ᑭᕙᓪᓕᕐᒥ ᒪᓕᒐᓕᐅᖅᑎ ᐃᓄᖕᓂ ᐊᕕᒃᓯᒪᓂᐅᔪᒥ ᐸᕐᓇᐅᑎᓕᐅᖁᕙᖏᑦ ᓴᐳᔾᔨᓯᒪᓂᕐᒧᑦ ᖃᒪᓂᕐᔪᐊᑉ ᑐᒃᑐᓂᑦ ᐃᓛᑰᓕᖓᓂᖏᓐᓂ ᑲᑕᒃᐸᓪᓕᐊᖏᓐᓇᖅᑐᒥ ᐅᓄᕐᓂᐅᔪᓄᑦ.
ᑕᖅᑭᐅᓚᐅᖅᑐᒥ ᒪᓕᒐᓕᐅᕐᕕᖕᒥ, ᑳᑎ ᑕᐅᑐᙱ, ᑲᖏᖅᖠᓂᕐᒥ ᐅᐊᖕᓇᒥ ᐊᒻᒪ ᐃᒡᓗᓕᒑᕐᔪᖕᒧᑦ ᒪᓕᒐᓕᐅᖅᑎ, ᓴᖅᑭᑎᑦᑎᓚᐅᖅᐳᖅ ᐃᓱᒫᓘᑕᐅᔪᓄᑦ ᑐᒃᑐᐃᑦ ᒥᒃᓴᓄᑦ “ᐊᒥᓱᐊᓗᐃᑦ ᑐᖁᑕᐅᕙᓪᓕᐊᓪᓗᑎᒃ ᑮᓇᐅᔭᓕᐅᕈᑎᒃᓴᐅᓪᓗᑎᒃ” ᐊᖑᓇᓱᒃᑎᓄᑦ ᐆᒪᔪᓐᓇᐅᑎᖃᕋᓱᐊᖅᖢᑎᒃ ᐃᓛᑰᓕᖓᓂᖏᓐᓂ.
Bylaw officers block the road to prevent traffic from disturbing migrating caribou on July 14. The hamlet, department of environment and hunters and trappers organization have been trying to stop large vehicles from getting in the way of caribou but have been letting hunters on ATVs pass. Cody Punter/NNSL photo
ᐊᐱᖅᓱᖅᑕᐅᓂᐅᔪᒥ ᑭᕙᓪᓕᕐᒥ ᓂᐱᕗᒻᒥ ᐱᓇᓱᐊᕈᓯᐅᓚᐅᖅᑐᒥ ᑕᐅᑐᙱ ᐅᖃᓚᐅᖅᐳᖅ ᓂᕿᓂ ᓱᕈᖅᑎᕆᑐᐃᓐᓇᖅᑐᓂ, ᐃᓄᐃᑦ ᐸᒡᕕᓵᕆᔪᓂ ᑕᒡᔪᐊᖅᑐᓂᑦ ᐃᓛᑰᓕᖓᓂᖏᓐᓂ ᐊᒻᒪ ᐊᖑᓇᓱᒃᑏᑦ ᓂᐅᕕᐊᒃᓴᖃᖅᑐᓂ ᓂᕿᓂᑦ ᑮᓇᐅᔭᓕᐅᕈᑕᐅᓪᓗᑎᒃ ᐊᖏᔪᕐᔪᐊᒥ ᐊᒃᓱᕈᖅᑎᑦᑎᕗᑦ ᑐᒃᑐᓄᑦ.
“ᓄᖑᓐᓂᐊᓕᖅᑕᕗᑦ ᐃᓛᑰᓕᖓᓂᑦᑎᓐᓂ – ᑭᓱᒧᑦ ᐊᑭᒋᔭᖓᓄᑦ? ᐱᔪᓐᓇᐅᑎᑦᑎᓐᓃ? ᑕᑯᓚᐅᕆᑦᑎ ᖃᓄᐃᓕᓚᐅᕐᓂᖓᓂ ᕿᑭᖅᑖᓗᖕᒥ,” ᐅᖃᓚᐅᖅᐳᖅ.
