ᓄᓇᒥ-ᑐᙵᕕᓕᖕᒥ ᐃᓕᓐᓂᐊᕐᓂᖅ ᐃᓱᒪᒋᔭᐅᓯᒪᓂᐅᕗᖅ ᓇᓄᖅ ᐃᓕᓐᓂᐊᕐᕕᖓᓂ ᐊᕐᕌᒍᒐᓴᓄᑦ, ᐊᒻᒪ ᓯᑎᐱᕆᐅᓚᐅᖅᑐᒥ ᑖᓐᓇ ᐃᓱᒪᒋᔭᐅᓂᐅᔪᖅ ᐱᓪᓚᕆᙳᓚᐅᖅᐳᖅ.
ᓄᓇ ᐃᓕᓐᓂᐊᕐᕕᖕᒥ ᐱᓕᕆᐊᖑᔪᖅ ᑕᑯᓲᖑᕗᖅ ᓱᕈᓯᓂ ᓄᓇᒥᒃ ᐊᑐᕐᓂᕐᒧᑦ ᐃᓕᓐᓂᐊᕐᕕᐊᕈᓯᒋᓪᓗᓂᔾᔪᒃ.
"ᑕᑯᕙᕋ ᑲᑎᑎᕆᓂᐅᔪᒥ ᐃᓄᐃᑦ ᐃᓱᒪᒋᓯᒪᔭᖏᓐᓂᑦ ᐊᒻᒪ ᐊᒃᓱᕈᕈᑕᐅᔪᓂ ᐊᕐᕌᒍᒐᓴᓄᑦ. ᓄᓇᓕᖕᓂᙶᓪᓚᕆᒃᐳᖅ, ᐊᖓᔪᖅᑳᖑᔪᓂ, ᐃᓕᓴᐃᔨᓂᑦ, ᐅᕙᒍᑦ ᓂᐊᖁᙴᒥ ᓄᓇᓕᖕᓂᑦ – ᐃᓄᐃᑦ ᑕᑯᔪᒪᕐᔪᐊᓚᐅᖅᐳᑦ ᑕᐃᒪᐃᑦᑐᒥ ᐱᓕᕆᐊᖑᓂᐅᔪᒥ ᑕᐃᒪᐃᓐᓂᖓᓂ," ᐅᖃᓚᐅᖅᐳᖅ ᐃᓕᓴᐃᔨᓄᑦ ᐊᖓᔪᖅᑳᖓᑦ ᒫᑦ ᓂᑯᓪᐸᐃᓐ.
ᒫᒋ ᑰᓂᓘᓯ, ᐃᓕᓴᐃᔨᐅᔪᖅ ᓇᓄᖅ ᐃᓕᓐᓂᐊᕐᕕᖓᓂ ᐊᕐᕌᒍᓄᑦ 23−ᓄᑦ, ᐃᓕᓐᓂᐊᖅᑎᓂᑦ ᓄᓇᒧᐊᕈᔾᔨᓯᒪᕗᖅ ᐊᕐᕌᒍᒐᓴᐅᔪᓄᑦ.
"ᑕᒡᓘᓄᑦ, ᑎᓂᙵᑎᓪᓗᒍ ᐱᓱᔪᖕᓂᐅᔪᓂ," ᐅᖃᓚᐅᖅᐳᖅ.
ᐳᕆᐋᓐ (ᐳᕇ) ᑳᑦ, ᓱᕈᓯᐅᓚᐅᖅᓯᒪᕗᖅ ᐃᓕᓐᓂᐊᕐᕕᖕᒥ ᐃᔨᕋᖅᑐᖅᖢᓂ ᐅᒡᔪᖕᓇᓂᑦ ᐃᓗᐊᓄᐊᕈᔾᔨᕙᓚᐅᖅᐳᖅ ᐊᒻᒪ ᑐᑭᖅᑎᑉᐸᓚᐅᖅᑕᖏᓐᓂ ᑭᐳᖓᑕ ᐃᓗᐊᓂ. ᓅᓚᐅᖅᓯᒪᕗᖅ ᓄᓇᕗᒻᒧᑦ ᐊᒻᒪ ᐃᓕᓐᓂᐊᖅᑎᑦᑎᓕᓚᐅᖅᐳᖅ ᓇᓄᖅ ᐃᓕᓐᓂᐊᕐᕕᖓᓂ ᐅᒃᑐᐱᕆ 2017−ᒥ.
