ᒐᕙᒪᑐᖃᒃᑯᑦ ᑐᓴᖅᑎᑦᑎᔪᑦ $786,000 ᑮᓇᐅᔭᑦ ᐃᑲᔫᑕᐅᓂᐊᕐᒪᑕ ᓯᑕᒪᓄᑦ ᑭᕙᓪᓕᕐᒥ ᐱᓕᕆᐊᖑᔭᕆᐊᓕᖕᓄᑦ ᐃᒡᓗᓕᒑᕐᔪᖕᒥ, ᑲᖏᖅᖠᓂᕐᒥ ᐊᒻᒪᓗ ᑎᑭᕋᕐᔪᐊᕐᒥ ᑐᓴᖅᑎᑦᑎᔾᔪᑕᐅᑉᓗᓂ ᓄᕕᐱᕆ 15-ᒥ.
ᑐᓴᖅᑎᑦᑎᓂᖃᓚᐅᖅᑐᑦ ᑲᖏᖅᖠᓂᕐᒥ ᑐᓴᖅᑎᑦᑎᑉᓗᓂ ᒐᕙᒪᑐᖃᒃᑯᑦ ᐳᓚᕋᖅᑐᓕᕆᓂᕐᒧᑦ ᒥᓂᔅᑕᖓ ᒥᓚᓂ ᔪᓕ ᑭᒡᒐᖅᑐᐃᑉᓗᓂ ᒥᓂᔅᑕᒥᒃ ᑲᒪᔨᐅᔪᒥᒃ ᐅᑭᐅᖅᑕᖅᑐᒧᑦ ᐱᕙᓪᓕᐊᔪᓕᕆᓂᕐᒧᑦ) ᓇᕝᑏᑉ ᐸᐃᓐᔅ.
ᑲᓇᑕᒥ ᐱᕙᓪᓕᐊᔪᓕᕆᔨᒃᑯᑦ ᑮᓇᐅᔭᖅᑖᖑᔪᑦ ᑐᑭᖃᖅᑐᑦ ᑐᕌᕐᕕᒃ ᑐᔪᕐᒥᕕᒃ ᑲᖏᖅᖠᓂᕐᒥ, ᐱᑦᓯᐅᓛᖅ ᑯᐊᐸ ᐊᒻᒪᓗ ᑐᔪᕐᒥᕕᖓ ᐃᒡᓗᓕᒑᕐᔪᖕᒥ ᐊᒻᒪᓗ ᐃᓴᑎᒃ ᑯᐊᐸ ᓯᓂᒃᑕᕐᕕᒡᓗ ᑎᑭᕋᕐᔪᐊᕐᒥ ᐊᑐᓂ ᑮᓇᐅᔭᖅᑖᖅᑎᑕᐅᓂᐊᖅᑐᑦ $250,000-ᒥᒃ ᓄᑖᙳᖅᑎᖅᑕᐅᖁᑉᓗᒋᑦ.
ᓄᑖᙳᖅᑎᕆᓂᐊᖅᑐᑦ ᐃᒡᓗᑕᑦ ᐊᒥᓱᙳᕆᐊᖅᑕᐅᓗᑎᒃ, ᓄᑖᓂᒃ ᐱᖁᑎᑖᖅᑐᕐᓗᑎᒃ, ᐱᐅᓯᕚᓪᓕᖅᑎᓪᓗᒋᑦ ᐋᖅᑭᐅᒪᑎᑕᐅᖃᑦᑕᕐᓂᖏᑦ ᐱᔨᑦᓯᕋᖅᑕᐅᖃᑦᑕᕐᓂᖏᓪᓗ ᐊᒻᒪᓗ ᓄᑖᙳᖅᑎᓪᓗᒋᑦ ᐃᑭᑦᑕᖅᑐᖏᑦ ᐅᑉᓗᒥᐅᔪᖅ ᐊᑐᖅᑕᐅᖃᑦᑕᓕᖅᑐᓄᑦ ᐊᑐᙱᓐᓂᖅᓴᐅᔪᓐᓇᖅᓯᖁᑉᓗᒋᑦ ᖃᐅᒻᒪᖅᑯᑎᓂᒃ.
