ᓯᓐᓇᖅᑑᒪᓂᐊᕈᕕᑦ, ᐊᖏᔪᒥᒃ ᓯᓐᓇᖅᑑᒪᓇᓱᐊᕐᓂᐊᖅᐳᑎᑦ.
ᑕᐃᒪᓐᓇ ᒪᓕᒐᖃᖅᐳᑦ ᐊᕐᓇᕐᓃᑦ ᐅᔭᐅᑦᑕᖅᑎᖏᑦ (Northern Lights Gymnastics) Club ᓵᓚᒃᓴᐅᑎᖃᑕᐅᓂᐊᖅᖢᑎᒃ ᐱᒋᐊᖅᑎᑦᓯᓚᐅᖅᓯᒪᔪᖅ ᐃᓕᓐᓂᐊᖅᑎᑎᔨᒻᒪᕆᖓᓪᓗ ᓖᓴ ᑯᕆᔅᑭ ᐅᔭᐅᑦᑕᖅᑎᒥᓂᒃ ᐃᓚᐅᑎᑦᓯᖁᔨᑦᓯᐊᖅᐳᖅ ᖃᓄᑐᐃᓐᓇᕐᓗ ᐱᓇᓱᐊᕐᓂᐊᖅᐳᖅ ᐃᓚᐅᑎᑦᓯᓇᓱᐊᕐᓂᐊᕐᓗᓂ.
ᐊᕐᕌᒍᒥ ᐊᑐᖅᑐᒥ, ᐅᔭᐅᑦᑕᖅᑎᑦ ᐱᓐᖑᐊᖅᑎᖃᖅᐳᑦ 22-ᓂᒃ, ᒪᒃᑯᒃᑐᑦ 7−ᓂᒃ ᐅᑭᐅᖃᖅᑐᑦ ᐊᒻᒪ ᐱᖓᓱᒃ ᒪᒃᑯᒃᑑᑉᓗᑎᒃ ᐃᓅᓱᒃᑐᑦ.
ᐅᔭᐅᑦᑕᖅᑎᑦ ᐊᐅᓪᓚᕐᓂᐊᖅᖢᑎᒃ Las Vegas−ᒧᑦ ᕕᕗᐊᕆ 23-ᒥᑦ ᒫᑦᓯ 5-ᒧᑦ ᓵᓚᒃᓴᐅᑎᖃᑦᑕᐅᑎᓂᐊᖅᖢᑎᒃ ᓄᑕᕋᓪᓗ ᐊᒥᐊᓕᑲᒥᐅᑦ, ᐊᒻᒪ ᕼᐊᓐᑐᐊᕋᔅᒥᐅᑦ ᐊᒻᒪ ᒥᒃᓯᑯᒥᐅᑦ.
ᒪᒃᑯᒃᑐᑦ ᑲᖏᖅᖠᓂᕐᒥ ᐅᔭᐅᑦᑕᖅᑎᑦ ᓵᓚᒃᓴᐅᑎᖃᑦᑕᐅᑎᓂᐊᖅᐳᑦ Vegas−ᒥ, ᖃᓄᐃᓕᐅᕈᑎᖃᕐᓗᑎᒡᓗ ᑕᑯᓐᓇᖅᑕᐅᓗᑎᒃ.
ᑯᕆᔅᑭ ᐅᖃᓚᐅᖅᐳᖅ ᓂᕆᐅᒃᐳᑦ ᑲᖏᖅᖠᓂᕐᒥ ᐅᔭᐅᑦᑕᖅᑎᑦ ᐃᓕᓐᓂᐊᖁᑉᓗᒋᑦ ᕙᓕᐹᖕᒥ ᐅᔭᐅᑦᑕᕐᕕᖕᒥ ᐊᒻᒪ Vegas−ᒥ ᓵᓚᒃᓴᐅᑎᓚᐅᖏᓐᓂᕐᒥᖕᓂ.