"ᐅᖃᐅᓯᕆᓚᐅᖅᐸᕋ ᐱᓕᕆᐊᕆᕙᓚᐅᖅᓯᒪᔭᓐᓂ ᐃᓱᒪᓂᐅᔪᒥ ᓯᓚᒥ ᐃᓕᓐᓂᐊᕐᕕᐅᔪᒥ. ᓯᓚᒥ ᐃᓕᓐᓂᐊᕐᓂᕐᒧᑦ ᐱᓕᕆᔨᒻᒪᕆᐅᓪᓗᓂ ᐊᒻᒪ ᐃᓕᓴᐃᔨᐅᓪᓗᓂ, ᓂᕆᐅᖕᓂᕆᓚᐅᖅᐸᕋ ᐃᓕᓐᓂᐊᖅᑎᑦᑎᓐᓂ ᓯᓚᒧᐊᖅᑎᑦᑎᓂᕐᒧᑦ ᓄᓇᒥ−ᑐᙵᕕᓕᖕᒥ ᐃᓕᑦᑎᓂᖃᕐᓂᕐᒧᑦ ᐱᕕᒃᓴᖃᕐᓂᐅᔪᒥ," ᐅᖃᓚᐅᖅᐳᖅ.
"ᒫᒋ ᐅᖃᐅᓯᖃᓚᐅᖅᐳᖅ ᐊᓕᐊᓇᐃᒋᕐᔪᐊᕐᓂᖓᓂ ᐊᒻᒪ ᐊᑐᕐᓂᑯᖏᓐᓂ ᐃᓕᓐᓂᐊᖅᑎᓂᑦ ᓄᓇᒧᐊᕈᔾᔨᖃᑦᑕᕐᓂᖓᓄᑦ. ᐃᕐᙲᓐᓇᑲᐅᑎᒋ ᑲᑎᖃᑎᒌᓚᐅᖅᐳᒍᑦ ᐊᒻᒪ ᐃᓕᓐᓂᐊᖅᑎᕗᑦ ᓯᓚᒧᐊᕈᑎᓚᐅᖅᐸᕗᑦ ᓄᓇᒥ−ᑐᙵᕕᓂᖕᒥ ᐃᓕᑦᑎᓂᐅᔪᒥ ᐱᔪᓐᓇᑐᐊᕌᖓᑦᑕ."
ᑕᒪᓐᓇ ᑐᑭᖃᖅᐳᖅ ᐊᕐᕌᒍᒐᓴᓂ ᐅᖃᓪᓚᖃᑎᒌᖕᓂᐅᔪᓂ, ᐊᒻᒪ ᐊᕐᕌᒍᒐᓴᓂ ᐸᕐᓇᐃᓂᕐᒧᑦ, ᐃᓕᔭᐅᓪᓗᑎᒃ ᖃᓄᐃᓕᐅᕐᓂᐅᓂᕐᒧᑦ, ᐅᖃᓚᐅᖅᐳᖅ ᓂᑯᓪᐸᐃᓐ.
ᑕᑯᒃᓴᐅᑎᑕᐅᓂᖃᖃᑦᑕᓚᐳᖅᐳᑦ ᓂᐊᖁᙴᒥ ᐊᕕᒃᓯᒪᓂᐅᔪᓄᑦ ᐃᓕᓐᓂᐊᖅᑐᓕᕆᔨᒃᑯᓐᓄᑦ, ᑕᒪᒃᑭᑦ ᐃᑲᔪᖅᓱᐃᑦᑎᐊᖅᖢᑎᒃ. ᐱᓇᓱᐊᕐᓂᐅᔪᖅ ᐃᓕᓐᓂᐊᖅᑐᓕᕆᔨᒃᑯᓐᓄᑦ ᐱᓕᕆᑦᑎᐊᓚᐅᖅᐳᖅ.
