ᔮᒃ ᐊᓄᒑᒃ ᕿᓂᓚᐅᖅᐳᖅ ᐊᓈᓇᖓᑕ ᐃᓗᕕᖓᓂ ᐊᕐᕌᒍᒐᓵᓗᖕᓄᑦ, ᐱᓗᐊᖅᑐᒥ ᕿᓂᖅᖢᓂ ᓇᓃᓐᓂᖓᓂ ᐅᖃᐅᓯᒃᑯᑐᐃᓐᓇᖅ ᐊᑐᐃᓐᓇᕈᖅᑎᑕᐅᓚᐅᖅᑐᒥ.
ᒫᓐᓇ ᓇᓂᓚᕗᑦ (Let's find them) ᖃᐅᔨᓴᖅᑕᐅᓂᑯᓂ ᑎᑎᕋᖅᑕᐅᓯᒪᔪᓄᑦ ᑐᖅᑯᖅᓯᒪᓂᐅᔪᓂ ᓇᓗᓇᐃᖅᓯᓯᒪᕗᑦ ᐃᓂᖓᓂ.
ᓇᓂᓚᕗᑦᐱᒋᐊᓪᓚᕆᓚᐅᖅᐳᑦ ᒫᔾᔨ 8-ᒥ ᐃᖃᓗᖕᓂ ᑲᓇᑕᐅᑉ ᐊᖓᔪᖅᑳᕐᔪᐊᖓ ᔭᔅᑎᓐ ᑐᕉᑑ ᒪᒥᐊᓚᐅᖅᑎᓪᓗᒍ ᒐᕙᒪᐅᑉ ᐱᓕᕆᓂᕆᓚᐅᖅᑕᖏᓐᓂ ᐃᓄᖕᓂ ᐳᕙᒡᓗᖕᓂᕐᒧᑦ ᐊᐃᑦᑐᐃᓂᕐᔪᐊᖅᑕᖃᖅᑎᓪᓗᒍ (TB).
ᐱᐅᕚ ᐱᕙᐅᓚᐅᖅᐳᖅ ᓇᐅᔮᓂ ᖃᓪᓗᓈᑦ ᓄᓇᖓᓐᓄᑦ ᐃᓅᓕᓴᖅᑕᐅᔭᖅᑐᖅᖢᓂ, ᐊᑕᐅᑦᑎᒃᑯᑦ ᐊᓯᖏᓐᓂ ᖃᓪᓗᓈᑦ ᓄᓇᖓᓐᓄᙵᐅᑎᓪᓗᒋᑦ ᐳᕙᒡᓗᖕᓂᕐᒧᑦ ᐃᓅᓕᓴᖅᑕᐅᓂᕐᒧᑦ, 1956-ᒥ ᐊᓄᒑᒃ 6-ᖑᑎᓪᓗᒍ.
"ᐊᕐᕌᒍᑦ ᒪᕐᕉᖕᓂ ᐊᓂᒍᖅᑎᓪᓗᒍ, ᒫᔾᔨᒥ 1958-ᒥ, ᑐᓴᓚᐅᖅᐳᒍᑦ ᐃᓅᔪᓐᓃᓚᐅᕐᓂᖓᓂ," ᐊᓄᒑᒃ ᐃᖅᑲᐅᒪᕗᖅ.
"ᐅᕙᑦᑎᓐᓂ ᐅᖃᐅᔾᔨᓚᐅᙱᑦᑐᑦ ᓇᒥ ᐃᓗᕕᖅᑕᐅᓯᒪᓂᖓᓂ."
ᐅᓄᒑᒃ ᐅᖃᖃᑎᖃᖅᑎᓪᓗᒍ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᓐᓄᑦ ᒪᐃ 2017-ᒥ, ᐃᒃᐱᒍᓱᓚᐅᖅᐳᖅ ᖃᓂᒡᓕᕙᓪᓕᐊᓇᓱᒋᓪᓗᓂ ᓇᓂᓯᓂᖓᓄᑦ. ᒫᓐᓇᓕᓴᐅᓛᖑᔪᒥ, ᖃᓂᒡᓕᒃᑲᓐᓂᖅᑰᔨᓚᐅᖅᐳᖅ, ᑐᙵᕕᖃᖅᑐᒥ ᐅᖃᐅᓯᒃᓴᓂ ᐊᕐᓇᒥᑦ ᐊᓄᒑᑉ ᓄᓕᐊᖓᑕ ᑳᓚᐃᓐ ᐹᓚᐅᖅᑕᖓᓄᑦ Fort Qu'Appelle, ᓴᔅᑳᑦᓱᐊᓐᒥ.
