ᖃᑉᑎᕆᔩᑦ ᖃᐃᑲᐅᑎᒋᓂᖏᓐᓄᑦ ᖃᒥᑦᑎᑲᐅᑎᒋᔪᓐᓇᓚᐅᖅᑐᑦ ᐃᒡᓗᒥᒃ ᐃᑭᑦᑐᒥᒃ ᑲᖏᖅᖠᓂᕐᒥ ᑎᓯᐱᕆ 6-ᒥ.
ᑲᖏᖅᖠᓂᕐᒥ ᖃᑉᑎᕆᔨᒃᑯᑦ ᐊᖓᔪᖅᑳᖓ ᒪᑯᓯ ᕙᐃᔭᓐ ᐅᖃᓚᐅᖅᑐᖅ ᐅᖃᓗᒃᑐᖃᓚᐅᕐᓂᖓᓄᑦ 8:45-ᒥ ᐅᓐᓄᒃᑯᑦ ᐅᖃᖅᑐᖃᖅᖢᓂ ᐃᑭᑦᑐᖃᓕᕐᓂᖓᓄᑦ ᓯᑕᒪᐃᑦ ᐃᒡᓗᑦ ᑲᑎᙵᔪᑦ ᐃᓚᖓᓂ ᕿᑎᐊᓃᓐᓂᖅᓴᐅᔪᒥ Area 5-ᒥ ᑲᖏᖅᖠᓂᕐᒥ.
ᐅᖃᖅᖢᓂ ᐅᖃᓗᒃᑐᕉᖅ ᐅᐃᒪᔮᓚᐅᕐᒪᑦ ᐅᖃᖅᖢᓂᓗ ᐃᒡᓗ ᐃᑭᓕᕐᓂᕋᖅᖢᒍ, ᐃᑭᓐᓂᖓᒎᖅ ᓱᑲᔪᒻᒪᕆᐊᓗᒃ, ᖃᐃᑲᐅᑎᒋᖁᔨᑉᓗᓂᓗ.
“ᐃᑯᐊᓪᓚᒋᐊᖅᑎᑦᑎᔪᕕᓂᖅ ᐱᖓᓱᓂᒃ ᐅᑭᐅᓕᒃ ᓄᑕᕋᖅ ᐃᖕᓂᓕᕆᓕᕐᓂᕐᒪᑦ ᐃᒡᓕᕐᒥ ᐃᒡᓘᑉ ᑐᓄᐊᓂ,” ᑕᐃᒪᓐᓇ ᐅᖃᖅᖢᓂ ᕙᐃᔭᑦ.
“ᑐᓄᐊᓂ ᐳᔫᖅᑐᒻᒪᕆᐊᓘᓚᐅᖅᑐᖅ ᐊᒻᒪᓗ ᐃᒐᓛᑦ ᓯᖁᒥᓯᒪᓕᖅᖢᑎᒃ ᑕᐃᑯᙵ ᑎᑭᓐᓇᑉᑕ.” ᑕᐃᒪᓐᓇ ᐅᖃᖅᖢᓂ. “ᖃᑉᑎᕆᔨᕗᑦ ᐃᓗᐊᓅᖅᖢᑎᒃ, ᑭᓯᐊᓂ ᓇᓂᓯᑲᐅᑎᒋᔪᓐᓇᓚᐅᙱᑦᑐᑦ ᐃᑭᑦᑐᒥᒃ ᐳᔫᓗᐊᕐᒪᑦ ᐊᒻᒪᓗ ᐃᑯᐊᓛᖅᑐᖅ ᑐᓄᐊᓃᖦᖢᓂ.”
“ᐃᑯᐊᓛᖅᑐᖅ ᓯᐊᒻᒪᓚᐅᙱᑦᑐᖅ ᐊᓯᖏᓐᓄᑦ ᐃᒡᓗᒋᔭᐅᔪᓄᑦ ᐊᒻᒪᓗ ᖃᒥᑦᑐᓐᓇᓚᐅᖅᑕᖅᐳᑦ ᐊᓯᖏᑦ ᐃᒡᓗᑦ ᓱᕈᖅᑕᐅᓯᒪᙱᖦᖢᑎᒃ.”
ᕙᐃᔭᑦ ᐅᖃᖅᖢᓂ ᐃᑭᓚᐅᖅᑐᕉᖅ ᐃᒡᓗ ᐋᖅᑭᒃᓱᖅᑕᐅᔪᓐᓇᕐᓂᐊᖅᑐᖅ, ᑭᓯᐊᓂ ᐃᓚᖓ ᓴᓂᕋᖓ ᐲᔭᖅᑕᐅᔭᕆᐊᖃᕐᓂᐊᖅᑐᖅ ᐊᒻᒪᓗ ᐃᒡᓗ ᐃᓗᐃᑦᑐᒃᑯᑦ ᐃᓗᖓ ᒥᙳᐊᖅᑕᐅᔭᕆᐊᖃᕐᓂᐊᖅᖢᓂ.
ᐅᖃᖅᖢᓂᓗ, 13-ᖑᓚᐅᖅᑐᒡᒎᖅ ᖃᑉᑎᕆᔩᑦ ᐅᐸᒍᑎᓚᐅᖅᑐᑦ ᐃᖕᒥᓂᒃ ᐱᖃᑕᐅᑉᓗᓂ.
“ᑕᐃᑯᙵ ᑎᑭᐅᑎᖅᑳᓚᐅᖅᑐᖓ 8:48-ᒥ ᐅᓐᓄᒃᑯᑦ ᐊᒻᒪᓗ ᖃᑉᑎᕆᔨᒃᑯᑦ ᐱᓕᕆᕝᕕᐊᓄᑦ ᐅᑎᖅᓯᒪᓕᓚᐅᖅᑐᒍᑦ 11:30-ᒥ ᐅᓐᓄᒃᑯᑦ,” ᑕᐃᒪᓐᓇ ᐅᖃᖅᖢᓂ.
ᕙᐃᔭᑦ ᐃᓱᒫᓘᑎᖃᖃᑦᑕᖅᑐᕉᖅ ᐅᖃᐅᑎᔭᐅᑦᑎᐊᙱᓐᓇᔭᕐᓂᕐᒧᑦ ᐃᒡᓗ ᓇᓃᓪᓚᑦᑖᕐᒪᖔᑦ ᑕᐃᒪᐃᑦᑐᖃᖅᐸᑦ ᐃᓅᔪᓐᓃᖅᓯᒪᔪᖃᓕᖅᑎᓪᓗᒍ ᑎᑭᐅᑎᑐᐃᓐᓇᕆᐊᖃᕐᓂᖏᓐᓄᑦ.