ᐱᕚᓪᓕᕈᑎᖏᑦ ᓄᓇᒥ−ᑐᙵᕕᓕᖕᒥ ᐱᓕᕆᐊᖑᔪᒥ ᐃᓱᖃᙱᓚᑦ ᐊᒻᒪᓗ ᑕᖅᑭᓄᑦ ᒪᕐᕉᖕᓄᑦ ᐊᒻᒪ ᓇᑉᐸᖓᓂ ᓄᓇ ᐃᓕᓐᓂᐊᕐᕕᒃ ᐊᐅᓚᓯᒪᓂᖓᓂ, ᐅᔾᔨᕆᓯᒪᕗᒍᑦ ᐃᓕᓐᓂᐊᖅᑎᕗᑦ ᐋᓐᓂᐊᒐᔪᙱᓐᓂᖅᓴᐅᓂᖏᓐᓂ, ᓇᑉᐸᖓᑦᑎᐊᕐᓂᖅ ᐊᒻᒪ ᐱᓕᕆᔅᓲᔪᕈᓐᓇᕐᓂᖏᑦ ᐱᐅᓯᕚᓪᓕᖅᐳᑦ, ᑲᑎᙵᓪᓗᑎᒃ ᐱᓕᕆᖃᑎᒌᖕᓂᐅᔪᑦ ᐊᒻᒪ ᐋᔩᖃᑎᒌᖕᓂᑦ ᐱᐅᔪᒻᒪᕆᐅᕗᑦ, ᐊᑲᐅᙱᓕᐅᕈᑎᓂ ᐋᖅᑭᒃᓱᐃᓂᖅ ᐊᒻᒪ ᐱᓪᓚᕆᐅᔪᒥ ᐃᓱᒪᓂᖅ ᐅᖓᕙᕆᐊᕐᓂᖅᓴᐅᕗᑦ, ᐊᒻᒪ ᓄᓇᒦᓐᓂᐅᔪᖅ ᐊᒻᒪ ᐃᓂᖃᕐᓂᖓᓂ ᓄᓇᒥ ᐃᑲᔪᓲᖑᓂᖓᓂ ᐃᒻᒥᒃᑯᑦ−ᐊᐅᓚᑦᑎᓂᕐᒥ ᐊᒻᒪ ᐃᒃᐱᒍᓱᖕᓂᐅᔪᒥ ᐃᒻᒥᖕᓂᑦ,” ᐅᖃᓚᐅᖅᐳᖅ ᑰᓂᓘᓯ ᐊᒻᒪ ᑳᑦ.
"ᑕᑯᕙᓪᓕᐊᒋᕗᒍᑦ ᐅᖓᕙᕆᐊᖅᑐᒥ ᐅᖃᓪᓚᖕᓂᐅᔪᒥ ᑕᒪᒃᑭᓄᑦ ᐅᖃᐅᓯᕐᓄᑦ (ᐃᓄᒃᑎᑐᑦ ᐊᒻᒪ ᖃᓪᓗᓈᑎᑐᑦ), ᐃᓕᑦᑎᕙᓪᓕᐊᒐᑦᑕ ᐊᕐᕌᒎᑉ ᐃᓚᖓᓐᓂ ᒪᓕᒃᖢᑕ ᐊᒻᒪ ᑭᓱᓂᒃ ᓄᓇ ᐊᑐᐃᓐᓇᖃᕐᓂᖓᓂ ᐊᕐᕌᒎᑉ ᐃᓚᖓᓐᓂ."
