ᑕᐃᒪ ᖁᕕᐊᓱᒡᕕᐅᓂᐊᓕᕐᒥᑎᓪᓗᒍ, ᖃᓄᑐᐃᓐᓇᖅ ᓄᓇᓕᒃ ᐃᑲᔪᕈᒪᕗᑦ ᑲᑐᔾᔨᖃᑉᓗᑎᒃ ᐊᒻᒪ, ᓇᐅᔮᓕ ᕼᐊᒻᓚᒃᑯᑦ ᐊᕐᕌᒍᑕᒫᖅᓯᐅᑎᒥᒃ ᑲᑎᖅᓱᐃᓂᐊᖅᐳᑦ ᓂᕿᓂᒃ.
ᑎᑎᕋᖅᑎ ᕼᐊᒻᓚᒃᑯᓐᓄᑦ ᕌᑉ ᕼᐃᑦᓕ ᐱᒋᐊᕈᑎᖃᓚᐅᖅᐳᖅ 2017-ᒥ ᓂᕿᓂᒃ ᑲᑎᖅᓱᐃᓂᕐᒧᑦ ᖁᕕᐊᓱᖕᓇᐅᓂᐊᖅᑐᒥ ᑐᓂᔭᐅᓂᐊᖅᑐᓂᒃ ᓇᐅᔮᓂ ᓄᕕᐱᕆ 16-ᒥ.
ᕼᐊᒻᓚᒃᑯᑦ ᑎᑎᕋᖅᑎᖓᑦ ᕌᑉ ᕼᐃᑦᓕ ᐅᖃᓚᐅᖅᐳᖅ ᑕᐃᒪᓐᓇ ᓂᕿᓂᒃ ᑲᑎᖅᓱᐃᓂᖅ ᖁᕕᐊᓱᖕᓇᐅᓂᐊᓕᖅᑎᓪᓗᒍ ᓇᐅᔮᓂ ᐱᓕᕆᐊᕆᔭᐅᒐᔪᖕᒪᑦ.
ᑎᑎᕋᖅᑎ ᐅᖃᓚᐅᖅᐳᖅ ᓄᓇᓕᒃ ᓂᕿᓂᒃ ᑲᑎᖅᓱᐃᓂ ᐊᕐᕌᒍᑕᒫᑦ ᐱᓕᕆᐊᕆᔭᐅᓇᓱᐊᖅᓯᒪᕗᖅ ᑲᔪᓯᑎᑕᐅᓇᓱᐊᖅᖢᓂ ᐊᑯᓂᐅᓕᖅᑐᖅ.
“ᐊᕐᕌᒍᑉ ᑐᖏᓕᐊᓂ ᑎᑎᕋᖅᑎᐅᓕᖅᐳᖓ ᕼᐊᒻᓚᒃᑯᓐᓄᑦ, ᐊᒻᒪ, ᐊᕐᕌᒎᓚᐅᖅᑐᒥ ᐱᓕᕆᒋᐊᓕᖅᖢᖓ ᓯᕗᓪᓕᖅᐹᒥ ᖁᕕᐊᓱᒡᕕᒃᓯᐅᓚᐅᖅᐳᖓ ᑕᒫᓂ, ᕼᐊᒻᓚᒃᑯᓪᓗ ᐅᖃᓚᐅᖅᐳᖅ ᖁᕕᐊᓱᒡᕕᖕᒥ ᓂᕿᓂᒃ ᑲᑎᖅᓱᐃᓂᖅ ᐊᑐᖅᑕᐅᒍᒪᓪᓗᓂ ᐊᕐᕌᒍᑕᒫᑦ ᑲᔪᓯᑦᓯᐊᖅᑎᑕᐅᓗᓂᓗ, ᐱᒋᐊᕈᑎᒋᓚᐅᖅᓯᒪᕙᕗᑦ ᓯᕗᕙᓯᒃᖢᑕ,” ᐅᖃᓚᐅᖅᐳᖅ ᕼᐃᑦᓕ.
“ᐃᓕᓯᓚᐅᖅᐳᒍᑦ ᐴᖅᑲᐃᕕᒃᓴᒥᒃ ᕼᐊᒻᓚᒃᑯᑦ ᑎᑎᕋᕐᕕᖓᓂ ᐃᑎᕆᐊᕐᕕᖓᓂ ᐃᓄᐃᑦ ᐴᖅᓯᖃᑦᑕᖁᑉᓗᒋᑦ ᓂᕿᓂᒃ ᒪᕐᕉᐃᖅᑕᖅᖢᑕᓗ ᑕᑕᓕᕐᓂᖓᓄᑦ ᐋᖅᑭᒃᓱᖅᑕᐅᒋᐊᒃᑲᓐᓂᖅᓯᒪᓕᖅᐳᑦ.