ᐅᖃᐅᓯᐅᓂᖓᓂ ᒫᓐᓇᓕᓴᐅᓛᖑᔪᓄᑦ ᓈᓴᐅᑎᓂᑦ, ᖃᒪᓂᕐᔪᐊᑉ ᐃᓛᑰᓕᖓᓂᖏᓐᓂ ᑲᑕᒃᓯᒪᕗᑦ 50 ᐳᓴᓐᑎᑲᓴᖕᒥ ᓇᓚᐅᑦᑖᕆᔭᐅᓯᒪᔪᒥ 500,000-ᓂ 1994-ᒥ 264,000-ᓄᑦ 2014-ᒥ. ᓄᑖᖑᔪᒥ ᓇᐃᓴᐃᓂᐅᓂᖃᓚᐅᖅᐳᑦ 2017-ᒥ. ᐅᓄᕐᓂᓪᓚᕆᖏᓐᓂ ᐊᑐᐃᓐᓇᐅᔾᔮᙱᓚᖅ ᑭᓯᐊᓂ ᐊᕐᕌᒎᓂᐊᖅᑐᒥ, ᓯᕗᓕᖅᑎ ᔫ ᓴᕕᑲᑖᖅ ᐅᖃᐅᔾᔨᓚᐅᖅᐳᖅ ᒪᓕᒐᓕᐅᕐᕕᖕᒥ ᓯᕗᓪᓕᖅᐹᒥ ᖃᓄᐃᓕᖓᓂᐅᔪᑦ ᓇᓗᓇᐃᖅᓯᕗᖅ ᑲᑕᒃᐸᓪᓕᐊᑐᐃᓐᓇᖅᑐᒥ.
ᑕᐅᑐᙱ ᓇᓗᓇᐃᖅᓯᓚᐅᖅᐳᖅ ᓂᐅᕕᐊᒃᓴᐅᓂᖓᓂ ᑐᒃᑐᓂᑦ ᐃᓚᒋᔭᐅᓯᒪᙱᓚᖅ ᓄᓇᕗᒻᒥ ᓄᓇᑖᕋᓱᐊᕐᓂᕐᒧᑦ ᐊᖏᕈᑎᖓᓂ ᐱᔾᔪᑎᖃᖅᖢᓂ ᐱᖅᑯᓯᑐᖃᖅᑎᒍᑦ ᐃᓕᖅᑯᓯᐅᔪᒧᑦ ᓂᕿᐅᔪᑦ ᑭᓇᑐᐃᓐᓇᕐᒧᑦ ᑐᓂᐅᖅᑲᖅᑕᐅᓪᓗᐊᕐᓂᖓᓂ. ᑕᐅᑐᙱ ᐅᖃᓚᐅᖅᐳᖅ ᐱᕈᖅᐸᓪᓕᐅᓂᐅᔪᒥ ᖕᕙᓪᓕᐅᑉ ᐃᓄᒋᐊᖕᓂᖏᓐᓂ, ᐊᓯᐅᔨᓂᐅᔪᒥ ᐱᖅᑐᓯᑐᖃᖅᑎᒍᑦ ᖃᐅᔨᒪᓂᐅᔪᒥ ᐊᒻᒪ ᐱᔪᒪᓂᐅᔪᒥ ᓂᕿᓪᓚᑦᑖᓂ ᓇᒥᑐᐃᓐᓇᖅ ᓄᓇᕗᒻᒥ ᐱᔾᔪᑕᐅᔪᓂ ᑲᑕᒃᐸᓪᓕᐊᓂᐅᔪᓂ ᑐᒃᑐᓄᑦ ᐅᓄᕐᓂᖏᓐᓂ ᓂᕆᐅᒋᔭᐅᓚᐅᙱᓚᑦ ᓄᓇᕘᑉ ᓇᓂᓯᔨᐅᔪᓄᑦ ᐊᑖᑕᐅᔪᓄᑦ.
“ᐊᑐᖅᐸᓚᐅᖅᑕᑦᑎᓐᓂ ᐃᓄᐃᑦ ᐊᐅᓪᓛᑐᐃᓐᓇᖅᐸᓚᐅᙱᓚᑦ ᐃᓱᒪᓇᑎᒃ ᐊᒻᒪ ᑐᖂᑦᑎᑐᐃᓐᓇᖅᖢᑎᒃ ᐆᒪᔪᓂᑦ,” ᐅᖃᓚᐅᖅᐳᖅ.