"ᑭᓯᐊᓂ ᐃᑲᔪᕈᑎᒃᓴᖃᓗᐊᓚᐅᙱᓚᒍᑦ ᕿᓂᓪᓚᕆᖕᓂᕐᒧᑦ. ᑕᐃᒫᒃ ᓇᓂᓚᕗᑦ ᐱᓕᕆᐊᖑᔪᑦ ᐱᒋᐊᕋᒥ, ᑐᓂᓚᐅᖅᐸᒃᑲ ᐊᓈᓇᒪ ᐊᑎᖓᓂ ᐊᒻᒪ E ᓇᐃᓴᐅᑎᖓᓂ. ᓇᓂᓚᐅᖅᐸᖓᑦ," ᐅᖃᓚᐅᖅᐳᖅ ᐊᓄᒑᒃ.
"ᑕᐃᑲᓂ ᐃᓂᐅᓚᐅᖅᐳᖅ, Oak River Reserve ᐃᓗᕕᖓᓐᓂ. ᓇᓂᓚᕗᑦ ᓇᓗᓇᐃᖅᓯᓚᐅᖅᐳᑦ."
ᐱᐅᕚᑉ ᐃᓗᕕᖓ ᓇᓂᓚᕗᑦ ᓯᕗᓪᓕᖅᐸᐅᓪᓗᓂ ᐱᓕᕆᑦᑎᐊᕐᓂᐅᕗᖅ, ᓇᓂᔭᐅᓪᓗᓂ ᐱᓇᓱᐊᕈᓯᐅᔪᒥ ᐱᒋᐊᖅᑎᑕᐅᓂᖓᓄᑦ.
"ᐊᒻᒪᓗ ᐃᒻᒪᖄ, ᑐᕉᑑ ᒪᒥᐊᓚᐅᖅᐳᖅ ᐊᕐᕌᒍᑦ 61-ᓄᑦ ᐅᓪᓗᖓᓂ ᐊᓈᓇᒪ ᑐᖁᕕᕕᓂᐊᓄᑦ, ᒫᔾᔨ 8-ᒥ," ᐅᖃᓚᐅᖅᐳᖅ ᐊᓄᒑᒃ.
ᐅᓪᓗᖓ ᑐᑭᖃᑦᑎᐊᖅᓯᒪᕗᖅ ᐊᓄᒑᖕᒧᑦ ᐊᓈᓇᖓ ᓇᓂᓰᓐᓇᓲᖑᓚᐅᕐᒪᑦ ᐋᔩᖃᑎᖃᕐᓂᕐᒧᑦ ᐃᒻᒥᓂᒃ ᐹᖅᓯᓂᐅᔪᓄᑦ ᐊᓯᖏᓐᓄᑦ ᓄᓇᕗᓕᒫᒥ ᖃᐅᔨᒪᓚᐅᖅᑐᓄᑦ ᐱᐅᕚᒥᑦ.