“ᑲᑎᓪᓗᒋᑦ, 69−ᓂᒃ ᐴᖅᓯᒪᔪᓂᒃ ᑲᑎᑦᓯᔪᓐᓇᓚᐅᖅᐳᒍᑦ 69-ᓄᑦ ᐃᓚᒌᓄᑦ ᐊᔾᔨᒌᖏᑦᑐᓄᑦ ᑐᓂᔭᐅᔪᒃᓴᐅᑉᓗᑎᒃ ᓄᓇᓕᖕᒥ.
“ᐊᕐᕌᒍᒥ ᐊᑐᖅᑐᒥ, ᐅᖁᖅᑐᓂᒃ ᐊᓐᓄᕌᓂᒃ ᐃᓚᓕᐅᔾᔨᓂᐊᖅᐳᒍᑦ ᐊᔾᔨᒌᖏᑦᑐᓂ ᐃᓄᐃᑦ ᓂᕿᓂᒃ ᑐᓂᓯᔪᓐᓇᖏᓐᓂᕈᑎᒃ ᑐᓂᓯᔪᓐᓇᖁᑉᓗᒋᑦ ᐳᐊᓗᓂᒃ ᓇᓴᕐᓂᒃ ᑐᐊᕕᐅᑎᒋᑉᓗᒍᓗ ᐱᒋᐊᕈᑎᒋᓚᐅᖅᐸᕗᑦ ᑕᐃᒪᓐᓇ ᐊᕐᕌᒍᓚᐅᖅᑐᒥ ᖃᓄᐃᓕᐅᕈᑎᒋᓚᐅᖅᑕᕗᑦ ᖄᖏᐅᑎᒍᒪᑉᓗᒋᑦ.”
ᕼᐊᒻᓚᒃᑯᑦ ᓇᓚᐅᑦᓵᕈᑎᖃᖅᐳᑦ ᐱᒋᐊᕈᑎᒃᓴᕆᔭᐅᓂᐊᖅᖢᓂ ᖁᕕᐊᓱᒡᕕᐅᓂᐊᖅᑐᒥ ᖃᓄᐃᓕᐅᕈᑕᐅᔪᓄᑦ ᑎᑭᓐᓇᓱᐊᕐᓂᐊᕐᓂᖓᓄᑦ ᖁᕕᐊᓱᒃᕕᖕᒥ ᐱᓐᖑᐊᖅᑎᑦᓯᓂᖅ.
ᕼᐃᓕ ᐅᖃᓚᐅᖅᐳᖅ ᑕᒪᒃᑯᐊ ᐊᒥᓱᑦ ᐃᓄᐃᑦ ᑐᓂᔭᐅᕙᒃᖢᑎᒃ ᓄᓇᓕᖕᓂᒥᐅᑕᐃᑦ ᐱᒋᐊᖃᖅᑐᑦ.
ᐅᖃᓚᐅᖅᖢᓂᓗ ᖁᕕᐊᓱᖕᓇᒥ ᓂᕿᓂᒃ ᑲᑎᖅᓱᐃᓂᖅ ᓄᓇ`ᓕᖕᓂᒥᐅᓄᑦ ᖁᕕᐊᒋᔭᐅᑦᓯᐊᖃᑦᑕᖅᐳᖅ, ᐱᓗᐊᖅᑐᒥᒃ ᑕᒪᒃᑯᐊ ᐃᓚᒌᑦ ᓇᐅᔮᓕ ᖁᕕᐊᓱᒡᕕᒃᓯᐅᑦᓯᐊᖁᑉᓗᒋᑦ.
“ᑕᒪᓐᓇ ᐊᔾᔨᒋᕙᖓ ᐃᓚᒌᓂᑦ ᑐᓂᔭᐅᓂᕐᒥᑎᑐᑦ ᐱᖃᖏᓐᓂᖅᓴᓄᑦ, ᑕᒪᒃᑯᐊᓗ ᑐᓂᔭᐅᔪᑦ ᓄᓇᓕᖕᓂᒥᐅᑦ ᐱᖃᖏᓐᓂᖅᓴᐅᒐᕖᖃᑦᑕᖏᑉᐳᑦ ᑐᓂᔭᐅᔪᓄᑦ.