ᐊᖏᔪᒻᒪᕆᐊᓘᔪᒥ ᓂᐅᕕᐊᒃᓴᐅᔪᓐᓇᕐᓂᖓᓂ ᑐᒃᑐᓄᑦ ᐊᖑᓇᓱᒃᑕᐅᔪᓄᑦ ᑭᕙᓪᓕᕐᒥ ᐱᑎᑕᐅᓯᒪᕗᖅ ᐃᓚᖓᒍᑦ ᓱᓕᓂᐅᔪᒥ ᓄᓇᓕᖕᓂ ᕿᑭᖅᑖᓗᖕᒥ ᑭᒡᓕᖃᖅᑎᑕᐅᓯᒪᓂᖓᓂ ᑰᑕᐅᔪᒥ 250-ᓄᑦ ᐱᔪᓐᓇᐅᑎᐅᔪᓄᑦ ᐸᖕᓂᕐᓄᑦ ᑐᒃᑐᓄᑦ ᑕᐃᒪᙵᓂ 2014-ᒥ ᐱᑎᑕᐅᓂᐅᔪᒧᑦ ᐃᓛᑰᓕᖓᓂᖏᓐᓂ ᒥᒃᖠᒋᐊᕐᓂᐅᔪᓄᑦ 95 ᐳᓴᓐᑎᒧᑦ 5,000-ᑐᐃᓐᓇᓄᑦ ᑐᒃᑐᓂᑦ.
ᒪᓕᒃᑐᒥ ᒐᕙᒪᐅᔪᓄᑦ ᓇᓚᐅᑦᑖᕆᓂᐅᔪᓄᑦ ᖃᒪᓂᕐᔪᐊᑉ ᐃᓛᑰᓕᖓᓂᖏᓐᓂ ᑮᓇᐅᔭᓕᐅᖅᐳᖅ $11 ᒥᓕᐊᓐᓂ ᑮᓇᐅᔭᓂᑦ ᖏᐃᓯᖅᐸᓪᓕᐊᔪᓄᑦ ᓂᐅᕕᐊᒃᓴᖃᖅᐸᒃᑐᓄᑦ ᐊᖑᓇᓱᒃᑎᓂ ᓄᓇᕗᒻᒥ, ᓴᔅᑳᑦᓱᐊᓐᒥ ᐊᒻᒪ ᒫᓂᑑᐸᒥ.
ᑭᓯᐊᓂ ᑕᐅᑐᙱ ᐅᖃᓚᐅᖅᐳᖅ ᓇᐅᑦᑎᖅᓱᕐᓂᐅᔪᒥ ᐱᓕᕆᔾᔪᓯᐅᔪᒥ ᐃᓕᓯᒪᔪᖃᕐᓇᓂ ᐊᔪᕐᓇᑦᑎᐊᖅᐳᖅ ᖃᐅᔨᓴᖅᑕᐅᓂᖏᓐᓂ ᖃᔅᓯᓪᓚᕆᐅᓂᖏᓐᓂ ᑐᒃᑐᐃᑦ ᐊᖑᓇᓱᒃᑕᐅᓂᖏᓐᓂ.
ᓄᓇᕗᒻᒥ ᓄᓇᑖᕋᓱᐊᕐᓂᐅᔪᒧᑦ ᐊᖏᕈᑎ ᓇᓗᓇᐃᖅᓯᕗᖅ ᐃᓄᐃᑦ ᐱᔪᓐᓇᕐᓂᖃᕐᓂᖏᓐᓂ ᐊᖑᓇᓱᖕᓂᕐᒧᑦ ᐆᒪᔪᓂᑦ ᑭᒡᓕᖃᖅᑎᑕᐅᙱᓪᓗᑎᒃ.
ᑕᐅᑐᙱ ᐅᖃᓚᐅᖅᐳᖅ ᐊᖑᓇᓱᒃᑎᑦ ᐊᖑᓇᓱᒍᓐᓇᓪᓗᐊᖅᐳᑦ ᐃᓱᒪᖅᓱᑦᑎᐊᕐᓗᑎᒃ ᓂᕿᒃᓴᖃᖅᑎᑦᑎᓂᕐᒧᑦ ᐃᓚᒥᓂᑦ ᑭᓯᐊᓂ ᒪᓕᒐᕋᓛᖃᓪᓗᐊᖅᑐᖅ ᐃᓕᓯᒪᔪᒥ ᓂᐅᕕᐊᒃᓴᖃᕐᓂᐅᔪᒥ ᑐᒃᑐᓄᑦ ᐊᐅᓚᑕᐅᑦᑎᐊᕐᓂᖓᓄᑦ.
“ᐊᐅᓚᑦᑎᓂᖃᕆᐊᖃᖅᐳᖅ ᐊᒻᒪ ᓇᐅᑦᑎᖅᓱᕐᓂᕐᒥ ᐊᒻᒪᓗ ᑕᑯᓇᓱᒋᐊᖃᖅᐳᒍᑦ ᑰᑕᒥᑦ ᓴᓂᕐᕙᒃᓯᓯᒪᔭᕆᐊᖃᕐᒪᖔᑕ ᓂᐅᕕᐊᒃᓴᖃᕐᓂᕐᒧᑦ ᐱᔾᔪᑕᐅᔪᒧᑦ.”
