ᓄᓇᖅᑲᑎᒌᑦ ᕿᒃᓵᒃᑐᑦ

ᐊᑕᐅᓯᖅ ᐊᖑᑎ ᑎᒍᔭᐅᓯᒪᓕᖅᑐᖅ ᐊᒻᒪᓗ ᐊᑕᐅᓯᖅ ᐊᖑᑎ ᐃᓅᔪᓐᓃᖅᓯᒪᑉᓗᓂ ᐃᓄᐊᖅᓯᔪᖃᓚᐅᖅᑎᓪᓗᒍ ᐊᕐᕕᐊᓂ ᑕᐃᒪᐃᑦᑐᖃᕆᐅᖅᖢᓂ ᖁᓕᑦ ᐅᑭᐅᑦ ᐅᖓᑖᓂ ᕕᕗᐊᕆ 19-ᒥ.
ᐃᓅᔪᓐᓃᖅᓯᒪᔪᖅ ᒪᓇᓯ ᑖᒻᓴᓐ, 29-ᓂᒃ ᐅᑭᐅᓕᒃ.
ᐃᐅᐳᑦ ᓇᐸᔪᖅ, 30-ᓂᒃ ᐅᑭᐅᓕᒃ, ᐸᓯᔭᒃᓴᙳᖅᑎᑕᐅᓯᒪᔪᖅ ᐃᓄᐊᖅᓯᓂᕐᒧᑦ ᑖᒻᓴᓐ ᐃᓅᔪᓐᓃᓚᐅᖅᑎᓪᓗᒍ.
ᐊᕐᕕᐊᑦ ᒪᐃᔭᖓ ᐹᑉ ᓕᓇᑦ ᐅᖃᖅᖢᓂ ᓄᓇᓕᖕᒥᒎᖅ ᒫᓐᓇᐅᔪᖅ ᖃᐱᓚᓇᖅᑐᒻᒪᕆᐊᓗᒃ ᐃᓅᔪᓐᓃᖅᑳᓚᐅᖅᑎᓪᓗᒍ.
ᐅᖃᖅᖢᓂ ᑕᐃᒪᐃᑦᑐᖃᕐᓂᐊᖅᑐᒥᒎᖅ ᐃᓱᒪᓇᖃᑦᑕᙱᒻᒪᑦ ᓄᓇᖅᑲᑎᒌᑦ ᐃᓅᖃᑎᒌᑦᑎᐊᖃᑦᑕᖅᑎᓪᓗᒋᑦ.
“ᑕᐃᒪᐃᑦᑐᖃᕋᔪᙱᒻᒪᑦ ᓄᓇᑉᑎᓐᓂᒃ, ᖁᒃᓴᓪᓚᖕᓇᓲᖅ ᑕᐃᒪᐃᑦᑐᖃᕌᖓᑦ,” ᑕᐃᒪᓐᓇ ᐅᖃᖅᖢᓂ ᓕᓇᑦ.
“ᑐᓴᖅᓯᒪᙱᑦᑐᒍᑦ ᖃᓄᐃᑦᑐᖃᓪᓚᑦᑖᓚᐅᕐᒪᖔᑦ, ᑕᐃᒪᐃᒻᒪᑦ ᐃᓄᐃᑦ ᐅᑕᖅᑭᔪᑦ ᑐᓴᖅᑎᑕᐅᓂᐊᕐᓂᕐᒥᓂᒃ.”
ᐳᑭᖅᑕᓕᒃᑯᑦ ᑐᑭᓯᒋᐊᕈᑎᒃᓴᒃᑲᓐᓂᕐᓂᒃ ᐊᑐᐃᓐᓇᕈᖅᑎᑦᑎᓯᒪᓚᐅᙱᑦᑐᑦ ᑐᓴᒐᒃᓴᖅ ᑎᑎᕋᖅᑕᐅᕙᓪᓕᐊᑎᓪᓗᒍ.
ᓕᓇᑦ ᐅᖃᖅᖢᓂ ᑐᓴᖅᓯᒪᙱᓐᓇᒥᒎᖅ ᐃᑲᔪᕆᐊᖅᑐᖃᕐᓂᐊᕐᒪᖔᑦ ᐅᖃᐅᔾᔨᒋᐊᖅᑎᓂᒃ.