ᐱᓪᓚᕆᐅᓂᐅᔪᖅ ᓯᓐᓇᒃᑐᕐᓂᐅᔮᖅᑰᔨᒃᑲᓐᓂᓕᓚᐅᖅᐳᖅ ᓄᑖᒥ ᑐᐱᕐᒥ ᐃᓕᓐᓂᐊᕐᕕᐊᕈᓯᕐᒥ – ᐅᖅᑰᓴᐅᑎᖃᖅᖢᓂ – ᓴᓂᓕᖓᓂ ᐃᓕᓐᓂᐊᕐᕕᓪᓚᕆᐅᔪᒥ ᐃᒡᓗᕐᔪᐊᖓᓐᓂ. ᓯᑭᑑ ᓂᐅᕕᒃᓴᑦ ᐊᒻᒪ ᐱᔨᑦᑎᕋᕐᓂᕐᒧᑦ ᖃᖓᑕᓲᒃᑰᖅᑎᑦᑎᓚᐅᖅᐳᑦ ᑐᐱᖅ ᑕᑉᐸᐅᖓ ᓂᐅᕙᓐᓛᓐᒥ ᐊᒻᒪ NCC ᐱᕙᓪᓕᐊᑎᑦᑎᓂᕐᒧᑦ ᓕᒥᑎᑦ ᑐᓂᓯᓚᐅᖅᐳᑦ ᓱᓇᒃᑯᑖᖏᓐᓂ ᐊᒻᒪ ᓇᑉᐸᖅᑎᕆᔭᐅᓂᖓᓂ ᑐᐱᖓᓂ, ᒪᑭᑎᑕᐅᓚᐅᖅᑐᒥ ᐱᓇᓱᐊᕈᓯᐅᓚᐅᖅᑐᒥ.
"ᑐᐱᖅ ᑕᖕᒫᕐᕕᓪᓚᕆᐅᕗᖅ, ᐃᓕᓐᓂᐊᖅᑏᑦ ᐅᖅᑰᓯᑦᑎᕆᐊᕐᕕᒋᓪᓗᓂᐅᒃ. ᐃᓄᑐᖃᐃᑦ ᐳᓚᕋᕈᓐᓇᖅᐳᑦ ᐊᒻᒪ ᐱᓕᕆᓂᖃᕐᓗᑎᒃ ᐃᓕᓐᓂᐊᖅᑎᓂᑦ, ᐅᕝᕙᓘᓐᓃᑦ ᐃᓕᓐᓂᐊᖅᑎᑦ ᐃᓄᒃᓱᒃ ᖁᑦᑎᒃᑐᒥ ᐃᓕᓐᓂᐊᕐᕕᖓᓐᓂ ᐅᐸᒍᓐᓇᖅᖢᑎᒃ ᐅᓂᒃᑳᕆᐊᖅᑐᕐᓗᑎᒃ. ᓄᓇᓕᖕᓂ ᐃᓂᐅᕗᖅ ᐸᓚᐅᒑᖅᑐᕐᓂᕐᒧᑦ (bannock), ᑏᑐᕐᓗᑎᒃ, ᐆᓇᖅᑐᒥ ᑯᑯᖕᒥ, ᐸᓂᖅᓰᓗᑎᒃ ᐊᓐᓄᕌᓂᒃ ᖁᓕᕈᐊᓂᑦ," ᐅᖃᓚᐅᖅᐳᖅ ᑳᑦ.
