ᑲᖏᖅᖠᓂᖅ ᓇᖕᒥᓂᖃᓕᖅᐳᑦ ᓄᑖᑦᓯᐊᒥᒃ ᓯᑯᒥᒃ ᓴᓗᒻᒪᖅᓴᐃᒍᑎᒥᒃ ᐊᑐᖅᑕᐅᖃᑦᑕᕐᓂᐊᖅᖢᓂ ᓯᐊᕐᕆᔮᕐᕕᒃ ᐊᑐᖅᑕᐅᓗᐊᖃᑦᑕᖅᑐᖅ ᓴᓗᒪᑎᑕᐅᓗᓂ ᓯᑯᖓ 2017-18-ᖑᐊᓂᐊᖅᑐᓂ ᕼᐋᑭᕐᓇᐅᓂᐊᖅᑐᒥ.
ᑲᖏᖅᖠᓂᕐᒥ ᐱᓐᖑᐊᖅᑐᓕᕆᔨᒃᑯᑦ ᑲᒪᔨᖓᑦ ᑏᕕᑦ ᑲᓛᒃ ᐅᖃᓚᐅᖅᐳᖅ ᓄᓇᓕᖕᓂ ᓯᕗᓪᓕᖅᐹᒥ ᓄᑖᒥᒃ ᓯᑭᒥᒃ ᓴᓗᒻᒪᖅᓴᐅᑎᖃᓕᖅᐳᑦ ᐅᑭᐅᓂ 15-ᖑᓯᒪᓕᖅᑐᓂ.
ᐅᖃᓚᐅᖅᖢᓂᓗ ᓄᑕᐅᖏᑦᑐᑦ ᓯᑯᒥᒃ ᓴᓗᒻᒪᖅᓴᐃᒍᑦ ᐃᖢᐃᓪᓕᐅᕈᑎᖃᓕᓚᐅᕐᒪᑦ ᐃᓱᒪᓕᐅᕈᑎᖃᓕᓚᐅᖅᐳᑦ ᓄᑖᒥᒃ ᓂᐅᕕᕆᐊᖃᕐᓂᕐᒧᑦ.
“ᑖᒃᑯᐊ ᑲᑉᐸᓂᒃᑯᑦ Tormont ᖃᐅᔨᓴᓚᐅᖅᐳᑦ ᓄᑕᐅᖏᑦᑐᒥᒃ ᓴᓗᒻᒪᖅᓴᐃᒍᑎᒥᒃ ᐊᑭᖃᕋᔭᓚᐅᖅᖢᓂᓗ ᐊᑯᓐᓂᖓᓂ $30,000ᓂᑦ $40,000ᓄᑦ ᐃᓚᒃᓴᓄᑦ ᐋᖅᑭᒃᓱᖅᑕᐅᓂᖓᓄᓪᓗ ᑕᐃᒪᓐᓇ ᓴᓗᒻᒪᖅᓴᖅᑕᐅᑦᓯᐊᕐᓗᓂ,” ᐅᖃᓚᐅᖅᐳᖅ ᑲᓛᒃ.
“ᑕᒪᓐᓇ ᐅᖃᐅᓯᕆᓚᐅᕋᑉᑯ ᑎᑎᕋᖅᑎᑉᑎᓐᓄᑦ, ᔭᔅᑕᓐ ᒥᐅᕆᑦ, ᐃᓱᒪᓕᐅᕈᑎᖃᓕᓚᐅᖅᐳᖅ ᓄᑖᒥᒃ ᓴᓗᒻᒪᖅᓴᐃᒍᑎᒥᒃ ᓂᐅᕕᕈᒪᑉᓗᓂ ᓄᑕᐅᖏᓐᓂᖅᓴᖅ ᐋᖅᑭᒃᓱᖅᑕᐅᕌᕐᔪᒡᓗᓂ ᐊᑐᖅᑕᐅᖃᑦᑕᕐᓂᐊᖅᖢᓂ ᓯᓚᒥ ᕕᓕᐊᒻᓴᓐ ᑕᓯᖓᓂ ᓴᓗᒻᒪᖅᓴᐅᑕᐅᓗᓂ ᓯᑯᒥᒃ.