`ᐅᖃᓚᐅᖅᖢᓂᓗ ᖁᕕᐊᓱᖕᒪᑕ ᑐᓴᖅᑎᑎᒍᓐᓇᕋᒥᒃ ᓯᑕᒪᑦ ᒪᒃᑯᒃᑐᑦ ᓂᕈᐊᖅᑕᐅᓚᐅᕐᓂᖏᓐᓄᑦ − ᔫᓯ ᐸᓂᑲ, AJ Libatique, ᑲᐃᔪ ᐊᒃᓴᕐᓂᒃ ᐊᒻᒪ ᒪᔭ ᕼᐃᕋᑐ − ᑭᒡᒐᖅᑐᕐᓂᐊᕐᓗᑎᒃ ᓄᓇᕗᒥᐅᓂᒃ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᓐᖑᐊᕐᔪᐊᓕᖅᐸᑕ ᒫᑦᓯᐅᓂᐊᖅᑐᒥ ᕼᐃᕆᕗ ᓄᓇᑦᓯᐊᒥ.
“ᐊᒥᐊᓕᒐᐃᑦ ᓄᓇᖓᓂ Vegas ᐊᖏᔪᒻᒪᕆᐅᖕᒪᑦ ᐊᒻᒪ, ᑮᓇᐅᔭᓕᐅᕈᓐᓇᑐᐊᕈᒪ ᐱᕈᖅᓴᐃᓗᖓ ᓈᒻᒪᒃᑐᓂᒃ ᕚᓐᑰᕙᓕᐊᕈᒪᕗᒍᑦ ᔫᓐ 26ᒥᑦ ᔪᓚᐃ 3, 2018-ᒧᑦ, ᑲᓇᑕᒥ ᐅᔭᐅᑦᑕᕆᐊᖅᑐᖃᑕᐅᓗᑕ ᐊᒥᓱᓂ,” ᐅᖃᓚᐅᖅᐳᖅ ᑯᕆᔅᑭ.
“ᐅᔭᐅᑦᑕᖅᑎᑦ ᑲᓇᑕᒥᑦ ᐃᓚᐅᔭᖅᑐᕐᓂᐊᖅᐳᑦ ᑕᒪᐃᓐᓂ ᐃᒡᓗᑉ ᐃᓗᐊᓂ ᓯᓚᒥᓗ ᐅᔭᐅᑦᑕᕐᓂᐊᕐᒪᑕ ᐅᑉᓗᓂ ᐱᖓᓱᓂ ᕚᓐᑰᕙᒥ.
“ᐃᓕᓐᓂᐊᖃᑕᐅᓂᐊᖅᖢᑎᒡᓗ ᐅᔭᐅᑦᑕᕆᐊᖅᓯᒪᓗᑎᒃ, ᑲᑎᑦᓯᔪᓐᓇᕐᓂᐊᕐᓗᑎᒃ ᐅᔭᐅᑦᑕᖅᑎᐅᖃᑕᐅᔪᓂᒃ ᓇᑭᑐᐃᓐᓇᖅ ᑲᓇᑕᒥᐅᑕᐅᖃᑎᒥᓂᒃ.
“ᐃᓕᓐᓂᐊᖃᑕᐅᓂᐊᖅᖢᑎᒡᓗ ᐊᔾᔨᒌᖏᑦᑐᓂᒃ ᐃᓚᐅᓗᑎᒃ ᑕᐅᓇᓂ, ᓄᑕᖃᑦ ᑲᑎᑦᓯᔪᓐᓇᕐᓂᐊᖅᖢᑎᒡᓗ ᐅᔭᐅᑦᑕᖅᑎᐅᖃᑎᒥᓂᒃ ᖃᓄᐃᓕᐅᖅᑎᓂᒡᓗ ᐊᓯᖏᓐᓂᑦ ᓄᓇᓕᖕᓂ ᑲᓇᑕᒥ.
“ᐊᒻᒪ, ᑲᓇᑕᒥᐅᑦ ᑕᑯᕋᓐᓂᕈᓱᒃᐸᑕ ᐅᕙᑉᑎᓐᓂᒃ, ᓯᓐᓇᖅᑑᒪᕗᒍᑦ ᑏᒻ ᑲᓇᑕ ᐊᒻᒪ ᓯᓚᕐᔪᐊᒥ ᐅᔭᐅᑦᑕᖅᑎᓄᑦ ᐃᓚᐅᖃᑕᐅᓕᕐᓗᑕ ᐱᒍᒪᕗᒍᑦ ᑕᐃᑲᓂ ᐊᔅᑐᐊᒥ, ᔪᐃᓚ 5 14-ᒧᑦ 2019-ᒥ.”
