ᑲᓇᑕᒥ ᐸᓖᓯᒃᑯᓐᓂ ᐊᖓᔪᖅᑳᖃᕐᕕᖓᓂ ᐋᑐᕚᒥ ᐸᓖᓯᒃᑯᑦ ᑲᓇᑕᒥ ᐸᓖᓯᐅᖕᒪᑕ ᐊᒻᒪᓗ ᓄᑖᙳᖅᐸᓪᓕᐊᓂᐅᔪᒥ ᐊᒃᓱᕈᕈᑕᐅᔪᓂ ᐊᒻᒪ ᐊᑭᓕᕆᐊᓕᖕᓂ ᐃᓚᒋᔭᐅᔪᒥ ᑐᖅᑯᐃᓂᕐᒧᑦ ᑕᒪᒃᑭᓄᑦ ᑕᕐᕆᔭᓕᐊᖑᔪᕕᓂᕐᓂ.
"ᐅᖃᓚᐅᖅᓯᒪᔾᔮᙱᓚᖓ ᑕᐃᒪᐃᓚᐅᖅᓯᒪᔾᔮᙱᓐᓂᖓᓂ ᑭᓯᐊᓂ ᒫᓐᓇᐅᔪᒥ ᐱᔪᓐᓇᕐᓂᐅᔪᒥ ᑎᒍᒥᐊᕈᓐᓇᕐᓂᕐᒧᑦ ᑕᒪᒃᑭᓂ ᑐᓴᒐᒃᓴᓕᐊᖑᔪᓂ (ᑕᒪᓐᓇ ᐊᒡᕕᐊᕈᑕᐅᕗᖅ)," ᐅᖃᓚᐅᖅᐳᖅ ᔫᓐᔅ. "ᐃᓚᖏᑦ ᐃᓚᒋᔭᑦᑎᓐᓂ ᐊᑐᕈᒪᓇᔭᖅᐳᑦ ᑕᐃᒃᑯᓂᖓ ᐱᓕᕆᔾᔪᑕᐅᔪᓂ ᐃᒃᐱᒍᓱᖕᒪᑕ ᒪᓕᒐᓕᕆᑦᑎᐊᙱᓐᓂᐅᓂᖓᓂ ᐃᒻᒥᖕᓄᑦ ᐃᓱᒪᓚᐅᕐᒪᑕ ᐱᓕᕆᑦᑎᐊᓚᐅᕐᓂᖏᓐᓂ ᐊᒻᒪ ᑭᓇᑐᐃᓐᓇᕐᒥ ᐅᖃᖅᑐᖃᖅᖢᓂ ᑲᒪᒋᔭᐅᑦᑎᐊᓚᐅᙱᓐᓂᖏᓐᓂ ᐊᓯᖏᓐᓂᓪᓘᓐᓃᑦ. ᖃᖓᑭᐊᖅ ᐊᑐᓕᖅᑎᑕᐅᑐᐃᓐᓇᕆᐊᖃᖅᐳᖅ ᓄᑖᙳᖅᐸᓪᓕᐊᓂᐅᔪᑦ ᐱᐅᓯᕙᓪᓕᐊᑎᓪᓗᒋᑦ ᐊᕐᕌᒎᓂᐊᖅᑐᓄᑦ."