ᐅᖃᖅᖢᓂ ᐳᑭᖅᑕᓕᖕᒥᒎᖅ ᑎᑭᑦᑐᖃᓚᐅᖅᑐᖅ ᑭᐅᒍᕆᒥᐅᑕᕐᒥᒃ ᕕᕗᐊᕆ 20-ᒥ ᖃᐅᔨᓴᕆᐊᖅᑐᖃᑕᐅᔪᒥᒃ ᓄᓇᕗᒥ ᖃᐅᔨᓴᖅᑎᕐᔪᐊᑦ ᐱᕋᔭᒃᓯᒪᔪᖃᖅᑎᓪᓗᒍ ᐃᑲᔪᕆᐊᖅᑐᖅᖢᒋᑦ.
“ᐅᑉᓛᖑᔪᖅ (ᑕᓪᓕᒻᒥᕐᒥ, ᕕᕗᐊᕆ 21-ᒥ, ᒪᓇᓯᐅᑉ ᑎᒥᖓ ᐊᐅᓚᑦᑎᑕᐅᓚᐅᖅᑐᖅ ᖃᐅᔨᓴᖅᑕᐅᔭᖅᑐᖅᖢᓂ ᑐᖁᖓᔪᓕᕆᔨᒧᑦ, ᑐᑭᓯᐅᒪᔭᒃᑯᑦ.
“ᓄᓇᒋᔭᑉᑎᓐᓂᒃ ᐃᓅᖃᑎᒌᑦᑎᐊᖁᔨᑉᓗᑕ ᐊᒃᓱᕉᑎᖃᖃᑦᑕᕋᑉᑕ ᐃᓅᖃᑎᒌᒃᑐᓪᓗ ᐃᒃᐱᒍᓱᑦᑎᐊᖃᑦᑕᖁᑉᓗᒋᑦ ᐃᓅᖃᑎᒋᔭᒥᓂᒃ.
“ᑕᐃᒪᐃᑦᑐᓂᒃ ᑲᒪᑦᑎᐊᖏᓐᓇᕋᓱᖃᑦᑕᖅᑐᒍᑦ.
“ᑕᐃᒪᐃᑦᑐᖃᖅᑎᓪᓗᒍ, ᐃᓄᐃᑦ ᐃᕿᔾᔪᑏᓐᓇᖃᑦᑕᖅᑐᑦ ᑎᒍᒥᐊᕈᑎᒐᔪᒃᖢᑎᒡᓗ ᓄᓇᑉᑎᓐᓂᒃ ᐊᒻᒪᓗ ᓇᓗᓇᖅᖢᓂ ᖃᓄᖅ ᐃᑲᔪᒃᑲᓐᓂᕋᔭᕐᒪᖔᑉᑖ ᖁᒃᓴᓪᓚᒃᓯᒪᓗᐊᖁᔪᓐᓃᖅᖢᒋᑦ ᐋᓐᓂᐊᓗᐊᖁᔪᓐᓃᖅᖢᒋᓪᓗ ᑕᐃᒪᐃᑦᑐᒃᑰᖅᓯᒪᑎᓪᓗᒋᑦ.”
ᓕᓇᑦ ᐅᖃᖅᖢᓂ ᐅᖃᖃᑎᒌᓗᐊᕌᓗᙱᑦᑐᒡᒎᖅ ᓄᓇᓕᖕᒥ ᐃᓅᔪᓐᓃᖅᑳᖅᑎᓪᓗᒍ ᑖᒻᓴᓐ.
ᑕᐃᒪᐃᒐᔪᒃᑐᒡᒎᖅ ᐊᕐᕕᐊᓂ.
“ᐃᓄᐃᑦ ᐃᒃᐱᒍᓱᑦᑎᐊᖅᑐᑦ ᐃᓚᐃᓚᐅᖅᑐᓂᒃ ᐃᓚᒌᖕᓂᒃ ᑕᒪᑐᒥᙵ ᖃᐅᔨᕙᓪᓕᐊᓂᖃᖅᑎᓪᓗᒋᑦ.”