ᓄᓇᖅᑲᑎᖏᓐᓄᑦ ᐅᐱᒋᔭᐅᑦᑎᐊᖅᑐᖅ

ᔨᐅᕆᒥ ᒪᐃᓕ ᐆᒃᑑᑎᑦᑎᐊᕙᐅᓕᖅᑐᖅ ᐊᒻᒪᓗ ᓄᓇᖅᑲᑎᒥᓄᑦ ᐅᐱᒋᔭᐅᑦᑎᐊᖅᑐᖅ ᑎᖕᒥᓲᓕᕆᔨᙳᓚᐅᖅᑎᓪᓗᒍ ᑳᒻ ᐃᐊᒃᑯᓐᓄᑦ ᑎᖕᒥᓲᓕᕆᔨᒃᑯᓐᓄᑦ ᑕᖅᑭᐅᓚᐅᖅᑐᒥ.

ᒪᐃᓕ, 21-ᓂᒃ ᐅᑭᐅᓕᒃ, ᑲᖏᖅᖠᓂᕐᒥᐅᑕᖅ ᖃᖓᑕᖃᑦᑕᕐᓂᕐᒥᒃ ᐱᐅᒋᔭᖃᑦᑎᐊᓕᓚᐅᖅᑐᖅ ᓄᑕᕋᐅᒃᑲᓐᓂᖅᖢᓂ ᐊᑖᑕᒥᑐᑦ, ᓵᓐ ᒪᐃᓕᑎᑐᑦ, ᐊᑖᑕᓂᑦᑕᐅᖅ ᑎᖕᒥᓲᓕᕆᔨᐅᖕᒪᑦ ᐃᕐᓂᓂ ᖃᖓᑕᖃᑎᒋᖃᑦᑕᓚᐅᕐᒪᒍ ᑎᖕᒥᓲᕋᓛᕐᒥᒍᑦ.
ᐅᑭᐅᖃᓕᖅᖢᓂ 14-ᓂᒃ ᔨᐅᕆᒥ ᒪᐃᓕ ᑎᖕᒥᓲᓕᕆᔨᐅᔪᒪᑉᓗᓂ ᐃᓱᒪᓕᐅᓚᐅᖅᓯᒪᔪᖅ ᐊᒻᒪᓗ ᐅᑭᐅᖅᑕᖅᑐᒥ ᖃᖓᑕᖃᑦᑕᕈᒪᓛᕐᓂᕋᖅᖢᓂ.
ᐅᖃᓚᐅᖅᑐᖅ ᓇᖕᒥᓂᖃᕐᓂᒃᑯᒡᒎᖅ ᓚᐃᓴᓐᓯᑖᕈᓐᓇᖅᓯᓚᐅᖅᑐᖅ 18-ᓂᒃ ᐅᑭᐅᖃᖅᖢᓂ ᐊᒻᒪᓗ ᓯᓚᑦᑐᖅᓴᕐᕕᖕᒧᑦ ᐃᓕᓐᓂᐊᕆᐊᖅᖢᓂ ᑎᖕᒥᓲᓕᕆᔨᐅᓂᕐᒧᓪᓗ ᑮᓇᐅᔾᔭᒃᓴᕈᑎᒃᓴᒃᑯᑦ ᓚᐃᓴᓐᓯᑖᕈᒪᓂᕐᒧᑦ.
ᐃᓱᒪᓗᐊᓚᐅᙱᑦᑐᕉᖅ ᓇᓂ ᑎᖕᒥᓲᓕᕆᔨᙳᕋᔭᕐᒪᖔᕐᒥ ᐃᓕᓐᓂᐊᕌᓂᒃᑯᓂ ᐊᒻᒪᓗ ᖁᕕᐊᓱᑦᑎᐊᖅᖢᓂ ᑲᖏᖅᖠᓂᕐᒥ ᓄᓇᖃᕐᓗᓂ ᓴᓇᕝᕕᒃᑖᕋᒥ ᑳᒻ ᐃᐊᒃᑯᓐᓂᒃ.