ᔪᐊᓇᓯ ᐊᑯᒪᓕᒃ ᓄᓇᕗᒻᒥ ᑐᙵᕕᒃᑯᓐᓂ ᓇᓂᓚᕗᑦ ᐱᓕᕆᐊᒃᓴᒧᑦ ᐊᐅᓚᑦᑎᔨᐅᕗᖅ. ᐅᖃᓚᐅᖅᐳᖅ 15-ᐸᓗᖕᓂ ᐃᓄᖕᓂ ᖃᐃᓯᒪᕗᑦ ᐊᐱᕆᓪᓗᑎᒃ ᐃᑲᔪᖅᑕᐅᔪᒪᓪᓗᑎᒃ ᓇᓂᓯᓂᕐᒧᑦ ᓇᒡᓕᒋᔭᒥ ᐃᓗᕕᖓᓐᓂ ᖃᓪᓗᓈᑦ ᓄᓇᖓᓐᓂ. ᖃᐅᔨᓴᖅᑕᐅᓂᑯᓂ ᑎᑎᕋᖅᑕᐅᓯᒪᔪᓄᑦ ᑐᖅᑯᖅᓯᒪᓂᐅᔪᓂ ᐃᓗᓕᖃᖅᐳᖅ 900-ᐸᓗᖕᓂ ᐊᑎᕐᓂ ᐃᓄᖕᓂ ᐅᑎᓚᐅᖅᓯᒪᙱᑦᑐᓂ ᐳᕙᓘᖕᓂᕐᒧᑦ ᐃᓅᓕᓴᖅᑕᐅᔭᖅᑐᓚᐅᖅᑐᓄᑦ ᖃᓪᓗᓈᑦ ᓄᓇᖓᓐᓂ.
ᐱᖓᓱᓂ ᐃᓗᕕᕐᓂᑦ ᓇᓗᓇᐃᖅᑕᐅᓯᒪᕗᑦ ᕿᓂᖅᑐᓄᑦ ᐃᓚᒌᖑᔪᓄᑦ ᒫᓐᓇᒧᑦ ᑎᑭᖦᖢᒍ, ᐅᖃᓚᐅᖅᐳᖅ ᐊᑯᒪᓕᒃ.
ᐅᖃᐅᓯᖃᖅᐳᖅ ᐱᓕᕆᓂᐅᕙᒃᑐᒥ.
"ᐅᕙᓐᓄᑦ ᐅᖃᓗᒐᔪᖅᑳᓲᖑᕗᑦ. ᐊᓱᐃᓛᒃ ᐅᓂᒃᑳᖅᑐᐊᓕᖅᖢᑎᒃ. ᕿᐊᓱᙳᓇᖅᓯᓲᖅ," ᐅᖃᓚᐅᖅᐳᖅ.
ᐊᑯᒪᓕᒃ ᐊᔾᔨᐅᙱᑦᑐᒥ ᓈᒻᒪᑦᑎᐊᖅᐳᖅ ᐱᓕᕆᓂᕐᒧᑦ ᐊᔪᕐᓇᖅᑐᐊᓗᖕᒥ ᑭᓯᐊᓂ ᖁᕕᐊᑦᑎᐊᕐᓇᖅᖢᓂ ᐱᓕᕆᓂᐅᕗᖅ. ᐃᑲᔪᓚᐅᖅᓯᒪᕙᖓ ᐊᑖᑕᒥᓂᑦᐊᒻᒪ ᐊᒃᑲᒥᓂᑦ ᓇᓂᓯᓂᖏᓐᓂ ᐊᑖᑕᖓᑕ ᐃᓗᕕᖓᓐᓂ ᕼᐋᒧᓪᑎᓐ, ᐋᓐᑎᐊᕆᐅᒥ ᐃᓗᕕᖃᕐᕕᖓᓐᓂ. ᐊᔾᔨᒋᐸᓗᒃᑎᑉᐸᖓ ᐸᓖᓯᑎᑐᑦ ᐱᓕᕆᓂᐅᔪᒧᑦ. ᖃᔅᓯᒐᓚᖕᓂ ᐊᑎᓕᐅᕆᓯᒪᓂᖃᐅᖅᐳᑦ ᑎᑎᕋᖅᓯᒪᓂᖏᓐᓂ, ᐊᒻᒪ E-ᓇᐃᓴᐅᑎᓂᑦ ᐊᑕᐅᓯᐅᙱᑦᑐᒧᑦ ᐊᑐᖅᑕᐅᓂᖃᓲᖑᕗᖅ. ᑎᑎᖅᑲᖁᑕᐅᔪᑦ ᐱᓯᒪᔭᐅᔪᓂ ᐊᑐᓂ ᐃᓗᕕᖃᕐᕕᐅᔪᓄᑦ ᐊᔾᔨᒌᙱᓚᑦ.