ᐊᔭᐅᕆᕗᖅ ᑕᐃᒃᑯᓄᖓ ᐃᒃᐱᒍᓱᒃᑐᓂ ᐱᑦᑎᐊᖅᑕᐅᙱᑦᑐᕕᓂᐅᓇᓱᒋᔪᓂ ᑲᓇᑕᒥ ᐸᓖᓯᒃᑯᓐᓂᑦ ᐅᖃᖃᑎᖃᒻᒪᕆᒡᓗᑎᒃ ᓄᓇᓕᖕᓂ ᐸᓖᓯᒃᑯᓐᓄᑦ ᐊᖓᔪᖅᑳᖓᓐᓄᑦ ᐅᕝᕙᓘᓐᓃᑦ ᖃᐅᔨᒋᐊᕐᓗᑎᒃ ᐃᓄᑐᐃᓐᓇᕐᓄᑦ ᕿᒥᕐᕈᔭᐅᓂᖓᓄᑦ ᐊᒻᒪ ᐅᓐᓂᕐᓗᖕᓂᕐᒧᑦ ᑲᑎᒪᔨᐅᔪᓄᑦ ᑲᓇᑕᒥ ᐸᓖᓯᒃᑯᓐᓄᑦ, ᑐᙵᕕᖃᖅᑐᒥ ᐋᑐᕚᒥ. ᑲᑎᒪᔨᐅᔪᑦ ᒐᕙᒪᑐᖃᒃᑯᑦ ᐱᓕᕆᔨᐅᕗᑦ, ᐊᑕᙱᑦᑐᓄᑦ ᐸᓖᓯᒃᑯᓐᓄᑦ, ᐱᓕᕆᐊᒃᓴᖃᖅᑐᓂ "ᑐᓂᓯᓂᕐᒥ ᐆᒻᒪᕆᒃᑐᒥ ᐅᓐᓂᕐᓗᖕᓂᕐᒧᑦ ᐱᓕᕆᓂᐅᔪᒥ ᑎᒍᒥᐊᖅᑎᑦᑎᔪᓂ ᑲᓇᑕᒥ ᐸᓖᓯᒃᑯᓐᓂᑦ ᑲᒪᒋᔭᖃᑦᑎᐊᕐᓂᖅᓴᐅᓂᖏᓐᓂ ᖃᓄᐃᓕᐅᕐᓂᖏᓐᓄᑦ ᐊᒻᒪ ᐱᓕᕆᑦᑎᐊᕐᓂᖏᓐᓄᑦ ᐃᓚᒋᔭᐅᔪᓄᑦ."
ᔫᓐᔅ ᐅᖃᕆᐊᓪᓚᓚᐅᖅᐳᖅ ᐊᑦᑎᐸᓗᒃᑐᒥ ᐅᓄᕐᓂᐅᓂᖃᕐᓂᖓᓂ ᐅᓐᓂᕐᓗᖕᓂᐅᔪᓂ ᑎᑎᕋᐅᓯᐅᔪᓄᑦ ᑲᑎᒪᔨᐅᔪᓄᑦ ᓄᓇᕗᒻᒥ.
"ᐅᒃᐱᕈᓱᒃᐳᖓ ᐃᓄᐃᑦ ᓈᒻᒪᒃᓴᙱᓐᓂᖏᓐᓂ ᑭᓯᐊᓂ ᐃᓱᒪᕗᖓ ᖃᐅᔨᒪᙱᓗᐊᑐᐃᓐᓇᕐᓂᖏᓐᓂ ᑖᒃᑯᓂᖓ," ᐊᖓᔪᖅᑳᕐᔪᐊᖅ ᐅᖃᖅᑑᔮᓚᐅᖅᐳᖅ.
ᖃᒪᓂᖅ ᐊᒻᒪ ᐃᓚᒋᔭᐅᖃᑎᖓ ᒪᓕᒐᓕᐅᖅᑎᒃᑯᓐᓂ ᐃᒦᓕᐋᓄ ᕿᖕᓄᖅ ᐅᖃᓪᓚᓚᐅᕆᕗᑦ ᐱᐅᒃᓴᕐᓂᖏᓐᓂ ᓴᖅᑭᑎᑕᐅᒃᑲᓐᓂᕐᓂᐅᔪᒥ ᐃᓄᖕᓂ ᑲᓇᑕᒥ ᐸᓖᓯᒃᑯᓐᓂ ᐊᓯᐊᒎᖅᑐᓂ ᐸᓖᓯᖃᕐᓂᕐᒥ ᓯᕗᓂᐊᓂ ᑕᖅᑭᐅᔪᒥ.
ᔫᓐᔅ, ᐃᓇᖏᖅᓯᓚᐅᖅᑐᒥ ᓄᓇᕗᒻᒥ ᐊᖓᔪᖅᑳᕐᔪᐊᖑᓂᕐᒧᑦ ᔭᓄᐊᕆ 2019–ᒥ, ᐅᖃᓚᐅᖅᐳᖅ ᐅᖃᓪᓚᖕᓂᖃᖃᑦᑕᕐᓂᖓᓂ ᑲᓇᑕᒥ ᐸᓖᓯᒃᑯᑦ ᑲᓇᑕᒥ ᐊᖓᔪᖅᑳᖃᕐᕕᖓᓂ ᐱᔪᓐᓇᕋᔭᕐᒪᖔᑕ ᐊᓯᐊᒎᖅᑐᒥ ᐃᓄᖕᓂ ᐸᓖᓯᐅᔪᓂ ᐅᕝᕙᓘᓐᓃᑦ ᓄᓇᓕᖕᓂ ᐸᓖᓯᐅᓂᕐᒧᑦ ᐱᓕᕆᐊᖑᔪᒥ "ᑕᑯᓇᓱᐊᕐᓂᕐᒧᑦ ᐅᑎᖅᑎᑕᐅᔪᓐᓇᕋᔭᕐᒪᖔᑦ."