“ᓇᒧᙵᐅᓂᐊᕐᒪᖔᕐᒪ ᓯᕗᓪᓕᖅᐹᒥ ᖃᐅᔨᒪᓚᐅᙱᑦᑐᖓ, ᐊᒻᒪᓗ ᖃᓄᐃᓕᐅᕈᑎᒋᔪᒪᔭᒃᑲ ᐊᓯᔾᔨᖃᑦᑕᓚᐅᖅᑐᑦ ᒪᕐᕈᐃᖅᖢᑎᒡᓘᓐᓃᑦ, ᑭᓯᐊᓂ ᐃᓱᒪᒌᓐᓇᖃᑦᑕᓚᐅᖅᑕᒃᑲ ᑳᒻ ᐃᐊᒃᑯᑦ ᐊᒻᒪᓗ ᑕᐃᑲᓂ ᓴᓇᓕᖅᖢᖓ,” ᑕᐃᒪᓐᓇ ᐅᖃᖅᖢᓂ. “ᐊᓕᐊᓇᐃᑦᑐᒻᒪᕆᐊᓗᒃ, ᐅᖃᐱᓗᒍᑎᒃᓴᖃᔮᙱᑦᑐᖓ.”
ᔨᐅᕆᒥ ᐱᓕᕆᒋᐊᖅᓯᒪᓕᖅᑐᖅ ᐊᔪᙱᑦᑎᐊᖅᖢᓂ ᑎᖕᒥᓲᓕᕆᔨᐅᔪᖅ ATR-ᑯᑦ ᑳᒻ ᐃᐊᒃᑯᓐᓂᒃ, ᓯᕗᓪᓕᖅᐹᖑᔪᖅ ᑎᖕᒥᓲᓕᕆᔨᐅᓂᕐᒧᑦ ᐃᓅᑉᓗᓂ ᑳᒻ ᐃᐊᒃᑯᓐᓂᒃ. ᐅᖃᖅᖢᓂᓗ ᐊᓕᐊᓇᐃᑦᑐᕉᖅ ᐅᑉᓗᑕᒫᒃᑯᑦ ᖃᓄᐃᓕᐅᕈᑎᒋᔭᕆᐊᖃᖃᑦᑕᖅᑕᖏᑦ ᐊᓯᔾᔨᖃᑦᑕᕐᒪᑕ ᐊᒻᒪᓗ ᐊᒃᓱᕈᕐᓇᖃᑦᑕᕋᓗᐊᖅᖢᓂ ᐃᑲᔫᑕᐅᖕᒥᖕᒪᑦ.
“ᐃᓕᑦᑎᕙᓪᓕᐊᑦᑎᐊᖅᑐᖓ ᐊᓕᐊᓇᐃᑦᑎᐊᖅᖢᓂᓗ.”
ᒪᐃᓕ ᐅᖃᖅᖢᓂ ᖁᕕᐊᓱᒃᑐᕉᖅ ᑲᖏᖅᖠᓂᕐᒦᑦᑕᕆᐊᒃᓴᖅ ᐊᒻᒪᓗ ᑕᒫᓃᑦᑐᒪᔪᖅ ᐅᑭᐅᓂᒃ ᖃᐃᔪᓂᒃ.
ᖃᖓᑕᖃᑦᑕᓕᓵᖅᖢᓂ ᑲᒻ ᐃᐊᒃᑯᑦ, ᐊᒥᓱᑦ ᐊᔾᔨᓕᐅᕆᔪᒪᖃᑦᑕᓕᓚᐅᖅᑐᑦ ᐊᔾᔨᓕᐅᖅᑕᐅᖃᑎᖃᕈᒪᑉᓗᑎᒃ ᔨᐅᕆᒥᓗ ᖃᕆᑕᐅᔭᒃᑯᓪᓗ ᑕᑯᒃᓴᐅᒐᔪᓕᖅᖢᓂ ᐊᔾᔨᓕᐅᖅᑕᐅᖃᑕᐅᓯᒪᕐᓗᓂ ᐅᐱᒋᔭᐅᑉᓗᓂ ᓯᕗᓪᓕᖅᐹᖑᖕᒪᑦ ᐃᓅᑉᓗᓂ ᑎᖕᒥᓲᓕᕆᔨᐅᓂᕐᒧᑦ ᑲᖏᖅᖠᓂᕐᒥ.