“ᐊᑐᕈᓐᓇᕐᓂᐊᖅᐸᕗᓪᓗ ᑖᒃᑯᐊ ᑕᒪᕐᒥᒃ ᓴᓗᒻᒪᖅᓴᐅᑎᑦ ᕼᐋᑭᕐᔪᐊᕐᓇᐅᑎᓪᓗᒍ, ᕿᓚᒥᐅᓂᖅᓴᖅ ᐱᓐᖑᐊᕆᐊᕈᓐᓇᖃᑦᑕᕐᓂᐊᕐᒪᑕ. ᓄᑕᐅᖏᓐᓂᖅᓴᖅ ᒫᓐᓇ ᐋᖅᑭᒃᓱᖅᑕᐅᖕᒪᑦ, ᐱᓐᖑᐊᕐᓂᐊᓕᕈᑉᑕ ᓯᕗᓪᓕᕐᒥ ᐱᐊᓂᒃᑕᐅᓯᒪᓂᐊᖅᑐᒃᓴᐅᕗᖅ.”
ᑲᓛᒃ ᐅᖃᓚᐅᖅᐳᖅ ᓄᑖᖅ ᐊᑭᖃᓚᐅᕐᒪᑦ $100,000 ᐅᖓᑖᓄᑦ ᑕᐃᒪᓐᓇ ᐱᑕᖃᖅᖢᓂᓗ ᓯᕙᓂᕈᑎᓂᒃ ᖁᖁᐊᕈᑎᓂᒡᓗ.
ᐅᖃᓚᐅᖅᖢᓂᓗ ᕼᐊᒻᓚᒃᑯᑦ ᓄᑖᒧᑦ ᐊᑭᓖᓂᖅᓴᐅᓚᐅᖅᐳᑦ ᐃᕐᒥᐅᑎᖃᖅᖢᓂᓗ ᐃᒪᖃᐅᑎᖃᖅᑐᒥᒃ, ᑕᐃᒪᓐᓇ ᐱᐊᓂᑦᓯᐊᖅᓯᒪᓂᖅᓴᐅᑉᓗᓂ ᓴᓗᒻᒪᐃᖃᑦᑕᖅᖢᓂ.
“ᑕᐃᒪᓐᓇ ᐊᑭᑐᓂᖅᓴᐅᑉᓗᓂ, ᑭᓯᐊᓂ ᓯᑯᒥᑦ ᓴᓗᒪᓂᖅᓴᐅᑎᑦᓯᖃᑦᑕᕐᒪᑦ ᑕᐃᒪᓐᓇ ᐱᓐᖑᐊᖅᑎᑦᓯᓕᕌᖓᑉᑕ ᕼᐋᑭᕆᐊᖅᑐᖅᑐᓂᒃ, ᐱᓗᐊᖅᑐᒥᒃ ᐊᖏᓂᖅᓴᓂᒃ ᐱᓐᖑᐊᖅᑎᑦᓯᓕᕌᖓᑉᑕ, ᐱᒻᒪᕆᐅᖕᒪᑦ ᑕᒪᓐᓇ ᐃᓚᒋᐊᖅᑕᐅᓚᐅᖅᑐᑦ,” ᐅᖃᓚᐅᖅᐳᖅ.
“ᓄᑖᖅ ᓯᑯᒥᒃ ᓴᓗᒻᒪᖅᓴᐃᒍᑦ ᒥᑭᓂᖅᓴᐅᑉᓗᓂ ᓄᑕᐅᖏᑦᑐᒥᑦ ᒥᑭᓂᖅᓴᓂᒡᓗ ᐳᓪᓚᐅᔭᒃᑯᑦ ᐅᖅᓴᕐᕕᖃᖅᖢᓂ, ᐅᓗᕆᐊᓇᖏᓐᓂᖅᓴᐅᑉᓗᑎᒡᓗ ᑕᒪᒃᑯᓄᖓ ᐱᓕᕆᔨᓄᑦ.