"ᓇᓗᓇᙱᓚᖅ ᐱᓕᒻᒪᒃᓴᕐᓂᐅᔪᖅ, ᑮᓇᐅᔭᖃᖅᑎᑕᐅᓂᖓᓂ ᐊᒻᒪ ᐃᑲᔪᕈᑎᒃᓴᓂ ᐃᓚᖓᓐᓂ ᑖᔅᓱᒥᖓ ᐊᖏᔪᒥ ᑕᑯᒃᓴᐅᓂᐅᕗᖅ, ᑭᓯᐊᓂ ᑕᒪᓐᓇ ᐃᒃᓯᓐᓇᖅᑕᐅᓯᒪᑐᐃᓐᓇᙱᓚᖅ," ᐅᖃᓚᐅᖅᐳᖅ. "ᐄᑦᑎᐊᖅ ᐅᖃᓪᓚᐅᓯᕇᓐᓇᖅᐸᕗᑦ ᐃᓕᓴᖅᓯᓯᒪᒐᑦᑕ ᐃᓄᐃᑦ ᐱᓕᕆᓂᖃᕈᒪᓪᓚᕆᖕᓂᖏᓐᓂ, ᐃᓚᐅᖃᑕᐅᓂᕐᒥ ᑲᓇᑕᒥ ᐸᓖᓯᒃᑯᓐᓂᑦ, ᐊᒻᒪᓗ ᐱᓕᕆᐊᑦᑎᐊᕙᒻᒪᕆᐊᓘᓚᐅᖅᓯᒪᓂᖓᓂ ᑕᐃᔅᓱᒪᓂᒃᑲᓐᓂᖅ."
ᐊᓯᐊᓂ ᐊᑐᓕᖁᔭᐅᓇᔭᖅᑐᒥ ᓴᓇᔭᐅᔪᒥ ᓄᓇᕗᒻᒥ ᑲᑎᒪᔨᕐᔪᐊᖑᔪᓄᑦ ᓴᖅᑭᑉᐸᓪᓕᐊᔪᒥ–ᐃᒻᒪᖄ ᖃᓂᓐᓂᖅᓴᐅᔪᒥ – ᐃᓕᖅᑯᓯᒥᒃ ᓇᓗᓇᐃᔭᐃᔾᔪᔾᔭᐅᓂᕐᒥ. ᐱᓇᓱᐊᕈᓯᕐᓂ ᒪᕐᕉᖕᓂ ᓯᕗᓂᐊᓂ–ᓄᓇᓕᖕᓄᐊᖅᑕᐅᓚᐅᖅᑳᕋᑎᒃ ᐱᓕᒻᒪᒃᓴᕐᓂᐅᔪᓂ ᐊᐃᑉᕆᓕᒥ ᑲᓇᑕᒥ ᐸᓖᓯᒃᑯᓐᓄᑦ ᐃᓕᔭᐅᓂᐊᖅᑐᓄᑦ ᓄᓇᕗᒻᒥ. ᐅᑯᐊ ᐃᓕᓐᓂᐊᕐᓂᐅᔪᑦ ᐃᓚᖃᕐᓂᐊᖅᐳᑦ ᐃᓄᐃᑦ ᐃᓕᖅᑯᓯᖓᓐᓂ, ᖃᓄᐃᑉᐸᓚᐅᕐᓂᖏᓐᓂ ᐊᒻᒪ ᐅᖃᐅᓯᕐᒥ ᐃᓕᓐᓂᐊᕐᓂᐅᔪᓂ ᐸᓖᓯᒃᑯᑦ ᑐᑭᓯᐅᒪᓂᖃᕐᓂᖅᓴᐅᓂᐊᕐᒪᑕ ᓄᓇᕗᒻᒥ ᐊᒻᒪᓗ ᐃᓄᖏᓐᓂ, ᐅᖃᐅᓯᐅᓪᓗᓂ ᔫᓐᔅᒧᑦ.