“ᑕᒪᕐᒥᒃ ᐃᓄᐃᑦ ᖃᐅᔨᒪᒍᒪᖕᒪᑕ ᑕᒪᕐᒥᒃ ᐃᓚᒌᑦ, ᐱᓗᐊᖅᑐᒥᒃ ᓄᑕᖃᑦ ᖁᕕᐊᓱᒡᕕᐅᑦᓯᐅᑦᓯᐊᖁᑉᓗᒋᑦ.
“ᑕᐃᒪᓐᓇ ᐃᑲᔪᖃᑕᐅᒍᒪᒐᑉᑕ ᐃᓚᒌᓂᒃ ᖁᕕᐊᓱᒡᕕᐅᓂᐊᖅᑎᓪᓗᒍ ᐊᒻᒪ, ᐱᓗᐊᖅᑐᒥᒃ ᓄᑕᖃᓂᒃ ᑕᒪᒃᑯᐊ ᐃᑲᔪᖅᑐᑦ ᑕᒪᑐᒥᖓ ᑕᐃᒪᓐᓇ ᐃᓚᒌᒃᑑᖃᑕᐅᓂᕐᒧᑦ ᐃᓱᒪᒋᔭᖃᖅᐳᑦ.”
ᕼᐃᑦᔨ ᐅᖃᓚᐅᖅᐳᖅ ᑐᓴᓚᐅᖅᓯᒪᖏᓐᓇᒥ ᐅᖃᐱᓘᑕᐅᔪᓂᒃ ᖃᓄᖅ ᑕᒪᓐᓇ ᖁᕕᐊᓱᒡᕕᖕᒥ ᓂᕿᓂᒃ ᑲᑎᖅᓱᐃᓂᐅᖃᑦᑕᖅᑐᖅ ᐱᔾᔪᑎᒋᑉᓗᒍ.
ᐅᖃᓚᐅᖅᖢᓂᓗ ᑕᒪᒃᑯᐊ ᑐᓂᔭᐅᖃᑦᑕᖅᑐᑦ ᖁᔭᓐᓇᒦᕐᔪᐊᖃᑦᑕᖅᖢᑎᒃ ᖁᕕᐊᓱᒃᖢᑎᒡᓗ ᓴᕆᒪᓱᒃᖢᑎᒡᓗ ᑐᓂᓯᓂᕐᒧᑦ ᑲᑎᑕᐅᔪᓄᑦ ᓂᕿᓄᑦ.
'ᓄᓇᓕᖕᓂᖔᕐᓂᖏᑦ'
“ᑕᒪᓐᓇ ᓄᓇᓕᖕᓂᖔᖅᖢᑎᒃ ᐱᓕᕆᐊᕆᔭᐅᓂᖓ, ᓯᓚᑕᓂᒥᐅᑕᓂᑦ ᐱᒋᐊᖅᑕᐅᓯᒪᖏᑦᖢᓂ ᑎᒥᐅᔪᓂᑦ ᖃᑉᓗᓈᑦ ᓄᓇᖓᓐᓂᓘᓐᓃᑦ, ᐃᖕᒥᓂᒃ, ᐃᒪᓐᓇ ᐅᖃᖅᓯᒪᑉᓗᑎᒃ, ᐃᒪᓐᓇᐃᑦᑐᓂᒃ ᐃᓚᑉᑎᓐᓄᑦ ᑐᓂᓯᒍᒪᕗᒍᑦ ᐊᖓᔪᒋᔭᐅᔪᓄᑦ/ᓄᑲᕆᔭᐅᔪᓄᓪᓗ, ᓇᔭᖕᓄᑦ ᐊᓂᖕᓄᑦ, ᐊᑖᑕᐅᔪᓄᑦ, ᐃᓚᒋᔭᑉᑎᓐᓄᓪᓗ ᖁᕕᐊᓱᒡᕕᖕᒥ ᑕᒪᕐᒥᒃ ᐃᓄᐃᑦ ᖁᕕᐊᓱᖁᑉᓗᒋᑦ.