ᒪᐃᓕ ᓈᒻᒪᑐᐃᓐᓇᓚᐅᖅᑐᖅ, ᐅᐱᒍᓱᕐᓚᓚᐅᖅᑑᒐᓗᐊᖅ ᐊᔾᔨᓕᐅᕆᔪᒪᔪᓂᒃ.
ᑲᖏᖅᖠᓂᕐᒥ ᐱᕈᖅᓴᖅᑕᐅᓂᑯ ᐊᓈᓇᖓ ᐃᓅᑉᓗᓂ, ᓵᓐᑎᐅ ᑕᐃᓚ, ᒪᐃᓕ ᓇᓗᓇᐃᖅᓯᓯᒪᔪᖅ ᐱᔪᒪᔭᖃᖅᖢᓂ ᐱᔪᓐᓇᖃᑦᑕᕐᒪᑕ ᐱᓕᕆᔪᒪᓂᖃᑐᐊᕈᓂ ᐃᓄᒃ.
ᐅᖃᖅᖢᓂ ᐊᔾᔨᐅᙱᕐᓚᒃᑐᕉᖅ ᐆᒃᑑᑎᑦᑎᐊᕙᐅᔪᑎᑐᑦ ᐃᓱᒪᒋᔭᐅᑉᓗᓂ, ᑭᓯᐊᓂ ᓈᒻᒪᒋᑐᐃᓐᓇᓕᖅᑕᖓ.
ᒪᐃᓕ ᐅᖃᖅᖢᓂ ᖃᖓᑕᑉᓗᓂᒎᖅ ᖁᕕᐊᒋᑦᑎᐊᕐᒪᒍ ᐊᓯᐊᓂᒎᖅ ᓴᓇᕝᕕᒃᑖᕆᐊᒃᓴᖅ ᐃᓱᒪᙱᑦᑐᕐᓘᓐᓃᑦ.
ᐅᖃᖅᖢᓂᓗ ᖃᖓᑕᑉᓗᓂᒎᖅ ᑎᖕᒥᓲᓕᕆᔨᐅᑉᓗᓂ ᓴᓇᕝᕕᒋᔫᔭᕐᓇᙱᒥᐊᖅᑐᖅ ᖁᕕᐊᒋᓗᐊᒧᑦ.
“ᐊᓕᐊᓇᐃᒋᑦᑎᐊᖅᑕᕋ ᖃᖓᑦᑕᕆᐊᕐᓂᖅ ᒥᑉᐸᓪᓕᐊᓂᕐᓗ,” ᑕᐃᒪᓐᓇ ᐅᖃᖅᖢᓂ ᒪᐃᓕ. “ᓯᕗᓂᐊᓂᓗ ᑎᖕᒥᓲᑉ ᐃᒃᓯᕙᑉᓗᓂ ᓄᓇ ᑕᐅᑐᑦᑎᐊᕐᓇᖅᑐᐊᓗᒃ ᓄᓇᒋᔭᖅᐳᑦ ᐱᐅᔪᐊᓗᒃ.”
“ᐅᐱᒍᓱᑦᑎᐊᖅᓯᒪᔪᖓ ᓄᓇᒋᔭᖅᐳᑦ ᑕᐃᒪᓐᓇ ᑕᐅᑐᖃᑦᑕᓚᐅᙱᒃᑲᓗᐊᕋᑉᑯ ᐱᐅᔪᓪᓚᕆᒃ, ᐊᒻᒪᓗ ᐊᓕᐊᓇᐃᑦᑑᓯᒪᑉᓗᓂ ᖃᖓᑕᑉᓗᓂ ᐊᔾᔨᓕᐅᕆᔪᓐᓇᖃᑦᑕᕐᓂᖅ.”