"ᓂᕆᐅᒃᐳᖓ ᑕᒪᓐᓇ ᐃᖏᕐᕋᐃᓐᓇᕐᓂᐊᕐᓂᖓᓂ," ᐅᖃᓚᐅᖅᐳᖅ ᐃᓕᓐᓂᐊᕐᓂᐅᔪᒥ. "ᓲᖃᐃᒻᒪ ᑮᓇᐅᔭᖃᖅᑎᑕᐅᔭᕆᐊᖃᖅᐳᖅ ᐊᑭᑐᔪᐊᓘᖕᒪᑦ. ᑐᓂᓯᓂᐊᖅᐳᒍᑦ (ᑐᒃᓯᕋᐅᑎᒥᒃ) ᑮᓇᐅᔭᖃᖅᑎᑕᐅᒃᑲᓐᓂᕐᓂᐅᔪᒥ, ᐊᒻᒪᓗ ᐊᓱᐃᓛᒃ ᖃᓄᖅ ᐱᐅᓯᒋᐊᖅᑎᒃᑲᓐᓂᕈᓐᓇᖅᐸᕗᑦ? ᑭᓱᓂᒃ ᐃᓚᒋᐊᖅᓯᔭᕆᐊᖃᖅᐳᒍᑦ ᑐᓂᓯᓂᕐᒥ ᐱᐅᓂᖅᓴᐅᔪᒥ ᐃᓕᖅᑯᓯᒥ ᐊᑐᖅᑕᐅᓂᑯᓂ ᐃᓚᒋᔭᐅᓂᐅᔪᓄᑦ? ᐱᓕᕆᓂᐅᔪᒥ ᑕᑯᔪᒪᓇᔭᖅᑕᓐᓂ ᑐᕌᒐᕆᔭᐅᓂᐅᔪᒥ (ᐊᑯᓂᐅᔪᒃᑯᑦ). ᐊᔾᔨᐅᙱᑦᑐᒻᒪᕆᐅᕗᖅ ᐊᒻᒪ ᐱᓐᓇᕆᔭᐅᓪᓗᓂ ᑎᑭᑉᐸᓪᓕᐊᔪᒧᑦ ᓄᓇᕗᒻᒧᑦ. ᖃᓄᐃᓕᐅᕐᓂᖃᕐᔪᐊᕐᓂᖃᖅᐳᖅ ᐃᓚᒋᔭᕗᑦ ᖃᐅᔨᒪᔭᕆᐊᖃᕐᓂᖏᓐᓂ ᐊᒻᒪ ᑕᒪᓐᓇ ᐃᓕᓴᕆᓯᒪᕙᕗᑦ."
ᔫᓐᔅ ᓇᓗᓇᐃᖅᓯᓚᐅᖅᐳᖅ ᑕᒪᕐᒥᒐᓚᑦ ᐊᐱᖅᑯᓯᐅᔪᓄᑦ ᑲᓇᑕᒥ ᐸᓖᓯᒃᑯᓐᓄᑦ ᐃᓚᖃᕆᐊᖃᕐᓂᖓᓂ ᑮᓇᐅᔭᖃᖅᑎᑕᐅᒃᑲᓐᓂᕐᓂᐅᔪᒥ ᐱᓪᓚᕆᙳᖅᑎᑦᑎᓂᕐᒧᑦ.
"ᐱᔪᒪᓂᖅ ᑕᕝᕙᐅᕗᖅ, ᐅᖃᕋᔭᖅᐳᖓ ᑖᔅᓱᒥᖓ, ᑭᓯᐊᓂ ᓇᒥᑐᐃᓐᓇᑦᑎᐊᖅ ᐊᒃᓱᕈᕐᓂᖅᑕᖃᖅᐳᖅ ᐊᒻᒪ ᐃᓕᓯᔪᓐᓇᕆᐊᖃᖅᐳᑎᑦ ᐃᑲᔪᕈᑎᒃᓴᓂ ᐱᔪᓐᓇᖅᑕᕐᓂᑦ ᐊᒻᒪ ᑮᓇᐅᔭᖃᖅᑎᑕᐅᓂᐅᔪᒥ ᐊᔪᙱᑕᕐᓄᑦ."