ᐊᒥᐊᒃᑯᖓ $36,440 ᑐᕌᖓᓂᐊᖅᑐᖅ ᐋᖅᑭᒃᓲᑕᐅᓗᓂ ᖃᕐᒪᓕᐊᖑᓯᒪᔪᓄᑦ ᐃᑦᓴᕐᓂᑕᖃᕐᕕᖕᒥ ᐃᒡᓗᓕᒑᕐᔫᑉ ᖃᓂᒋᔭᖓᓂᒃ, ᑮᓇᐅᔭᑦ ᐊᑐᖅᑐᒃᓴᓕᐊᖑᓯᒪᑉᓗᑎᒃ ᓄᓇᙳᐊᓕᐅᕐᓂᕐᒧᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐱᕙᓪᓕᐊᑎᑦᑎᓂᕐᒧᑦ.
ᔪᓕ ᐅᖃᖅᖢᓂ ᓯᑕᒪᐅᔪᒡᒎᖅ ᐱᓕᕆᐊᖑᔭᕆᐊᓖᑦ ᑮᓇᐅᔭᖅᑖᖅᑎᑕᐅᓯᒪᔪᑦ ᐊᒃᑐᐊᓂᓖᑦ ᐳᓚᕋᖅᑐᓕᕆᓂᕐᒧᑦ.
“ᑕᒪᕐᒥᒃ ᑲᑎᖦᖢᒋᑦ, ᓯᑕᒪᐅᔪᑦ ᐱᓕᕆᐊᒃᓴᑦ ᓴᓇᔭᒃᓴᖅᑖᖅᑎᑦᑎᔪᓐᓇᕐᓂᐊᖅᑐᑦ 100-ᓂᒃ ᑭᕙᓪᓕᕐᒥ,” ᑕᐃᒪᓐᓇ ᐅᖃᖅᖢᓂ ᔪᓕ. “ᐊᑕᐅᓯᖅ ᖁᓕᐅᔪᓂᒃ ᓴᓇᔭᒃᓴᓂᒃ ᑲᓇᑕᒥ ᐊᒃᑐᐊᓂᖃᖃᑦᑕᖅᑐᑦ ᐳᓚᕋᖅᑐᓕᕆᓂᕐᒧᑦ, ᑕᐃᒪᐃᒻᒪᑦ ᐅᖃᐅᑎᔪᒪᔭᖅᐳᑦ ᐃᓄᐃᑦ ᑲᖏᖅᖠᓂᕐᒥ ᐃᒡᓗᓕᒑᕐᔪᖕᒥᓗ ᓯᕗᓂᒃᓴᖃᑦᑎᐊᕐᓂᐊᕐᓂᕐᒥᓂᒃ ᓂᕆᐅᒍᓐᓇᕐᒪᑕ ᐊᒻᒪᓗ ᓴᕆᒪᓱᒍᓐᓇᖅᑐᑦ ᐱᓕᕆᐊᒥᓂᒃ.”
ᐃᓚᒌᒃᓴᒃᑯᑦ ᐱᕈᖅᑎᑦᑎᓯᒪᔪᑦ $884,800-ᒥᒃ ᑲᖏᖅᖠᓂᕐᒥ ᑐᔪᕐᒥᕕᖕᒥ ᓄᑖᙳᖅᑎᕆᓯᒪᑎᓪᓗᒋᑦ, $1,405,000-ᒥᒃ ᐃᒡᓗᓕᒑᕐᔪᖕᒥ ᐊᒻᒪᓗ $2,020,000-ᒥᒃ ᑎᑭᕋᕐᔪᐊᕐᒥ. ᐃᒡᓗᓕᒑᕐᔫᑉ Hᐊᒻᓚᖓ ᑐᓂᓯᓯᒪᔪᖅ $9,110-ᒥᒃ ᖃᕐᒪᓕᕆᓂᒃᑯᑦ.
ᔪᓕ ᐅᖃᐅᓯᖃᖅᖢᓂ ᑲᖏᖅᖠᓂᕐᒥ ᐅᖃᓚᐅᖅᑐᖅ ᑲᖏᖅᖠᓂᕉᖅ ᐱᒻᒪᕆᐊᓗᒃ ᑕᑯᔭᐅᑦᑎᐊᖅᓯᒪᙱᑐᐃᓐᓇᖅᑐᖅ ᒐᕙᒪᑐᖃᒃᑯᓐᓄᑦ ᐅᖃᓪᓚᒃᑎᓪᓗᒍ ᑮᓇᐅᔭᖅᑖᖅᑎᑦᑎᓂᒃᑯᑦ.
ᐅᖃᖅᖢᓂ ᐳᓚᕋᖅᑐᓕᕆᓂᕉᖅ ᐱᕈᖅᐸᓪᓕᐊᔪᖅ ᐊᕐᕌᒍᑕᒫᒃᑯᑦ 4%-ᒥᒃ, ᑕᐃᒪᐃᑦᑑᑎᓪᓗᒍ ᐱᕈᖅᐸᓪᓕᐊᓂᖅᐹᖑᓯᒪᔪᖅ ᐱᓕᕆᕝᕕᒡᔪᐊᓂᒃ ᓄᓇᕐᔪᐊᕐᒥ.
