ᑕᒪᕐᒥᒃ ᑎᑭᕋᕐᔪᐊᒥᐅᑦ ᓄᕙᒡᔪᐊᕐᓇᖃᓕᓚᐅᖅᑐᑦ ᖃᓄᐃᖏᓕᖅᐳᑦ ᑎᓴᐱᕆ 8-ᖑᓚᐅᖅᑐᒥ, ᐅᖃᓚᐅᖅᐳᑦ ᓄᓇᕗᑦ ᒐᕙᒪᒃᑯᖏᑦ.
"ᐱᕚᓪᓕᕈᑎᖃᓚᐅᖅᐳᒍᑦ ᐃᑲᔪᖅᑎᒌᒃᖢᑕ ᓄᕙᒡᔪᐊᕐᓇᖅᑖᖅᑕᐃᓕᖁᑉᓗᒋᑦ ᐃᓅᖃᑎᕗᑦ ᓄᓇᕗᒻᒥ," ᐅᖃᓚᐅᖅᐳᖅ ᐹᑐᓴᓐ. "ᑎᑭᕋᕐᔪᐊᒥᐅᑦ ᓴᕆᒪᓱᒍᑎᖃᕆᐊᖃᖅᐳᑦ ᖃᓄᐃᓕᐅᕈᑎᒋᓚᐅᖅᑕᒥᖕᓂᒃ. ᐃᖅᑲᐃᖁᔨᒃᑲᓐᓂᖅᖢᖓ ᐃᓄᖕᓂᒃ ᑕᐃᒪᓐᓇᐃᑦᑐᖃᑐᐊᖅᐸᑦ ᓄᓇᓕᖕᓂ ᐊᓂᑦᑕᐃᓕᑎᑕᐅᔪᓂᒃ, ᓄᕙᕐᔪᐊᕐᓇᖃᖅᑐᖃᐃᓐᓇᕐᓂᐊᖅᐳᖅ. ᓄᓇᕗᒻᒥᐅᑦ, ᒪᓕᑦᓯᐊᖏᓐᓇᕆᑦᓯ ᐋᓐᓂᐊᖃᕐᓇᖏᑦᑐᓕᕆᔨᑦ ᖃᓄᐃᓕᐅᖁᔨᒍᑎᖏᓐᓂᒃ ᐳᐃᒍᖅᑕᐃᓕᓗᒋᓪᓗ ᑕᐃᒪᖓᓗᒃᑖᖅ."
ᑎᓴᐱᕆ 10-ᖑᓚᐅᖅᑐᒥ 42ᖑᓚᐅᖅᐳᑦ ᓄᕙᒡᔪᐊᕐᓇᖃᖅᑐᑦ ᓄᓇᕗᒻᒥ, ᑕᒪᕐᒥᒃ ᐊᕐᕕᐊᓂ. "ᖃᐅᔨᒪᕗᖓ ᐊᒃᓱᕈᕐᓇᕐᒪᑦ ᑕᒪᓐᓇ ᖁᔭᓐᓇᒦᕈᒪᑉᓗᒋᓪᓗ ᑕᒪᕐᒥᒃ ᐊᕐᕕᐊᒥᐅᑦ ᓯᐊᒻᒪᒃᑎᑦᓯᑦᑕᐃᓕᓂᕐᒧᑦ ᐃᑲᔪᕈᑎᖃᕐᒪᑕ ᓄᓇᓕᖏᓐᓂ," ᐅᖃᓚᐅᖅᐳᖅ ᓘᒃᑖᖅ ᒪᐃᑯ ᐹᑐᓴᓐ, ᓄᓇᕗᒻᒥ ᐋᓐᓂᐊᖅᑐᖃᓕᕆᓂᕐᒧᑦ ᐊᖓᔪᖄᕆᔭᐅᔪᖅ. "ᑭᓯᐊᓂ, ᓄᕙᕐᔪᐊᕐᓇᖅᑕᖃᒃᑲᓐᓂᖅᐸᑦ ᐊᕐᕕᐊᓂ, ᑕᒪᕐᒥᒃ ᓄᓇᓕᖕᓂᒥᐅᑦ ᐃᑲᔪᕆᐊᖃᖅᐳᑦ ᒪᓕᒡᓗᑎᒃ ᐋᓐᓂᐊᖅᑐᓕᕆᔨᑦ ᖃᓄᐃᓕᐅᖁᔨᒍᑎᖏᓐᓂᒃ. ᐅᖃᒃᑲᓐᓂᕈᒪᑉᓗᖓᓗ ᐊᒥᓱᐃᖅᑐᕋᓗᐊᕐᓗᖓ ᐊᒃᓱᕈᕐᓇᕈᑎᖃᕈᓐᓇᕐᒪᑦ ᖃᓄᐃᓕᐅᕈᑎᒋᔭᐅᔪᑦ ᒪᓕᒃᖢᒋ ᒪᓕᒃᑕᐅᖏᑉᐸᑕ. ᐱᐊᓪᓚᒐᓗᐊᖅᑕᐃᓕᒋᐊᖃᖏᑉᐳᓯ ᒪᓕᖏᓐᓇᕐᓗᓯ ᖃᓄᐃᓕᐅᖁᔭᐅᒍᑕᐅᔪᓂᒃ."