ᐊᓯᔾᔨᕐᓂᐅᔪᑦ ᐆᒪᔪᓄᑦ ᐱᔭᕆᐊᖃᖅᑎᑦᑎᓇᔭᖅᐳᖅ ᐊᖏᖃᑎᒌᖕᓂᐅᔪᒥ ᐅᓄᕐᓂᖅᓴᓄᑦ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᓪᓗ ᑲᑐᔾᔨᖃᑎᒌᖑᔪᓄᑦ, ᐊᕕᒃᓯᒪᓂᐅᔪᓂ ᐆᒪᔪᓕᕆᔨᕐᔪᐊᖑᔪᓂ ᑲᑎᒪᔨᓂᑦ, ᓄᓇᕗᒻᒥ ᑐᙵᕕᒃᑯᓐᓂ ᐊᒻᒪᓗ ᓄᓇᕗᒻᒥ ᒐᕙᒪ.ᒃᑯᓐᓂ
“ᑲᑎᖃᑎᒌᒋᐊᖃᖅᐳᑦ ᑐᐊᕕᕐᓇᖅᑐᒥ ᑲᑎᒪᓂᐅᔪᒧᑦ ᖃᖓᑭᐊᖅ ᐊᒻᒪ ᐸᕐᓇᒍᑎᓕᐅᕐᓂᕐᒧᑦ ᑲᑎᒪᓂᖃᕐᓗᑎᒃ ᐊᒻᒪ ᐱᓕᕆᐊᖑᓗᓂ ᐃᓱᒪᑦᑎᐊᕋᓱᐊᕐᓗᑎᒃ ᐊᒻᒪ ᑐᑭᖃᕆᐊᑦᑎᐊᖅᑐᒥ, ᑕᐅᑐᑐᐃᓐᓇᕈᑦᑕ ᖃᓄᐃᑉᐸᓪᓕᐊᓂᖓᓂ ᐱᖃᕈᓐᓃᕐᓂᐊᖅᑐᒍᑦ ᐃᓛᑰᓕᖓᓂᑦᑎᓐᓂ,” ᐅᖃᓚᐅᖅᐳᖅ.
ᔅᑖᓐᓕ ᐋᑦᔪᒃ, ᐃᒃᓯᕙᐅᑕᐅᔪᖅ ᑭᕙᓪᓕᕐᒥ ᐆᒪᔪᓕᕆᔨᕐᔪᐊᒃᑯᓐᓂ ᑲᑎᒪᔨᖏᓐᓂ ᑎᑭᑕᐅᔪᓐᓇᓚᐅᙱᓚᖅ ᐅᖃᐅᓯᒃᓴᓕᐅᕐᓂᕐᒧᑦ.
ᐳᕋᐃᔭᓐ ᓯᒍᑦᓴᓐ, ᐃᒃᓯᕙᐅᑕᐅᔪᖅ ᐊᖑᓇᓱᒃᑐᓕᕆᔨᒃᑯᑦ ᒥᑭᒋᐊᕐᓂᐊᖅᑎᓪᓗ ᑲᑐᔾᔨᖃᑎᒌᖑᔪᑦ, ᐅᖃᓚᐅᖅᐳᖅ ᐅᖃᓪᓚᐅᓯᖃᕈᓐᓇᙱᓐᓂᖓᓂ ᐅᖃᐅᓯᐅᔪᒥ ᒫᓐᓇᐅᔪᒥ ᐅᖃᖃᑎᖃᖅᑳᕆᐊᖃᕋᔭᕐᒪᑦ ᐊᑲᐅᙱᓕᐅᕈᑕᐅᔪᒥ ᐊᓯᖏᓐᓂ ᐱᓕᕆᖃᑎᒋᔭᐅᔪᓄᑦ ᓯᕗᓪᓕᕐᒥ.
ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᑲᑎᒪᔪᓃᓚᐅᕐᒪᑦ ᐃᖃᓗᐃᑦ ᓯᓚᑖᓂ ᐊᒻᒪ ᑭᐅᔪᓐᓇᓚᐅᙱᓚᖅ.