“ᖃᑉᓯᓂᒃ ᐃᑲᔪᕐᓂᐊᕐᓂᖅᐳᑦ ᐱᔾᔪᑎᖃᖅᐳᖅ ᖃᑉᓯᓂᒃ ᑲᑎᖅᓱᐃᓂᑉᑎᓐᓂᒃ ᐊᒻᒪ, ᐱᐊᓂᒃᑳᖓᑉᑕ, ᑲᑎᖅᓱᐃᓚᐅᖅᖢᑕ ᖃᐅᔨᓴᓕᖅᖢᑕ ᑎᑎᕋᖅᓯᒪᔪᒥᒃ ᒪᓕᒐᒃᓴᖃᖏᓐᓇᑉᑕ ᑭᑐᑦ ᑐᓂᔭᐅᒋᐊᖃᕐᒪᖔᑕ.
“ᐱᓪᓚᕆᒃᑑᔮᕋᔭᖏᓐᓇᑉᑕ ᑕᐃᒪᓐᓇ ᒪᓕᒐᒃᓴᖃᕐᓗᑕ, ᐊᖏᖃᑎᒌᒍᑎᑐᐃᓐᓇᑉᑎᓐᓂᒃ ᐊᑐᖃᑦᑕᖅᐳᒍᑦ ᑕᐃᒪᓐᓇ ᐊᐅᓪᓛᑦᓯᐊᖅᖢᓂᓗ ᐱᒋᐊᖃᓪᓚᕆᒃᑐᓂᒃ ᑐᓂᐅᖃᐃᖃᑦᑕᖅᖢᑕ, ᑕᐃᒪᓐᓇ ᐃᓚᒌᑐᐃᓐᓇᕐᓄᖓᖅᑕᐅᖏᑦᖢᑎᒃ.”
ᐃᑲᔪᕈᓐᓇᕐᓂᖅ ᐃᓚᒌᓂᒃ 69-ᓂᒃ ᓄᓇᓕᖕᒥ ᑕᐃᒪᓐᓇ ᐃᓄᒋᐊᖏᓂᖃᖅᑐᒥ ᓇᐅᔮᒥᐅᑎᑐᑦ ᐃᑲᔪᕈᑕᐅᑦᓯᐊᖅᐳᖅ ᖁᕕᐊᓱᒡᕕᐅᑎᓪᓗᒍ.
ᕼᐃᑦᓕ ᐅᖃᓚᐅᖅᐳᖅ ᖁᕕᐊᓱᑦᓯᐊᓚᐅᕋᒥ ᓂᕆᐅᓚᐅᖏᑦᖢᓂᓗ ᐃᑲᔪᖅᑐᖅᑕᐅᑦᓯᐊᓚᐅᕋᒥ ᓄᓇᓕᖕᓂᒥᐅᓂᑦ 2016-ᒥ ᖁᕕᐊᓱᒡᕕᖕᒥ ᓂᕿᓂᒃ ᑲᑎᖅᓱᐃᑎᓪᓗᒋᑦ.
ᐅᖃᓚᐅᖅᖢᓂᓗ ᐊᕐᕌᒎᓚᐅᖅᑐᒥ ᓇᓚᐅᑦᓵᕈᑎᑦ ᐊᖏᔪᒻᒪᕆᐅᓚᐅᕐᒪᑕ ᐊᒻᒪ, ᑕᐃᒪᑐᖅ, ᐊᖏᒡᓕᒋᐊᖅᑕᐅᔪᓐᓇᖅᖢᓂᓗ ᐊᕐᕌᒍᒥ ᐊᑐᖅᑐᒥ.
“ᐃᓄᐃᑦ ᒪᓕᒃᓴᑦᓯᐊᓚᐅᕐᒪᑕ ᐱᓕᕆᐊᕆᒍᒪᔭᑉᑎᓐᓂᒃ ᐊᕐᕌᓂᓂᑦ ᑕᐃᒪᓐᓇᐃᓕᐅᕈᒪᑉᓗᑕᓗ, ᓂᕆᐅᒃᖢᑕᓗ, ᐊᕐᕌᒍᒥ ᐊᑐᖅᑐᒥ.”
ᕼᐃᑦᓕ ᑐᓴᖅᑎᑦᓯᔾᔪᑎᖃᓚᐅᖅᐳᖅ Facebook−ᑯᑦ ᑖᒃᑯᐊ 3055 RCACC ᐅᓇᑕᖅᑐᒃᓴᖑᐊᓛᑦ ᓇᐅᔮᓂ ᐊᕐᕌᒍᒥ ᐊᑐᖅᑐᒥ ᐃᑲᔪᕐᓂᖏᓐᓄᑦ.