"ᐃᓚᖏᑦ ᐸᐸᑦᑎᑦᑎᐊᖅᐳᑦ ᑎᑎᖅᑲᖁᑎᑦᑎᐊᕙᐅᔪᓂ ᐊᒻᒪ ᐃᓚᖏᑦ ᑕᒪᐃᙱᓚᑦ. ᐅᓂᒃᑳᖅᑕᖃᓚᐅᖅᐳᖅ 'ᖃᐅᔨᒪᔭᐅᙱᑦᑐᒥ ᐃᓄᖕᒥ' ᔭᓗᓇᐃᕝᒥ. ᑕᒪᓐᓇ ᓂᕆᐅᒋᓚᐅᖅᐸᕗᑦ," ᐅᖃᓚᐅᖅᐳᖅ ᐊᑯᒪᓕᒃ, ᐃᓚᒋᐊᖅᓯᓪᓗᓂ ᐃᓚᖏᓐᓂ ᑎᒥᖓ ᐅᕐᔭᙳᖅᑎᑕᐅᓂᖓᓂ ᐅᕝᕙᓘᓐᓃᑦ ᐃᓂᖓᓂ ᓇᓗᓇᕐᓂᖓᓂ.
"ᓂᕆᐅᒋᓚᐅᕆᕙᕗᑦᑕᐅᖅ," ᐅᖃᓚᐅᖅᐳᖅ ᐊᑯᒪᓕᒃ.
"ᑕᐃᒫᒃ ᐃᖅᑲᓇᐃᔮᕋ ᐱᓗᖓ ᑕᐃᔅᓱᒥᖓ ᐅᖃᐅᓯᒃᓴᒐᓚᐅᔪᒥ. ᑲᑎᑎᖅᖢᒋᑦ ᐅᖃᐅᓯᒃᓴᐅᔪᓂ ᐱᓂᕐᒧᑦ ᓇᓚᐅᑦᑐᓂ ᐅᖃᐅᓯᒃᓴᐅᔪᓂᑦ. 100 ᐳᓇᓐᑎᒥ ᖃᐅᔨᒪᑦᑎᐊᕆᐊᖃᖅᐳᖓ."
ᐱᓕᕆᓂᐅᔪᖅ 10 ᒥᓂᑦ-ᖑᔪᓐᓇᖅᐳᖅ ᖃᔅᓯᒐᓚᖕᓄᑦ ᐱᓇᓱᐊᕈᓯᐅᔪᓄᑦ, ᒪᓕᒃᑐᒥ ᐊᒥᓱᓄᑦ ᐱᔾᔪᑕᐅᔪᓄᑦ, ᐃᓚᖃᖅᑐᒥ ᑲᓇᑕᐅᑉ ᐊᕕᒃᑐᖅᓯᒪᓂᐅᔪᓄᑦ ᒐᕙᒪᐅᔪᓄᑦ ᑭᐅᓂᕆᔭᖓᓐᓂ ᐊᑯᓂᐅᓂᖓᓂ.
ᐃᓄᐃᑦ ᖃᓱᕚᓪᓕᓲᖑᕗᑦ ᐱᒑᖓᑕ ᐅᖃᐅᓯᒃᓴᓂ, ᐊᒻᒪ ᕿᐊᕐᔪᐊᓲᖑᕗᑦ, ᐊᑯᒪᓕᒃ ᐅᖃᓚᐅᖅᐳᖅ. ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᖅᓱᐃᓂᖅᑕᖃᖅᐳᖅ ᑕᐃᒃᑯᓄᖓ ᐱᔭᕆᐊᖃᖅᑐᓄᑦ.
"ᐃᓱᐊᓂ, ᐃᒃᐱᒍᓱᖕᓂᐅᓚᐅᖅᐳᖅ ᖃᓱᓂᕐᔪᐊᖑᔪᒥ," ᐅᖃᓚᐅᖅᐳᖅ ᐊᓄᒑᒃ ᐱᐅᕙᐅᑉ ᐃᓗᕕᖓᓂ ᓇᓂᔭᐅᓪᓚᕆᖕᓂᐅᔪᒧᑦ.