ᑕᐅᑐᙱ ᐅᖃᓚᐅᖅᐳᖅ ᐱᓂᑐᐃᓐᓇᐅᙱᓚᖅ ᓴᖅᑭᑎᑦᑎᓂᕐᒥ ᒪᓕᒐᕋᓛᓂᑦ, ᑭᓯᐊᓂ ᐊᑐᓕᖅᑎᑦᑎᓂᕐᒥ ᐱᑕᖄᓂᒃᑐᓂ. ᐅᖃᐅᓯᖃᓚᐅᖅᐳᖅ ᐊᑲᐅᙱᓕᐅᕈᑕᐅᔪᒥ ᓂᕿᓂᑦ ᓱᕋᑦᑎᕆᑐᐃᓐᓇᕐᓂᐅᔪᒥ ᐊᒻᒪ ᐸᒡᕕᓵᕆᓂᐅᔪᒥ ᑕᒡᔪᐊᖅᑐᓄᑦ ᐃᓛᑰᓕᖓᓂᖏᓐᓂᑦ ᐆᒃᑐᕋᐅᑎᓪᓗᐊᑕᐅᓪᓗᑎᒃ.
“ᐃᓄᑐᖃᑦᑎᓐᓂ ᐊᓯᐅᔨᓂᑦᑎᓐᓂ ᑲᒪᒋᔭᖃᑦᑎᐊᙱᐊᓗᒃᑐᓂᑦ ᐊᖑᓇᓱᒃᑎᖃᓕᖅᐳᒍᑦ,” ᐅᖃᓚᐅᖅᐳᖅ. “ᐃᓚᖏᑦ ᐊᖑᓇᓱᒃᑎᐅᔪᑦ ᐱᓕᕆᒃᑲᒻᒪᕆᐊᓘᕗᑦ, ᖃᐅᔨᒪᕗᑦ ᖃᓄᐃᑦᑐᓂ ᑐᒃᑐᓂ ᑐᖂᑦᑎᓂᕐᒧᑦ, ᑭᓯᐊᓂ ᐃᓚᖏᑦ ᑕᐃᒪᐃᙱᓚᑦ.”
ᑕᒡᔪᐊᖅᑐᒥᑦ ᖄᖏᖅᓯᒪᓕᖅᑐᓄᑦ ᖃᔅᓯᐊᕐᔪᖕᓂ ᐱᓇᓱᐊᕈᓯᐅᔪᓂᑦ ᖕᕙᓪᓕᕐᒥ ᓂᐱᕗᑦ ᑐᓴᖅᓯᒪᕗᑦ ᖃᔅᓯᒐᓚᖕᓂ ᐅᖃᐱᓗᒃᑐᓄᑦ, ᐅᖃᖅᑐᓂ ᐃᓗᐃᑦᑐᓂ ᑐᒃᑐᓂᑦ ᖁᑭᖅᑕᐅᓂᑯᓕᖕᓂ ᕿᒪᒃᑕᐅᑐᐃᓐᓇᖅᑐᓂ ᐱᔭᐅᓇᑎᒃ ᒪᒃᑯᒃᑐᓪᓗ ᒪᓕᒃᓴᖅᑐᓄᑦ ᐃᓛᑰᓕᖓᓂᖏᓐᓂ ᑎᓴᒪᓕᖕᓄᑦ ᑕᐸᓱᑐᐃᓐᓇᕐᓂᕐᒧᑦ ᐊᒻᒪ ᖁᑭᕆᐊᖅᓯᓪᓗᑎᒃ ᖁᑭᐅᑎᓂᑦ ᑐᕌᖓᓂᐅᔪᓄᑦ ᐃᓄᖕᓄᑦ ᖁᙱᐊᖅᑐᓂ ᑕᒡᔪᐊᖅᑐᓂᑦ.
ᑕᐅᑐᙱ ᐅᖃᓚᐅᖅᐳᖅ ᐃᑲᔪᕈᑎᒃᓴᒃᑲᓐᓂᕐᓂ ᑐᕌᖓᓂᖃᕆᐊᖃᖅᐳᑦ ᐊᑐᓕᖅᑎᑦᑎᓂᕐᒧᑦ ᐆᒪᔪᓕᕆᓂᕐᒧᑦ ᒪᓕᒐᖓᓐᓂ, ᐱᓗᐊᖅᑐᒥ ᑕᒡᔪᐊᖅᑐᓐᓇᖅᑎᓪᓗᒍ ᐊᕐᕌᒍᖓᓂ.
“ᐃᓱᒪᑦᑎᐊᕆᐊᖃᖅᐳᒍᑦ ᐊᒻᒪ ᑐᑭᖃᑦᑎᐊᕆᐊᕐᓗᑕ ᖃᓄᖅ ᐱᓕᕆᐊᖃᕐᓂᐊᕐᓂᑦᑎᓐᓂ ᐱᔭᕆᐊᓕᑦᑎᓐᓂ ᓯᕗᓂᒃᓴᒧᑦ.”