ᑯᕆᔅᑭ ᐅᖃᓚᐅᖅᐳᖅ ᑲᖏᖅᖠᓂᕐᒥ ᐅᔭᐅᑦᑕᖅᑎᑦ ᕚᓐᑰᕙᓕᐊᕈᓐᓇᖅᐸᑕ, ᓯᓚᕐᔪᐊᒥ ᐅᔭᐅᑦᑕᖃᑕᐅᔭᖅᑐᕈᓐᓇᕆᕗᑦ.
ᐅᖃᓚᐅᖅᖢᓂᓗ ᑕᒪᓐᓇ ᑐᓗᕈᑎᑐᐊᖅ ᑮᓇᐅᔭᖃᖏᒻᒪᑕ.
“ᐱᓕᕆᐊᖃᕈᓐᓇᕋᑉᑕ, ᐱᒍᒪᓪᓚᕆᒍᑎᖃᖅᖢᑕᓗ ᐊᒻᒪ ᖁᕕᐊᒋᑉᓗᒍ ᐃᖃᐃᓕᓴᐅᑎᕗᑦ, ᑕᐃᒪ ᑮᓇᐅᔭᐃᑦ ᑐᓗᕈᑕᐅᒋᐊᖃᖏᒻᒪᑕ ᑭᓯᐊᓂ ᐊᐃᑦᑖ ᑐᓗᕈᑕᐅᕗᑦ ᖁᔭᓐᓇᒦᖃᑦᑕᕐᒪᑕ ᑮᓇᐅᔭᑎᒍᑦ ᐃᑲᔪᖃᑦᑕᕐᒪᑕ ᑕᒪᒃᑯᐊ ᓲᕐᓗ Nuna Logistics, Calm Air, ᐊᒻᒪ Nanuq Lodge ᐃᑲᔪᖅᓯᒪᑉᓗᑎᒃ ᓯᓐᓇᒃᑑᒪᒋᔭᑉᑎᓐᓂᒃ ᐅᔭᐅᑦᑕᖃᑕᐅᓂᕐᒧᑦ.
“ᖁᕕᐊᓇᑦᓯᐊᕋᔭᖅᐳᑦ ᐃᓚᒋᔭᐅᖃᑕᐅᓗᓂ ᑏᒻ ᑲᓇᑕᒃᑯᓐᓄᑦ ᓯᓚᕐᔪᐊᒥ ᐅᔭᐅᑦᑕᕐᔪᐊᖃᑕᐅᓗᓂ, ᓄᓇᓕᕐᔪᐊᑦ 50 ᐅᖓᑖᓄᑦ ᐊᒥᓲᑎᒋᔪᑦ ᐃᓚᐅᖃᐅᓂᐊᖅᐳᑦ ᐊᒥᓲᓂᖅᓴᐅᓗᑎᒡᓗ 20,000 ᐅᖓᑖᓄᑦ ᐃᓚᐅᔪᑦ.
“ᐊᖏᔪᒻᒪᕆᐅᓪᓗᓂ ᓯᓚᕐᔪᐊᒥ ᐊᑐᖅᑕᐅᓂᐊᕐᒪᑦ, ᐊᖏᓂᖃᕐᓗᓂ ᐅᓕᑉᐱᒃᑎᑐᑦ, ᐃᓚᒋᓗᐅᒐᔭᖅᖢᑕᓗ ᑏᒻ ᑲᓇᑕᒃᑯᓐᓄᑦ ᐊᒻᒪ 600 ᑲᓇᑕᒥᐅᓄᑦ.
“ᑭᒡᒐᖅᑐᐃᓗᓂ ᑲᖏᖅᖠᓂᖅ, ᓄᓇᕗᒥᒃ ᐊᒻᒪ ᑲᓇᑕᒥᒃ ᑕᐃᒪᓐᓇ ᐃᖏᔪᒻᒪᕆᐅᖃᑕᐅᔪᒥ ᐅᐱᓐᓇᑦᓯᐊᕋᔭᖅᐳᖅ ᑕᒪᐃᓐᓄᑦ ᐃᓚᐅᔪᓄᑦ.”