ᑲᑎᓪᓗᒋᑦ, 187 ᓄᓇᕗᒻᒥᐅᑦ ᓄᕙᒡᔪᐊᕐᓇᖃᓚᐅᖅᑐᑦ ᖃᓄᐃᖏᓕᑉᐳᑦ.
ᐊᐃᑦᑐᕐᓗᒃᑕᐅᓇᓱᒋᔭᐅᓯᒪᔪᓂᒃ ᖃᐅᔨᓴᕐᓂᖅ ᑕᒪᐃᓐᓂ ᓄᓇᓕᖕᓂ ᓄᕙᒡᔪᐊᕐᓇᖃᖅᑐᓂ ᓱᓕ ᐱᓕᕆᐊᕆᔭᐅᖏᓐᓇᖅᐳᖅ ᐊᒻᒪ ᐋᓐᓂᐊᖅᑐᓕᕆᔨᑦ ᑕᒪᕐᒥᒃ ᖃᐅᔨᓴᐃᓐᓇᖅᐳᑦ ᐊᓂᑦᑕᐃᓕᒋᐊᖃᖅᓯᒪᔪᓂᒃ.
ᑎᓴᐱᕆ 10-ᖑᓚᐅᖅᑐᒥ, ᐊᕐᕕᐊᒥᐅᑦ 784 ᖃᐅᔨᓴᖅᑕᐅᓚᐅᖅᖢᑎᒃ ᖃᓄᐃᖏᓐᓂᕋᖅᑕᐅᓚᐅᖅᐳᑦ.
ᖃᐅᔨᓴᖅᖢᒋᑦ ᓴᓂᑭᓗᐊᒥᐅᑦ, ᑲᖏᖅᖠᓂᕐᒥᐅᑦ ᐊᒻᒪ, ᑎᑭᕋᕐᔪᐊᒥᐅᑦ ᓱᓕ.
ᑭᓇᑐᐃᓐᓇᖅ ᑕᐃᒪᓐᓇ ᓄᕙᒡᔪᐊᕐᓇᖃᖅᑐᒥᒃ ᖃᓂᒋᔭᖃᓚᐅᕈᓂ ᐊᐃᑦᑐᖅᑕᐅᓯᒪᓇᓱᒋᒍᓂᓗ ᓄᕙᕐᔪᐊᕐᓇᒥᒃ ᐅᖃᓗᒍᓐᓇᖅᐳᖅ ᐅᑯᓄᖓ Covid-hotline 1-888-975-8601 ᐊᑯᓐᓂᖓᓂ 10 ᐅᑉᓛᒃᑯᑦ 6-ᒧᐊᕋᓱᐊᕐᓂᖓᓂ ᐅᓐᓄᒃᑯᑦ ᑲᓇᖕᓇᒥᐅᑦ ᖃᐅᔨᓴᐅᑎᖓᑦ ᒪᓕᒡᓗᒍ, ᐅᕝᕙᓘᓐᓃᑦ ᖃᐅᔨᑎᑦᓯᓗᑎᒃ ᐋᓐᓂᐊᖅᑐᓕᕆᔨᓂᒃ ᓄᓇᔅᓯᓐᓂᒃ ᑐᐊᕕᕐᓇᖅᑐᒃᑯᑦ, ᐊᓂᑦᑕᐃᓕᓕᕐᓗᑎᓪᓗ ᐅᑉᓗᓄᑦ 14-ᓄᑦ. ᐋᓐᓂᐊᕐᕕᓕᐊᖅᑕᐃᓕᓗᑎᑦ ᐃᖕᒥᓂᒃ.