ᔪᓕ ᐅᖃᖅᖢᓂ ᒐᕙᒪᑐᖃᒃᑯᒡᒎᖅ ᐃᓚᐅᖃᑕᐅᑎᑦᑎᔪᒪᑦᑎᐊᖅᑐᑦ ᐃᓐᓇᑐᖃᕐᓂᒃ ᒪᒃᑯᒃᑐᓂᒡᓗ ᐱᕙᓪᓕᐊᑎᑦᑎᑎᓪᓗᒋᑦ ᖃᕐᒪᕐᒥᒃ ᐃᒡᓗᓕᒑᕐᔪᖕᒥ.
ᑭᓴᕐᕕᒃ ᑯᐊᑉ ᑲᑎᒪᔨᖓ ᓯᑎᕝ ᕗᕆᑦᓚᓐ ᑲᖏᖅᖠᓂᕐᒥᐅᑕᖅ ᐅᖃᖅᓗᓂ ᑲᖏᖅᖠᓂᕐᒥᒎᖅ ᑯᐊᐸ ᑯᐊᐸᒃᑯᑦ ᐃᓚᒋᔭᐅᔪᑦ 1,100-ᒦᒻᒪᑕ ᐊᒻᒪᓗ ᐃᓚᒋᔭᐅᖃᑕᐅᔪᑦ ᐊᒥᓱᙳᖅᐸᓪᓕᐊᖕᒪᑕ.
ᐅᖃᖅᖢᓂᓗ ᑯᐊᐸᒎᖅ ᐃᓚᒋᔭᐅᖃᑕᐅᔪᓪᓗ ᖁᔭᓕᑦᑎᐊᖅᑐᑦ $250,000-ᑖᖅᑎᑕᐅᖕᒪᑕ ᒐᕙᒪᑐᖃᒃᑯᑦ ᐱᕙᓪᓕᐊᔪᓕᕆᔨᒃᑯᖏᑦᑕ ᑮᓇᐅᔭᖁᑎᖏᓐᓂᒃ ᑲᖏᖅᖠᓂᕐᒥ.
“ᐅᖃᖃᑎᖃᖅᓯᒪᙱᑦᑐᖓ ᑎᑭᕋᕐᔪᐊᕐᒥᐅᓂᒃ ᐅᕝᕙᓘᓐᓃᑦ ᐃᒡᓗᓕᒑᕐᔪᖕᒥᐅᓂᒃ, ᑭᓯᐊᓂ ᖃᐅᔨᒪᔪᖓ ᐱᕕᒃᓴᖃᖅᑎᑕᐅᒍᑎᒃ ᑕᒫᓃᑦᑐᓐᓇᕐᓂᕐᒧᑦ ᖁᔭᓐᓇᒦᕈᔾᔭᐅᔪᒪᓇᔭᖅᑐᑦ ᖁᔭᓐᓇᒦᒃ,” ᑕᐃᒪᓐᓇ ᐅᖃᖅᖢᓂ ᕗᕆᑦᓚᓐ.
ᑮᓇᐅᔭᑦ ᐃᑲᔫᑕᐅᓂᐊᖅᑐᑦ ᑮᓇᐅᔭᓕᖅᓯᓂᒃᑯᑦ ᓄᑖᙳᖅᑎᕆᓂᕐᒧᑦ ᑐᕌᕐᔪᒃ ᓯᓂᒃᑕᕐᕕᖕᒥ, ᑲᒪᒋᔭᐅᓗᑎᒃ 21 ᐃᒡᓗᑕᑦ, ᑲᑎᒪᕝᕕᒃ, ᐃᒐᕝᕕᒃ, ᓂᕆᕝᕕᒃ ᐊᒻᒪᓗ ᐃᓚᒋᐊᖅᑕᐅᓗᓂ ᖁᐊᖅᓯᐅᕝᕕᒡᔪᐊᖃᓕᕐᓗᓂ, ᖁᓛᖓᓗ ᐋᖅᑭᒃᓱᖅᑕᐅᓗᓂ.
“ᑕᐃᒪᐃᒻᒪᑦ ᑮᓇᐅᔭᑦ ᐊᑐᖅᑕᐅᑦᑎᐊᕐᓂᐊᖅᑐᑦ,” ᑕᐃᒪᓐᓇ ᐅᖃᖅᖢᓂ.