ᑯᕆᔅᑭ ᐅᖃᓚᐅᖅᐳᖅ ᐅᔭᐅᑦᑕᖅᑎᑦ ᖁᕕᐊᓱᑦᓯᐊᕐᒪᑕ ᓈᓴᐃᕙᓪᓕᐊᓕᖅᖢᑎᒡᓗ ᖃᖓ ᐱᓐᖑᐊᖃᑕᐅᓂᐊᕐᒪᖔᕐᒥᒃ. ᐅᖃᓚᐅᖅᖢᓂᓗ ᐃᓱᒫᓗᒍᑎᑐᐊᖓᑦ ᐃᓚᐅᖏᑐᐃᓐᓇᕆᐊᖃᕐᒪᑕ ᖁᕕᐊᓱᖏᓕᕐᓗᑎᒡᓗ ᑮᓇᐅᔭᓂᒃ ᐱᕈᖅᓯᒍᓐᓇᖏᒃᑯᑎᒃ ᐊᐅᓪᓚᖃᑕᐅᒍᑎᒋᓂᐊᖅᑕᒥᖕᓂᒃ.
“ᐅᔭᐅᑦᑕᕐᔪᐊᕐᓂᖅ ᓵᓚᒃᓴᐅᑎᐅᑎᖃᑦᑕᐅᓂᐊᖏᑉᐳᑦ, ᑭᓯᐊᓂ, ᐅᔭᐅᑦᑕᖅᑎᑦ, ᐅᑭᐅᖃᖅᑐᑦ ᖁᓕᓂᑦ ᐅᖓᑖᓄᑦ ᐊᑐᖅᑕᐅᓂᐊᖅᐳᖅ.
"ᑕᐃᒪᓐᓇ ᐅᐱᓐᓇᖅᑐᒥᒃ ᖁᕕᐊᓇᖅᑐᒥᒃ ᐊᑐᕈᒪᕗᒍᑦ, ᑲᓇᑕᒥ− ᐅᓕᑉᐱᖕᒥᓘᓐᓃᑦ ᐅᔭᐅᑦᑕᕐᓂᐊᖏᑦᑐᒍᑦ, ᑕᒪᒃᑯᐊ ᐅᑭᐅᖅᑕᖅᑐᒥ ᐃᓕᖁᓯᑦ ᐊᑐᕐᓂᐊᕋᑉᑎᒍ.
“ᑕᒪᒃᑯᐊ ᓯᓐᓇᖅᑑᒪᕐᔪᐊᕈᑎᕗᑦ, ᓄᑕᖃᑦ ᐃᓕᓐᓂᐊᖅᑎᑕᐅᕗᑦ ᒫᓐᓇ ᐊᒃᓱᕈᑦᓯᐊᖅᖢᑎᒡᓗ, ᖁᕕᐊᓱᑦᓯᐊᖅᖢᑎᒡᓗ ᐃᓚᐅᔪᓐᓇᕐᓂᐊᕋᒥᒃ, ᑮᓇᐅᔭᓂᒡᓗ ᑲᑎᖅᓱᐃᓇᓱᐊᖅᐳᑦ ᐃᖃᐃᓕᓴᐅᑎᖃᖅᖢᑎᒃ, ᐱᓐᖒᖅᑎᑎᑉᓗᑎᒃ, ᓇᓚᐅᑦᓵᖅᑎᑦᓯᑉᓗᑎᒃ, ᓂᐅᕕᐊᒃᓴᖃᖅᑎᑦᓯᑉᓗᑎᒃ ᐊᒻᒪ ᖃᓄᑐᐃᓐᓇᖅ, ᑭᓯᐊᓂ ᐊᐃᑦᑖᖑᒐᓗᐊᖅᐳᖅ 22−ᖑᓂᐊᖅᖢᑎᒃ ᐱᖓᓱᑦ ᐃᓕᓐᓂᐊᖅᑎᑎᔨᖏᓪᓗ, ᑮᓇᐅᔭᓂᒃ ᐊᑐᕆᐊᖃᓪᓚᕆᖕᓂᐊᖅᐳᑦ.
“ᑕᐃᒪᓐᓇ ᓯᓐᓇᒃᑑᒪᕗᒍᑦ ᑕᐃᒪᑐᖅ ᐃᓄᐃᑦ ᐃᑲᔪᕐᓂᐊᖅᐳᑦ ᑮᓇᐅᔭᖃᖅᑎᑦᓯᓗᑎᒃ ᓯᓐᓇᒃᑑᒪᕗᑦ ᐊᑐᓪᓚᕆᖕᓂᐊᕋᑦᑎᒍ.”