ᐅᖃᓚᐅᖅᖢᓂᓗ ᖃᓄᑐᐃᓐᓇᖅ ᑕᐃᒪᓐᓇ ᐃᑲᔪᖅᑕᐅᑉᓗᓂ ᐃᑲᔪᕐᓂᖃᓪᓚᕆᒃᐳᖅ, ᐊᒻᒪ ᓄᓇᓕᖕᓂ ᐅᓇᑕᖅᑐᒃᓴᖑᐊᓛᑦ ᐃᑲᔪᐃᓐᓇᖅᐸᖕᒪᑕ ᓄᓇᓕᖕᓂ ᖃᓄᐃᓕᐅᕈᑕᐅᔪᓂ.
“ᐅᓇᑕᕐᔪᐊᓚᐅᖅᓯᒪᔪᓂᒃ ᐃᖅᑲᐅᒪᓐᓇᐅᑎᓪᓗᒍ ᑕᒡᕙᓂ ᓄᕕᐱᕆ 10-ᒥ ᐱᑦᓯᐊᓚᐅᕐᒪᑕ, ᐊᒻᒪ ᐃᓄᐃᑦ ᑕᐅᑐᒃᑐᑦ ᐊᑐᖅᑕᐅᔪᓂᒃ ᖁᕕᐊᕆᔭᖃᖃᑦᑕᕐᒪᑕ ᐊᔪᖏᑦᓯᐊᕐᓂᖏᓐᓄᑦ ᐅᓇᑕᖅᑐᒃᓴᖑᐊᓛᑦ ᐃᓕᓐᓂᐊᖅᑎᑎᔨᖓᓪᓗ, ᓄᓇᓕᖕᓂᒥᐅᓄᑦ ᖁᕕᐊᒋᔭᐅᑦᓯᐊᖅᖢᑎᒡᓗ.
“ᐊᑖᑕᒐ ᐅᓇᑕᖅᑐᒃᓴᐅᖃᑕᐅᓯᒪᖕᒪᑦ, ᑕᐃᒪ ᐃᓚᐅᓂᖃᖃᑦᑕᖅᐳᖓ ᐅᓇᑕᕐᔪᐊᓚᐅᖅᑐᑦ ᐃᖅᑲᐅᒪᔭᐅᑎᓪᓗᒋᑦ ᐊᒻᒪ ᖃᐅᔨᒪᑉᓗᖓ ᖃᓄᐃᓕᐅᕐᒪᖔᕐᒪ ᑕᒡᕙᓂ ᐊᑐᖅᑕᐅᖃᑦᑕᖅᑐᑦ ᐊᔾᔨᐅᖏᑦᑑᖕᒪᑕ.
“ᐊᒥᓱᑦ ᓄᑕᖃᑦ ᐃᖏᕐᕋᔭᒃᑎᑕᐅᕙᒃᖢᑎᒡᓗ ᐊᔾᔨᒌᖏᑦᑐᓂᒃ ᐊᔪᖏᓴᖅᑎᑕᐅᖃᑦᑕᖅᖢᑎᒡᓗ ᓄᓇᓕᖕᓂ ᐅᓇᑕᖅᑐᒃᓴᖑᐊᓛᓄᑦ, ᑐᓱᓵᕆᔪᓐᓇᖅᖢᑕᓗ ᐊᖏᓛᖑᑉᓗᑎᒃ ᐅᓇᑕᖅᑐᒃᓴᖑᐊᖏᑦ ᓇᐅᔮᑦ ᓄᓇᕗᒥ.
“ᓄᓇᓕᖕᓂᒥᐅᓄᑦ ᐅᖃᖅᑎᐅᔪᓐᓇᖅᐳᖓ, ᑭᓯᐊᓂ ᓴᕆᒪᓇᑦᓯᐊᖅᐳᖅ ᑲᔪᓯᑦᓯᐊᖅᓯᒪᖕᒪᑕ ᓇᐅᔮᓕ ᐅᓇᑕᖅᑐᒃᓴᖑᐊᑦ ᑕᒪᓐᓇᓗ ᐅᖃᐅᓯᕆᖃᑦᑕᖅᖢᒍ ᐅᖃᓪᓚᓕᕌᖓᒪ ᖃᖓᑐᐃᓐᓇᖅ.”