"ᐊᒻᒪ ᓲᕐᓗ ᖁᕕᐊᕐᔪᐊᕐᓂᐅᔪᒥ. ᐃᓱᒪᔪᖓ ᐃᓱᒪᒧᑦ ᖁᐊᓱᙳᓂᐅᔪᒥ ᑎᑭᓐᓂᐊᖅᐳᖅ ᐃᓗᕕᕐᒧᐊᕈᑦᑕ."
ᐊᓄᒑᒃ ᐃᑲᔪᖅᑕᐅᓂᖃᕐᓂᐊᖅᐳᖅ ᑖᔅᓱᒧᖓ, ᐊᒻᒪᓗᑦᑕᐅᖅ, ᐅᓂᒃᑳᖅᐳᖅ ᐊᑯᒪᓕᒃ, ᓇᓂᓚᕗᑦ ᑮᓇᐅᔭᖃᖅᑎᑦᑎᓲᖑᕗᑦ ᒪᕐᕉᖕᓂ ᖃᖓᑦᑕᐅᑎᓄᑦ ᐃᓚᒌᖑᔪᓄᑦ, ᑐᔪᕐᒥᕕᒃᓴᖏᓐᓄᑦ ᐊᒻᒪ ᓂᕆᔾᔪᑎᒃᓴᓄᑦ.
"ᐃᓚᖏᑦ ᐃᓄᐃᑦ ᐊᐱᕆᓯᒪᕗᑦ ᓄᓇᕗᒻᒥ ᑐᙵᕕᒃᑯᑦ ᓇᓗᓇᐃᒃᑯᑕᖅᑖᖅᑎᑦᑎᔪᓐᓇᕐᒪᖔᑕ ᐃᓗᕕᖓ ᓇᓗᓇᐃᒃᑯᑕᖃᙱᒃᑯᓂ. ᑕᐃᒪᐃᑦᑐᓐᓇᖅᐳᒍᑦ," ᐅᖃᓚᐅᖅᐳᖅ ᐊᑯᒪᓕᒃ.
ᐊᑯᒪᓕᒃ ᐃᑲᔪᕈᓐᓇᕆᕗᑦ ᐋᖅᑭᒃᓱᐃᓂᕐᒥ ᖃᖓᑦᑕᐅᑎᖏᓐᓂ, ᐅᓯᔭᐅᓂᐅᔪᒧᑦ ᒪᓂᖅᑲᒥ, ᑐᔪᕐᒥᕕᖕᓄᑦ ᐃᓂᒃᓴᓕᐅᕐᓂᐅᔪᓄᑦ, ᑐᕌᕈᑕᐅᔪᓂ ᐃᓗᕕᕐᓄᑦ, ᐊᒻᒪ ᑭᓱᒥᒃ ᓂᕈᐊᖕᓂᐊᕐᓂᕐᒧᑦ ᐃᓗᕕᕐᓄᐊᕈᑎᒃ.
"ᐸᕐᓇᐅᑎᒃᓴᖃᖅᐳᖓ ᑕᐅᓄᙵᐅᓂᐊᕐᓂᓐᓂ ᔫᓂ 10-ᒥ, ᑎᒍᐊᖑᓪᓗᓂ ᓇᔭᒐᓗ – ᑎᒍᐊᖑᓂᑰᓪᓗᓂ ᐊᓈᓇᒋᕙᖓ – ᑕᐃᓐᓇ (ᐱᐅᕚᑉ) ᐸᓂᑐᐊᖓ," ᐅᖃᓚᐅᖅᐳᖅ ᐊᓄᒑᒃ.
"ᖁᕕᐊᓱᕐᔪᐊᖅᐳᖓ, ᓄᓇᕐᔪᐊᓕᒫᖅ ᖃᐅᔨᒪᖁᕙᒃᑲ, ᕿᐊᓱᙳᓇᕐᓂᐊᕋᓗᐊᖅᑐᒃᓴᐅᑎᓪᓗᒍ ᑕᐃᑯᙵᕈᑦᑕ."