“ᐊᑐᖅᑕᐅᔪᓐᓇᕐᓂᐊᖅᖢᓂ ᐅᑭᐅᓄᑦ 15ᓂᑦ 20-ᓄᑦ, ᑭᓯᐊᓂ, ᓲᖃᐃᒻᒪ, ᓯᓚᕗᑦ ᒪᓕᒃᖢᒍ ᐃᒃᑮᕐᓇᕐᓂᖓ ᐃᓗᐊᓂ ᕼᐋᑭᕐᕕᐅᑉ, ᐅᑭᐅᓂ ᖃᐃᔪᓂ ᑕᒪᒃᑯᐊ ᓴᓗᒻᒪᖅᓴᐅᑎᑦ ᕿᓚᒥᐅᓂᖅᓴᖅ ᐊᑐᖅᑕᐅᕙᖕᒪᑕ. ᓯᑯᒥ ᓯᓚᒥ ᐊᑐᖅᖢᒍ ᓄᑕᐅᖏᓐᓂᖅᓴᖅ ᐊᑯᓂᐅᓂᖅᓴᖅ ᐊᑐᖅᑕᐅᓂᖅᓴᐅᔪᓐᓇᕐᓂᐊᖅᐳᑦ ᓄᑖᖑᓂᖅᓴᖅ, ᑕᐃᒪᓐᓇ ᐱᓕᕆᒍᑎᒋᖃᑦᑕᕐᓗᒍ.”
ᑲᓛᒃ ᐅᖃᓚᐅᖅᐳᖅ ᕼᐋᑭᕐᓇᐅᓕᕐᒥᒃᐸᑦ ᑲᖏᖅᖠᓂᕐᒥ, ᐊᑐᖅᑕᐅᖏᓐᓇᕐᓂᐊᓕᕆᕗᖅ ᓴᓗᒻᒪᖅᓴᐅᑦ.
ᐅᖃᓚᐅᖅᖢᓂᓗ ᑕᐃᒪᖓᓗᒃᑖᖅ ᐅᑉᓗᓄᑦ 7−ᓄᑦ ᐊᑐᖅᑕᐅᓂᐊᕐᒪᑦ ᕼᐋᑭᕐᓇᐅᑎᓪᓗᒍ.
“ᖃᐅᔨᒪᕗᒍᑦ ᕼᐋᑭᖅᑎᑎᔪᑦ ᓄᓇᓕᖕᓂ ᐊᓯᖏᓐᓂ ᐃᖢᐃᓪᓕᐅᕈᑎᖃᖃᑦᑕᕐᒪᑕ ᓯᑯᒥᖕᓂᒃ ᖁᕕᐊᓇᖏᑦᖢᓂᓗ ᑕᒪᓐᓇ,” ᐅᖃᓚᐅᖅᐳᖅ.
“ᐱᓐᖑᐊᑦᓯᐊᕈᓐᓇᕐᓂᐊᖏᒻᒪᑕ ᑕᐃᒪᓐᓇ, ᐱᒻᒪᕆᐅᕗᖅ ᓴᓗᒻᒪᖅᓴᐅᑦ ᐱᒋᓕᖅᑕᕗᑦ.
ᐊᒻᒪ ᕼᐋᑭᖅᑎᕗᑦ ᐊᔪᖏᓐᓂᖅᓴᐅᔪᓐᓇᕐᒪᑕᓗ ᓯᑯᖃᑦᓯᐊᕐᓗᑎᒃ, ᐅᓗᕆᐊᓇᖅᑐᒦᖏᓐᓂᖅᓴᐅᓗᑎᒡᓗ ᓯᑯᖃᑦᓯᐊᕐᓗᑎᒃ − ᐅᓗᕆᐊᓇᖅᑐᒦᒋᐊᖃᖏᓐᓂᖅ ᐱᒻᒪᕆᐅᑎᑕᐅᑉᓗᓂ ᕼᐋᑭᕐᓇᐅᑎᓪᓗᒍ ᓯᐊᕐᕆᔮᕆᐊᖅᑐᖅᓯᒪᔪᓄᓪᓗ.”