"ᐊᒻᒪᓗᑦᑕᐅᖅ, ᖃᐃᖁᔨᓂᕐᒧᑦ ᐃᓄᑐᖃᕐᓂ ᑐᐱᕐᒧᑦ ᐊᖏᒡᓕᒋᐊᖅᓯᓂᕐᒧᑦ ᖃᐅᔨᒪᓂᑦᑎᓐᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᓲᕐᓗ ᒥᖅᓱᕐᓂᕐᒥ ᐊᒻᒪ ᐱᒋᐊᖅᑎᑦᑎᓂᕐᒧᑦ ᕿᓯᓕᕆᓂᕐᒧᑦ ᐱᒋᐊᕐᓂᖓᓂ ᐃᓱᐊᓄᑦ ᓂᐱᓕᐊᕈᒪᓇᔭᖅᑕᑦᑎᓐᓂ ᓱᕈᓯᕐᓂᑦ," ᐅᖃᓚᐅᖅᐳᖅ ᑰᓂᓘᓯ. "ᓇᑉᐸᖅᑯᑕᐅᓪᓗᐊᖅᐳᑦ ᐃᓕᓐᓂᐊᕐᓂᑦᑎᓐᓂ, ᐊᒃᓱᓪᓘᓐᓃᑦ ᓄᓇᕗᑦᑎᓐᓂ. ᐊᒻᒪᓗᑦᑕᐅᖅ, ᒪᒃᑯᖕᓂᖅᓴᐅᔪᓄᑦ ᐃᓄᖕᓄᑦ, ᐃᓕᑦᑎᕝᕕᒋᔪᓐᓇᕆᕙᕗᑦᑕᐅᖅ, ᐱᓗᐊᖅᑐᒥ ᓄᓇᒦᓐᓂᑦᑎᓐᓂ. ᐅᖃᐅᓯᖅᑕᖃᐅᖅᐳᖅ, ᐃᓚᖏᑦ ᐅᖃᐅᓰᑦ ᐊᑐᖅᐸᙱᑕᑦᑎᓐᓂ ᓄᓇᓕᖕᓃᑎᓪᓗᑕ ᐅᕝᕙᓘᓐᓃᑦ ᐃᓕᓐᓂᐊᕐᕕᖕᒦᑎᓪᓗᑕ. ᐃᓄᒃᑎᑐᑦ ᐅᖃᐅᓯᕗᑦ ᐊᖏᒡᓕᒋᐊᕐᔪᐊᓲᖑᕗᑦ ᐅᖃᐅᓯᕐᓂᑦ ᐊᑐᖅᑕᐅᕙᙱᑦᑐᓂ ᐃᒡᓘᑉ ᐃᓗᐊᓂ."
ᐃᓄᑐᖃᖅ ᓲᓗᒨᓂ ᐊᕙ, ᓲᕐᓗ, ᐃᓕᓐᓂᐊᕐᕕᓕᐊᖅᓯᒪᕗᖅ ᐃᓕᓐᓂᐊᖅᑎᑦᑎᓂᕐᒧᑦ ᐃᒡᓗᕕᒐᓕᐅᕐᓂᕐᒧᑦ. ᐅᐱᕐᙶᒥᐅᓚᐅᖅᐳᖅ. ᑭᓯᐊᓂ ᒫᓐᓇ ᐅᖅᑰᔪᒥ ᑐᐱᕐᒥ, ᓇᓄᖅ ᐃᓕᓐᓂᐊᕐᕕᒃ ᖃᐃᖁᔨᒃᑲᓐᓂᕈᒪᓛᖅᐳᑦ ᐅᓄᕐᓂᖅᓴᓂ ᐃᓄᑐᖃᕐᓂᑦ.
"ᐃᓚᓕᐅᔾᔨᓂᐊᖅᐳᒍᑦ ᑐᙵᕕᐅᔪᓂ IQ−ᒥ (ᐃᓄᐃᑦ ᖃᐅᔨᒪᔭᑐᖃᖏᑦ) ᐊᒻᒪ ᓴᖅᑭᑎᑦᑎᓗᑕ ᖃᓄᖅ ᑐᑭᖃᓪᓚᕆᖕᓂᖏᓐᓂ ᐊᒻᒪ ᐃᓚᓕᐅᔾᔨᓗᒋᑦ ᑕᖅᑲᐅᖓ. ᐆᒃᑐᕋᖃᑦᑕᕐᓂᐊᖅᑕᕗᑦ, ᑕᖅᑳᓂ," ᑰᓂᓘᓯ ᐅᖃᓚᐅᖅᐳᖅ.